1. ¿Imastataj Jehová noqanchejpi qhawan?

JEHOVÁ DIOSQA llajtanmanta kajkunata mayta munakun. Chayta yachaytaj mayta kusichiwanchej (2 Cró. 2:11). Jehovaqa, noqanchejpi allin imastapuni qhawan. Yachantaj aswan kʼacha runasman tukuyta atisqanchejta. Chantapis payqa, amigosnin kananchejpaj yanapawanchej. Payta tukuy sonqo sirvillasunpuni chayqa, noqallanchejwanpuni kanqa (Juan 6:44).

2. ¿Imaraykutaj wakin hermanos mana creeyta atillankuchu, Jehová paykunata munakusqanta?

² Wakin hermanosqa ninkuman: “Yachani Jehová Diosqa hermanosta munakusqanta, jinapis ni creenichu noqata munakunawantaqa”, nispa. ¿Imaraykutaj wakin hermanos ajinata yuyankuman? Hermananchej Roxanamanta parlarina. * Payqa wawallaraj kashaspa mayta sufrerqa. Pay nin: “Bautizakusqaymanta, precursora kayta qallarisqaymanta ima mayta kusikorqani. Jinapis 15 watasninman jina, wawa kashaspa mayta sufrisqaymanta yuyarikorqani. Chayrayku yuyarqani Jehová niña allinpajchu qhawawasqanta, nitaj munakunawanpaj jinachu kasqayta”, nispa. Julia sutiyoj precursorapis, wawa kashaspa mayta sufrillarqataj. Pay nin: “Kausayniyta Jehovaman qoporqani payta kusichiyta munaspa. Jinapis yuyarqani ni jaykʼaj munakunawanta”, nispa.

3. ¿Ima tapuykunamantaj kay yachaqanapi kutichisun?

³ Ichá noqanchejpis, hermananchej Roxana jina, Julia jina, Jehová Diosta mayta munakunchej. Jinapis Jehová munakuwasqanchejtaqa, mana creeyta atillanchejchu. ¿Imajtintaj mayta kallpachakunanchej tiyan Jehová munakuwasqanchejmanta mana iskayrayanapaj? ¿Imatá ruwasunman Jehová munakuwasqanchejmanta iskayrayanchej chay? Kay yachaqanapi chay tapuykunaman kutichisun.

4. Jehová munakuwasqanchejmanta iskayrayasun chay, ¿imataj kanqa?

⁴ Jehová Dios munakuwasqanchejmanta mana iskayrayaspaqa, ima llakiypi kaspapis tukuy atisqanchejta payta sirvillasunpuni. Jinapis Jehovaj munakuyninmanta iskayrayasun chayqa, ‘kallpanchej pisiyanqa’ (Pro. 24:10). Chantapis Satanás urmachiyta munawajtinchej, mana jarkʼakuyta atillasunchu (Efe. 6:16).

5. Jehová munakuwasqanchejmanta iskayrayaj hermanos, ¿imatataj ninku?

⁵ Wakin hermanosqa mana creeyta atillankuchu, Jehová paykunata munakusqanta. Chayrayku creeyninku pisiyapun. Jaime sutiyoj anciano, nin: “Betelpi kasharqani, may kusisqataj waj parlaypi kaj congregacionpi yanapakusharqani. Jinapis nej kani ‘Jehová kay ruwasqayta, ¿allinpajchu qhawashanman? ¿Mañakusqaytapis uyarishawanmanchu?’”, nispa. Hermananchej Evaqa, Betelpi yanapakushan. Pay nin: “Jehová munakuwasqanchejmanta iskayrayaspaqa, manaña tukuy sonqochu imatapis paypaj ruwanchej. Niñataj kusisqachu sirvinchej”, nispa. Hermanonchej Miguelpis precursor regular, ancianotaj kashan. Pay nin: “Jehová munakuwasqanchejmanta iskayrayaspaqa, pisimanta pisi paymanta karunchakapusunman”, nispa.

6. Jehová munakuwasqanchejmanta iskayrayashanchej chay, ¿imastataj ruwasunman?

⁶ Hermanosninchej Jaime, Eva, Miguel imatachus nisqankoqa, reparachiwanchej Jehová munakuwasqanchejmanta iskayrayayqa, manapuni allinchu kasqanta. Chayrayku Jehová munakuwasqanchejmanta mana iskayrayanapaj, tukuy atisqanchejta kallpachakuna. Chantapis mana llakiyninchejwan atipachikunapaj, Jehovamanta mañakuna sonqonchejta tiyaykuchinanta. Ajinamanta payqa ‘sonqonchejta, yuyayninchejtawan waqaychanqa’ (Sal. 94:19; Fili. 4:6, 7). Chantapis ashkha hermanosninchej mayta kallpachakushanku, noqanchej jinallataj Jehová munakuwasqanchejmanta mana iskayrayanankupaj. Ñaupa tiempomanta Diospa wakin kamachisninpis, mayta kallpachakorqanku. Qhepan parrafospi, apóstol Pablomanta yachakusunchej.

7. ¿Imastaj Pablota llakicherqa?

⁷ Ashkha ruwanasniyoj kasqanchejrayku,  ichá wakin kutis yuyanchej mana tukuyninta ruwayta atinanchejta. Pablopis ajinallatataj yuyarqa. Pay nerqa “tukuy hermanosmanta” llakikusqanta (2 Cor. 11:23-28). Chantapis ichá sinchʼi onqosqa kasqanchejrayku, llakisqalla kashanchej. Pablopis ajinapi rikukorqa. Chayrayku nerqa: “Aychaypi khishkayoj jina kani”, nispa. Chayqa ichapis uj onqoy karqa, chaymantataj mayta sanoyapuyta munarqa (2 Cor. 12:7-10). Chantapis ichá llakikullanchejtaj pantasqasninchejmanta. Pablopis llakikullarqataj. Payqa mana cheqan kajta ruwayta atispa nerqa: “¡Ay, imanallasajtaj!”, nispa (Rom. 7:21-24).

8. ¿Imataj Pablota yanaparqa llakiykunasniyoj kaspapis Jehovata sirvinallanpajpuni?

⁸ Pabloqa ashkha llakiykunasniyoj kaspapis Jehovata sirvillarqapuni. ¿Imataj chaypaj yanaparqa? Payqa yacharqa pantaj runa kasqanta. Jinapis Jesús tukuy runasrayku kausayninta qosqanpi, sinchʼita creerqa. Chantapis sumajta yacharqa ‘pillapis Jesuspi creejqa, wiñay kausayniyoj kananta’ (Juan 3:16; Rom. 6:23). Pabloqa manapuni iskayrayarqachu, Jesús runasrayku kausayninta qosqanmanta. Payqa yacharqa juchasninchejmanta arrepientekojtinchej, Jehová perdonayta munawasqanchejta (Sal. 86:5).

9. ¿Imatataj Gálatas 2:20 versiculopi Pabloj nisqanmanta yachakunchej?

⁹ Pabloqa Jehová Dios payta munakusqanmanta mana iskayrayarqachu. Imaraykuchus yacharqa Jehová Dios Wawanta payrayku wañunanpaj kachamusqanta. Chayrayku Pabloqa Gálatas 2:20 (leey) versiculoj tukukuyninpi nerqa: ‘Diospa Wawan munakuwarqa, noqaraykutaj kausayninta qorqa’, nispa. Pabloqa niraj cristiano kashaspa mana allin imasta ruwasqanrayku niyta atinman karqa: “Yachani Jehová hermanosniyta munakusqanta, jinapis noqataqa nipuni munakuwanmanchu”, nispa. Chayta ninanmantaqa, Romamanta hermanosman nerqa: “Cristorí juchasapasllaraj kashajtinchej noqanchejrayku wañorqa”, nispa (Rom. 5:8). Jehová Diosqa maytapuni munakuwanchej.

10. ¿Imatataj Romanos 8:38, 39 versiculosmanta yachakusunman?

¹⁰ (Romanos 8:38, 39 leey). Pabloqa nipuni iskayrayarqachu Jehová munakuwasqanchejmanta. Pay nerqa: ‘Ni imapis tʼaqayta atiwasunmanchu Diospa munakuyninmantaqa’, nispa. Pabloqa yacharqa, Jehová Dios israelitaswan mayta pacienciakusqanta. Yachallarqataj Jehová paymanta mayta khuyakusqanta. Chayrayku Pabloqa waj parlaypi kayta  nisharqa: “Jehová Diosqa Wawanta noqarayku wañunanpaj kachamorqa. Chaypi reparani Jehovaqa maytapuni munakuwasqanta” (Rom. 8:32).

11. Pablo ñaupa kausayninpi mana allin imasta ruwaspapis, ¿imaraykutaj mana iskayrayarqachu Jehová payta mayta munakusqanmanta?

¹¹ (1 Timoteo 1:12-15 leey). Pabloqa niraj cristiano kashaspa imastachus ruwasqanmanta, wakin kutis maytachá llakikoj. Pay nerqa: ‘Juchasapasmantaqa noqa aswan juchasaparaj kani’, nispa. Pabloqa niraj cristianoman tukushaspa, cristianosta ashkha llajtaspi qhatiykacharqa. Payqa wakin cristianosta carcelman wisqʼaracherqa, wakinta wañuchisqankutapis allinpaj qhawarqa (Hech. 26:10, 11). Pabloqa cristianoña kaspa, ichapis rejserqa wañuchicherqa chay cristianospa wawasninkuta. Chayrayku imastachus ñaupajpi ruwasqasninmanta maytachá llakikorqa. Jinapis niña imatapis ruwayta aterqachu. Astawanpis Jesús payrayku wañusqanmanta mana iskayrayananpaj kallpachakorqa. Chayrayku nerqa: “Diospa jatun khuyakuyninrayku apóstol kani”, nispa (1 Cor. 15:3, 10). ¿Imatá yachakunchej? Cristo sapa ujninchejrayku wañusqanmanta mana iskayrayanata, paypa wañuyninnejtataj Jehovaman qayllaykuyta atisqanchejta (Hech. 3:19). Ichapis niraj testigos kashaspa chayri testigos kaspaña mana allin imasta ruwarqanchej. Jinapis Jehovaqa mana chaytachu qhawan. Payqa qhawan imatachus kunan ruwashasqanchejta, chayri imatachus aswan qhepaman ruwasun, chayta (Isa. 1:18). 

12. Kay 1 Juan 3:19, 20 nisqanman jina, ¿imatataj ruwananchej kanman ni imapaj valesqanchejta yuyaspa?

¹² Pantaj runas kasqanchejrayku, ichá wakin kutisqa yuyasunman ni imapaj valesqanchejta, chayri ni pí munakunawanchejpaj jina kasqanchejta (1 Juan 3:19, 20 leey). Chayrayku  ichá yuyasunman Jesús noqanchejrayku wañojtinpis, mana perdonasqa kayta atinanchejta. Maykʼajllapis ajinata yuyaspaqa, ‘Diosqa sonqonchejmanta aswan kuraj’ kasqanta yuyarikuna. Jehovaqa mayta munakuwanchej, perdonawanchejtaj. Chaymanta mana iskayrayanapaj, tukuy atisqanchejta kallpachakuna. ¿Imatá chaypaj ruwasunman? Bibliata sapa día estudiana, mana saykʼuspa Diosmanta mañakuna, hermanosninchejmantataj ama karunchakunachu. Qhepan parrafospi qhawarisun, imaraykuchus chay kinsa imasta ruwananchejpuni kasqanta.

13. ¿Imaynatataj Bibliata estudiay yanapawanchej? (“ Diospa Palabranwan yanapachikunku” nisqa recuadrota leeriy).

¹³ Sapa día Diospa Palabranta estudiana. Chayta ruwaspaqa, Jehovata astawan rejsisun, mayta munakuwasqanchejtataj reparasun. Sapa día Bibliata estudiasqanchejpi tʼukurisun chayqa, yuyayninchejpi, sonqonchejpi kaj imasta astawan cheqanchasun (2 Tim. 3:16). Kevin sutiyoj ancianomanta parlarina. Payqa mana pisipaj qhawakunanpaj mayta kallpachakorqa. Pay nin: “103 Salmota leererqani, chaypitaj tʼukurerqani. Chaytaj yanapawarqa mana pisipaj qhawakunaypaj, Jehová imaynatachus qhawawasqanta reparanaypaj ima”, nispa. Hermananchej Evamanta ujtawan parlarina. Pay nin: “Sapa tarde tʼukurini imaynatachus Jehová Dios qhawawasqanpi. Chaytaj yanapawan sonqo tiyasqa kanaypaj, sinchʼi creeyniyoj kanaypaj ima”, nispa.

14. ¿Imaynatá yanapawanchej Diosmanta mana saykʼuspa mañakuy?

¹⁴ Diosmanta mana saykʼuspa mañakuna (1 Tes. 5:17). Sumaj amigosqa, ni imata pakanakuspa sapa kuti parlarikunku. Jehovawanpis ajinallatataj ruwasunman. Payman willarikusunman imaynachus kashasqanchejta, imatachus yuyasqanchejta, imachus llakichiwasqanchejtapis. Ajinamanta rikuchisun paypi atienekusqanchejta, munakuwasqanchejmanta mana iskayrayasqanchejtataj (Sal. 94:17-19; 1 Juan 5:14, 15). Hermananchej Juliamanta ujtawan parlarina. Pay nillanpuni: “Orakushaspaqa Jehovaman tukuy imata willakuni, manataj chay día imastachus ruwasqallaytachu. Jehovata uj patronta jina qhawanaymantaqa, wawasninta munakoj kʼacha tatata jina qhawayta qallarerqani”, nispa (“ ¿Estudiarqankichu?” nisqa recuadrota leeriy).

15. ¿Imajtintaj ninchej Jehová sapa ujninchejmanta llakikusqanta?

¹⁵ Ama hermanosninchejmanta karunchakunachu. Paykunaqa Jehová Diosmanta uj sumaj regalo jina kanku (Sant. 1:17). Jehová Diosqa, paykunata familianchej kanankupaj qowanchej. Paykunataj tukuy tiempo munakuwanchej. Ajinamanta Jehovaqa, sapa ujninchejmanta  llakikusqanta rikuchiwanchej (Pro. 17:17). Pabloqa colosensesman qhelqasqan cartanpi, wakin cristianospa sutisninkuta oqharerqa. Payqa nerqa chay cristianos mayta yanapasqankuta, sonqochasqankutataj (Col. 4:10, 11). Jesustapis amigosnin, ángeles ima yanapallarqankutaj. Chaymantataj payqa mayta agradecekorqa (Luc. 22:28, 43).

16. ¿Imaynatá hermanosninchej yanapawanchej Jehovaman qayllaykunapaj?

¹⁶ Hermanoswan yanapachikuna. Diosta yupaychaypi sinchʼi sayasqa hermanoman, imachus llakichiwasqanchejta willarikuna. Chayta ruwaspaqa mana pisi creeyniyoj kasqanchejtachu rikuchishanchej, manaqa yanaparichikuyta munasqanchejta. Hermano Jaimemanta parlarinallapuni. Pay nin: “Congregacionpi sinchʼi sayasqa hermanoswan amigos kasqayqa, maytapuni yanapawan. Llakisqa kashaspaqa, paykunaman llakiyniyta willarikuni. Paykunataj pacienciawan uyariwanku, mayta munakuwasqankutataj niwanku. Ajinamanta reparani Jehová Diosqa mayta munakuwasqanta”, nispa. Congregacionpi amigosniyoj kayqa may sumajpuni.

17, 18. ¿Imaraykutaj Jehovata uyarinanchej tiyan?

¹⁷ Satanasqa mana munanchu allin kajta ruwananchejta. Payqa creechiyta munawanchej, Jehová mana munakuwasqanchejta, nitaj salvanawanchejpaj jinachu kasqanchejta. Jinapis kay yachaqanapi yachakunchej jina, chayqa mana jinachu.

¹⁸ Jehovaqa mayta munakuwanchej, sapa ujtataj may valorniyojpaj qhawawanchej. Payta kasukullasunpuni chayqa, Jesús jina munakuynillanpipuni kasun (Juan 15:10). Chayrayku ama Satanasta uyarinachu, nitaj sonqonchejwan chʼaukiyachikunachu. Astawanpis Jehová Diosta uyarina. Payqa sapa ujninchejpi, allin kaj imasta qhawan. Jehovaqa llajtanta, nisunman sapa ujninchejta mayta munakuwanchej.