Ruwanasninkuta juntʼaj runasqa, atienekunapaj jina kanku, ima ruwanata japʼispapis tiemponpi tukunku.

Wawaspis juchʼuymantapacha ruwanasta juntʼayta yachakunkuman. Tatasmanta parlaspa, uj libro nin: “Wawitasqa wata kurajniyojmantapacha wasipi ruwanaswan yanapakunkumanña. Wata khuskanniyojña kaspataj astawan yanapakuyta munanku. Wakin lugarespitaj tatasqa wawasninku phishqa watayojmanta, qanchis watayojkama kashajtinku yanapakuyta yachachinku. Chay edadmanta wawitasqa wasipi wakin ruwanasta sumajtaña ruwankuman”, nispa.

Wakin lugarespi jovenesqa tatasninkoj wasinmanta ripunku, problemaspi rikukuspataj tatasninkojpaman kutipunku. Chaytaj pasan tatas wawasninkuman mana qolqeta apaykachayta, wasipi ruwanasta chayri tareasninkuta juntʼayta mana yachachisqankurayku.

Chayrayku tatasqa wawasninkuta juchʼuymantapacha yachachinanku tiyan jatunña kaspa ruwanasninkuta juntʼanankupaj. Waj librotaj chaymanta parlaspa nin: “Tatasqa manachá munankumanchu wawasninku 18 watasniyoj kanankukama ni imata ruwayta yachanankuta, ni imata ruwayta yachasqankuraykutaj sufrinankuta”, nispa.

Wawasta wasipi ruwachiy

BIBLIA NIWANCHEJ: “Tukuy sonqo trabajasqamantaqa ashkhata ganakunchej”, nispa (Proverbios 14:23).

Juchʼuy wawitasqa, tatasninkuwan khuska ruwanasta ruwayta munanku. Ruwayta munajtinkoqa wasipi ruwaykunata ruwachina.

Wakin tatasqa mana saqenkuchu wawasninku wasipi ruwanasta ruwanankuta, ashkha tareasniyoj kasqankuta yuyaspa.

Chaywanpis wasipi ruwanaswan yanapakoj wawasqa, mejores alumnos kankuman. Imaraykuchus ruwanasta juntʼayman yachasqa kanku. Chantapis tatasmanta parlaj libropi nillantaj: “Mana saqesunchu wawas yanapakunankuta chayqa, tanqashasunman mana yanapakuyta yachanankupaj [...]. Wajkuna tukuy imata ruwapunankumantaj yachaykukonqanku”, nispa.

 Chay libro nisqanman jina, wawasman wasipi ruwanasta yachachejtinchejqa, wajkunata yanapariyta yachakonqanku, nitaj paykunallapichu yuyanqanku. Chantapis wasipi ruwanasta ruwaspaqa, reparanku familiankupaj munasqa kasqankuta, tataspa kamachisqankutapis juntʼanankuta.

Wawas pantajtinku ama socapanachu

BIBLIA NIWANCHEJ: “Yuyaychasqataqa uyariy, kʼamisqatapis japʼikuy; ajinamanta chayanki sumaj yachayniyoj kayman”, nispa (Proverbios 19:20).

Wawas wajpa imallantapis pʼakirpajtinkoqa ama socapanachu. Wawasqa imata ruwarpaspapis juchayoj kasqankuta reconoceyta atinku. Chayrayku wawasqa perdonta mañakunkuman, atispataj ichá pagapunkuman.

Paykuna juchayoj kasqankuta reconoceyqa wawasta yanapanman:

• mana llullakunankupaj, mana suwakunankupaj, mana qhellas kanankupajtaj

• mana wajkunata juchachanankupaj

• mana justificakunankupaj

• juchayoj kaspa perdonta mañakunankupaj