Chayta nerqanku uj grupo investigadores jallpʼanchejpi tiempo cambiasqanmanta parlashaspa. Dios kasqanpi, noqanchejmantataj llakikusqanpi creenki chayqa, chay nisqankoqa jallpʼanchejta sapallanmanta kutirikuyta atinanpaj jina ruwasqanpichá piensarichisunki.

Jinapis runas kay jallpʼata maytapuni pierdechisqankurayku, manaña sapallanmanta sumajta kutirikuyta atinchu. Jallpʼanchej mana chinkananpaj, chaypitaj kausay kanallanpajpuni, ¿imaraykutaj atienekusunman Dios imallatapis ruwananpi?

Kay urapi rikhurej textosqa sutʼita rikuchiwanchej jallpʼaqa mana chinkachisqachu kananta, chaypitaj kausay kanallantapuni.

• Dios jallpʼanchejta ruwarqa. “Qallariypeqa Dios ruwarqa cielotawan jallpʼatawan” (Génesis 1:1).

• Jallpʼanchejpa dueñonqa Dios. “Jallpʼapis, chaypi tukuy ima kajpis Jehová Diospata” (Salmo 24:1). a

• Diosqa jallpʼata ruwarqa ni jaykʼaj chinkananpaj jina. “Diosqa jallpʼata cimientosnin patapi sayachin. Chaymantataj wiñaypaj wiñaynintinpaj mana kuyuchisqachu kanqa” (Salmo 104:5).

• Diosqa niwanchej jallpʼapeqa kausay kanallantapuni. “Cheqa Diosqa, pichus jallpʼata rikhuricherqa, […] jallpʼataqa mana qhasipajchu ruwarqa, manachayqa runas tiyakunankupaj” (Isaías 45:18).

• Diosqa niwanchej jallpʼapeqa runas kanallankutapuni. “Cheqan runasqa kay jallpʼata herenciata jina japʼenqanku, kay jallpʼapitaj wiñaypaj kausakonqanku” (Salmo 37:29).

Diosqa jallpʼata ruwarqa runas chaypi kusisqas kausakunanchejpaj jina, nitaj pierdechinanchejpajchu. Bibliaj profeciasnin nisqanman jina, Jehová Diosqa manaña saqenqachu runas mana midirikuspa jallpʼata pierdechinankuta, maykʼajchus chayta ruwanantataj ninña (Apocalipsis 11:18).

Bibliaqa nin chayta ruwajtin Diosqa jallpʼata jampinanta, uj kʼachitu paraisoman tukuchinanta, chaymantataj makinta “kicharispa tukuy runasman, tukuy animalesmanpis munasqankuta” qonanta (Salmo 145:16).