1. 1) ¿Imaynatá hermano Russell, uj grupo runaspiwan estudiaj kanku? 2) Ajinata estudiaspa, ¿imastataj entienderqanku?

KAY 1870 watapi, hermano Russell, compañerosninwan khuska, Diospa Palabranta estudianankupaj tantakuyta qallarerqanku. Chay juchʼuy grupo runasqa yachayta munarqanku, imatachus Biblia Jehová Diosmanta, Jesusmanta, wañusqasmanta, runa juchamanta kacharichisqa kasqanmanta ima yachachisqanta. Chaypajtaj kay jinata estudiaj kanku: Ujninku uj tapuyta ruwaj, chantataj tukuyninku chaymanta parlaj versiculosta maskʼaj kanku. Chantá imatachus entiendesqankuta anotakoj kanku. Chay cristianosqa Jehová Diospa yanapayninwan, Bibliaj ashkha yachachiykunasninta sutʼita entienderqanku. Chay yachachiykunataj kunankama yanapashawanchej.

2. ¿Imajtintaj Bibliaj profeciasninta mana entiendeyta atikullanchu?

² Bibliata estudiaj grupitoqa, repararqanku uj profeciata entiendeyqa, mana Bibliaj yachachiykunasninta entiendey jinachu kasqanta. ¿Imajtintaj Bibliaj profeciasninta mana entiendeyta atikullanchu? Imaraykuchus profeciastaqa, juntʼakushajtinraj chayri juntʼakusqanmanta qhepamanraj entiendenchej. Chantapis uj profeciata sumajta entiendenapajqa, chay profeciamanta tukuynin versiculosta estudiana tiyan. Uj cheqallata leesunman chayqa, chay profeciata pantasqata entiendesunman. Joel libromanta uj profeciawantaj, chaytasina ruwarqanchej. Chayrayku kunanqa chay profeciata watejmanta estudiasun, reparasuntaj waj jinamanta entiendenanchej kasqanta.

3, 4. ¿Imaynatataj Joel 2:7-9 versiculospi profeciata entiendej kanchej?

³ (Joel 2:7-9 leey). Profeta Joelqa, may chhika langostas Israelman juntʼaykunankuta nerqa. Chay langostaspata kirusninkoqa, quijadankupis leonpata jina karqa, tukuy chajrastataj mikhukapunanku karqa. Chay khurusqa Israel jallpʼata qʼarallata saqenanku karqa (Joel 1:4, 6). Ashkha watasta entienderqanchej,  chay profeciaqa mana saykʼuspa predicasqanchejwan ninakusqanta. ¿Imaraykutaj ajinata entiendej kanchej? Imaraykuchus Diospa llajtanqa, chay langostas jina jarkʼaykunata atipanku, predicallankupunitaj. Chantapis predicasqanchejwanqa, cristiano nichikoj iglesiaspa yupaychayninku mana allinchu kasqanta sutʼiman orqhonchej. *

⁴ Joel 2:7-9 versiculosllata leesunman chayqa, chay entiendesqanchejqa allillan kashanman. Jinapis chay profeciamanta parlaj tukuynin versiculosta leespaqa, waj jinamanta entiendenanchej kasqanta reparasun. Chayrayku qhepan parrafospi tawa imasta qhawarisun.

5, 6. 1) ¿Imapitaj Joel 2:20 piensarichiwanchej? 2) ¿Imapitaj Joel 2:25 piensarichiwanchej?

⁵ Ñaupaj kaj, Jehová Diosqa langostasmanta nerqa: “Wichaynejmanta jamoj langostastaqa karunchasaj qankunamanta”, nispa (Joel 2:20). Chay langostas Jehovaj testigosninwan ninakun chay, ¿imajtintaj Jehová Dios langostasta karunchananta chayri wijchʼunanta nin? Jehovaj testigosnenqa, Jesús kamachiwasqanchejrayku runasman Diosmanta willamunchej, yachachimunchejtaj (Eze. 33:7-9; Mat. 28:19, 20). Chantapis Jehová Diosqa, imaschus chayri pikunachus llajtanta ñakʼarichinku, chayllata wijchʼunman.

⁶ Iskay kaj, imatachus Joel 2:25 nisqanta qhawarina. Chaypi Jehová Dios nin: “Noqa waj watasta kutichipusqaykichej, pasaj wataspi pierderqankichej, chaypa cuentanmanta, maypachachus kachaykamorqaykichej langostastaqa, chajrasniykichejta tukuykunankupaj, chay tiempojpa cuentanmanta”, nispa. Kay versiculopi rikunchej jina, Jehová Diosqa israelitasman nerqa langostasrayku ‘pierdesqankuta kutichipunanta’. Ñaupajta entiendesqanchejman jina, langostasqa Diospa Gobiernonmanta willajkunawan ninakun. Jina kajtin, willasqanchej runasta ñakʼarichisqanta nishasunman. Jinapis willayninchejqa mana runasta ñakʼarichinchu, astawanpis sajra ruwayninkuta saqenankupaj yanapan. Ajinamanta willayninchejqa kausayninkuta salvan (Eze. 33:8, 19). Chaytaj may sumajpuni.

7. Joel 2:28, 29 versiculospi Jehová Dios “kay imas qhepata” nisqan, ¿imapitaj piensarichiwanchej?

⁷ (Joel 2:28, 29 leey). Kinsa kaj, Joelpa profecian imayna sukʼasqachus kasqanta qhawarina. Profeta Joel nisqanman jina, Jehová Diosqa langostasmanta parlayta tukuytawan nerqa: ‘Kay imas qhepata, espirituyta tʼakaykamusaj’, nispa. Chayqa niyta munan, Jehová Dios atiyninta tʼakaykamusqanta langostas llankʼayninkuta tukusqankutawanraj. Chay langostas noqanchejwan ninakun chay, ¿manachu nishasunman willayta tukusqanchejtawanraj Jehová Dios atiyninta qonawanchejta? Jinapis yachanchej jina, Jehová Dios atiyninta qowasqanchejrayku, unaytaña paymanta willashanchej. Chaytataj ruwashanchej runas churanakuwajtinchejpis chayri autoridades prohibiwajtinchejpis. Manachus Jehová Dios atiyninwan yanapawasunman chayqa, mana ajinata willasunmanchu karqa.

8. Apocalipsis 9:1-11 versiculospi rikhurej langostas, ¿pikunawantaj ninakunku? (Kay revistaj tapanpi fotosta qhawariy).

⁸ (Apocalipsis 9:1-11 leey). Tawa kaj, unayqa nej kanchej Joelpa profecianmanta langostaswan, Apocalipsis libropi rikhurej langostaswan ujlla kasqankuta. Chayrayku entienderqanchej, Joelpa profecian predicasqanchejwan ninakusqanta. Apocalipsis libroqa may  chhika langostasmanta parlan. Chay langostasqa runa uyasniyoj kanku, umasninkupitaj qori pillusniyoj jina kanku (Apo. 9:7). Paykunaqa “pikunajtachus frentesninkupi mana Diospa sellon kanchu”, chaykunata ñakʼarichinku, nisunman Diospa enemigosninta. Chaytataj ruwanku phishqa killata, uj langostaj kausasqan tiempota (Apo. 9:4, 5). Chay profeciaqa ajllasqa cristianosmanta parlashan. Imaraykuchus paykunaqa, Jehová Dios kay mundomanta sajra runasta chinkachinanta mana manchachikuspa willashanku. Chay willasqankutaj runasta mayta llakichin.

9. Joelpa profecianmanta langostas, ¿imaspitaj apóstol Juanpa rikusqan langostaswan mana kikinchu?

⁹ Joelpa profecianqa, Apocalipsis libropi kaj profeciawan wakin imaspi rijchʼakun. Jinapis ashkha imaspi mana kikinchu. Joelpa profecianmanta langostasqa, “tukuy chajrasta mikhukaporqanku” (Joel 1:4, 6, 7). Apóstol Juan rikusqan langostastaj, ‘kamachisqa kanku jallpʼapi kaj qʼomerkunata ama imananankupaj’ (Apo. 9:4). Joelpa profecianmanta langostasqa, ‘wichaynejmanta jamunku’ (Joel 2:20). Juanpa rikusqan langostastaj, ‘chinkay ukhumanta’ llojsimunku (Apo. 9:2, 3). Joelpa profecianmanta langostastaqa, Jehová Dios karuman wijchʼun. Juanpa rikusqan langostastataj mana wijchʼunchu. Astawanpis ruwanankuta juntʼanankuta saqen. Bibliataj ni maypi ninchu, Jehová Dios Apocalipsismanta langostasta mana allinpaj qhawasqanta (“ Langostasmanta  profecías: Rijchʼakuspapis mana kikinchu kanku” nisqa recuadrota leeriy).

10. 1) Joelpa profecianpi langostas, Apocalipsis libropi langostaswan, ¿ujllachu kasqanku? 2) ¿Imaynatataj wakin kikinchaykunata Bibliapi oqharikun?

¹⁰ Rikunchej jina, chay iskay profeciasqa ashkha imaspi mana kikinchu kanku. Chayrayku nisunman Joelpa profecianpi langostasqa, Apocalipsis libropi langostaswan mana ujllachu kasqankuta. Chantapis Bibliapeqa uj kikinchayta oqharikuyta yachan, iskaymanta chayri astawan imasmanta parlanapaj. Astawan entiendenapaj, imaynatachus “león” palabrata oqharikusqanta qhawarina. Apocalipsis 5:5 versiculopi “Judá ayllumanta Leonqa” nispa, Jesusmanta parlashan. 1 Pedro 5:8 versiculopitaj, “qhaparirishaj león” nispa, Satanasmanta parlashan. Joelpa profecianta watejmanta qhawarispaqa, reparanchej chay profeciata waj jinamanta entiendenanchej kasqanta. Qhepan parrafospi yachakusun, imaynatachus entiendenanchej kasqanta.

11. ¿Imaynatá Joel 1:6 chanta 2:1, 8, 11 versículos yanapawanchej Joelpa profecianta entiendenapaj?

¹¹ Joelpa profecianmanta tukuynin versiculosta qhawarispaqa, uj tropa soldados maqanakoj risqankumanta parlashasqanta entiendenchej (Joel 1:6; 2:1, 8, 11). Jehová Diosqa nerqa mana kasukoj israelitasta castigananpaj, may chhika langostasta kachaykunanta. Payqa chay langostas soldadosnin kasqankuta nerqa. Chaytaj Babiloniamanta soldadoswan ninakorqa (Joel 2:25). Chay langostasqa, nisunman Babiloniamanta soldadosqa, Israelman “wichaynejmanta” yaykunanku karqa (Joel 2:20). Chay soldadostaqa, sumaj wakichisqa may chhika langostaswan kikinchakun. Profeta Joeltaj paykunamanta nerqa: “Sapa ujpis ñannillanta rin. [...] Llajtaman yaykuykunku. Perqa patasta wasaykunku, wasi patastapis. Wasi ventananta suwas jina yaykuranku”, nispa (Joel 2:8, 9). Chay soldadosqa tukuynin llajtaman juntʼaykunanku karqa. Babiloniosmantaqa mana pipis pakakuyta, nitaj ayqeyta atinmanchu karqa.

12. ¿Imaynatá Joelpa profecian juntʼakorqa?

¹² Babiloniosqa caldeos nisqallataj kanku. Paykunataj langostas jinapuni Jerusalén llajtaman juntʼaykorqanku. Chaytaj karqa 607 watapi, Jesús niraj jamushajtin. Biblia nisqanman jina, caldeospa reyninkoqa “waynasta espadawan wañuchicherqa manataj khuyarqachu wayna runasta, nitaj sipas warmistapis, nitaj machu runastapis, nitaj allin achachistapis. Tata Diosqa tukuyninkuta paypa makisninman jaywaykorqa”. Bibliaqa babiloniosmanta nillanpuni: “Chay jawaqa Diospa Templontapis ruphaykucherqanku, Jerusalén llajtaj perqasnintataj thuñirarqanku. Tukuy jatuchaj wasismampis ninata japʼiykucherqanku. Chay valorniyoj kaj imastapis tukuyninta tʼunaykorqanku”, nispa (2 Cró. 36:17, 19). Babilonios Jerusalenta thuñisqankutawan, runasqa nerqanku: “Kay jallpʼaqa mana runasniyoj, mana uywasniyojtaj chʼin qhepakun, caldeospa makinkuman jaywaykusqa kasqanrayku”, nispa (Jer. 32:43).

13. ¿Imamantataj Jeremías 16:16, 18 parlashan?

¹³ Joel profecianta willasqanmanta 200 watasninman jina, Jehová Diosqa profeta Jeremiasnejta uj imatawan willarqa. Payqa nerqa Jerusalenman yaykoj soldados, sajra imasta ruwaj israelitasta maskʼanankuta, tukuyninkutataj japʼinankuta. Jehová Dios nerqa: “Kunanrí kachamusaj ashkha challwa japʼejkunata, challwasta jina israelitasta japʼinankupaj. Chantá kachamullasajtaj ashkha kʼita animalesta japʼejkunata tukuy orqospi, lomaspi, jinataj chhanka kʼajlluspipis israelitasta wañurachinankupaj. [...] Uj jinatawanraj tukuy  sajra ruwasqasninkumanta, jinataj juchasninkumantapis paykunata castigasaj”, nispa. Juchasninkumanta mana pesachikoj israelitasqa, babiloniosmanta manapuni ayqeyta atinkumanchu karqa (Jer. 16:16, 18).

14. ¿Maykʼajtaj Joel 2:28, 29 juntʼakorqa?

¹⁴ Joelqa allin imas kananta willallarqataj. Payqa nerqa Israelpi watejmanta tukuy ima poqonanta (Joel 2:23-26). Chaywanqa nisharqa, jamoj tiempopi Jehová Diospa yachachiynin may chhika kananta. Jehová Diosqa profeta Joelnejta nerqa: “Espirituyta jichʼarimusaj tukuy runasman. Qhari wawasniykichej, jinataj warmi wawasniykichejpis, Noqaj sutiypi parlanqanku. [...] Jinallataj wata runasman, qhari kajman, warmi kajmampis, jaqay pʼunchaykunapeqa Espirituyta juntʼachimusaj”, nispa (Joel 2:28, 29, Qheshwa Biblia). ¿Maykʼajtaj Jehová Dios espiritunta chayri atiyninta jichʼaykamorqa? ¿Israelitas Babiloniamanta kutinpusqankutawanchu chayta ruwarqa? Mana. Chaytaqa ashkha watasninmanraj ruwarqa, 33 watamanta Pentecostés pʼunchaypi. Qhepan parrafopi chaymanta astawan parlarisun.

15. Hechos 2:16, 17 nisqanman jina, ¿imatataj Pedro, Joelpa profecianmanta cambiarqa, chanta imatataj chay rikuchiwanchej?

¹⁵ Apóstol Pedroqa Jehová Diospa yanapayninwan nerqa, Joel 2:28, 29 Pentecostés pʼunchaypi juntʼakusqanta. Chay pʼunchayqa 120 runas uj wasipi tantasqa kasharqanku. Jehová Diostaj 9 de la mañanata jina, atiyninta chay runasman tʼakaykamorqa. Chay atiyta japʼejkunaqa, “Diospa may jatuchaj tʼukuna ruwasqasninmanta” parlayta qallarerqanku (Hech. 2:11). Apóstol Pedroqa, Joelpa profecianta oqharishaspa uj imata cambiarqa (Hechos 2:16, 17 leey). ¿Repararqankichu imatachus  cambiasqanta? Profeta Joelqa profecianta “kay imas qhepata” nispa qallarerqa. Pedrotajrí Joelpa profecianta ajinata oqharerqa: “Diosqa nin: Qhepa pʼunchaykunapeqa, atiyniyta qosaj tukuy laya runasman”, nispa. Pedroqa ‘qhepa pʼunchaykuna’ nispa, Jerusalenwan templonwan thuñikunan qayllamanta parlasharqa. Chaytaj rikuchiwanchej, Joelpa profecianqa tukuysitun ashkha watasninmanraj juntʼakusqanta.

16. 1) ¿Imatataj ñaupa cristianos ruwarqanku Diospa atiyninta japʼisqankutawan? 2) Dios atiyninwan yanapawasqanchejrayku, ¿imatataj kay tiempopi ruwashanchej?

¹⁶ Ñaupa cristianosqa Diospa atiyninta Pentecostespi japʼisqankutawan, sumaj willaykunata ni jaykʼaj jina willayta qallarerqanku. 61 wata chaynejta, apóstol Pabloqa colosensesman cartanpi nerqa: “Evangelioqa tukuy kay pachapi kajkunaman willakun”, nispa (Col. 1:23, Diosmanta Qhelqasqa). Kay tiempopipis, Jehová Diosqa willamunanchejpaj atiyninwan yanapashawanchej. Chayraykutaj astawan ashkha runasman willashanchej, nisunman kay “jallpʼaj kʼuchusninkama” (Hech. 13:47; “ ‘Espirituyta tʼakaykamusaj’” nisqa recuadrota leeriy).

17. ¿Imaynatá Joelpa profecianta kunan entiendenchej?

¹⁷ ¿Imataj cambian? Kunanqa Joel 2:7-9 versiculospi profeciata, aswan sutʼita entiendenchej. Chay profeciaqa mana tukuy sonqo predicasqanchejmantachu parlashan. Astawanpis Babiloniamanta soldados, Jerusalenman juntʼaykusqankumanta parlashan. Chaytaj karqa Jesús niraj jamushajtin, 607 watapi.

18. ¿Imataj kikillanpuni?

¹⁸ ¿Imataj kikillanpuni? Jehová Diospa llajtanqa sumaj willaykunata tukuynejpi willashan, tukuy imaymanamantataj (Mat. 24:14). Chay llankʼayta ruwananchejtaqa, ni mayqen gobiernopis jarkʼayta atiwasunchu. Jehová Dios bendeciwasqanchejrayku, Gobiernonmanta ni jaykʼaj jina willashanchej. Bibliaj profeciasninta entiendenapajqa, Jehová Diospa yanapanta mañakunallapuni. Paytaj maychus tiemponpi ‘cheqa kajta allinta entiendenapaj’ yanapawasun (Juan 16:13).