1. ¿Imata ruwananchejtataj Jehová munan?

 CASADOSQA maytapuni kusikunku wawitanku nacekojtin. Pero wawitankuta mayta munakojtinkupis, nichá munankumanchu wawitallapuni kananta. Mana wiñajtenqa maytachá llakikunkuman. Kikillantataj Jehovapis mayta kusikun paymanta yachakuyta qallarejtinchej, jinapis mana munanchu ‘wawitasllapuni’ kananchejta (1 Cor. 3:1). Astawanpis munan “wiñay tukusqa” cristianosman tukunanchejta (1 Cor. 14:20).

2. ¿Ima tapuykunamantaj kay yachaqanapi kutichisun?

² Kay yachaqanapi kay tapuykunasman kutichisun: ¿Ima niytá munan wiñay tukusqa cristiano kay? ¿Imatá ruwananchej tiyan wiñay tukusqa cristianoman tukunapaj? Bibliapi khamuna mikhuna jina kaj yachachiykunata, ¿imaraykutaj estudiananchejpuni tiyan? ¿Imaraykutaj mana yuyananchejchu tiyan wiñay tukusqa cristianoña kaspa manaña kallpachakunanchejchu kasqanta?

¿IMA NIYTÁ MUNAN WIÑAY TUKUSQA CRISTIANO KAY?

3. ¿Ima niytá munan wiñay tukusqa cristiano kay?

³ Bibliapeqa wiñay tukusqa cristianomanta parlaspa, mana edadmantapunichu parlashan. Griego parlaypi “wiñay tukusqa” palabra rikhurejtin niyta munallanmantaj “juntʼa” kasqanta, “ni imantaj” faltasqanta (1 Cor. 2:6). a Imaynatachus uj wawita  wiñan, ajinallatataj noqanchejpis Jehovaman qayllaykunapaj wiñanallanchejpuni tiyan, ajinamanta wiñay tukusqa cristianoman tukunchej. ¿Chay ninayanchu wiñay tukusqa cristianokamalla kallpachakunanchej kasqanta? Mana. Astawanqa ñauparinallanchejpuni tiyan (1 Tim. 4:15). Chaywanpis, ¿imaynapí yachasunman uj hermano jovenllaraj kajtinpis, chayri kurajña kajtinpis, wiñay tukusqa cristianoña kasqanta?

4. ¿Imaynataj kanku wiñay tukusqa cristianos?

⁴ Wiñay tukusqa cristianosqa, Jehovaj tukuy kamachiykunasninta kasukunku, nitaj imachus payman allin rijchʼan chaykunallatachu. Wakin imaspi pantajtinkupis, kallpachakunku Jehová munasqanman jina yuyanankupaj, ruwanankupajpis, chaytaj sutʼi reparay. Paykunaqa mosoj runa kaywan pʼachallikunku, kallpachakunkutaj astawan astawan Jehová jina yuyanankupaj (Efe. 4:22-24). Chantapis Jehovaj kamachiykunasninman jina, yuyaychaykunasninman jinataj sumajta ajllayta yachanku. Chayrayku imatachus ruwanankuta yachanankupajqa, mana Diospa kamachiykunasninmanta uj listatachu necesitanku. Imatapis ruwanankuta nikuspataj, chayta ruwanankupaj kallpachakunku (1 Cor. 9:26, 27).

5. ¿Imataj pasanman mana wiñay tukusqa cristianoswan? (Efesios 4:14, 15).

⁵ Pikunachus mana wiñay tukusqa cristianosrajchu kanku chaykunatajrí, chʼaukiyaj runaswan engañachikullankuman. Noqanchejmanta llullasta parlasqankuta, Diospa contranta oqharikojkunaj nisqankutapis creellankuman (Efesios 4:14, 15 leey). b Ichapis wajkunamanta envidiakunkuman, churanakoj runastaj kankuman, chayri usqhayllata phiñarpakunkuman, juchamanpis facilta urmankuman (1 Cor. 3:3).

6. ¿Imaynatá uj hermano wiñay tukusqa cristianoman tukun? Kikinchariy (fotostawan qhawariy).

⁶ Rikunchej jina Bibliaqa wiñay tukusqa cristianoman tukuyta, uj wawitaj wiñasqanwan kikinchan. Uj wawitaqa ashkha imasta mana yachanchu, chayrayku kuraj runata necesitan cuidananpaj, qhawarinanpajtaj. Uj mamaqa wawitanta makinmanta japʼispa calleta pasachin. Wawitan wiñasqanman jinataj, sapallantaña calleta pasananta saqen, jinapis  yuyarichillanpuni tukuy ladosta qhawarikuspa pasananta. Jatunña kajtintaj, wawanqa sapallanmantaña cuidakuyta atin. Cristianoswanpis ajinallataj. Manaraj wiñay tukusqa cristianoschu kajkunaqa, ashkha kutispi necesitanku wiñay tukusqa cristianos yanapanankuta. Ajinamanta ni ima Jehovamanta karunchachinanpaj, allin kajtataj ajllanankupaj. Wiñay tukusqa cristianostajrí, Bibliaj yuyaychaykunasninpiraj piensarinku imatachus Jehová yuyasqanta yachanankupaj, allintataj ajllanankupaj.

7. Wiñay tukusqa cristianos, ¿wajkunaj yanapayninkuta necesitankuchu?

⁷ ¿Chay niyta munanchu wiñay tukusqa cristianos ni pejpa yanapayninta necesitasqankuta? Mana. Wakin kutisqa paykunapis yanapata necesitankupuni. Pero pichus manaraj wiñay tukusqa cristianochu kajqa, suyanraj wajkuna ninankuta imatachus ruwananta, imatachus ajllanantapis. Uj wiñay tukusqa cristianotajrí, sumaj yachayniyoj kajkunawan, sumajta yuyaycharejkunawan yanapachikun. Chaywanpis yachan “sapa uj ruwananta juntʼanan kasqanta” (Gál. 6:5).

8. ¿Imaraykutaj nisunman mana tukuy wiñay tukusqa cristianoschu kikin kasqankuta?

⁸ Imaynatachus wiñay tukusqa runasqa mana tukuychu kikinkamalla kanku, ajinallatataj wiñay tukusqa cristianospis mana tukuychu kikin kʼacha kaykunasniyoj kanku. Wakenqa sumaj yachayniyoj kanku, wakintaj mana manchikunkuchu, wakintaj qorikuyta yachanku, wakintaj wajkunapaj sonqoyoj kanku. Chantapis wiñay tukusqa cristianosqa wakin imasmanta, astawanraj concienciaman jina kajtin, mana kikintapunichu yuyankuman, pero ni mayqenninku Bibliaj nisqanta pʼakishankumanchu. Chayrayku ni mayqenninku qhawaranakonqankuchu, manaqa iskayninku kallpachakonqanku ujchasqallapuni kanankupaj (Rom. 14:10; 1 Cor. 1:10).

¿IMATÁ RUWASUNMAN WIÑAY TUKUSQA CRISTIANOMAN TUKUNAPAJ?

9. ¿Jinallamantachu wiñay tukusqa cristianoman tukuyta atinchej?

⁹ Uj wawitaqa sapallanmanta wiñay tukusqa runaman tukun tiempo pasasqanman jina. Wiñay tukusqa cristianoman tukuytajrí mana jinallamantachu. Por ejemplo, Corintomanta hermanosqa sumaj willaykunata japʼikorqanku, bautizakorqanku, espíritu santota japʼerqanku, ashkha imastataj apóstol Pablomanta yachakorqanku (Hech. 18:8-11). Jinapis wakenqa bautizakusqankumanta ashkha watasña pasajtinpis, nirajpuni wiñay tukusqa cristianosman tukorqankuchu (1 Cor. 3:2). ¿Imatá ruwasunman mana ajinapi rikukunapaj?

10. ¿Imatá ruwananchej tiyan wiñay tukusqa cristianoman tukunapaj? (Judas 20).

¹⁰ Wiñay tukusqa cristianosman tukunapaj, ñaupajtaqa chayta ruwayta munananchej tiyan. Wawas jinallapuni kayta munajkunaqa ni jaykʼaj ñaupariyta atenqankuchu (Pro. 1:22). Wakin runasqa wiñay tukusqaña kaspapis mana sapallankumantachu imatapis ruwanku, suyankuraj tatasninku ninanta imatachus ruwanankuta. Noqanchejtajrí mana paykuna jina kayta munasunmanchu, astawanpis tukuy atisqanchejta ruwayta munanchej astawan Jehovaman kʼaskaykunapaj (Judas 20 leey). Sichus reparakunki niraj wiñay tukusqa cristianochu kasqaykita chayqa, Jehovamanta mañakuy ‘ruwayta munanaykipaj, ruwayta atinaykipaj’ yanapasunanta (Fili. 2:13).

11. ¿Ima yanapastataj Jehová qowanchej wiñay tukusqa cristianosman tukunapaj? (Efesios 4:11-13).

¹¹ Jehovaqa mana suyanchu sapallanchejmanta wiñay tukusqa cristianoman tukunanchejta. Payqa congregacionpi michejkunata, yachachejkunata churapuwanchej, paykunataj yanapawanchej “wiñay tukusqa runas kananchejpaj, imaynachus Cristo kasqanman jina”  (Efesios 4:11-13 leey). Chantapis espíritu santonta qowanchej, chaytaj yanapawanchej “Cristoj yuyaynin kapunawanchejpaj” (1 Cor. 2:14-16). Chantapis payqa qhelqacherqa tawa evangeliosta, chaytaj yanapawanchej kay jallpʼapi kashaspa imastachus Jesús ruwasqanta sumajta yachanapaj. Sichus Jesús jina yuyasun, parlasun, ruwasuntaj chayqa, wiñay tukusqa cristianoman tukuyta atisun.

KHAMUNA MIKHUNATA NECESITANCHEJ

12. ¿Imataj ‘Cristomanta qallariy yachachiykuna’ kanku?

¹² Wiñay tukusqa cristianoman tukunapajqa, mana ‘Cristomanta qallariy yachachiykunallatachu’ yachananchej tiyan. Chaykunamanta wakenqa kanku arrepientekuy, creey, bautismo, kausarimuy ima (Heb. 6:1, 2). Chay yachachiykunataqa tukuy cristianos rejsinanchej tiyan. Chayrayku apóstol Pedroqa Pentecostés Fiestapi ashkha runasman predicashaspa chaymanta parlarqa (Hech. 2:32-35, 38). Cristoj discipulosnin kayta munanchej chayqa, chay yachachiykunata japʼikunanchejpuni tiyan. Pabloqa nerqa kausarimuy kananpi mana creespaqa, mana cheqa cristianoschu kasqanchejta (1 Cor. 15:12-14). Chayrayku wiñay tukusqa cristiano kanapajqa, mana qallariy yachachiykunasllawanchu qhepakunanchej tiyan.

13. Khamuna mikhunawan yanapachikunapaj, ¿imatá ruwasunman? (Hebreos 5:14; fototawan qhawariy).

¹³ Mana qallariy yachachiykunallachu kapuwanchej, waj yachachiykunapis kapullawanchejtaj, chaytaj khamuna mikhuna jina. Chay mikhunaqa mana Jehovaj leyesnillanchu, manachayqa yuyaychaykunasninpis. Chaytaj yanapawanchej imaynatachus Diosninchej yuyasqanta entiendenapaj. Chaywan yanapachikunapajtaj Bibliata estudiananchej tiyan, chaypitaj tʼukurinanchej tiyan, kallpachakunanchejtaj tiyan yachakusqanchejman jina ruwanapaj. Ajinamanta Jehovata kusichinapaj jinapuni imatapis ajllayta yachakusun (Hebreos 5:14 leey). c

14. ¿Imaynatá Pablo corintiosta yanaparqa wiñay tukusqa cristianosman tukunankupaj?

¹⁴ Mana wiñay tukusqa cristianosrajchu kanku chaykunaqa, imatapis ajllanankupaj Bibliapi mana uj kamachiyta tarinkuchu chayqa, mana atillankuchu allin kajta ajllayta. Ajinapi rikukuspa ichá wakenqa yuyankuman  munasqankuman jinalla ruwananku kasqanta. Wakenqa ichapis mañakunkuman uj kamachiyta chaypaj churanankuta, mana chay kamachiy necesitakushajtinpis. Corintomanta cristianosqa Pablotasina nerqanku uj kamachiyta churananta, santosman jaywasqa mikhunata mikhunankutachus manachus yachanankupaj. Pabloqa mana nerqachu imatachus ruwanankuta, astawanpis sutʼincharqa sapa uj concienciankuman jina “imatachus ruwayta” ajllanankuta. Chantapis paykunata yanapananpaj Bibliaj ashkha yuyaychaykunasninta oqharerqa, chayman jina allinta ajllanankupaj, ajinamanta sonqonku mana juchachananpaj, nitaj ni pita pantachinankupaj (1 Cor. 8:4, 7-9). Ajinamanta yanapasharqa wiñay tukusqa cristianosman tukunankupaj. Chaywanqa wakichisqa kankuman karqa sapallankumanta reparayta yachanankupaj, nitaj wajkunatarajchu tapukushanankupaj, chayri uj kamachiy kanantarajchu suyanankupaj.

15. ¿Imaynatá Pablo hebreo cristianosta yanaparqa Jehovaman astawan qayllaykunankupaj?

¹⁵ Waj sumaj yachachiyta tarillanchejtaj Pablo hebreo cristianosman qhelqasqanpi. Paykunamanta wakenqa manaña kallpachakusharqankuchu Jehovaman astawan qayllaykunankupaj. Chayrayku paykunaman nerqa: “Watejmantataj lechellapajraj kankichej, manataj khamuna mikhunapajchu”, nispa (Heb. 5:12). Jehovaqa congregacionnejta mosoj imasta yachachisharqa, paykunataj mana chayta yachakusharqankuchu, nitaj japʼikusharqankuchu (Pro. 4:18). Ashkha judío cristianosqa nishallarqankupuni Moisespa Leyninta kasukunallankupuni kasqanta, Cristoj wañuynin chay Leyta tukuchisqanmanta 30 watasña pasajtinpis (Rom. 10:4; Tito 1:10). Chay chhika wataspeqa chayta entiendenankuña karqa. Pabloqa chay cartapi aswan ukhu yachachiykunata paykunaman yachacherqa, yanapaytataj munarqa chayta japʼikunankupaj. Chay cristianosqa chay yachachiykunatapuni khamuna mikhunata jina necesitasharqanku. Ajinamanta entiendenankupaj Jehovata waj jinamanta yupaychashasqankoqa aswan sumaj kasqanta. Chantapis judíos churanakojtinkupis mana manchachikuspa predicanallankupajpuni (Heb. 10:19-23).

KALLPACHAKUNALLAPUNI

16. Wiñay tukusqa cristianoña kaspapis, ¿imatá ruwanallanchejpuni tiyan?

¹⁶ Mana wiñay tukusqa cristianos kanallapajchu kallpachakunanchej tiyan, manaqa ajinallapuni kanapajpis. Chayrayku ama yuyanachu  wiñay tukusqa cristianoña kaspaqa, manaña kallpachakunanchejchu kasqanta (1 Cor. 10:12). Sapa kuti qhawarikunallanchejpuni tiyan ñauparishasqanchejtachus manachus (2 Cor. 13:5).

17. ¿Imatá yachachiwanchej Colosensesman Cartapi imatachus Pablo nisqan?

¹⁷ Pabloqa Colosensesman Cartapi nillarqataj wiñay tukusqa cristianoman tukunapaj kallpachakuna kasqanta, wiñay tukusqa cristianollapuni kanapajpis kallpachakunallataj kasqanta. Paykunaqa wiñay tukusqa cristianosña karqanku, jinapis paykunaman nerqa allinta qhawarikunankuta mana kay mundomanta runaj yuyayninkuwan engañachikunankupaj (Col. 2:6-10). Epafrasqa paykunata sumajta rejsisqanrayku, Diosmanta mañapojpuni “wiñay tukusqa runas jina sinchʼita” sayanankupaj, nisunman wiñay tukusqa cristianosllapuni kanankupaj (Col. 4:12). ¿Imatá chay yachachiwanchej? Pablowan Epafraswanqa sumajta yacharqanku wiñay tukusqa cristianollapuni kanapajqa kallpachakuna kasqanta, Jehovaj yanapaynintataj necesitasqanchejta. Paykunaqa munarqanku Colosasmanta hermanos wiñay tukusqa cristianos jinallapuni kanankuta llakiykunapi rikukuspapis.

18. ¿Imataj pasanman uj wiñay tukusqa cristianowan? (Fototawan qhawariy).

¹⁸ Pabloqa hebreo cristianosman nerqa uj wiñay tukusqa cristianoqa Diosmanta karunchakuyta atisqanta, Diostaj niña ni jaykʼaj allinpajchu qhawananta. Sonqon rumiyajtin Jehovamanta maytapuni karunchakusqanrayku, niña arrepientekunmanchu, nitaj Jehovaj perdonninta tarinmanñachu. Hebreostaj manaraj ajinapichu rikukusharqanku (Heb. 6:4-9). Kay tiempopipis wakenqa chiriyaporqanku, wakintaj congregacionmanta qharqochikorqanku, tiemponmantaj arrepientekorqanku. Paykunaqa kʼumuykukoj sonqowan arrepientekusqankurayku, mana Pablo parlarqa chay runas jinachu kasqankuta rikuchinku. Chaywanpis Jehovaman kutinpuspaqa yanapayninta necesitanku (Eze. 34:15, 16). Chayrayku ichapis ancianosqa, uj wiñay tukusqa hermanota ninkuman payta yanaparinanta, Jehovawan watejmanta masichakunanpaj.

19. ¿Imata ruwanapajtaj kallpachakunanchej tiyan?

¹⁹ Wiñay tukusqa cristiano kanapaj kallpachakushanchej chayqa, siga kallpachakunallapuni. Khamuna mikhunata mikhunallapuni, sapa diataj yachakunallapuni Jehová jina piensayta. Wiñay tukusqa cristianoña kaspataj, tukuy imata ruwana ajinallapuni kanapaj.