• Diospa ajllasqan kanan karqa. ‘Ajllakusqay Reyta churaniña. Nacionesta herenciaykipaj, tukuy kay pachata kʼuchunkama qanpata kananpaj qosqayki’ (Salmo 2:6, 8).

• Davidpa reinonta japʼinan karqa. ‘Uj wawa nacepuwanchejña; Dios uj wawata qowanchej. Kamachisqanta, chantá allin kausayta qosqanpis manapuni tukukonqachu Davidpa reinonpi, jinallataj paypa reinonpipis. Kamachiynenqa sumaj sayasqa kanqa’ (Isaías 9:6, 7).

• Belenpi nacekunan karqa. ‘Qantajrí Belén, qanmantamin llojsenqa kamachejqa. Jatunchasqa kanqa kay pachaj kʼuchusninkama’ (Miqueas 5:2, 4).

• Qhesachasqa, wañuchisqataj kanan karqa. ‘Qhesacharqanku, manataj paytaqa munakuywan qhawarqanchejchu. Payqa tʼojsisqa karqa Diospa contranta oqharikusqanchejrayku. Juchanchejrayku tukuy cuerpon tʼunasqa karqa’ (Isaías 53:3, 5).

• Kausarichisqa, jatunchasqataj kanan karqa. ‘Mana wañusqastawan khuskachu saqerpariwanki, nitaj tʼaqakusqayki kaj wañojtin, asnaykojta saqenkichu. May jatun kusikuy tiyan ñaupaqeykipi; qanwanqa wiñaypaj sonqo qhallallariy tiyan’ (Salmo 16:10, 11).

Jesucristollapi imastachus Dios nisqan juntʼakorqa, payllataj sumaj Gobierno kanqa. Uj angelpis maman Mariaman nerqa: ‘Jehová Diostaj payta churanqa kamachinanpaj, tatan Davidta jina. Gobiernontaj mana tukukonqachu’, nispa (Lucas 1:31-33).

Jesusqa jallpʼapi kashaspa mana gobernarqarajchu. Astawanpis cielomantapacha Diospa Gobiernonpi Rey kashaspa jallpʼata gobernamonqa. Jesusqa uj sumaj Kamachej kanqa. Imastachus jallpʼapi kashaspa ruwasqanta qhawarina.

•   Jesusqa runasta yanaparqa. Jesusqa yanaparqa qharista, warmista, jovenesta, machitusta ima. Mana qhawarajchu maymantachus kasqankuta, nitaj wajchachus qhapajchus kasqankutapis (Mateo 9:36; Marcos 10:16). Uj lepra onqoyniyoj runa Jesusta nerqa: “Munankichus chayqa, atinki sanoyachiwayta”, nispa. Jesustaj chay runata khuyaspa sanoyacherqa (Marcos 1:40-42).

• Jesusqa yachacherqa imaynatachus Diosta kusichinata. Jesús nerqa: “Qankunaqa mana atinkichejchu ujllapi Diostawan qolqetawan sirviyta”, nispa. Chantá nillarqataj: “Imastachus munankichej runas qankunapaj ruwanankuta, chayllatataj qankunapis paykunapaj ruwapuychej”, nispa. Yachachillarqataj Diosqa mana ruwasqasnillanchejtachu qhawasqanta, manaqa imatachus yuyasqanchejta, imaschus sonqonchejpi kasqantapis. Chayrayku Diosta kusichinapajqa, tukuy imapi allinta qhawarikunanchej tiyan (Mateo 5:28; 6:24; 7:12). Jesusqa nillarqataj, kusisqa kausakuyta munaspaqa imatachus Dios ruwananchejta munasqanta yachanata, chayman jinataj kausakunata (Lucas 11:28).

• Jesusqa imaynatachus munakunata yachacherqa. Jesús imastachus nisqan, ruwasqan ima uyarejkunaj sonqonman chayarqa. Biblia nin: “Runasqa mayta tʼukorqanku chay jinata yachachisqanmanta. Payqa atiyniyoj jinapuni yachachisharqa”, nispa (Mateo 7:28, 29). Paykunamantaj kamacherqa: “Enemigosniykichejtaqa munakullaychejpuni”, nispa. Jesusqa wañupushaspaña, payta wañuchejkunapaj Tatanmanta mañakorqa: “Tatáy, paykunata perdonay. Mana yachankuchu imatachus ruwashasqankuta”, nispa (Mateo 5:44; Lucas 23:34).

Jesuslla sumaj wakichisqa kashan kay jallpʼata kamachimunanpaj. Payqa munakuwasqanchejrayku yanapayta munawanchej. Jinapis, ¿maykʼajtaj kamachiyta qallarenqa?