1, 2. ¿Imatataj Jehová llajtan wiñananmanta nerqa?

JALLPʼANTINPI uj qotu runas, Jehovata munakunku, yupaychaytataj munanku. Chay qotu runasqa Jehovaj testigosnin kanku. Pantaj runas kajtinkupis Jehovaqa atiyninwan yanapan, yuyaychan ima. Qhawarinachej imaynatachus paykunata Jehová bendecisqanta.

² Kay 1914 watapi pisi runaslla Jehovata yupaychaj kanku. Jehovataj paymanta willamunankupaj kallpachakusqankuta bendicerqa. Chayraykutaj ashkha runas Diosmanta yachakorqanku, Jehovaj testigosninmantaj tukorqanku. Jehovaqa imaynatachus llajtan wiñananmanta jinata nerqa: “Kay pisi puchoj runasqa waranqasta miranqanku; aswan mana kasuy runaspis uj jatun nacionman tukonqanku. Noqa Tata Diosmin chaytaqa nini. Chay imasqa usqhayta juntʼakonqapuni”, nispa (Isa. 60:22). Cheqamantapuni kay profecía kay tiempopi juntʼakushan. Jehovaj testigosnenqa ashkha kanku wakin suyuspi mashkha runaschus tiyakusqankumanta nisqaqa astawanraj.

3. ¿Imaynatá Diospa llajtan munakuyta rikucherqa?

³ Kay qhepa pʼunchaykunapi, Jehovaqa kamachisninta yanapan  purajmanta astawan munanakunankupaj. “Diosqa munakuymin”, kamachisnintaj pay jina ruwanku (1 Juan 4:8). Jesusqa yachachisqasninman ‘purajmanta munanakunankuta’ kamacherqa. Nerqataj: “Qankunachus munanakunkichej chayqa, tukuy runas yachanqanku yachachisqasniy kasqaykichejta”, nispa (Juan 13:34, 35). Kunanpis Diospa kamachisnenqa purajmanta munanakusqankuta rikuchillankutaj, guerras kajtinpis. Sutʼincharinapaj, Iskay kaj Guerra Mundialpi 55 millones runas jina wañorqanku. Chaywanpis Jehovaj llajtanqa chay wañuchinakupi mana chhapukorqachu (Miqueas 4:1, 3 leey). Ajinamantataj Diospa llajtanqa “mana juchayojchu” karqa runas wañusqankumanta (Hech. 20:26, 27).

4. ¿Imaraykutaj Jehovaj llajtan wiñasqan tʼukunapaj jina?

⁴ Kay tiempopi Diospa llajtanqa wiñashallanpuni, ‘kay pachaj diosnin’ Satanás enemigon kajtinpis (2 Cor. 4:3, 4). Satanasqa kay pachamanta gobiernosnejta, radionejta, telenejta, Internetnejta ima tukuy imata ruwan mana willamunanchejpaj. Jinapis ni imata ruwayta atinchu sayachinanpaj. Yachantaj paypaj “pisi tiempollaña kasqanta”, chayraykutaj tukuy imata ruwashallanpuni Jehovata niña yupaychananchejpaj (Apo. 12:12).

5. ¿Imaraykú wajkuna wakin kutis sonqonchejta nanachiwasunman? (23 paginapi dibujota qhawariy).

⁵ Noqanchejqa Diosta, runa masinchejta ima munakuy may sumaj kasqanta yachanchej. Jesús nerqa: “Señor Diosniykitaqa munakunki tukuy sonqoykiwan, tukuy almaykiwan, tukuy yuyayniykiwantaj. Chaymin leypa kamachisqasninmanta aswan kuraj, ñawpaj kajtaj. Qhepan kaj kamachisqapis ñawpaj kajman rijchʼakullantaj: Runa masiykita munakunki qan kikiykita jina”, nispa (Mat. 22:35-39). Jinapis Bibliaqa Adán juchallikusqanrayku tukuyninchej juchasapas nacekusqanchejta nin (Romanos 5:12, 19 leey). Chayrayku ichá mayqen hermanollapis sonqonchejta nanachinawanchejpaj jina imatapis ruwanqa chayri nenqa. ¿Imatataj chay kutispi ruwasun? ¿Jehovata munakullasunpunichu? ¿Cheqa sonqollapunichu kasun Jehovaman, hermanosman ima? Bibliaqa nin Diospa wakin kamachisnin wajkunaj sonqonkuta nanachinankupaj jina ruwasqankuta chayri nisqankuta. Kunantaj qhawarina imatachus paykunamanta yachakunanchejta.

6. ¿Imaraykú ninchej Elí wawasninta mana kʼamisqanta?

⁶ Elijpa kausayninpi tʼukurina. Payqa Israelpi kuraj kaj sacerdote karqa, iskaynin wawasnintaj Diospa leyesninta mana kasukorqankuchu. Biblia nin: “Elijpa churisnenqa millay kawsayniyoj karqanku, manataj [Jehovata] manchachikojchu kanku”, nispa (1 Sam. 2:12, 13). Eliqa yacharqa wawasnin millay imasta ruwashasqankuta, jinapis tumpallata kʼamerqa. Tiemponmantaj Jehovaqa payta, wawasninta ima castigarqa. Niñataj saqerqachu mirayninmanta ni pi kuraj kaj sacerdote kananta (1 Sam. 3:10-14). Elijpa tiemponpi kausashasqanchejpi tʼukurina, reparanchejtaj Elí wawasninta sajra imasta ruwajta saqeshallasqanta. ¿Imatá ruwasunman karqa? ¿Creeyninchej pisiyanantachu, Jehovamanta karunchanawanchejtachu saqesunman karqa?

7. ¿Ima juchatataj David ruwarqa, chantá imatá Jehová ruwarqa?

⁷ Davidqa kʼacha kaykunasniyoj karqa, chayraykutaj Jehová mayta munakorqa (1 Sam. 13:13, 14; Hech. 13:22). Jinapis Davidqa jatun juchapi urmarqa. Uj kuti Uriaspa warmin Betsabewan puñuykorqa, Urías maqanakupi kanankama. Chay warmeqa  onqoj rikhurerqa. Davidtaj imatachus Betsabewan ruwasqanta ni pi yachananta munaspa, Uriasta wajyacherqa, wasinman kachananpaj. Munarqataj Urías, Betsabewan puñuykunanta, chay wawa Uriaspata kasqanta runas yuyanankupaj. Uriastajrí mana wasinman rerqachu. Chayraykutaj Davidqa maqanakupi wañunanpaj ñaupajman churacherqa. Chayta ruwasqanraykutaj pay, familian ima mayta ñakʼarerqanku (2 Sam. 12:9-12). Jinapis Jehovaqa khuyarqa, perdonarqa ima. Yacharqa cheqan kajta David ruwayta munasqanta (1 Rey. 9:4, 5). Chay tiempopi kausakusunman karqa chay, David ruwasqantataj yachasunman karqa chay, ¿imatá ruwasunman karqa? ¿Niñachu Jehovata sirvisunman karqa?

8. 1) ¿Jesusman nisqanta Pedro juntʼarqachu? Sutʼinchay. 2) Pedro pantajtinpis, ¿imaraykú Jehová waj ruwaykunata qollarqapuni?

⁸ Apóstol Pedromantapis mayta yachakullasunmantaj. Jesusqa payta apostolnin kananpaj ajllarqa. Jinapis wakin kutis Pedroqa mana allin imasta parlarqa chayri ruwarqa. Sutʼincharinapaj, uj kuti Jesusman nerqa wajkuna saqerparejtinkupis manapuni sarqerparinanta (Mar. 14:27-31, 50). Chaywanpis Jesusta presochanankupaj japʼisqankutawan, tukuynin apostolesnin saqerparerqanku, Pedropis. Kinsa kutistataj Pedroqa Jesusta mana rejsisqanta nerqa (Mar. 14:53, 54, 66-72). Chayta ruwasqanraykutaj may phutisqa kasharqa. Chayrayku Jehovaqa perdonarqa, waj ruwaykunatapis qollarqapuni. Chay tiempopi Jesuspa yachachisqasnin kasunman karqa chay, Pedroj ruwasqantataj yachasunman karqa chay, ¿Jehovapi atienekullasunmanpunichu karqa?

9. ¿Imaraykú Jehová cheqan kajta ruwananpi atienekunchej?

⁹ Elimanta, Davidmanta, Pedromanta ima yachakunchej jina, Jehovaj wakin kamachisnin sajra imasta ruwaspa wajkunata ñakʼaricherqanku. Kay tiempopi kikillantataj pipis pantajtin, ¿imatataj ruwasunman? ¿Niñachu tantakuykunaman risun? ¿Jehovamanta, llajtanmanta ima karunchakapusunchu? Chayrí, ¿yuyarikusunchu Jehová  khuyakuyniyoj kasqanta, juchallikojman pesachikunanpaj tiempota qoshasqanta ima? Wakin kutisqa juchallikojkunaqa Jehovaj khuyakuyninta qhesachanku, nitaj juchankumantapis pesachikunkuchu. Jehovaqa maychus tiemponpi cheqan kajta ruwanqa chay runasta llajtanmanta qharqospa. ¿Chayta Jehová ruwananpi atienekusunchu?

10. Judas Iscariote, Pedro ima pantajtinkupis, ¿imatá Jesús yacharqa?

¹⁰ Bibliaqa Diospa ashkha cheqa sonqo kamachisninmanta parlan. Paykunaqa wajkuna pantajtinkupis Jehovaman, llajtanman ima cheqa sonqollapuni karqanku. Sutʼincharinapaj, Jesusqa tatanmanta sutʼiyanankama mañakuytawan 12 apostolesninta ajllarqa. Chaywanpis apostolesninmanta ujnin, nisunman Judas Iscariote wasancharqa. Apóstol Pedropis payta mana rejsisqanta nerqa (Luc. 6:12-16; 22:2-6, 31, 32). Jesusqa yacharqa Judas Iscariote, Pedro ima ruwasqankumanta mana Jehovachu, nitaj wakin yachachisqasninchu juchayoj kasqankuta. Chayrayku tatanpa qayllallanpipuni karqa, tukuy sonqotaj sirvillarqapuni. Ajinata ruwasqanraykutaj Jehovaqa wañuymanta kausaricherqa. Aswan qhepamantaj gobiernonmanta Rey kananpaj churarqa (Mat. 28:7, 18-20).

11. ¿Imatataj Jehová nerqa kay tiempopi kamachisninmanta?

¹¹ Jesusqa yacharqa imasraykuchus Jehovapi, llajtanpi ima atienekuyta. Noqanchejpis pay jinallataj yachanchej imasraykuchus Jehovapi, llajtanpi ima atienekuyta. Kay qhepa pʼunchaykunapi Jehová yuyaychashawasqanchejta sutʼita rikunchej. Jallpʼantinpi cheqa kajmanta willamunapajtaj yanapashawanchej. Chay llankʼaytataj noqallanchej ruwashanchej. Jehová yachachiwasqanchejraykulla ujchasqas, kusisqastaj kashanchej. Jehová nerqa: “Kamachisneyqa tukuy sonqowan sumajta takirikonqanku”, nispa (Isa. 65:14).

12. ¿Imaynatá wajkunaj pantasqankuta qhawananchej tiyan?

¹² Mayta kusikunchej Jehová yuyaychawasqanchejrayku, sumaj imasta ruwanapaj yanapawasqanchejrayku ima. Kay pachanmanta runastajrí, mana kusisqaschu kanku, nitaj uj suyakuyniyojchu kanku. Chayrayku mana allinchu kanman pi hermanollapis pantajtin Jehovamanta, llajtanmanta ima karunchakunanchej. Astawanpis Jehovaman cheqa sonqo kana, yuyaychawasqanchejtapis kasukunallapuni. Chantapis yachakuna imaynatachus wajkunaj pantasqankuta qhawanata, imatachus chay kutispi ruwanata ima.

13, 14. 1) ¿Imaraykutaj tukuywan pacienciakunanchej tiyan? 2) ¿Imatataj ama qonqananchejchu tiyan?

¹³ ¿Imatataj ruwasun uj hermano sonqonchejta nanachinawanchejpaj jina imatapis nejtin chayri ruwajtin? Bibliaqa jinata yuyaychawanchej: “Ama imamantapis usqhayllata phiñakuychu, imaraykuchus phiñakoyqa wampu runasllapaj allin”, nispa (Ecl. 7:9). Tukuypis juchasapas kanchej, pantanchejtaj. Chayrayku mana suyasunmanchu hermanosninchej cheqan kajtapuni ruwanankuta chayri parlanankuta. Nillataj allinchu kanman pantasqasninkupi yuyanallanchejpuni. Pantasqallankupipuni yuyasun chayqa, ichapis Jehová Diosta niña kusisqachu yupaychasunman. Jehovapi creeyninchejtaj pisiyanman, Jehovaj llajtanmantataj karunchakusunman. Ajinamantataj niña Jehovata yupaychayta atisunmanchu, niñataj mosoj pachapipis kausakuyta suyakusunmanchu.

 ¹⁴ Jehovata kusisqas yupaychanallapajpuni, uj suyakuyniyoj kanallapajpuni ima, Jehová kay nisqanta ama qonqanachu: “Noqaqa mosoj cielota, mosoj kay pachatawan ruwasaj. Chay ñawpaj kajkunaqa qonqasqa kanqa, manapunitaj yuyarisqachu kanqa”, nispa (Isa. 65:17; 2 Ped. 3:13). Jehovaqa chay bendicionesta qowasun, payman cheqa sonqollapuni kajtinchej.

15. Pillapis contranchejpi juchallikojtin, ¿imata ruwananchejtataj Jesús nerqa?

¹⁵ Niraj paraisopichu kausakushanchej. Chayrayku pillapis sonqonchejta nanachiwajtinchej, imatachus Jehová ruwananchejta munasqanpi t’ukurina. Jesús nerqa: “Sichus contraykichejta juchallikojkunata perdonankichej chayrí, ajinallatataj janaj pachapi kashaj Tataykichejpis juchasniykichejta pampachanqa. Runas contraykichejta juchallisqankutachus mana perdonankichej chayqa, Dios Tataykichejpis manallataj juchasniykichejta pampachanqachu”, nispa. Pedro, Jesusta qanchis kutillatachus pitapis perdonana kasqanta tapojtin, Jesús kuticherqa: “Mana qanchis kutillatachu; astawanqa, qanchis chunka kuti qanchiskamaraj”, nispa. Jesusqa yachachiwanchej wajkunata contranchejpi juchallikojtinku perdonana kasqanta (Mat. 6:14, 15; 18:21, 22).

16. ¿Imatá Josemanta yachakusunman?

¹⁶ Wajkuna sonqonchejta nanachiwajtinchej, José ruwasqanmanta yachakusunman. Jacobqa, Raquelwan iskay wawasniyojlla karqa, José, Benjamín ima. Chantá 10 wawasnin kallarqataj. Jinapis Joseta astawan munakusqanrayku, hermanosnin Joseta chejnikuspa esclavota jina venderparqanku, Egiptomantaj apasqa karqa. Unayninmantaj Egiptomanta rey, Joseta paypa qhepanta aswan atiyniyoj runa kananpaj chay llajtapi churarqa. Chay reyqa José allin imasta ruwasqanmanta mayta t’ukorqa. Tiemponmantaj Josej hermanosnin Egiptoman rerqanku mikhunata rantinankupaj, Canaanpi mana mikhuna kasqanrayku. Joseta hermanosnin rikuspa mana repararqankuchu José kasqanta. Josetajrí hermanosnin kasqankuta repararqa. Nitaj vengakorqachu, mayta ñakʼarichisqankumanta. Astawanpis pruebaman churarqa ñaupajta jinallapunichus manachus kasqankuta yachananpaj. Manaña ñaupajta jinachu kasqankuta reparaytawantaj, José kasqanta willarqa. Unayninmantaj Joseqa paykunata sonqocharqa, nerqataj: “Ama llakikuychejchu. Noqaqa mikhunata qosqaykichej mikhunaykichejpaj, wawasniykichej mikhunankupaj ima”, nispa (Gén. 50:21).

17. ¿Imatá ruwasun wajkuna pantajtinku?

¹⁷ Tukuypis pantaj runas kasqanchejrayku wajkunaj sonqonkuta nanachisunman. Pillatapis sonqonta nanachisqanchejta reparanchej chayqa, Biblia nisqanman jina ruwanachej. Perdonta mañakuna, allinyakuytataj mask’ana (Mateo 5:23, 24 leey). Wajkuna perdonanawanchejta mayta munanchej, ¿icharí? Chayrayku noqanchejpis perdonananchej tiyan. Colosenses 3:13 nin: “Ujkuna ujkunawan paciencianakuspa, purajmanta perdonanakuychej, sichus pipis wajpa contrampi imatapis ruwan chayqa. Imaynatachus [Jehová] juchasniykichejta perdonarqa, ajinallatataj qankunapis ujkunata perdonaychej”, nispa. Cheqamantapuni hermanosninchejta munakunchej chayqa, mana phiñasqallapunichu kasun sonqonchejta nanachiwasqanchejmanta (1 Cor. 13:5, 6). Wajkunata perdonasun chayqa, Jehovapis perdonawasun. Chayrayku wajkuna pantajtinku, paykunamanta khuyakunachej, imaynatachus Jehová khuyakuwanchej ajinata (Salmo 103:12-14 leey).