1, 2. ¿Imaraykutaj wañupojpa familianta imaynatachus sonqocharinata yachananchej tiyan? (Patapi kaj dibujota qhawariy).

UJ HERMANA Susi sutiyoj nerqa: “Wawayku wañupusqanmantapacha manchay llakisqa kasharqayku. Casi watatapuni ajina kasharqayku”, nispa. Uj hermanotaj nin: “Mana yuyallarqanipischu señoray wañupunanta. Pay wañupojtintaj llakiymanta ni imanakuyta aterqanichu. Sonqoyqa mayta nanawarqa”, nispa. Ajina llakiykunapeqa ashkhas rikukunku. Diospa kamachisninmanta ashkhas mana yuyallarqankupischu, Armagedón niraj chamushajtin familiankumanta pillapis wañupunanta. Pinillaykipis wañupun chay, chayri amigoykej familianmanta pillapis wañupun chayqa, ichapis tapurikunki: “¿Imaynatá payta sonqochariyman?”, nispa.

² Wakin runasqa niyta yachanku: “Tiempo pasasqanman jina llakiyninchejta qonqapullasunchej”, nispa. ¿Ajinapunichu? Uj viuda hermana nin: “Llakiyninchejtaqa mana tiempo pasasqanman jinallachu qonqapunchej. Astawanqa llakiyninchejta qonqapunanchejpaj tiemponchejta allinta apaykachana”, nispa. Imaynatachus cuerponchejpi imanarpakojtinchej, pisimanta pisi sanoyapun. Ajinallatataj ima llakiyninchejpis pisimanta pisi chinkapun. ¿Imaynatá llakisqa kajkunata sonqochasunman?  Chaymanta yachakusunchej.

3, 4. ¿Pinillanchejpis wañupusqanmanta imayna llakisqapunichus kashasqanchejta Jehová yachanmanchu?

³ Jehová Tatanchejqa may khuyakuyniyoj. Payqa mayta sonqochawasunman (2 Corintios 1:3, 4 leey). Payqa allinta yachan pinillanchejpis wañupusqanmanta imayna llakisqapunichus kashasqanchejta. Chayrayku kamachisninman kayta nerqa: “Noqamin kani sonqochajniykeqa”, nispa (Isa. 51:12; Sal. 119:50, 52, 76).

⁴ Jehovaqa “may khuyakuyniyoj Tata”. Payqa mayta llakikorqa kamachisnin Abrahán, Isaac, Jacob, Moisés, rey Davidpiwan wañupusqankumanta (Núm. 12: 6-8; Mat. 22:31, 32; Hech. 13:22). Biblia nisqanman jina Jehová Diosqa, mayta munashan munasqa kamachisninta kausarichimuyta (Job 14:14, 15). Paykuna kausarimojtinkoqa may kusisqa kanqanku, niñataj onqonqankuchu. Chantapis Jehová Diosqa may munasqa wawanta wañupojta rikullarqataj. Paywan kashaspaqa mayta kusikoj (Pro. 8:22, 30). Chayrayku munasqa wawan wañupusqanmanta, imaynatapunichus llakikusqanta mana yachayta atisunmanchu (Juan 5:20; 10:17).

5, 6. ¿Imaynatá Jehová Dios sonqochawanchej?

⁵ Jehovaqa llakisqa kashajtinchej sonqochawasunpuni. Chayrayku paymanta mañakushaspaqa, sonqomantapacha tukuy llakiyninchejta willakuna. Llakiyninchejta entiendesqanta, sonqochanawanchejtapis yachayqa, mayta kallpachawanchej. ¿Imaynatá Jehová sonqochawanchej?

⁶ Jehová Diosqa, “atiyninnejta” sonqochawanchej (Hech. 9:31). Jesús nerqa: “Cielopi kashaj Tataykichejqa atiyninta qonqa mañakojkunaman”, nispa (Luc. 11:13). Susi hermana nillantaj: “Ashkha kutispi Jehová Diosmanta qonqorikuspa mañakoj kayku sonqocharinawaykuta. Sapa mañakusqaykupitaj reparaj kayku, Jehová Dios ‘sonqo tiyaykuyta’ qowasqaykuta. Ajinamanta Payqa sonqoykuta, yuyayniykutawan waqaycharqa”, nispa (Filipenses 4:6, 7 leey).

7, 8. ¿Imaraykú Jesús sonqochanawanchejmanta mana iskayrayasunmanchu?

⁷ Jesús kay Jallpʼapi kashaspa Tatan jina runasta munakorqa, paykunamanta llakikorqa, khuyakorqataj (Juan 5:19). Tatanqa payta kachamorqa, tukuy ‘llakisqasta sonqochananpaj’ (Isa. 61:1, 2; Luc. 4:17-21). Runasqa sutʼita repararqanku Jesusqa khuyakoj runa kasqanta, llakiypi kajkunata entiendesqanta, paykunatataj yanapaytapuni munasqanta (Heb. 2:17).

⁸ Jesusqa jovenllaraj kashaspa, ichapis familiaresninta, amigosninta ima wañupojta rikorqa. Ichapis Jesús 20 watasniyojllaraj kashajtin, tatan José wañuporqa. * Tatan Joseta mayta munakusqanrayku maytachá Jesús llakikorqa wañupusqanmanta, jinallataj mamanta, hermanosnintapis waqajta rikusqanmanta.

9. ¿Imatataj Jesús ruwarqa Lázaro wañupusqanmanta waqajkunata rikuspa?

 ⁹ Diospa gobiernonmanta willashaspa Jesusqa, runas llakisqa kashajtinku paypis llakikullarqataj. Chayrayku munasqa amigon Lázaro wañupusqanmanta Mariata, Martatawan mayta waqajta rikuspa paypis waqarikullarqataj. Arí, Jesusqa Lazarota kausarichinanta yachaspapis sinchʼita llakikorqa (Juan 11:33-36).

10. ¿Imaraykú nisunman Jesús runasmanta khuyakushallasqantapuni?

¹⁰ Jesús runasmanta khuyakusqanta yachayqa mayta sonqochawanchej. Bibliaqa nin: “Jesucristoqa kikillanpuni, qaynapis, kunanpis, wiñaypajpis”, nispa (Heb. 13:8). Jehovaqa payta “Kausayta Qonanpaj” churarqa. Jesusqa noqanchej jina ñakʼarerqa. Chayrayku “pikunachus pruebaman churasqa kashanku, chaykunata” yanapayta atinman (Hech. 3:15; Heb. 2:10, 18). May llakisqa kashajtinchej Jesusqa khuyakuwasunpuni, sonqochawasuntaj (Hebreos 4:15, 16 leey).

11. ¿Bibliamanta mayqen versiculostaj astawan sonqochasunki?

¹¹ Lázaro wañupojtin imaynatachus Jesús runasmanta khuyakusqanta yachaspa mayta sonqochakunchej. Chantapis Bibliapeqa sonqochanawanchejpaj jina waj versículos kallantaj. Imaraykuchus “ñaupa tiempopi qhelqakusqanqa, yachachinawanchejpaj qhelqasqa karqa, jinallataj suyakuyniyoj kananchejpaj. Imaraykuchus Diosmanta Qhelqasqaqa sinchʼita sayanapaj, sonqochakunapaj ima yanapawanchej” (Rom. 15:4). ¿Qanpata pinillaykipis wañupunchu? Ajina kajtenqa kay versículos mayta sonqochasunkiman:

• “Tata Diosqa qayllallapi kashan salvanampaj juchallisqankumanta sonqonkuta nanachikojkunata, pikunachus manaña salvasqa kayta suyankuchu, chaykunata” (Sal. 34:18, 19).

• “Sonqoy ukhupi ashkha llakiyniyoj kashajtiy, sonqochawasqaykeqa almayta kusicherqa” (Sal. 94:19).

• “Tatanchej Diosqa munakuwanchej. Jatun khuyakuyninraykutaj wiñaypaj sonqochawanchej, sumaj suyakuyta ima qowanchej. Noqayku mañakuyku, Dioswan Señorninchej Jesucristowan qankunata sonqochanankuta, kallpachanankutataj” (2 Tes. 2:16, 17). *

12. ¿Imaynatá llakisqasta yanapasunman?

¹² Wañupojpa familianqa congregacionpi sonqochayta tarinkuman (1 Tesalonicenses 5:11 leey). ¿Imaynatá llakisqa kajkunata, sonqochasunman kallpachasunmantaj? (Pro. 17:22). Bibliaqa nin: “Uj tiempoqa tiyan chʼinyanapaj, uj tiempotaj parlanapaj”, nispa (Ecl. 3:7). Iskay hermanasmanta parlarina. Uj viuda hermana Dalene sutiyoj nin: “Wañupojpa familianqa llakiyninkumanta parlariyta munanku. Chayrayku paykunataqa allinta uyarina”, nispa. Junia sutiyoj hermanamanta parlarina. Paypa hermanonqa wañuchikorqa. Junia nin: “Wañupojpa familian imayna llakisqapunichus kashasqankuta mana allinta entiendeyta atisunmanchu. Jinapis entiendeyta munasqanchejqa, may sumaj”, nispa.

13. ¿Kikintachu tukuy llakikunchej?

¹³ Mana tukuychu kikinta llakikunchej, nillataj llakikusqanchejta kikintapunichu rikuchinchej. Wakin kuteqa noqallanchej  llakiyninchejta allinta yachanchej, manataj wajkunaman sutʼinchayta atillanchejchu. Bibliaqa nin: “Runaqa sonqompa llakiykunanta rejsin, manataj mana rejsisqanmanqa kusiyninta sutʼinchanchu”, nispa (Pro. 14:10). Llakiyninchejta wajkunaman willarikojtinchejpis, ichá mana allinta entiendewasunchu.

14. ¿Imatawantaj ruwasunman llakisqasta sonqochanapaj?

¹⁴ Wakin kuteqa wañupojpa familianman imatachus ninata mana yachanchejchu. Chaywanpis Bibliaqa nin: “Yachayniyojkunaj parlasqasninkurí jampi jina sonqota thañichin”, nispa (Pro. 12:18). Ashkha cristianosqa Familiamanta pillapis wañupuptin folletopi, sumaj yuyaychaykunata tarinku wajkunata sonqocharinankupaj. * Jinapis allinpuni kanqa ‘waqajkunawan waqananchej’ (Rom. 12:15). Uj viuda hermana Gaby sutiyoj nin: “Llakisqa kashajteyqa waqay chayawan. Chayrayku mayta sonqochawan amigasniy waqaysiwajtinku. Ajinamanta manaña sapayakunichu”, nispa.

15. ¿Imastataj ruwasunman llakisqasta sonqocharinapaj? (“ ¿Imatataj nisunman llakisqasta sonqochanapaj?”, nisqatawan leeriy).

¹⁵ Llakisqasta sonqocharinapaj jina mana parlariyta atillanchejchu chayqa, ichapis uj cartitata, celularnejta uj mensajeta, chayri Internetnejta uj correota apachisunman. Chaypeqa sonqocharinapaj jina Bibliamanta uj versiculota churasunman, wañupojmanta allinta parlarisunman, imatachus paymanta astawan yuyarikusqanchejmantapis. Junia nin: “Wakinkunaqa sonqocharinawankupaj mensajesta apachimuwanku, wakin hermanastaj wasinkuman wajyariwanku. Chaywanqa mayta munakuwasqankuta,  cuidawaytataj munasqankuta reparani. Paykunaqa maytapuni yanapawanku”, nispa.

16. ¿Imaynamantataj llakisqasta sonqochallasunmantaj?

¹⁶ Chantapis allin kanman llakisqa kajkunawan kashaspa Jehovamanta mañapunanchej. Ichá chay kutispi mana atillasunchu Jehovamanta mañakuyta. Llakiymanta ichá waqay chayawasunman, khaka khakallatataj parlasunman. Jinapis sonqomantapacha Diosmanta mañapojtinchej maytapuni paykunata sonqochanman. Dalene nin: “Hermanas sonqochariwaj jamuwajtinku, wakin kuti Diosmanta mañaripunawankuta nini. Mañakuyta qallarishajtinkutaj llakiymanta mana parlariyta atillankuchu. Chaywanpis mañakushasqankuman jina sonqota kuyurichinapaj jina mañakunku. Creeypi sinchʼi sayasqa kasqanku, mayta munakuwasqankupis Diospi astawan atienekunaypaj yanapawan”, nispa.

17-19. ¿Imaraykutaj hermanosninchejta sonqochanallapuni?

¹⁷ Wakin runasqa familiankumanta pillapis wañupojtin pisi tiempollata llakikunku, wakintajrí unayta llakikunku. Chayrayku wakinkunaqa, mana wañupoj pʼampakusqan chay diasllapichu sonqocharinata necesitanku, manaqa qhepan killaspipis. Pʼampakuy diaspeqa ashkha familiares, amigos ima kashanku wañupojpa familianta sonqocharinankupaj, chaymantataj wasinkuman kutispa saqerpanku. Jinapis Proverbios 17:17 nin: “Uj kawsaqeqa tukuy tiempopi munakuyniyoj, uj wawqetaj runawan khuska llakiypi sayaykunampaj”, nispa. Wañupojpa familiantaqa sapa llakisqa kashajtinku sonqochanallapuni (1 Tesalonicenses 3:7 leey).

¹⁸ Qosanchej chayri señoranchej wañupojtin imallapis paymanta yuyarichiwasunman, ichapis kanman, uj takiysitu, uj foto chayri waj imas. Chantapis casarakusqanchej diapi chayri wakin killaspi astawan paymanta yuyarikusunman. Yuyarikuspataj mayta llakikusunman. Sapallanchejña kaspaqa ichá jatun tantakuyman, chayri Jesuspa wañuyninta yuyarinapaj tantakuyman mana riyta atillasunmanchu. Uj viudo hermano nin: “Casarakusqayku diata yuyarinapaj manaña señoraywan kasqayqa, may llakiypuni karqa. Jinapis hermanosqa amigosniywan khuska karinaypaj uj tantakuysituta wakichisqanku, mana sapallay sientekunaypaj”, nispa.

¹⁹ Wañupojpa familianqa mana wakin diasllapichu sonqochanata necesitanqanku. Junia nin: “Wañupojpa familianta ima diallapis waturikamusqanchejqa mayta paykunata yanapan, sonqochantaj”, nispa. Ichá mana llakiyninkuta chinkachiyta atisunchu. Jinapis tukuy imaymanamanta sonqochasunman (1 Juan 3:18). Gaby nin: “Jehovaman mayta agradecekuni ancianos munakuywan yanapawasqankumanta. Paykunaqa yanapata necesitajtiy mana saqerpariwarqankuchu. Astawanqa reparachiwarqanku Jehová munakuywan jarkʼashawasqanta”, nispa.

20. ¿Imatataj Jehová Dios pisimantawan ruwanqa?

²⁰ Jehovaqa “tukuy imapi sonqochaj” Dios. Payqa tukuypa waqayninta pichanqa ‘sepulturaspi tukuy kajkunata’ kausarichimojtin. Chaytaj mayta sonqochawanchej (Juan 5:28, 29). Jehová Diosqa “wañuyta wiñaypaj chinkachenqa”, tukuypa waqaynintataj pichanqa (Isa. 25:8). Chay día chayamojtenqa, manaña ‘waqajkunawan waqasunchu’, astawanqa ‘kusikojkunawan kusikusunchej’ (Rom. 12:15).