CREEYNIYOJ kaspaqa, tukuy imata ruwayta atisunman. Satanasqa Jehová Diosmanta karunchayta munawanchej. Creeyniyoj kaspataj, paypa “laurashaj tukuy flechasninta thasnuyta” atisun (Efe. 6:16). Chantapis creeyniyoj kaspaqa, jatuchaj orqosman rijchʼakoj problemastapis aguantayta atisun. Jesusqa yachachisqasninman nerqa: “Creesqaykichejchus mostaza mujitu chhikitallanpis kanman chayqa, kay orqota niwajchej: ‘Kaymanta jaqayman ithiriy’, nispa, ithirinmantaj”, nispa (Mat. 17:20). Creeyninchejqa Jehovaman astawan qayllaykunapaj yanapawasun. Chayrayku kay tapuykunata ukhuncharina: ¿Imaynataj creeyniyoj runa? ¿Imayna sonqoyojtaj kana creeyninchejta rikuchinapaj? ¿Imaynatá astawan creeyniyoj kasunman? ¿Pipitaj creenanchej tiyan? (Rom. 4:3).

Creeyniyoj kayqa mana “Diospi creeni” niyllachu, nitaj Bibliaj nisqan cheqa kasqanta yachayllachu. Imaraykuchus ‘supaykunapis Dios kasqanpi creellankutaj, manchariywantaj kharkatitinku’ (Sant. 2:19). Ajina kajtin, ¿imaynataj creeyniyoj runa?

Bibliaqa iskaynejmanta chayta sutʼinchan. Ñaupaj kaj, “creeyniyoj kajqa mana iskayrayanchu imatachus suyakushan chay juntʼakunanmantaqa”, nispa (Heb. 11:1 qallariynin). Creeyniyoj kaspaqa, Jehová Diospa tukuy nisqasnin cheqapuni kasqanmanta, juntʼakunanmanta ima, mana iskaychakusunchu. Jehová Diosqa israelitasman nerqa: “Manapuni atiwajchejchu pʼunchaywan, chʼisiyaywan trato ruwasqayta yanqhayachiytaqa, ajinamanta tutapis pʼunchaypis tiempompi mana kanampaj. Jinallataj kamachiy Davidwan trato ruwasqayqa, mana yanqhayachisqa kayta atinmanchu”, nispa (Jer. 33:20, 21). Noqanchejqa tutapis pʼunchaypis kananta yachanchej. Imaraykuchus sapa día inti llojsimunanmanta, yaykupunanmantapis, mana iskayrayanchejchu. Jina kajtin, ¿iskayrayananchejchu kanman tutatawan pʼunchaytawan ruwaj Diospa nisqasnin juntʼakunanmanta? Ni imarayku (Isa. 55:10, 11; Mat. 5:18).

Iskay kaj, creeyniyoj runaqa, yachan “imapichus creesqan cheqapuni kasqanta, chayta mana rikojtinpis” (Heb. 11:1 tukukuynin). Kaypi tʼukurina. Ichapis uj wawa tapuriwasunman: “¿Imaynapí yachanki aire kasqantapuni?”, nispa. Aireta ni jaykʼaj rikuspapis, wawaman aire kasqantapuni entiendechinapaj, ichá samaymanta, wayramanta ima parlarisunman. Wawaqa chay imas kasqanta creespa, aire kasqantapis creellanqataj mana rikojtinpis. Creeyniyoj runapis mana jinallamantachu imapipis creen, manachayqa chay imas kasqantapuni yachasqanrayku creen (Rom. 1:20).

Rikunchej jina, mana jinallamantachu creeyniyoj kasunman. Chayrayku creeyniyoj kanapajqa, cheqa kajtaraj allinta rejsinanchej tiyan (1 Tim. 2:4). Jinapis mana chayllatachu ruwananchej tiyan. Apóstol Pablo nerqa: “Runaqa sonqonpi creenan tiyan”, nispa (Rom. 10:10). Cheqa kajpi creespapis, chayta jatunpaj qhawananchej tiyan. Chayta ruwaspalla creeyniyoj kasqanchejta rikuchisun, nisunman cheqa kajman jina kausakusun (Sant. 2:20). Cheqa kajta mana jatunpaj qhawaj runaqa,  ñaupa creenciasninta mana saqeyta munanchu, munaynillantataj ruwayta munan. Chayrayku Bibliaj nisqan cheqapuni kasqanta yachaspapis, mana japʼikunchu (2 Ped. 3:3, 4; Jud. 18). Unay tiempopipis, ashkha runas Jehová Diospa milagrosninta, jinallataj Jesuspa milagrosninta rikorqanku. Jinapis manapuni paykunapi creerqankuchu (Núm. 14:11; Juan 12:37). Jehová Diosqa pikunachus cheqa kajta munakunku, llulla kajtataj chejnikunku, chaykunallata creeyniyoj kanankupaj atiyninwan yanapan (Gál. 5:22; 2 Tes. 2:10, 11).

Sinchʼi creeyniyoj kajkunamanta ujqa, David karqa (Heb. 11:32, 33). Jinapis familianmanta mana kikillantatajchu nisunman. Goliat Diospa contranta sayaykojtin, Davidqa phiñakorqa. Chayrayku kuraj hermanon Eliabqa Davidta kʼamerqa. Ajinamantataj Jehová Diospa atiyninpi mana creesqanta rikucherqa (1 Sam. 17:26-28). Ni pipis creeyniyoj kaspañachu nacekun, nitaj chayta tatasninmanta japʼinchu. Davidqa Jehová Diosman kʼaskasqa kasqanrayku creeyniyoj karqa.

Payqa 27 Salmopi nerqa, imachus sinchʼi creeyniyoj kananpaj yanapasqanta (versículo 1). Davidqa tʼukurej imaynatachus Jehová Dios kausayninpi yanapasqanpi, imaynatachus enemigosninmanta jarkʼasqanpi ima (versículos 2, 3). Payqa Jehová Diospa wasinta jatunpaj qhawaj (versículo 4). Chaypitaj waj israelitaswan khuska payta yupaychaj (versículo 6). Chantapis Davidqa Jehová Diosmanta yanapata rogakuspa mañakoj (versículos 7, 8). Payqa Jehová Dios cheqan ñanta pusananta munarqa (versículo 11). Davidqa creeyniyoj kayta may jatunpaj qhawarqa. Chayrayku nerqa: ‘Manachus Jehovapi creeyman chayqa, maypichus kashaymanpis karqa’, nispa (Sal. 27:13, Biblia Quechua de Cuzce).

David jina sinchʼi creeyniyoj kanapajqa, imatachus 27 Salmopi ruwarqa, chayllatataj ruwasunman. Creeyniyoj kanapajqa cheqa kajta allinta rejsina tiyan. Chayrayku Bibliata, publicacionesta ima estudiana. Creeyqa Diospa atiyninpa poqoyninmanta ujnin (Sal. 1:2, 3). Bibliata estudiashaspaqa sumajta tʼukurina. Imajtinchus tʼukureyqa, Jehová Diosman astawan agradecekunapaj yanapawasun. Payman astawan agradecekuspataj, paypi creesqanchejta rikuchiyta munasun. Chaytataj ruwasunchej, tantakuykunaman rispa, runasman wiñay kausaymanta willaspa ima (Heb. 10:23-25). Creeyninchejta rikuchillasunmantaj, ‘mana saykʼuspa Diosmanta mañakuspa’ (Luc. 18:1-8). Chayrayku paymanta sapa kuti mañakuna. Imaraykuchus payqa noqanchejmanta llakikun (1 Tes. 5:17; 1 Ped. 5:7). Creeyniyoj kaspaqa allin kajta ruwasunchej. Allin kajta ruwajtinchejtaj creeyninchej sinchʼiyanqa (Sant. 2:22).

Jesusqa wañupunanpaj uj chʼisi faltashajtin, yachachisqasninman nerqa: “Diospi creeychej,  noqapipis creellaychejtaj”, nispa (Juan 14:1). Mana Jehová Diosllapichu creenanchej tiyan, manaqa Jesuspipis. Imaynatachus chayta ruwanata kinsanejmanta qhawarina.

Ñaupaj kaj, Jehová Dios Jesusta sapa ujninchejrayku wañunanpaj kachamusqanta creena. Apóstol Pablo nerqa: “Noqaqa Diospa Wawanpi creesqayman jina kausashani. Paymin munakuwarqa, noqaraykutaj kausayninta qorqa”, nispa (Gál. 2:20). Jesusqa sapa ujninchejrayku wañorqa. Chayrayku Jehová Dios juchasninchejta perdonayta atiwanchej, wiñay kausaytapis japʼiyta atinchej. Chantapis Jehovaqa, mayta munakuwasqanchejrayku Wawanta kachamorqa. Jesuspi creespaqa, chay imasmanta mana iskayrayasunchu (Rom. 8:32, 38, 39; Efe. 1:7). Jesuspa wañuyninpi creesun chayqa, mana sonqonchej juchachanawanchejta saqesunchu (2 Tes. 2:16, 17).

Iskay kaj, Jesús kausayninta qosqanrayku Jehová Diosman chimpayta atinchej. Chayrayku Diosmanta mana manchachikuspa mañakuna. “Ajinamanta yanapata necesitajtinchej, Dios khuyakunawanchejpaj, jinallataj jatun khuyakuyninta qonawanchejpaj” (Heb. 4:15, 16; 10:19-22). Jehová Diosmanta mañakoyqa, juchapi mana urmanapaj yanapawasun (Luc. 22:40).

Kinsa kaj, Jesusta kasukuna. Apóstol Juan qhelqarqa: “Diospa Wawanpi creejqa wiñay kausayniyoj kanqa, Diospa Wawanta mana kasojrí, mana wiñay kausayta japʼenqachu, astawanpis Diospa kʼajaj phiñakuynin paypa patanpi kanqa”, nispa (Juan 3:36). Apóstol Juan nisqanman jina, creeyniyoj runaqa kasukun. Chayrayku Jesuspi creesqanchejtaqa, payta kasukuspa rikuchinchej. Chaytataj ruwasunman “Cristoj leyninta” kasukuspa, nisunman yachachisqanman jina, kamachisqanman jinataj kausakuspa (Gál. 6:2). Jesusta kasukullasunmantaj, “allin kamachi yuyayniyoj” nisqanta kasukuspa (Mat. 24:45). Jesusta kasukuspaqa, sinchʼi wayraman rijchʼakoj problemastapis aguantayta atillasunchej (Mat. 7:24, 25).

Uj pacha, uj runa Jesusta nerqa: “¡Creeni! Yanapaway ari astawan creenaypaj”, nispa (Mar. 9:24). Chay runaqa creeyniyojña karqa. Jinapis astawan creeyniyoj kanan kasqanta reparakorqa. Noqanchejpis ima ratollapis astawan creeyniyoj kayta necesitasunchej. Tukuyninchejtaj astawan creeyniyoj kanapaj kallpachakusunman. Yachakunchej jina, creeyninchej aswan sinchʼi kananpajqa, Bibliata estudiana, chaypitaj tʼukurina. Chayqa Jehová Diosman agradecesqas kanapaj yanapawasun. ¿Imastawan ruwasunman creeyninchejta sinchʼiyachinapaj? Jehová Diosta hermanoswan khuska yupaychana, suyakuyninchejmanta waj runasman willana, mana saykʼuspataj Diosmanta mañakuna. Ajinata creeyninchejta kallpachasun chayqa, sumaj tʼinkata japʼisun. Biblia nin: “Diospi creesqaykichejpi kallpachakuychej [...]. Ajinamanta Diospa munakuyninpi kanallaykichejpajpuni” (Jud. 20, 21).