ICHAPIS Jehová Diospaj astawan llankʼayta munanchej. Jinapis mana atinchejchu. Manachayqa waj hermanos jinallataj, congregacionpi astawan ruwanasta japʼiyta munanchej. Chayrí Jehovaj llajtanpi ima llankʼaytachus ñaupajta ruwarqanchej, chayta ruwayta munanchej. Jinapis viejitosña kasqanchejrayku, onqoykusqanchejrayku, qolqe pisiwasqanchejrayku, chayri familianchejta qhawananchej kasqanrayku, mana chaykunata ruwayta atinchejchu. Manachayrí Diospa llajtanpi ashkha cambios kasqanrayku, ichá unaytaña ruwarqanchej chay llankʼayta saqerqanchej. Imayna kajtinpis, ichá mana munasqanchejman jinachu Jehová Diospaj llankʼashanchej. Ajinapi rikukuspaqa, ichá llakikusunman, phutikusunman chayri phiñakusunman. ¿Imatá ruwasunman chay imasta atipanapaj, kusisqallapunitaj kanapaj?

Juan Bautistamanta mayta yachakusunman. Payqa Jehová Diosmanta may sumaj llankʼayta japʼerqa. Jinapis ichá mana yacharqachu, imaynachus kausaynin kananta. Payqa predicasqan tiempomanta nisqa, astawan unayta carcelpi wisqʼasqa karqa. Jinapis Juanqa wañupunankama kusisqallapuni karqa. ¿Imataj chaypaj yanaparqa? Noqanchejrí, ¿imaynatataj llakiypi kaspapis kusisqallapuni kasunman?

29 watamanta abril killa chaynejpi, Juanqa runas Mesiasta japʼikunankupaj, Jehová nisqanman jina sonqonkuta wakichiyta qallarerqa. Ajinatataj predicarqa: “Juchasniykichejmanta pesachikuychej, imaraykuchus cielopi kaj Gobiernoqa qayllapiña kashan”, nispa (Mat. 3:2; Luc. 1:12-17). Ashkha runas Juanpa willasqanta uyarinankupaj, karu lugaresmanta jamorqanku. Chantá ashkhas juchasninkumanta pesachikuspa, paywan bautizachikorqanku. Chantapis Juanqa fariseosta saduceostawan uyankupi nerqa, juchasninkumanta mana pesachikojtinku chinkachisqa kanankuta (Mat. 3:5-12). Chantá Juanqa 29 watamanta octubre killapi Jesusta bautizarqa. Chaytaj Diospaj llankʼayninpi aswan sumaj ruwasqan karqa. Chaymantapacha Juanqa runasta nerqa Jesuspa qhepanta rinankuta, nisunman suyasharqanku chay Mesiasta qhatinankuta (Juan 1:32-37).

Juanqa Mesías chayamunanpaj ñanta wakicherqa. Chayrayku Jesusqa Juanmanta nerqa: “Tukuy  nacekojkunamanta mana ujpis Juan Bautistamanta aswan kurajqa rikhurimorqachu”, nispa (Mat. 11:11). Juanqa Jehovamanta japʼisqan llankʼayta jatunpajchá qhawarqa, bendicionesta japʼisqanmantapis kusikorqachá. Kunanpis Jehovata Juan jina tukuy sonqo sirvej cristianosqa, ashkha bendicionesta japʼinku. Terry sutiyoj hermanonchejmanta parlarina. Payqa señoranwan khuska 50 watas kurajta Jehovapaj tiempo juntʼasqata llankʼashan. Terry nin: “Diospa llajtanpi ashkha ruwanasta japʼerqani. Sirverqani precursor regular jina, betelita jina, precursor especial jinataj. Chantapis congregacionesta waturej kani, superintendente de distritopis karqani. Kunantaj watejmanta precursor especial kani”, nispa. Diospa llajtanpi astawan ruwanasta japʼeyqa kusichiwanchej. Jinapis kausayninchej niña kikinchu kajtin, kusisqallapuni kanapaj kallpachakuna tiyan. Chaytataj Juan Bautistamanta yachakusun.

Juan Bautistaqa Jehová Diosmanta japʼisqan llankʼayta jatunpaj qhawaj. Chayrayku kusisqallapuni karqa. Jesús bautizakusqanmanta qhepaman, Juanpa yachachisqasnenqa pisiyasharqa, Jesuspatataj yapakusharqa. Chayta rikuspa, Juanpa yachachisqasnenqa payta nerqanku: “Yachachejníy, Jordán chimpapi qanwan kasharqa, pimantachus qan sutʼincharqanki, chay runaqa bautizashan, tukuy runastaj payman rishanku”, nispa (Juan 3:26). Juantajrí paykunaman nerqa: “Noviaqa noviojta. Novioj qayllanpi kaj amigontajrí, novioj parlasqanta uyarispa mayta kusikun. Ajinallatataj noqapis mayta kusikuni”, nispa (Juan 3:29). Juanqa mana Jesusta enemigonta jinachu qhawarqa. Chantá Jesuspaj llankʼaynin aswan sumaj kajtinpis, Juanqa Diospaj llankʼayninta mana pisipaj qhawarqachu. Astawanpis ‘novioj amigon’ kasqanta jatunpaj qhawarqa.

Juanqa ajinata yuyasqanrayku kusisqallapuni karqa, llankʼaynin mana wajkunajta jinachu kajtinpis. Juanqa nacekusqanmantapacha nazareo karqa, chayraykutaj mana vinota ujyajchu (Luc. 1:15). Jesuspis Juanmanta parlaspa nerqa: “Juanqa mana mikhuspa nitaj ujyaspa jamorqa”, nispa. Jesuswan yachachisqasninwanrí, mana nazareoschu karqanku, tukuy runas jinataj kausakoj kanku (Mat. 11:18, 19). Chantapis Juanqa, Jesuspa yachachisqasnin milagrosta ruwanankupaj atiyta japʼisqankuta yacharqa. Paykunamanta wakintaj, ñaupajta paypa yachachisqasnin karqanku. Juantajrí mana milagrosta ruwananpaj atiyta japʼerqachu (Mat. 10:1; Juan 10:41). Chay imaspi piensananmantaqa, Jehová Diosmanta japʼisqan llankʼayta tukuy sonqo juntʼarqa.

Noqanchejpis Jehová Diospaj llankʼayninchejta jatunpaj qhawasun chayqa, kusisqallapuni kasun. Terrymanta parlarerqanchejña. Pay nin: “Jehová ima llankʼaytapis qowajtin, tukuy sonqo chayta ruwani”, nispa. Payqa Jehovapaj llankʼasqanmanta yuyarikuspa nin: “Imastachus Jehová Diospaj ruwasqaymanta kusiywan yuyarikuni, manataj pesachikunichu”, nispa.

Jehová Diospaj llankʼaspaqa, paywan khuska llankʼashanchej. Chayta mana qonqasunchu chayqa, payta kusisqallapuni sirvisunchej (1 Cor. 3:9). Kaypi piensarina. May unayniyoj qori vasota llimphuchanchej chayqa, sumajta lliphipirillanpuni. Ajinallataj Jehovata sirvisqanchejwanpis. Paypaj llankʼasqanchejta jatunpaj qhawasun chayqa, kusisqallapuni kasun. Chayrayku Diospa llajtanpi imastachus ruwasqanchejta, ama wajkunaj ruwasqankuwan kikinchanachu, nitaj Jehovapaj llankʼayninchejta pisipaj qhawanachu (Gál. 6:4).

Ichapis Juanqa yacharqa Diospaj pisi tiempollata llankʼananta. Jinapis ichá mana yuyallarqapischu, llankʼaynin mana suyashajtillan tukukapunanta (Juan 3:30). Jesusta bautizasqanmanta sojta killasninman jina, rey Herodesqa payta presocharqa. Chaytaj 30 watapi karqa. Jinapis Juanqa tukuy atisqanta willallarqapuni (Mar. 6:17-20). ¿Imataj Juanta yanaparqa kusisqallapuni kananpaj? Jehová Diosta sirviypi sonqonta churasqan.

Juanqa carcelpi wisqʼasqa kashaspa, Jesuspa ruwasqasninmanta uyarerqa (Mat. 11:2; Luc. 7:18). Payqa Jesús Mesiaspuni kasqanta yacharqa. Jinapis Juanqa ichá yachayta munarqa, Biblia imatachus Mesiasmanta willasqanta tukuynintachus Jesús juntʼananta, chayri manachus. Juanqa  Mesías rey jina kamachinanta yacharqa. Chayrayku payqa ichá yachayta munarqa, pisimantawanchus rey kananta chayri manachus, carcelmanta kacharichinantachus manachus ima. Chay imasta yachayta munaspa, Juanqa iskay yachachisqasninta Jesusman kacharqa, tapucherqataj: “¿Qanchu kanki Jamunan Karqa chay, chayri wajtachu suyasqayku?”, nispa (Luc. 7:19). Jesustajrí Juanman kayta nimunankuta nerqa: “Ciegos rikunku, suchus puririnku, lepra onqoyniyojkuna sanoyachisqa kanku, lojtʼus uyarinku, wañusqas kausarinku, wajchasmanpis sumaj willaykuna willakun”, nispa. Juanqa Jesuspa chay ruwasqasninta tukuy sonqochá uyarerqa (Luc. 7:20-22).

Chaytaj maytachá Juanta kallpacharqa. Imaraykuchus yacharqa Mesiasmanta profecías Jesuspi juntʼakushasqanta. Jesusqa mana Juanta carcelmanta orqhorqachu. Jinapis Juanqa Diospaj llankʼasqan mana qhasipajchu kasqanta yacharqa. Chayrayku carcelpi kaspapis, kusisqallapuni karqa.

Noqanchejpis pay jinallataj Jehová Diosta sirviypi sonqonchejta churasun chayqa, kusiywan pacienciawantaj aguantallasunpuni (Col. 1:9-11). Chaypajtaj Bibliata leeriy, chaypi tʼukuriy ima yanapawasun. Chay imasta ruwaspaqa, reparasun Diospaj llankʼayninchej mana qhasipajchu kasqanta (1 Cor. 15:58). Terryjpata señoran Sandra nin: “Sapa día Bibliamanta uj capitulota leeni. Ajinamanta mana noqallapichu yuyani, manaqa Jehová Diospi yuyani. Chantapis payman astawan kʼaskaykuni”, nispa. Imaynatachus jallpʼantinpi hermanosninchej Diospa Gobiernonpaj llankʼashasqankuta yachakuna. Ajinamanta mana noqallanchejpichu yuyasun, manachayqa imastachus Jehová Dios ruwashasqanpi. Sandra nillanpuni: “Sapa killa Broadcastingta qhawaspa, Jehovaj llajtanman astawan ujchasqa kayku. Diospajtaj kusiywan llankʼallaykupuni”, nispa.

Juan Bautistaqa Elías jina Diospa atiyninwan willarqa, chayta pisi tiempollata ruwajtinpis. Payqa Elías jina “runalla karqa” (Luc. 1:17; Sant. 5:17). Noqanchejpis Juan Bautista jinallataj Diospaj llankʼayninchejta jatunpaj qhawana, chaypitaj sonqonchejta churana. Ajinamanta ima kajtinpis, Diospa Gobiernonpaj kusiywan llankʼallasunpuni.