1. 1) ¿Imamantá parlashanchej paraisopi jinaña kasqanchejta nispa? 2) Chaypiña kaspa, ¿imatataj mana ruwayta munanchejchu?

 KAY tiempopeqa kay jallpʼapi paraíso jina tiyan, chaypitaj ashkha runas allin kajta ruwaspa ocupasqa kashanku. Chay paraisopeqa may chhika runas, sonqo tiyasqas kausakunku, ni imaraykutaj chaymanta llojsipuyta munankuchu. Munankutaj may chhika runas chayman yaykunankuta. ¿Imataj chay paraíso? Maypichus Jehovata yupaychanchej chay. Chaypeqa Jehovawan, payta sirvej runaswanpis sumaj amigos kanchej. Chayrayku uj paraisopi jinaña kanchej.

2. ¿Imaraykutaj tʼukunapaj jinapuni kay tiempopi paraisopi jinaña kasqanchej?

² Kay mundoqa chejnikuymanta, sajra ruwaykunamanta juntʼa kashan, manchikunapaj jinataj. Chay chaupipi kausakojtinchejpis, Jehovaqa paraisota jina rikhurichipuwanchej chaypi sonqo tiyasqa kausakunapaj. Chaytaj tʼukunapaj jinapuni (1 Juan 5:19; Apo. 12:12). Jehovaqa yachan Satanaspa mundonqa runasta mayta sufrichisqanta. Kamachisnintataj mayta munakuwasqanchejrayku uj kʼachitu lugarmanpis pusawasunman jina. Chaypitaj Jehovata kusisqa sirviyta atinchej, paraisopi jinañataj kanchej. Diospa Palabrantaj nin chayqa ‘pakakunapaj jina’ kasqanta, “sumaj qarpasqa” huerta jinataj kasqanta (Isa. 4:6; 58:11). Kay jina llakiy tiempospi tiyakuspapis, chay paraisopi kajkunaqa Jehová bendeciwasqanchejrayku may kusisqa kashanchej, sumaj jarkʼasqastaj (Isa. 54:14; 2 Tim. 3:1).

3. ¿Maykʼajtaj Isaías 65 capítulo ñaupaj kutirayku juntʼakorqa?

³ Isaías 65 capitulopi, Jehovaqa profeta Isaiasnejta nerqa chay paraisopi imaynachus kausay kananta. Chay nisqantaj ñaupaj kutirayku 537 watapi juntʼakorqa Jesús niraj jamushajtin. Chay tiempopi, arrepientekoj judiosqa kacharichisqa karqanku Babiloniamanta, jallpʼankumantaj kutiporqanku.  Jerusalenqa qʼala thuñisqa kasharqa. Jehovataj llajtanta bendicerqa, yanaparqataj watejmanta sayarichinankupaj. Ajinamanta uj kʼachitu llajtaman watejmanta tukucherqanku. Chantapis templota watejmanta sayaricherqanku, Israelpi watejmanta Jehovallata yupaychanankupaj (Isa. 51:11; Zac. 8:3).

4. Isaías 65 capitulopi nisqan, ¿imaynatataj kay tiempopi juntʼakushan?

⁴ Isaiaspa nisqanqa 1919 watapi juntʼakuyta qallarillarqataj, chay karqa iskay kaj juntʼakuynin. Chay watapi Jehovaj kamachisnenqa Jatun Babiloniamanta kacharichisqa karqanku. Chay kutimantapacha chay paraisonchejqa jallpʼantinman chayashan. Diospa Gobiernonmanta sonqo kʼajaywan willajkunaqa, ashkha congregacionesta rikhuricherqanku. Ñaupajtaqa may chhika qharis, warmis ima sajra runas karqanku, khuchi kausayniyoj karqanku, Jehovata rejsispataj cambiarqanku, “mosoj runa kaywantaj” pʼachallikorqanku, “mayqenchus Diospa munayninman jina ruwasqa karqa chaywan” (Efe. 4:24). Isaiasqa ashkha bendicionesta japʼinanchejmanta parlarqa, chaykunataj kay jallpʼanchej paraisoman tukojtin tukuynin juntʼakonqa. Chaywanpis kunanña sumaj bendicionesta japʼishanchej. ¿Imaynatataj kunan yanapawanchej paraisopi jinaña kasqanchej? ¿Imajtintaj mana chaymanta ni jaykʼaj llojsipunanchejchu tiyan? Chayta qhawarina.

¿IMA BENDICIONESTATAJ JAPʼINCHEJ?

5. Isaías 65:13 nisqanman jina, ¿ima bendicionestataj japʼinchej paraisopi jinaña kasqanchejrayku?

⁵ Sumaj mikhusqa, sumaj kallpachasqa kanchej. Isaiasqa sutʼincharqa paraisopi jinaña kasqanchejrayku imaynachus kausayninchej kasqanta, mana chaypichu kajkunaj kausayninkutaj mana ajinachu kasqanta (Isaías 65:13 leey). Jehovaqa kamachisninman tukuy ima necesitasqankuta qon paypa qayllallanpipuni kanankupaj. Payqa qowanchej espíritu santonta, Palabranta, ashkha yachachiykunatapis. Chayta ‘mikhurikunchej, ujyarikunchej, kusirikunchejtaj’ (Apocalipsis 22:17, kikinchay). Mana chay paraisopichu kajkunatajrí mana ajinachu kanku. Paykunaqa ‘yarqhaymanta, chʼakiymanta, pʼenqaymanta’ ima wañunku, mana Diosta rejsisqankurayku (Amós 8:11).

6. 1) ¿Ima mikhunasmantataj Joel 2:21-24 versículos parlan? 2) ¿Imawantaj chaykuna ninakunku, chanta imaynatataj yanapawanchej?

⁶ Joelqa ujnin profecianpi nerqa Jehovaqa llajtanman tukuy ima necesitasqankuta qonanta: trigota, vinota, aceite de olivatapis (Joel 2:21-24). Nitaj chayllatachu qonanta nisharqa, manaqa creeyninkuta kallpachanankupajpis tukuy ima necesitasqankuta qonallantataj nisharqa. Kay tiempopipis payqa qowanchej Bibliata, publicacionesninchejta, Internetpi paginanchejta, reunionesta, asambleastapis. Chayta sapa día sumajta mikhusqanchejraykutaj aswan sanitos kanchej, kallpachasqastaj.

7. ¿Imaraykutaj ‘sonqonchej tʼikarin’? (Isaías 65:14).

⁷ May kusisqas, sonqo juntʼasqastaj kanchej. Cristianosqa tukuy sonqo Diosta agradecekusqanchejrayku ‘kusiywan qhaparinchej’ (Isaías 65:14 leey). ¿Imaraykutaj ‘sonqonchej tʼikarin’? Diospa Palabranpi cheqa yachachiykunata tarisqanchejrayku, nisqasnintaj mayta kallpachawasqanchejrayku. Chantapis Jesús kausayninta qosqanrayku uj sumaj suyakuyniyoj kanchej. Tukuy chay imasmanta hermanosninchejwan parlarispa mayta kusikunchej (Sal. 34:8; 133:1-3).

8. Paraisopi jinaña kasqanchejrayku, ¿ima iskay imastaj sutʼi reparay?

⁸ Paraisopi jinaña kasqanchejrayku iskay imas sutʼi reparay. Diospa llajtanpi kaspaqa ujchasqa kanchej, munanakunchejtaj. Chay munakoyqa runasta “sumajta ujchan”, chaytaj rikuchiwanchej jallpʼanchej uj paraisoman tukojtin imaynachus kausay kananta. Chaypeqa kunanmanta nisqa astawan munanakusunchej,  aswan ujchasqastaj kasunchej (Col. 3:14). Uj hermana willariwanchej Jehovaj testigosninta rejsispa mayta tʼukusqanta. Pay nin: “Ñaupajtaqa mana kusisqachu karqani, ni familiaywanpis kusisqachu karqani. Runas munanakusqankutaqa testigos ukhullapi ñaupaj kutirayku rikorqani”, nispa. Pikunachus kusisqas, sonqo juntʼasqa kausakuyta munanku chaykunaqa, chay paraisoman yaykunanku tiyan. Runas noqanchejmanta imata nejtinkupis, Jehovaj ñaupaqenpi, tukuynin familianpa ñaupaqenpipis sumaj sutiyoj kanchej, nisunman sumajpaj qhawasqa kanchej (Isa. 65:15).

9. ¿Imataj llakiykunasninchejwan kanqa? (Isaías 65:16, 17).

⁹ Sonqo tiyasqastaj kusisqastaj kanchej. Isaías 65:14 versiculopi, mana chay paraisopi kayta munajkunamanta nin: “Qankunataj sonqo nanasqa kasqaykichejrayku qhaparikunkichej, manchay llakisqa kasqaykichejrayku waqankichej”, nispa. Diospa kamachisninrí, ¿ajinallapitajchu rikukunku? Paykunata llakichej imaswan, ¿imataj kanqa? Jehová nin: “Ñaupa tiempomanta llakiykunaqa qonqasqa kanqa, chaykunataqa manaña ñawisniy rikonqachu”, nispa (Isaías 65:16, 17 leey). Payqa tukuy problemasninchejta chinkachenqa, tiempowantaj llakiykunasninchejta qonqasqata qonqachiwasun.

10. ¿Imaraykutaj niwaj hermanosninchejwan kay uj sumaj bendición kasqanta? (Fototawan qhawariy).

¹⁰ Tantakuykunasninchejpi kaspa kunanña sonqo tiyasqas, kusisqastaj kanchej. Reunionesninchejpi kaspaqa llakiykunasninchejmanta qonqapunchej. Chay paraisonchej ajina kʼachitullapuni kananpaj, ¿imaynatá yanapakusunman? Espiritoj poqoyninta kausayninchejpi rikuchispa. Chaykunaqa kanku “munakuyniyoj kay, kusikuyniyoj kay, sonqo tiyaykusqa kay, […] kʼacha sonqoyoj kay, kʼacha kay” ima (Gál. 5:22, 23). Diospa llajtanpi kayqa sumaj bendicionpuni. Chay paraisomanta mana llojsipusunchu chayqa, aswan qhepamanqa Diospa tukuy nisqasnin juntʼakusqanta rikusunchej. Payqa nin “mosoj cielota, mosoj jallpʼatawan” ruwananta.

11. ¿Imaynataj kanchej paraisopi jinaña kasqanchejrayku? (Isaías 65:18, 19).

¹¹ Agradecekunchej, sonqonchejtaj kʼajarin. Isaiasqa nin imaraykuchus chay paraisopi kaspa may kusisqa kasqanchejta. Chay paraisotaqa Jehová rikhurichipuwarqanchej (Isaías 65:18, 19 leey). Chayraykuchá Diosqa niwanchej kay mundopi kaj organizacionesmanta llojsipunankupaj runasta yanapananchejta. Chay organizacionesqa chʼin jallpʼas jina kanku, congregaciontaj tukuy imayoj uj kʼachitu lugar jina.  Diosta rejsisqanchejmanta maytapuni kusikunchej. Chayrayku chay bendicionesmanta wajkunaman willariyta munanchej (Jer. 31:12).

12.¿Imaynataj sientekunki Isaías 65:20-24 versiculosta leespa, chanta imaraykutaj?

¹² Paraisonchejmanta mayta agradecekunchej, maytataj kusikunchej suyakuyninchejmanta. Kay jallpʼanchej uj kʼachitu paraíso kajtintaj, aswan sumaj imastaraj rikusunchej, tukuy imatataj ruwayta atisunchej. Biblia nin: “Chaypeqa wawasqa manaña uj mashkha diasllatachu kausakonqanku, nitaj machituspis manaraj wañunankupi wañonqankuchu”. Runasqa “wasista ruwakonqanku, chaypitaj tiyakonqanku, uva huertasta churanqanku, poqoynintapis mikhonqanku”. Jehová bendecisqanraykutaj “mana qhasipajchu sinchʼita trabajanqanku”. Diosqa nin kausayninku mana qhasillachu kananta, ni imamanta manchachikunankuta, sonqo juntʼasqastaj kausakunankuta. Pay nillantaj: “Niraj qhaparikamushajtinku, kutichimusajña”, nispa. Chayqa niyta munan imatachus necesitasqankuta Dios yachanantaña, tukuymantaj “munasqankuta” qonanta (Isa. 65:20-24; Sal. 145:16).

13. Isaías 65:25 versiculopi nisqanman jina, ¿ima cambiostataj ruwananchej tiyan Jehovata sirvinapaj?

¹³ Allinta kausakunchej, nitaj ni imata manchikunchejchu. Espíritu santoj yanapayninwanqa ashkha sajra runas mayta cambiarqanku (Isaías 65:25 leey). Paykunaqa phiña animales jina karqanku, mansoyaporqankutaj (Rom. 12:2; Efe. 4:22-24). Pero Diosta rejsispañapis pantaj runasllapuni kanchej, chayrayku pantanchejpuni. Chaywanpis Jehovaqa “tukuy laya runasta” ujchan munanakunankupaj, allintataj kausakunankupaj. Chay ruwasqantaj uj milagropuni (Tito 2:11). Chaytaqa tukuy atiyniyoj Diosnillanchej ruwayta atin.

14. ¿Imaynatataj Isaías 65:25 uj hermanopi juntʼakorqa?

¹⁴ Uj runa, ¿caracterninta cambiayta atinmanchu? Arí. 20 watasniyoj uj jovenmanta parlarina. Payqa manchay sajra runa karqa, millay kausayniyojtaj, ashkha kutistataj carcelpi karqa autosta, waj imastawan suwakusqanrayku. Chantapis piwanpis maqanakuytapuni munaj. Jinallapi Bibliamanta yachakuyta qallarisqa, tantakuykunamanpis riyta qallarisqa. Chaypitaj reparasqa uj sumaj imata tarisqanta: Jehovata yupaychasqanchejrayku paraisopi jinaña kashasqanchejta. Bautizakuytawantaj ashkha kutispi yuyarikorqa Isaías 65:25 paypi juntʼakusqanta. Payqa león jina kashaspa corderitoman jina mansoyaporqa.

15. ¿Imaraykutaj runasta yanapayta munanchej Diospa llajtanman yaykumunankupaj, chanta imaynatá chayta ruwanchej?

¹⁵ Isaías 65:13 versiculopi kay jinata nispa qallarin: “Tukuyta Kamachej Señor Jehová Diosqa nin”. 25 versiculotaj kay jinata nispa tukuchan: “Nispa nin Jehová Diosqa”. Diospa nisqasnenqa juntʼakunpuni (Isa. 55:10, 11). Kunanña uj paraisopi jina kashanchej. Jehová hermanosninchejta uj familiata jina churapuwanchej. Chayrayku kay sajra mundopi tiyakuspapis, hermanosninchejwan khuska kaspaqa uj kʼachitu lugarpi jina kanchej, chaypitaj sonqo tiyasqa, jarkʼasqastaj sientekunchej (Sal. 72:7). Chay tukuy imasrayku ashkha runasta yanapayta munanchej Diospa llajtanman yaykumunankupaj. ¿Imaynamanta? Runasta Jesuspa discipulosninman tukuchispa (Mat. 28:19, 20).

RUNASTA YANAPANA DIOSPA LLAJTANMAN YAYKUMUNANKUPAJ

16. ¿Imaraykutaj runas Diospa llajtanman yaykumuyta munanku?

¹⁶ Diospa llajtanpi kaspaqa uj paraisopi jinaña kanchej. Chayman ashkha runas yaykumuyta munanankupajtaj, tukuy yanapakuyta atinchej. ¿Imaynamanta? Jehová jina ruwaspa.  Payqa mana tukuytachu munajta mana munajta llajtanman yaykuchiyta munan, manaqa runasta kʼachamanta payman pusamun (Jer. 31:3; Juan 6:44). Pikunachus Jehovamanta yachakunku, allin sonqoyojtaj kanku chaykunaqa, Jehová imaynachus kasqanta yachakuspa payman qayllaykuyta munanku. Noqanchejrí, ¿imatá ruwasunman runas Diospa llajtanman yaykumuyta munanankupaj?

17. ¿Imatá ruwasunman runas Diospa llajtanman yaykumuyta munanankupaj?

¹⁷ Hermanosninchejta munakusun, paykunawantaj kʼachas kasun chayqa, runasqa chayta rikuspa Diospa llajtanman yaykumuyta munanqanku. Runas ñaupaj kutirayku tantakuyninchejman jamojtinku, munanchej ñaupa tiempomanta Corinto congregacionman rerqanku chaykuna jina ninankuta. Paykunaqa reunionman rispasina kay jinata nerqanku: “Diosqa qankunawanpuni kashan”, nispa (1 Cor. 14:24, 25; Zac. 8:23). Chayrayku kay yuyaychayman jina ruwananchej tiyan: “Qankunapura allinta kausakuychej” (1 Tes. 5:13).

18 ¿Imataj runasta yanapanman Diospa llajtanman yaykumuyta munanankupaj?

¹⁸ Chantapis kallpachakunanchej tiyan hermanosninchejta Jehová jina qhawanapaj. Chayrayku mana pantasqasnillankutachu qhawananchej tiyan, manaqa kʼacha kaykunasninkutapis. Paraisopeqa niña pantaj runaschu kanqanku. Pillawanpis phiñanakunchej chayqa, munakuy yanapawasun allinyakapunapaj. Chaypajtaj kay yuyaychayta kasukuna tiyan: “Ujkuna ujkunawan kʼachas, may khuyakuyniyojtaj kaychej. Tukuy sonqo purajmanta perdonanakuychej” (Efe. 4:32). Runasqa chayta rikuspa paraisonchejman yaykumuyta munanqanku. a

 AMA PARAISONCHEJMANTA LLOJSIPUNACHU

19. 1) ¿Imatá nerqanku paraisonchejman kutinpoj hermanos? (“ Llojsipuspapis kutinporqanku” nisqa recuadrota qhawariy). 2) ¿Imatataj ruwayta munananchej tiyan? (Dibujotawan qhawariy).

¹⁹ Maytapuni agradecekunchej paraisopi jinaña kasqanchejmanta. Chay paraisonchejqa aswan kʼachituñapuni, ni jaykʼaj jinataj may chhika runas chaypi kashanchej Jehovata sirvispa. Jehovaman agradecekunapuni chay paraisota rikhurichipuwasqanchejmanta. Pikunachus kallpachasqas, kusisqas, sonqo tiyasqas, jarkʼasqas sientekuyta munanku chaykunaqa, chay paraisoman yaykunanku tiyan, ni jaykʼajtaj chaymanta llojsipunankuchu tiyan. Chayrayku sumajta qhawarikunanchej tiyan. Satanasqa engañayta munawanchej, chay paraisomantataj orqhoyta munawanchej (1 Ped. 5:8; Apo. 12:9). Amapuni gustonta qonachu. Tukuy atisqanchejta yanapakunallapuni chay paraisonchej kʼachitullapuni, llimphitullapuni kananpaj, sumaj kausaypis kanallanpajpuni.