RUNAS NINKU:

“Uj sorteo leyman jina kajtenqa, allillan kashan chaypi pujllanapaj fichasta rantikoyqa. Wakin sorteostaqa gobiernospuni wakichinku, chay tantakusqan qolqewantaj runasta yanapanku”, nispa.

BIBLIA NIN:

Bibliaqa mana ninchu qolqerayku pujllanaqa jucha kasqanta. Jinapis imatachus Dios chay jina pujllaykunamanta yuyasqanta reparachiwanchej.

Apuestajkuna chayri uj jatun premiota japʼinankupaj sorteosman yaykojkunaqa, wajkunaj qolqenkuta chʼawanku. Chaytaj Jesuspa nisqanwan churanakun. Pay nerqa: “Tukuy imata munapayaymantataj jarkʼakuychej”, nispa (Lucas 12:15). Runasqa qolqeta munapayasqankurayku apuestanku, chayri sorteosman yaykunku. Qolqerayku pujllachejkunaqa, runasta pʼajpakiyanku. Paykunaman ashkha qolqeta gananallankuta willanku, manataj pierdenankumanta parlankuchu. Runastaj qhapajyayta munasqankurayku, chay jina pujllaykunaman satʼikunku, ashkha qolqetataj tʼakanku. Qolqerayku pujllayqa qolqeta astawan munapayachiwanchej, qhella kaymantaj tanqawanchej.

Qolqerayku pujllaspaqa noqallanchejpi yuyanchej. Imaraykuchus wajkuna pierdejtinku gananchej. Bibliatajrí niwanchej: “Sapa uj maskʼallachunpuni wajkunaj allinninta, amataj paypa allinnillantaqa”, nispa (1 Corintios 10:24). Diospa kamachiykunasninmanta ujtaj kashan: ‘Ama runa masiykej ni imanta munapayankichu’ (Éxodo 20:17). Qolqerayku pujllajqa, pay ganananrayku wajkuna pierdenankuta munan.

Bibliaqa sutʼita nin, suertepi chayri chayman rijchʼakoj imaspi creenaqa mana allinchu kasqanta. Ñaupa tiempopi wakin israelitasqa, Diospi creenankumantaqa “Suerteta Qoj” diosta yupaychayta qallarerqanku. Jehová Diostajrí chay ruwasqankuta mana allinpajchu qhawarqa. Pay nerqa: “Qhawayniypi sajra imasllatapuni ruwarqankichej, imatachus millachikuni chaytapuni ruwarqankichej”, nispa (Isaías 65:11, 12).

Wakin suyuspeqa, sorteosta ruwana chayri chayman rijchʼakoj pujllaykunaqa leyman jina kashan. Gobiernostaj chaykunapi tantakusqan qolqewan, profesoresman paganku chayri waj jinasmanta runasta yanapanku. Jinapis chay qolqeqa, runas mana allin imasta ruwasqankumanta jamun. Imaraykuchus qolqerayku pujllayqa, runasta tanqan qolqeta munapayayman, paykunallapi yuyayman, qhella kaymantaj.

Ama runa masiykej ni imanta munapayankichu’ (Éxodo 20:17).

BIBLIA NIN:

“Qhapajyaytapuni munajkunarí, juchaman urmanku, trampasmantaj. Paykunaqa imaymana pierdechej mana allin munapayaykunawan chʼipaykuchikunku, chaywantaj mana allinman chayanku, tukuchisqataj kanku”, nispa (1 Timoteo 6:9). Runasqa qolqeta munapayasqankurayku sorteosman yaykunku, apuestasta ruwanku, waj jinasmantawan qolqerayku pujllanku. Qolqeta munapayayqa, mana allinman chayachiwanchej. Chayrayku Bibliaqa sutʼita nin, ama imatapis munapayananchejta (Efesios 5:3).

Qolqerayku pujllaspaqa facilta qolqeta japʼinchej. Chayrayku chayta ruwayqa, qolqeta munakunapaj tanqawanchej. Bibliatajrí niwanchej, “qolqeta munakoyqa tukuy imaymana sajra kajpa saphin” kasqanta. Ajinapunitaj, qolqeta munakuspaqa chaypa qhepallantaña rinchej. Qolqellamanta llakikuspataj, niña sumajtapis puñunchejchu, Diosmantapis karunchakusunman. Bibliaqa nin, qolqeta munapayajkunaqa ‘imaymana llakiykunata tarikusqankuta’ (1 Timoteo 6:10).

Chay jina runasqa qolqenku kajtinñapis astawan munallankupuni, ni jaykʼaj sajsakunkuchu, nitaj kusisqachu kausakunku. Chayrayku Eclesiastés 5:10 nin: “Qolqeta munakoj runaqa ni jaykʼaj contentakonqachu qolqellanwanqa, qhapajyayta munaj runapis ni jaykʼaj contentakonqachu ganasqallanwanqa”, nispa.

May chhika runas qolqerayku pujllayman yachaykakapunku, chayqa paykunapaj uj vicio jinaña. Estados Unidosllapiraj, may chhika runas qolqerayku pujllayta mana saqeyta atinkuchu.

Qolqeta munapayaj runasqa qhapajyayta atinkuman, pero mana Diospa bendicionninta japʼinkuchu. Chayta yachachiwanchej Proverbios 20:21. Chantapis qolqerayku pujllayman yachaykukojkunaqa, manuchaykukunku chayri ni imayoj rikhurinku. Jinallataj qolqenkuta, amigosninkuta, trabajonkuta, familiankutapis pierdenku. Bibliaj nisqanta kasukoyqa, tukuy chay llakiykunamanta librawanchej.

“Qhapajyaytapuni munajkunarí, juchaman urmanku, trampasmantaj. Paykunaqa imaymana pierdechej mana allin munapayaykunawan chʼipaykuchikunku, chaywantaj mana allinman chayanku, tukuchisqataj kanku” (1 Timoteo 6:9).