1, 2. 1) Autoridades Jehová Diosta yupaychajta manaña saqewajtinchej, ¿imaraykutaj mana tʼukunachu? 2) ¿Imastá kay yachaqanapi yachakusun?

ASHKHA lugarespi, gobiernosqa Jehovata yupaychajta mana saqenkuchu, chayri wakin imasllata ruwajta saqenku. Kay 2018 watapi, 223 mil hermanosmanta astawan chay lugarespi karqanku. Chaytaj mana tʼukunapajchu. Ñaupaj yachaqanapeqa, runas qhatiykachanawanchejta yachakorqanchej (2 Tim. 3:12). Maypi tiyakojtinchejpis, autoridadesqa ima ratollapis niña predicajta, nitaj tantakojtapis saqewasunmanchu.

² Gobiernos Jehová Diosta yupaychajta prohibiwajtinchej, ichá piensasunman: “Niñachá Jehová bendecishawanchejchu, chayraykupuni runas qhatiykachashawanchej”, nispa. Chayri nisunman: “Kunanrí, ¿niñachu Diosta yupaychasun? ¿Waj llajtamanchu ayqekusun?”, nispa. Kay yachaqanapi chaymanta parlarisun. Chantá yachakusun, autoridades prohibiwajtinchej imaynatachus Jehová Diosta sirvinallatapuni. Yachakullasuntaj imastachus mana ruwananchej kasqanta.

3. 1) Kay 2 Corintios 11:23-27 nisqanman jina, ¿imaspitaj apóstol Pablo rikukorqa? 2) ¿Imatá Pabloj kausayninmanta yachakusunman?

³ Autoridades Jehová Diosta yupaychajta jarkʼawajtinchej, ichá yuyasunman pay manaña bendecishawasqanchejta. Jinapis ama ajinata yuyanachu. Apóstol Pablopi piensarina. Paytaqa Jehová Dios allinpaj qhawarqa. Chantapis Pabloqa mana judío kajkunaman kachasqa apóstol karqa, 14 cartastataj Mosoj Testamentomanta qhelqarqa. Jina kajtinpis, ashkhas payta qhatiykacharqanku (2 Corintios 11:23-27 leey). ¿Imatá Pabloj kausayninmanta yachakunchej? Jehová Diosqa wakin kutis runasta saqen, paypa kamachisninta qhatiykachanankuta.

4. ¿Imaraykutaj mundomanta runas chejnikuwanchej?

⁴ Jesusqa imaraykuchus runas churanakunawanchejta sutʼincharqa.  Payqa nerqa: ‘Qankunaqa mana kay mundomanta runas jinachu kankichej, chayrayku kay mundomanta runasqa chejnisonqachej’, nispa (Juan 15:18, 19). Runas qhatiykachawasqanchejqa, mana ninayanchu Jehová Dios mañana bendecishawasqanchejta. Astawanpis Jehová Diospa kamachisnin kasqanchejta rikuchin.

5. ¿Runas jarkʼawasunmanchu Diosta manaña sirvinapaj? Sutʼinchariy.

⁵ Runasqa mana jarkʼawasunmanchu, tukuy atiyniyoj Jehová Diosta sirviyta. Jehovaj enemigosnenqa, qhasillata tukuy imata ruwarqanku. Iskay kaj Guerra Mundialpi imachus kasqanta qhawarina. Ashkha suyuspi gobiernosqa, Diospa kamachisninta mayta qhatiykacharqanku. Alemaniapi nazis nisqa gobiernopi kashajtinku, Jehovaj testigosninta niña predicajta, nitaj tantakojtapis saqerqankuchu. Canadapi, Australiapi, waj lugarespiwan, kikillantataj gobiernos ruwarqanku. Ajina kajtinpis willajkunaqa astawan yapakorqanku. Kay 1939 watapi guerra qallarishajtin, mundontinpi 72.475 willajkuna karqanku. Kay 1945 watapajrí, willajkunaqa Jehovaj bendicionninwan iskay jinastawan yapakorqanku. Chay guerra tukukuyta 156.299 willajkuna karqanku.

6. 1) Runas churanakuwasqanchej, ¿imapajtaj yanapawanchej? 2) ¿Imatá wakin hermanos ruwasqanku?

⁶ Runas churanakuwasqanchejqa, Jehová Diosta astawan sirvinapaj yanapawasunman. Uj wawitayoj qhariwarmimanta parlarina. Suyunkumanta gobiernoqa, hermanosninchejta niña Jehovata yupaychajta saqenchu. Gobiernota manchachikunankumanta, paykunaqa precursor regularta orqhorqanku. Hermanaqa precursora kananrayku sumaj pagasqa trabajonta saqerqa. Hermanotaj nerqa: “Gobierno prohibiwasqaykurayku, runasqa Jehovaj testigosninmanta astawan yachayta munanku. Chayrayku ashkha estudiosta tarini”, nispa. Hermanosninchejta autoridades Diosta yupaychajta niña saqesqankoqa, wajkunatapis yanaparqa. Chay suyumanta uj anciano nerqa: “Jehovamanta karunchakojkunapis watejmanta reunionesman jamushanku, predicajpis llojsishanku”, nispa.

7. 1) ¿Levítico 26:36, 37 versiculosmanta runas jinachu kananchej tiyan? 2) Autoridades Diosta niña yupaychajta saqewajtinchej, ¿imatá ruwasun?

⁷ ¿Imaraykutaj enemigosninchej Jehovata yupaychajta mana saqewanchejchu? Paykunaqa  Jehovata niña sirvinapaj manchachiyta munawanchej. Chaypajqa ichapis llullasta contranchejpi parlanqanku, chayri wasinchejman policiasta kachamonqanku publicacionesta maskʼanankupaj. Chayrí ichá juzgadoman apawasun, manaqa carcelman wisqʼachiwasun. Enemigosninchejqa wakin hermanosninchejta carcelpi wisqʼaspa, mancharichiyta munawanchej. Paykunata manchachikuspaqa, Jehovata manchi manchilla yupaychasunman, ichá niña yupaychasunmanpischu. Ama kanachu Levítico 26:36, 37 (leey) versiculosmanta runas jinaqa. Ama saqenachu manchachikuyninchej Diosmanta karunchanawanchejta, nitaj wasanchachinawanchejtapis. Tatanchej Jehovapi tukuy sonqo atienekuna, amataj manchachikuywan atipachikunachu (Sal. 27:1). Paypa yanapayninta mañakuna. Ajinamanta ni mayqen gobiernopis, paymanta tʼaqawasunchu, may atiyniyoj kajtinpis (Heb. 13:6).

8, 9. 1) ¿Imatá sapa tata chayri qosa ajllanan tiyan? 2) Niraj imatapis ruwashaspa, ¿imapitaj piensarisunman?

⁸ Autoridades Jehová Diosta niña yupaychajta saqewajtinchej, ichapis payta sirvinapaj waj suyuman ripuyta munasunman. Chayta ruwayqa sapa ujninchejmanta kashan. Wakin hermanosqa, ichapis ñaupa cristianos jina ruwayta munankuman. Chay cristianospa enemigosninkoqa, Estebanta wañuchiytawan cristianosta qhatiykachayta qallarerqanku. Chayraykutaj ashkhas, waj llajtasman riporqanku: Judeaman, Samariaman, Feniciaman, Chipreman, Antioquiaman ima (Mat. 10:23; Hech. 8:1; 11:19). Waj hermanostaj, ichapis apóstol Pablo jina ruwayta munankuman. Pabloqa kausayninta wañuy pataman churaspapis, may lugarespichus cristianosta qhatiykacharqanku chaypi qhepakorqa. Payqa chay lugarespi qhepakorqa sumaj willaykunata willananrayku, hermanosta kallpachananrayku ima (Hech. 14:19-23).

⁹ ¿Imatá ñaupa cristianosmanta, Pablomanta ima yachakusunman? Sapa tata chayri qosa, imatachus familianpaj ruwananta ajllanan tiyan. Niraj imatapis ruwashaspa, Jehová Diospa yanapayninta mañakunan tiyan. Payqa qhawarinan tiyan, imaynachus familian kashasqanta. Chantá piensarinan tiyan, waj llajtaman ripunanku familianpaj allinchus manachus kananta. Sapa cristiano imatachus “ruwananta” ajllanan tiyan (Gál. 6:5). Chay ajllasqankutataj, mana qhawarananchejchu tiyan.

10. ¿Imatataj sucursalmanta hermanos, ancianos ima niwasunchej?

¹⁰ Autoridades Jehová Diosta manaña sirvejta saqewajtinchej, ¿imatá ruwasun payta yupaychanallapajpuni? Sucursalqa ancianosnejta yuyaychawasun, kamachiwasuntaj. Ajinamanta yachasun imaynatachus publicacionesta japʼinanchejta, imaynatachus tantakunanchejta, predicananchejta ima. Sucursalmanta hermanos ancianoswan mana parlayta atenqankuchu chayrí, ancianos niwasun imaynatachus Diosta sirvinallatapuni. Paykunaqa Bibliaman jina, publicacionesman jinataj yuyaychawasun (Mat. 28:19, 20; Hech. 5:29; Heb. 10:24, 25).

11. 1) Jehová Dios yachachiykunasninta, ¿faltachiwasunchu? 2) Autoridades prohibiwajtinchej, ¿imatá ruwananchej tiyan?

¹¹ Jehová Diosqa niwanchej, yachachiykunasninta mana faltachinawanchejta (Isa. 65:13, 14; Luc. 12:42-44). Diospa llajtanqa sinchʼita sayananchejpaj, imatachus necesitasqanchejta qollawasunpuni. Ama chaymanta iskayrayanachu. Autoridades niña predicajta, nitaj tantakojta saqewajtinchejqa, Biblianchejta,  publicacionesninchejtawan sumajta pakananchej tiyan. Chaykuna papelpi chayri celularpi kajtinpis, ama mayllapipis saqerparinachu, wajkuna facilta tarinankupaj jinaqa. Creeyninchej sinchʼillapuni kananpajqa, tukuy atisqanchejta ruwananchej tiyan.

12. Autoridades manaña tantakojta saqewajtinchej, ¿imata ruwananchejtataj ancianos niwasun?

¹² Autoridades manaña tantakojta saqewajtinchej, ¿imaynatá tantakullasunpuni? Ancianosqa runaswan mana reparachikunanchejpaj jina tantakuykunata wakichenqanku. Paykunaqa ichapis niwasun, juchʼuy grupitosllapi tantakunanchejta. Chantapis ichá niwasun mana kikin lugarllapipunichu, nitaj kikin horasllapipunichu tantakunanchejta. ¿Imatataj ruwasunman tantakuykunaman rejkunata mana japʼichinapaj? Tantakuyman rishaspa, ripushaspapis, mana jatunmanta parlanachu. Chantapis ichá vistikunanchej kanqa, runaswan mana reparachikunanchejpaj jina.

13. Unión Sovieticapi hermanosninchejmanta, ¿imatá yachakusunman?

¹³ Gobiernos niña predicananchejta nejtinku, ¿imatá ruwasun predicanallapajpuni? Mana tukuy lugarespichu kikinta ruwakonqa. Jehová Diosninchejta munakusqanchejrayku, Gobiernonmanta tukuyman willamuyta munanchej. Chayrayku sumajta yuyaychakuspa predicallasunpuni (Luc. 8:1; Hech. 4:29). Emily Baran sutiyoj warmeqa, Unión Soviética nisqapi hermanosninchej imaynatachus predicasqankumanta parlarqa. Pay nerqa: “Gobierno amaña pipis predicananta kamachejtin, Jehovaj testigosnenqa vecinosninkuman, trabajonkumanta compañerosninkuman, amigosninkuman ima predicallarqankupuni. Chayrayku sinchʼita llankʼanankupaj carcelesman apasqas karqanku. Chaypipis predicallarqankupuni”, nispa. Unión Sovieticamanta hermanosninchejqa, gobiernos manaña predicanankuta nejtinkupis, predicallarqankupuni. Suyunchejpi autoridades niña predicananchejta kamachiwajtinchej, noqanchejpis chay hermanos jina ruwana.

14. Salmo 39:1 nisqanman jina, ¿imatá ruwasunman?

¹⁴ Ama wajkunaman imatapis willanallachu. Gobiernos Diosta yupaychajta niña saqewajtinchej, kayta yuyarikuna: “Uj tiempoqa tiyan chʼinyanapaj, uj tiempotaj parlanapaj” (Ecl. 3:7). Ama ni piman willanachu: hermanosninchejpa sutisninkuta, maypichus tantakusqanchejta, imaynatachus predicasqanchejta, imaynatachus publicacionesta japʼisqanchejta ima. Chay imastaqa ama autoridadesman willanachu. Nillataj chayta willananchejchu tiyan, suyunchejpi chayri waj suyuspi kaj familiasninchejman, nitaj amigosninchejmanpis. Chayta ruwasunman chayqa, ichapis autoridadeswan hermanosninchejta japʼichisunman (Salmo 39:1 leey).

15. 1) ¿Imatataj Satanás ruwayta munanqa? 2) ¿Imatá ruwasunman chaypi mana urmanapaj?

 ¹⁵ Ama imapis tʼaqanachinawanchejta saqenachu. Satanasqa uj familiata phiñanachispa, tʼaqanachiyta atisqanta yachan (Mar. 3:24, 25). Chayrayku payqa, tʼaqanachinawanchejpaj tukuy imata ruwanqa. Satanasqa noqanchejpurata maqanachiyta munawanchej, paywan maqanakunamantaqa.

16. ¿Imatá hermana Gertrudmanta yachakusunman?

¹⁶ Creeypi sinchʼi sayasqa cristianospis, Satanaspa trampanpi mana urmanankupaj sumajta qhawakunanku tiyan. Iskay ajllasqa cristianasmanta parlarina. Ujqa Gertrud Poetzinger sutikun, ujnintaj Elfriede Löhr sutikun. Paykunaqa nazis nisqa partido kamachishajtin, waj hermanaswan khuska carcelpi jina wisqʼasqas karqanku. Hermana Elfriedeqa chaypi kaj hermanasta parlasqanwan sumajta kallpachaj. Hermana Gertrudtaj payta envidiakuyta qallarisqa. Jinapis reparakuytawan Jehová Diosmanta yanapata mañakusqa. Hermananchej Gertrud nerqa: “Mana tukuychu kikin kasqanchejta entiendenanchej tiyan. Wakenqa noqanchejmanta nisqa, aswan sumajtapuni imatapis ruwanqanku chayri astawan ruwanasta japʼenqanku”, nispa. ¿Imatá hermana Gertrud ruwasqa, Elfriedeta niña envidiakunanpaj? Payqa hermana Elfriedepa allin ruwasqasninta astawan qhawasqa. Ajinamanta paywan allinyakapusqa. Tiempowantaj iskayninku chay carcelmanta llojsiporqanku, Jehová Diostataj wañupunankukama sirverqanku. Noqanchejpis hermanosninchejwan phiñanasqa kaspaqa, paykunawan allinyakapunapaj kallpachakuna. Chayta ruwasun chayqa, qhatiykachasqa kajtinchej mana tʼaqanakusunchu (Col. 3:13, 14). 

17. ¿Imaraykutaj ñaupajman pusaj hermanosta kasukunanchejpuni tiyan?

¹⁷ Kamachiykunata kasukuna. Ñaupajman pusawanchej chay hermanosta kasukusun chayqa, mana problemaspi rikukusunchu (1 Ped. 5:5). Uj suyupi, gobiernoqa hermanosninchejta niña Jehovata sirvejta saqenchu. Chay suyupi ñaupajman pusaj hermanosqa, hermanosta kamacherqanku ni revistasta, ni tratadostapis runasman saqenankuta. Jinapis uj precursorqa mana kasukorqachu. Mana kasukusqanrayku, ¿imataj karqa? Paywan waj hermanoswan predicaj llojsejtinku, gobiernoj kachasqan runa paykunata qhatiykusqa, saqerqanku chay publicacionestapis runasmanta qhechusqa. Chantá hermanosqa predicayta tukusqankutawan, policiawan japʼichikorqanku. ¿Imatá chay yachachiwanchej? Ñaupajman pusajkunata kasukunanchej kasqanta, imatachus kamachiwasqanchej mana allinchu rijchʼawajtinchejpis. Jehová Diosqa paykunata kasukojtillanchej bendeciwasun (Heb. 13:7, 17).

18. ¿Imaraykutaj mana allinchu kamachiykunata qhasita rikhurichiy?

 ¹⁸ Ama kamachiykunata qhasita rikhurichinachu. Ancianos chayta ruwanqanku chayqa, hermanosman uj llasa qʼepita churanqanku. Checoslovaquia suyupi hermanosninchejta qhatiykachasqankumanta parlarina. Chay tiempomanta yuyarikuspa, Juraj Kaminský sutiyoj hermano nin: “Ashkha ancianos presochasqa karqanku. Congregacionesta, circuitostawan ñaupajman apanankupaj qhepakoj hermanostaj, ashkha kamachiykunata rikhurichiyta qallarerqanku. Paykunaqa hermanos imatachus ruwanankumanta, imatatajchus mana ruwanankumanta listasta ruwarqanku”, nispa. Jehová Diosqa mana ni piman atiyta qonchu, wajkunapaj kamachiykunata churananpaj. Kamachiykunata qhasita churajkunaqa, mana hermanosta yanapankuchu. Astawanqa creeyninkumanta patrones jina kanku (2 Cor. 1:24).

19. Satanás tukuy imata ruwajtinpis, ¿imaynatá 2 Crónicas 32:7, 8 Jehovapi atienekunapaj yanapawanchej?

¹⁹ Enemigonchej Kuraj Supayqa, Jehovata sirvisqanchejrayku qhatiykachawasunpuni (1 Ped. 5:8; Apo. 2:10). Satanaswan, paypa atiyninpi kajkunawanqa, Jehovata niña yupaychananchejpaj tukuy imata ruwanqanku. Jinapis ama manchariywan atipachikunachu (Deu. 7:21). Jehová Diosqa noqanchejwan kashan. Autoridades niña predicajta, nitaj tantakojta saqewajtinchejpis, pay yanapawasun (2 Crónicas 32:7, 8 leey).

20. ¿Imatataj ruwayta munanchej?

²⁰ Ñaupa tiempomanta hermanosninchej jina ruwana. Paykunaqa chay tiempomanta kamachejkunaman nerqanku: “Qankunaña qhawariychej, Diospa ñaupaqenpi qankunata kasukunaykuchus chayri Diosta kasukunaykuchus aswan allin kasqanta. Noqaykoqa mana chʼinlla kayta atiykumanchu, willanaykupuni tiyan imastachus rikusqaykuta, uyarisqaykutapis”, nispa (Hech. 4:19, 20).