Pitapis sumajta rejsinapajqa, imastachus ruwasqanta, imaynatachus chaykunata juntʼasqanta ima yachana kanman. Diosninchejta sumajta rejsinapajpis, imastachus ruwasqanta yachananchej tiyan. Diosninchej imastachus unayña ruwasqanqa kunanña yanapashawanchej, aswan qhepamanpis yanapallawasuntaj. Chayta yachaspaqa mayta tʼukunki.

Jehová Diosqa tukuy imata ruwarqa. Imayna Dioschus kasqantaj, “paypa ruwasqasninpi sutʼi rikukun, runata rikhurichisqanmantapacha” (Romanos 1:20). “Paymin kay jallpʼataqa ruwarqa, paymin atiyninwan ruwarqa. Paymin kay jallpʼata yachayninwan sayacherqa. Paymin cielotapis allin yuyaywan mastʼarqa” (Jeremías 10:12). Jehová Diosqa tukuy imata may kʼachituta ruwaspa, mayta munakuwasqanchejta rikuchiwanchej.

Diosninchej “payman rijchʼakojta” ruwawasqanchejrayku, mana waj ruwasqasninwan kikinchu kanchej (Génesis 1:27). Chayrayku runasqa Diosman tumpata rijchʼakuyta atinchej kʼacha kaykunasninpi. Payqa yuyayninta, kamachiykunasnintawan entiendeyta atinanchejpaj jina ruwawarqanchej. Diosta kasukuspaqa aswan kusisqa kasun, nitaj qhasipajchu kausasun. Chantapis Diosqa payman qayllaykojta saqewanchej.

Diosninchejqa mayta munakuwasqanchejrayku, kay jallpʼata tukuy imayojta ruwarqa. Apóstol Pablo jinata nerqa: “Diosqa allin imasta ruwaspa qankunawan rejsichikorqa. Payqa cielomanta qankunapaj parachimun, ashkhata poqochin, mikhuna patapi uywasunkichej, sonqoykichejtataj kusiywan juntʼachin”, nispa (Hechos 14:17). Diosninchejqa jallpʼata ruwashaspa kausanapaj mana necesitasqanchej imasllatachu churapuwarqanchej, manaqa kusisqa kausakunanchejpaj tukuy imata churapuwarqanchej. Aswan qhepamantaj astawan ashkha imastaraj qowasun.

 Diosninchejqa kay jallpʼapi wiñaypaj kausananchejta munarqa. Bibliapi nin: “Jallpʼatataj runasman qorqa”, nispa. Chantá nillantaj: “Mana qhasipajchu ruwarqa, manachayqa runas tiyakunankupaj”, nispa (Salmo 115:16; Isaías 45:18). ¿Pikunataj kay jallpʼapi tiyakunanku karqa? Chantá, ¿mashkha unaytataj tiyakunanku karqa? Biblia nin: “Cheqan runasqa kay jallpʼata herenciata jina japʼenqanku, kay jallpʼapitaj wiñaypaj kausakonqanku”, nispa (Salmo 37:29).

Jehová Diosqa Adanta, Evatawan ruwaytawan, uj kʼachitu ‘huertaman churarqa llankʼanankupaj, qhawanankupajtaj’ (Génesis 2:8, 15). Chantá Diosqa paykunaman nerqa: “Miraychej, ashkhayaychejtaj. Jallpʼantinman juntʼaykuychej, tarpuychejtaj”, nispa (Génesis 1:28). Adanwan Evawanqa kay jallpʼapi kusisqas, wiñaypajtaj kausankuman karqa. Paykunatajrí Diosninchejta mana kasukorqankuchu, wiñay kausaytataj pierderqanku. Jinapis Diosninchejqa runas kay jallpʼapi wiñaypaj kausanankuta munallanpuni. Chaymantataj kunan yachakusun. Jinapis ñaupajtaqa, imatawanchus Diosninchej qowasqanchejta yachakusun.

Bibliaqa Diospa Palabran. ¿Imapajtaj Diosninchej Bibliata qowarqanchej? Astawanqa payta rejsinanchejpaj (Proverbios 2:1-5). Bibliaqa mana tukuy imatapunichu Diosmanta willawanchej. Ni mayqen libropis chayta willawasunmanchu (Eclesiastés 3:11). Jinapis Bibliapi tukuy ima nisqanqa, Diosta rejsinapaj yanapawanchej. Bibliapi wakin runasmanta leespaqa, imaynachus Dios kasqanta yachasunman. Yachallasunmantaj imayna runastachus pay allinpaj qhawasqanta (Salmo 15:1-5). Bibliaqa niwanchej imaynatachus Diosta yupaychananchejta, imaynatachus kausakunanchejta ima. Kapuyniyoj kananchejmanta imatachus yuyasqantapis willawanchej. Bibliaqa Diospa Wawan Jesucristomanta willallawanchejtaj. Payta sumajta rejsispa, Diosninchejta astawan rejsisunman (Juan 14:9).

Jehová Diosqa Palabranta qowanchej kusisqa kausananchejpaj, imapajchus kausasqanchejta yachananchejpaj ima. Jehová Diosqa Biblianejta yanapawanchej kusisqa familiayoj kanapaj, kapuwasqallanchejwan sonqo juntʼasqa kanapaj, mana anchata llakikunapaj ima. Ashkha runas yachayta munanku, imaraykuchus ashkha llakiykuna kasqanta, imaynachus kausay qhepaman kanantapis. Bibliatajrí chayta yachanapaj yanapawanchej. Bibliaqa sutʼinchallantaj imatachus Diosninchej munayninta juntʼananpaj ruwasqanta.

¿Imaraykutaj ninchej Biblia Diospa Palabranpuni kasqanta? Bibliataqa 40 runas qhelqarqanku, 1.600 wataspitaj. Jina kajtinpis tukuynin Bibliapi uj yachachiylla tiyan. Chaytaj rikuchiwanchej Diosmantapuni jamusqanta (2 Timoteo 3:16). Waj ñaupa librosmanta nisqaqa, Bibliaqa qallariypi qhelqakorqa jinallapuni kashan. Chaytataj ñaupa tiempomanta ashkha qhelqasqas sutʼita rikuchin. Chantapis Bibliata runas chinkachiyta munajtinkupis, kunankama kashallanpuni. Bibliaqa ni mayqen libro jina tukuy runasman chayashan, ashkha parlaykunapitaj ruwakushan. Biblia mana chinkasqanqa rikuchiwanchej ‘Diosninchejpa palabran wiñaypaj’ kasqanta (Isaías 40:8).

Yachakorqanchej jina, Diosninchejqa runas kay jallpʼapi wiñaypaj kausakunankuta munarqa. Jinapis Adanqa Diosta mana kasukuspa juchallikorqa. Chayrayku ni paypis, ni wawasninpis wiñaypaj kausayta aterqankuñachu. “Uj runanejta jucha kay mundoman yaykumorqa, juchanejtataj wañuy yaykumorqa. Ajinamanta wañoyqa tukuy runasman chayarqa, tukuyninku juchallikusqankurayku” (Romanos 5:12). Adán juchallikusqanrayku, ¿niñachu Diospa munaynin juntʼakunman karqa? Mana. ¿Imatá juntʼananpaj Dios ruwanman karqa?

Diosqa imaynachus kasqanman jina, chay chʼampayta allincharqa. Cheqan kajtapuni ruwasqanrayku, Adantawan Evatawan juchallikusqankuman jina castigarqa. Jinapis munakuyninrayku, imaynatachus wawasninkuta yanapananpi piensarerqa. May yachayniyoj kasqanraykutaj, imatachus ruwananta chay rato nerqa (Génesis 3:15). Juchamanta, wañuymantawan kacharichinawanchejpaj, Wawan Jesucristota kachamorqa.

 Jehovaqa Wawanta kay jallpʼaman kachamorqa wiñay kausayman pusanawanchejpaj, ‘kausaynintapis qonanpaj ashkha runasta kacharichinanpaj’. Ajinamanta Jehová Dios Adanpa rikhurichisqan chʼampayta allincharqa (Mateo 20:28; Juan 14:6). a Adanqa qallariypi mana juchasapachu karqa. Jesuspis manallataj juchayojchu karqa. Jinapis Adanmanta nisqaqa, wañupunan horakama Diosta kasukorqa. Chayrayku Jesús juchamanta kacharichiyta atiwarqanchej. Jesusqa mana juchayoj kasqanraykuchu wañorqa, chayrayku Diosninchej Jehová payta kausaricherqa cieloman kutipunanpaj. Jesús juchasninchejrayku wañusqanrayku, kasukoj runasqa wiñay kausayta japʼiyta atenqanku. Biblia nin: “Imaynatachus uj runa mana kasukusqanrayku ashkha runas juchayoj rikhurerqanku, ajinallatataj uj runa kasukusqanrayku ashkha runas cheqan runapaj qhawasqa kanqanku”, nispa (Romanos 5:19). Diosninchej Jehovaqa, Wawan Jesusta noqanchejrayku wañunanpaj kachamorqa, ajinamanta kay jallpʼapi wiñaypaj kausananchejpaj.

Jehová Diosninchej Adán rikhurichisqan problemasta imaynatachus allinchasqanqa, payta astawan rejsinapaj yanapawanchej. Jehová Diosqa munayninta “juntʼanqapuni”, ni ima paytaqa jarkʼayta atinmanchu (Isaías 55:11). Chantapis “kay jinamanta Diosqa munakuyninta rikuchiwarqanchej: Diosqa kʼata Wawanta kay mundoman kachamorqa paynejta kausayta japʼinanchejpaj. Kaymin munakoyqa: Diosqa Wawanta kachamorqa juchasninchejrayku jaywasqa kananpaj, ajinamanta Dioswan allinyakunanchejpaj. Payqa chayta ruwarqa munakuwasqanchejrayku, manataj noqanchej munakusqanchejraykuchu” (1 Juan 4:9, 10).

“Diosqa ni kikin Wawantapis ñakʼarinanmanta jarkʼakorqachu, astawanpis tukuyninchejrayku wañunanpaj jaywarqa”. Chayrayku yachanchej Diosqa “tukuy chay waj imastapis kusiywan qonawanchejta” (Romanos 8:32). Imatachus Diosninchej qoyta munawasqanchejta leerillaypuni.