1. ¿Imatataj Jehová Dios tukuyman qowasqanchej?

JEHOVÁ DIOSQA niraj imatapis ruwashaspa sapallan kasharqa. Chaywanpis tukuyman kausayta qowarqanchej jinallataj angelesmanpis. Kusikuyniyoj Dios kasqanraykutaj kusiywan tukuy ima allin kaj regalota qowanchej (1 Tim. 1:11; Sant. 1:17). Jehová Diosqa pay jina kusikunanchejta munasqanrayku, qorikuyta yachachiwanchej (Rom. 1:20).

2. ¿Michʼas kanapajchu Jehová Dios ruwawasqanchej?

² Jehová Diosqa rijchʼayninman jina ruwawarqanchej (Gén. 1:27). Chayrayku pay jina, runaswan kʼachas kayta atinchej. Kusisqa kanapaj, bendecinawanchejpajtaj Jehová Dios jina qorikuyta yachananchej tiyan. Chayrayku wajkunaj allinninta maskʼanapaj kallpachakuna, mana michʼakuspataj imallatapis wajkunaman qorina (Fili. 2:3, 4; Sant. 1:5). Jehová Diosqa mana michʼas kanapajchu ruwawarqanchej. Chayrayku pantaj runas kaspapis Jehová Dios jina wajkunaman imatapis qoriyta atinchej.

3. ¿Imatataj qhepan parrafospi yachakusunchej?

³ Qhepan parrafospeqa, yachakusunchej imatachus Biblia nisqanta wajkunaman qorinamanta. Yachakullasuntaj imajtinchus  Diosninchej kusikusqanta wajkunata khuyakojtinchej. Chantapis yachakusunchej tukuy sonqo predicamunapaj khuyakuna kasqanta. Yachakullasuntaj imaraykuchus mana michʼakunachu kasqanta.

4. ¿Munanchu Jehová Dios kusisqa kananchejta?

⁴ Jehová Diosqa pay jina qorikoj kananchejta munan. Chayrayku wajkunaman imallatapis qorejtinchejqa mayta kusikun (Efe. 5:1). Munantaj noqanchejpis kusisqa kananchejta. Chayrayku kusikunapaj jina ruwawarqanchej, tukuy imatataj sumaj yachayninwan kʼachituta ruwarqa sonqo juntʼasqa kananchejpaj (Sal. 104:24; 139:13-16). Wajkunaj allinninkuta maskʼaspaqa Jehová Diosta mayta kusichinchej.

5. ¿Imatataj Jesusmanta yachakusunman?

⁵ Jesusmantapis wajkunata khuyakuyta yachakusunman. Pay nerqa: “Mana sirvichikojchu jamuni, manachayqa sirvej, kausayniytataj qosaj ashkha runasta kacharichinaypaj”, nispa (Mat. 20:28). Apóstol Pablotaj cristianosman nerqa: ‘Imayna yuyaychus Cristo Jesuspi karqa, chay yuyayllataj qankunapipis kachun. Payqa tukuy kapuyninta saqerqa, esclavo jinataj karqa’, nispa (Fili. 2:5, 7). Jesús jina ruwanapaj allin kanman piensarinanchej wajkunarayku imatachus ruwayta atisqanchejpi (1 Pedro 2:21 leey).

6. ¿Imatataj kʼacha samaritanomanta yachakusunman? (18 paginapi dibujota qhawariy).

⁶ Jehová Diostaqa kusichisunman pay jina, Jesús jinataj ruwaspa. Paykuna jinataj ruwasunman wajkunaj allinninkuta maskʼaspa, wajkunata tukuy imaymanamanta yanapaspa ima. Chayta astawan entiendenapaj imatachus Jesús uj judío runaman kutichisqanmanta yachakuna. Chay judío Jesusta taporqa. “¿Pitaj chanta runa masiyri?”, nispa. Jesustaj chayta kutichinanpaj kʼacha samaritanomanta parlaspa sutʼincharqa. Runasmantaj nerqa chay kʼacha samaritano jina tukuy runasta khuyakunanku kasqanta maymanta kajtinkupis (Lucas 10:29-37 leey). Noqanchejpis chay kikinchaymanta yachakunchej Jehová Diosta kusichinapajqa wajkunata khuyakunapuni kasqanta.

7. ¿Imatataj rikuchinchej mana michʼas kaspa?

⁷ Mana michʼakuspaqa Satanás llulla kasqanta rikuchinchej. Imajtinchus Satanasqa Edén huertapi Adanman Evamanwan nerqa aswan kusisqa kanankuta Jehová Diosta mana kasukojtinku, munaynillankutataj ruwajtinku. Evataj munaynillanta ruwayta munasqanrayku Dios jina kayta munarqa. Adanpis munaynillanta ruwayta munasqanrayku Diosta kasukunanmantaqa Evata kasukorqa (Gén. 3:4-6). Munaynillankuta ruwasqankuraykutaj wañorqanku. Chayqa sutʼita reparachiwanchej munaynillanchejta ruwaspaqa, mana kusisqachu kayta atisqanchejta. Chayrayku mana michʼas kaspaqa rikuchinchej Jehová Diospa munayninta ruwaspalla kusisqa kayta atisqanchejta.

8. Adanwan Evawan niraj juchallikushajtinku, ¿imaspitaj allin kanman karqa piensarinanku?

⁸ Adanwan Evawanqa niraj juchallikushajtinku, allin kanman karqa wawasninkupi piensarinanku. Imajtinchus Jehová Diosqa paykunaman nerqa: “Miraychej, kay pachaman juntʼaychej”, nispa (Gén. 1:28). Arí, Diosqa munarqa wawasniyoj kanankuta. Munallarqataj wawasninkuwan kay mundota uj  paraisoman tukuchispa, kusisqa kausakunankuta. Adanwan Evawanqa chaypi piensarinanku karqa. Ajinamanta wawasninkoj allinninkuta maskʼankuman karqa.

9. Adanwan Evawan mana juchallikunkumanchu karqa chay, ¿wawasninku kusisqachu kankuman karqa?

⁹ Adanwan Evawan mana juchallikunkumanchu karqa chayqa, wawasninku mana pantaj runaschu kankuman karqa. Paykunataj Diospa munayninta ruwaspa kay mundota uj paraisoman tukuchinkuman karqa. Ajinamantataj “Diospa samarikuyninman” yaykunkuman karqa (Heb. 4:11). Kay mundota uj paraisoman tukuchishaspaqa maytachá kusikunkuman karqa. Jehová Diostaj Adanta Evatawan maytachá bendecinman karqa wawasninkoj allinninkuta maskʼasqankumanta.

10, 11. ¿Imataj yanapawasunman mana saykʼuspa predicamunallapajpuni?

¹⁰ Jehová Diosqa munan predicamunanchejta, Jesuspa yachachisqasninmantaj runasta tukuchimunanchejta. Runasman yachachimunapajtaj paykunamanta khuyakunanchej tiyan. Chantapis Diosta munakusqanchejrayku, runa masinchejtapis munakusqanchejrayku predicamunanchej tiyan. Ajinamanta mana saykʼuspa predicamullasunpuni.

¹¹ Apóstol Pablo nerqa: “Noqaykoqa Dioswan khuska llankʼayku”, nispa. Chayta nerqa predicasqankurayku, Diospa palabrantataj runasman yachachisqankurayku (1 Cor. 3:6, 9). Noqanchejpis Dioswan khuska llankʼayta atinchej, chaytaj ni imawan kikinchakunchu. Chayrayku predicamunapaj tukuy atisqanchejta ruwananchej tiyan, tiempochakunanchej tiyan, mana michʼakuspataj kapuyninchejwan yanapakunanchej tiyan.

12, 13. ¿Kusikunchejchu Diosmanta runasman yachachispa?

¹² Mayta kusikunchej runasman predicamunapaj, yachachimunapajtaj tiempochakuspa, kallpachakuspataj. May chhika hermanosqa ninku Diosmanta yachachispalla aswan kusisqa kasqankuta. Arí, tukuypis mayta kusikunchej estudiosninchej Bibliaj nisqasninta entiendejtinku, Diospa nisqanpi creejtinku, kausayninkuta cambiajtinku, yachakushasqankumanta wajkunaman willarejtinku ima. Jesuspis mayta kusikorqa 70 discipulosnin predicacionmanta kusisqas kutimusqankuta rikuspa (Luc. 10:17-21).

¹³ Tukuypis maytapuni kusikunchej Bibliaj nisqasnin runasta sumajta kausakunankupaj yanapashasqanta rikuspa. Uj joven hermanamanta parlarina. Payqa Ana sutikun, Jehová Diospajtaj astawan llankʼayta munarqa. * Chayrayku Europaman ripusqa, pisi hermanoslla kanku chay lugarman. Pay nin: “Kay lugarmanta runasqa tukuypis Bibliamanta yachakuyta munanku. Chayrayku kusisqa predicamuni.  Wasiyman chayaspataj mana problemasniypi piensallanipischu. Astawanpis piensarini imaynatachus estudiosniyta yanaparinaypi, kallpacharinaypitaj problemasninkuta atipanankupaj. Ajinamanta reparani aswan kusiy kasqanta wajman qoriy, qorichikunamanta nisqaqa”, nispa (Hech. 20:35).

14. Predicacionpi runas mana uyariwajtinchejpis, ¿kusisqa kayta atisunmanchu?

¹⁴ Runas mana uyariwajtinchejpis kusisqa kasunman. Chayrayku kallpachakuna tukuy runasman predicanapaj. Ajinamanta runas mana uyariwajtinchejpis sumaj willaykunata willaspa kusisqa kasunchej. Imajtinchus noqanchejqa Ezequiel jina willamushanchej. Jehová Diosqa Ezequielman nerqa: “Qanqa noqaj nisqayta paykunaman willay, uyarisuchunkupis amapis”, nispa (Eze. 2:7; Isa. 43:10). Runas mana uyariwajtinchejpis predicamusqanchejqa Diospaj mana qhasichu (Hebreos 6:10 leey). Uj hermano nerqa: “Noqaykoqa plantarqayku, qarparqayku, Diosmantataj wiñachinanta mañakorqayku”, nispa (1 Cor. 3:6).

15. Runas mana agradecekuwajtinchejpis, ¿imajtintaj wajkunaman qorinapuni kasqa?

¹⁵ Jehová Dioswan Jesuswanqa kusisqa kananchejta munanku. Chayrayku niwanchej: “Wajkunaman qoriychej, qankunamanpis qorillasonqachejtaj. Tʼimpiykichejmantaj ashkhata thalliykamusonqachej matʼi winasqata, thalaykusqata, tʼimpiykichejta atipashajtataj. Imawanchus wajkunata midinkichej, chayllawantaj paykunapis midisonqachej”, nispa (Luc. 6:38). Kapuyninchejmanta wajkunaman qorejtinchejqa mana tukuychu agradecekuwasunchej. Chaywanpis agradecekuyta yachajkunaqa, qorikuyta yachallanqankutaj. Chantapis qorikuspaqa runasta tukuy imaymanamanta yanapashasunman. Chayrayku runas mana agradecekuwajtinchejpis kapuyninchejmanta wajkunaman qorinallapuni.

16. ¿Pikunawantaj kʼachas kananchej kasqa?

¹⁶ Qorikoj runaqa mana kutichipunankuta suyaspachu wajkunaman qorin. Jesús nerqa: “Jatun mikhuyta wakichispaqa wajyarikuy wajchasta, ñukʼusta,  suchusta, cojosta, ciegostapis. Chayta ruwaspaqa kusisqa kanki, imaraykuchus paykunaqa mana kutichipusuyta atenqankuchu”, nispa (Luc. 14:13, 14). Biblia nin: “Pichus wajkunaman jaywarej runaqa bendecisqa kanqa”, nispa. Nillantaj: “Kusikuyniyojmin mana kallpayoj wajchapi yuyajqa”, nispa (Pro. 22:9; Sal. 41:1). Chayrayku sonqomantapacha wajkunata yanapana.

17. ¿Kapuynillanchejwanchu yanapakuna kasqa?

¹⁷ Apóstol Pablo nerqa Jesuspa nisqanta yuyarikunanchejta. Jesús nerqa: “Aswan kusiy wajman qoriy, qorichikunamanta nisqaqa”, nispa. Pabloqa chayta yuyarichishaspa mana kapuyninchejwan yanapakunallatachu nisharqa, manaqa wajkunata yanapanata kallpachaspa, Bibliawan yuyaychaspataj (Hech. 20:31-35). Pabloqa ruwasqanwan, parlasqanwantaj yachachiwarqanchej wajkunata yanapanapaj munakuna kasqanta, uyarinapaj tiempochakuna kasqanta, tukuy kallpanchejwantaj yanapana kasqanta.

18. ¿Imatataj wakin runas ninku qorikoj runasmanta?

¹⁸ Runasta estudiajkunaqa ninku uj runa imallatapis wajman qorejtin kusikusqanta. Uj libropitaj nin uj runaqa wajpa allinninta ruwaspa sonqo juntʼasqa sientekusqanta. Wakin yachayniyoj runastaj ninku: “Wajkunata yanapaj runasqa mana qhasipajchu kausashasqankuta sientekunku”, nispa. Chayrayku wakin yachayniyoj runasqa ninku mana onqonapaj, aswan kusisqa kanapajtaj wajkunata yanapanata mana pagota suyaspalla. Chayta yachayqa mana tʼukuchiwanchejchu. Imajtinchus Jehová Diosqa yachachiwarqanchejña, qorikoj kajtinchej kusisqa kananchejta (2 Tim. 3:16, 17).

19, 20. ¿Imatataj ñaupaj parrafospi yachakorqanchej?

¹⁹ Paykunallapi yuyaj runaspa chaupinpi tiyakusqanchejrayku, mayta kallpachakunanchej tiyan wajkunawan kʼachas kanapaj. Jesús nerqa: ‘Jehová Diosniykitaqa munakunayki tiyan tukuy sonqoykiwan, tukuy kausayniykiwan, tukuy yuyayniykiwan, tukuy kallpaykiwantaj. Runa masiykitapis munakunayki tiyan, qan kikiykita jina. Chay iskay kamachisqasmanta aswan kurajqa mana kanchu’, nispa (Mar. 12:28-31). Ñaupaj parrafospi yachakorqanchej Jehová Diosta munakusqanchejrayku pay jinallataj ruwananchej kasqanta. Jehová Dioswan Jesuswanqa mana michʼakuspa wajkunarayku tukuy imata ruwanku. Munankutaj noqanchejpis paykuna jinallataj mana michʼakuspa wajkunaman qorinanchejta, ajinamanta kusisqa kananchejpaj. Jehová Diosman mana michʼakuspa kapuwasqanchejmanta qojtinchej, runa masinchejtapis yanapanapaj kallpachakojtinchejqa, Jehová Diosta kusichisunchej, noqanchejpis kusikusunchej, jinallataj runa masinchejpis.

²⁰ Ichá tukuypis maytaña kallpachakushanchej tukuypaj allin kajta ruwanapaj, astawanqa creeypi hermanosninchejpaj (Gál. 6:10). Tukuypaj allin kajta ruwallasunpuni chayqa, runasqa agradecekuwasunchej, munakuwasunchejtaj, jinamantataj kusikusunchej. Bibliapis niwanchej: “Pichus mana michʼakuspa wajman jaywarejqa tukuy imayojman tukun; pichus wajkunata sajsachejqa, paypis sajsachisqallataj kanqa”, nispa (Pro. 11:25). Predicacionpi chayri mayllapipis kashaspaqa, runasta khuyakunapaj, yanapanapajtaj tukuy imata ruwana ni imata suyaspalla. Chaymanta astawan qhepan semana yachakusunchej.