1, 2. 1) ¿Imaynatá Jehovaj testigosnin Bibliata qhawanchej? 2) Bibliamanta, ¿mayqen librotaj leey gustasunki?

JEHOVAJ TESTIGOSNENQA Bibliata jatunpaj qhawanchej. Imaraykuchus Bibliapeqa atienekunapaj jina yachaychikuna kan, chantapis, sonqochawanchej, suyakuytataj qowanchej (Rom. 15:4). Bibliaqa mana runaj palabranchu, manaqa ‘Diospa Palabran’ (1 Tes. 2:13).

² Ichá Bibliaj mayqen librollanpis leey mayta gustawanchej. Wakinmanqa Mateo, Marcos, Lucas, Juan librosta leeriy mayta gustan. Imaraykuchus chay librosqa Jesusmanta parlashan, chaytaj Jehovaj kʼacha kaykunasninta rejsinapaj yanapawanchej (Juan 14:9). Wakinmantaj profeciasmanta parlaj librosta leey gustan, Apocalipsis libro jina. Chay libroqa ‘imaschus tumpamantawan juntʼakunanmanta’ parlashan (Apo. 1:1). Wakintataj mayta sonqochan Salmos librota leey, wakintaj mayta kusikunku Proverbios librota leerispa imaraykuchus sumaj yuyaychaykunata tarinku. Cheqamantapuni nisunman Bibliaqa tukuypaj kasqanta.

3, 4. 1) ¿Imaynatá publicacionesninchejta qhawanchej? 2) ¿Ima publicacionestaj tiyan jovenespaj, tataspaj, Jehovata mana yupaychajkunapaj ima?

³ Bibliata jatunpaj qhawasqanchejrayku, Bibliamanta orqhosqa  publicacionestapis jatunpaj qhawallanchejtaj. Jehovaqa mikhunata jina qowanchej librosta, folletosta, revistasta, waj publicacionesta ima. Chaykunataj paywan sumaj amigos kanapaj, sinchʼi creeyniyoj kanapaj ima yanapawanchej (Tito 2:2).

⁴ Ashkha publicacionesninchej Jehovaj testigosninpaj ruwakun. Chaywanpis wakin publicacionesqa jovenespaj, tataspaj ima ruwakullantaj. Chantá Internetpi jw.org nisqapi ashkha yachaqanas, videos ima wakichisqa kashan Jehovata mana yupaychaj runaspaj. Chay chhika yanapas kasqanqa sutʼita rikuchin, Jehová llajtanman cheqa yachachiykunata ashkhata qonanta nisqan juntʼakushasqanta (Isa. 25:6).

5. ¿Imatataj sutʼita yachanchej?

⁵ Tukuypis munasunman Bibliata, publicacionesta ima leenapaj astawan tiempoyoj kayta. Ichapis mana tukuy publicaciones chayamusqantachu sumajta leerinchej. Chaywanpis sutʼita yachanchej Bibliata, publicacionesninchejta leenapaj, estudianapaj ima tiempochakojtinchej Jehová mayta kusikunanta (Efe. 5:15, 16). Jinapis uj imamanta sumajta qhawarikunanchej tiyan. ¿Imamanta parlashanchej?

6. ¿Ima yuyaytaj Jehová tukuy ima yachachiykunata qowasqanchejwan mana yanapachikojta saqewasunmanchu?

⁶ Mana sumajta qhawarikusunchu chayqa, ichá yuyasunman Bibliamanta wakin cheqas chayri wakin publicaciones mana noqanchejpajchu kasqanta. Sutʼincharinapaj, ¿imatataj ruwasun Bibliamanta wakin cheqas mana chʼampayninchejpaj jinachu kajtin? Chayrí, ¿imatá ruwasun uj publicación mana noqanchejpajchu llojsejtin? ¿Pata patallantachu leerparisun? Chayrí, ¿nichu leellasunpis? Chayta ruwaspaqa, sumaj yuyaychaykunata Jehová qoshawasqanchejta mana yachasunchu. ¿Imatataj ruwasunman chay tojllapi mana urmanapaj? Yuyarina Jehová tukuy chay yachachiykunata qoshawasqanchejta. Biblia nin: “Noqamin Señorniyki Tata Dios kani; noqa yachachiyki imachus qampaj allin kasqanta”, nispa (Isa. 48:17). Kay yachaqanapeqa kinsa yuyaychaykunamanta yachakusun, mayqenkunachus yanapawasun Jehová tukuy ima yachachiykunata mikhunata jina qowasqanchejwan sumajta yanapachikunapaj.

7. ¿Imaraykú Bibliata tukuy sonqo leenanchej tiyan?

⁷ Bibliata tukuy sonqo leena. Cheqamantapuni nisunman Bibliamanta wakin cheqasqa uj runapaj chayri ashkha runaspaj qhelqakusqanta. Chaywanpis Bibliaqa “Diosmanta tukuy Qhelqasqaqa paypa yuyaychasqan kaspa, may sumaj kasha[sqanta]”, nin (2 Tim. 3:16). Chayrayku Bibliata tukuy sonqo leena tiyan. Uj hermano nin: “Bibliata leeshaspa, reparani leeshasqaymanta ashkha imasta yachakuyta atisqayta. Chayrayku sumajta estudiani”, nispa. Niraj Bibliata leeshaspa, Jehovamanta yanapata mañakuna tukuy sonqo leenapaj, yachayta qonawanchejpaj ima. Ajinamanta imatachus Jehová yachakunanchejta munasqanta yachakusunchej (Esd. 7:10; Santiago 1:5 leey).

8, 9. 1) Bibliata leeshaspa, ¿imastataj tapurikusunman? 2) Ancianospaj Jehová kamachiykunata churasqan, ¿imatataj Jehovamanta yachachiwanchej?

⁸ Tapurikuna. Bibliata leeshaspaqa, kay kinsa tapuykunata tapurikuna: “¿Imatataj Jehovamanta kay yachachiwan? ¿Imaynatataj kay leesqay yanapawan? ¿Imaynatataj kay leesqaywan wajkunata yanapayman?”, nispa. Bibliata leeshaspa kay tapuykunapi tʼukurisun chayqa, sumajta yanapachikusun.  Sutʼincharinapaj, ancianos ima kamachiykunatachus juntʼanankupi tʼukurina (1 Timoteo 3:2-7 leey). Mana tukuychu ancianos kasqanchejrayku, ichá yuyasunman chay versiculosqa mana noqanchejpajchu kasqanta. Chaywanpis chay kinsa tapuykunapi tʼukurisun chayqa, chay versiculosmanta mayta yachakuyta atisqanchejta reparasun.

⁹ “¿Imatataj Jehovamanta kay yachachiwan?”. Jehovaqa ancianospaj kamachiykunata churan. Suyantaj chayta sumajta juntʼanankuta. Imaraykuchus congregacionqa Jehovapaj may valorniyoj. Bibliataj “wawanpa yawarninwan” Jehová rantisqanta nin (Hech. 20:28, NM). Chayrayku Jehovaqa munan, ancianos wajkuna paykunamanta yachakunankupaj jina kanankuta. Chantapis ancianosqa Jehovaman cuentata qonanku kanqa, imaynatachus hermanosta qhawashasqankumanta. Jehovaqa munan ancianos sumajta qhawanawanchejta, ni imamanta manchachikunanchejta ima (Isa. 32:1, 2). Jehová kamachiykunata ancianospaj churasqanta leespaqa, yachakunchej Jehová noqanchejmanta mayta llakikusqanta.

10, 11. 1) Ancianospaj Jehová kamachiykunata churasqanta leey, ¿imaynatá yanapawasunman? 2) ¿Imaynatá chay kamachiykunawan wajkunata yanapasunman?

¹⁰ “¿Imaynatataj kay leesqay yanapawan?”. Ancianosqa Jehová ancianospaj kamachiykunata churasqanta sapa kuti qhawarinanku tiyan, imaspichus llankʼananku kasqanta reparanankupaj, chayman jinataj ruwanankupaj. Ancianos jina llankʼayta munaj hermanosqa, ancianospaj Jehová churasqan kamachiykunata juntʼanankupaj mayta kallpachakunanku tiyan (1 Tim. 3:1). Chaywanpis chay kamachiykunapi tʼukureyqa tukuyta yanapawasunman. Sutʼincharinapaj, Jehovaqa suyan tukuy kamachisnin “kʼachas” kanankuta, “maychus kajta ruwaspa” kausakunankutataj (Fili. 4:5; 1 Ped. 4:7). Ancianos kʼachas kajtinkoqa, paykunamanta mayta yachakusunman, “paykuna jinataj Diospi” sinchʼi creeyniyoj kasunman (1 Ped. 5:3; Heb. 13:7).

¹¹ “¿Imaynatataj kay leesqaywan wajkunata yanapayman?”. Bibliamanta yachakuyta munaj runasman, estudiosninchejman ima willarisunman, ima kamachiykunatachus Jehová ancianospaj churasqanmanta.  Ajinamanta runasqa reparanqanku Jehovaj llajtanpi ancianosqa, mana llulla religionpi kamachejkuna jinachu kasqankuta. Ancianospaj Jehová kamachiykunata churasqanqa, rikuchiwanchej ancianos yanapanawanchejpaj mayta llankʼasqankuta. Chay ruwasqankupi tʼukurispataj, astawan paykunata respetasunchej (1 Tes. 5:12). Paykunata astawan respetasun chayqa, paykunaqa aswan kusisqas congregacionpaj llankʼanqanku (Heb. 13:17).

12, 13. 1) ¿Imatataj estudiasunman ima yanapaschus kapuwasqanchejwan? 2) ¿Imaynatataj astawan estudiay yanapawasunman? Sutʼinchay.

¹² Estudiana. Bibliata estudiaspaqa, kay tapuykunaj kutichiykunasninta maskʼasunman:

• ¿Pitaj Bibliamanta kay cheqata qhelqarqa?

• ¿Maykʼajtaj, maypitaj qhelqakorqa?

• ¿Imastaj karqa kay libro qhelqakushajtin?

Kay tapuykunaj kutichiyninta maskʼayqa, imastachus leespalla mana tariyta atisqanchej imasta tarinapaj yanapawasunchej.

¹³ Sutʼincharinapaj, Ezequiel 14:12-14 versículos nisqanta qhawarina. Chaypi nin: “Sichus kay runasqa mana kasuta ruwawaspa contrayta juchallikunku chayqa, noqa contrankuta oqharikusaj paykunata castiganaypaj. Mikhuna tantakusqankuta qhechusaj, yarqhayta chay llajtaman apachimusaj, wañurachisajtaj runasta, jinallataj uywastawan. Kay kinsa runaschus chay llajtapi kashankuman, Noé, Daniel, Job ima chayqa, paykunalla kinsantinku salvasqa kankuman cheqan runas kasqankurayku. Noqa Tata Diosmin chayta nini”, nispa. Kayta astawan estudiaspaqa yachakunchej Ezequiel kay versiculosta qhelqasqanta 612 wata chaynejpi Jesús niraj jamushajtin. Noé, Job ima may unayña wañupojtinkupis Jehovaqa yuyarikullarqapuni, payman cheqa sonqos kasqankuta. Chaywanpis Danielqa kausashallarqaraj. Ichapis 20 watasniyojllaraj kasharqa, Noé jina, Job jina cheqan runa kasqanta Jehová nishajtin. ¿Imatataj chaymanta yachakunchej? Jehovaqa tukuy cheqa sonqo kamachisninta may allinpaj qhawasqanta, jóvenes chayri machitus kajtinkupis (Sal. 148:12-14).

14. 1) ¿Imaynatá jovenesta yanapan paykunapaj orqhokusqan yanapas? 2) ¿Imaynatataj jovenespaj yanapas wajkunata yanapan? (23 paginapi dibujota qhawariy.)

¹⁴ Jovenespaj publicaciones. Rikunchej jina, Bibliaj tukuynin librosninmanta mayta yachakuyta atinchej. Kikillantaj tukuy publicacionesninchejmantapis. Sutʼincharinapaj, kay qhepa watasllapi Jehovaqa jovenespaj ashkha yanapasta orqhorqa. ^[1] Chaykunataj jovenesta escuelapi sajra ruwaykunata atipanankupaj, jovenyashaspa ima chʼampaykunapichus rikukusqankuta atipanankupaj ima wakichisqa kashan. Chaywanpis, ¿imaynatá jovenespaj llojsej yanapas tukuyta yanapawasunman? Chaykunata leespaqa ima chʼampaykunapichus jóvenes rikukusqankuta yachasunchej, ajinamantataj paykunata yanapayta, kallpachayta ima atisun.

15. ¿Imaraykutaj jovenespaj publicaciones tukuyta yanapawasunman?

¹⁵ Kuraj cristianosqa mana yuyanankuchu tiyan, jovenespaj llojsej publicaciones jovenesllapaj kasqanta. Ajinata yuyaspaqa jatunchakushankuman. Imaraykuchus paykunapis chay publicacionespi yanapata tarinkuman chʼampaykunasninkuta atipanankupaj. Sutʼincharinapaj, tukuypis imapichus creesqanchejta sutʼinchananchej tiyan, llakiykunasninchejta, wajkuna sajra ruwayman tanqawasqanchejta ima atipananchej tiyan. Sajra runaswanpis mana masichakunanchejchu  tiyan, Diosmanta karunchaj imaswanpis sonqota mana kusirichinachu tiyan. Chay publicaciones jovenespaj kajtinpis, Bibliamanta orqhosqa kasqanrayku tukuyta yanapayta atiwasunman.

16. ¿Imaynamantawantaj publicacionesninchej jovenesta yanapan?

¹⁶ Jovenespaj publicacionesqa, jovenesta yanapan Jehovawan sumaj amigos kanallankupajpuni (Eclesiastés 12:1, 13 leey). Kuraj cristianospis chay publicacioneswan yanapachikullankumantaj. Sutʼincharinapaj, ¡Despertad! abril de 2009 watamanta revistapi “Los jóvenes preguntan. ¿Cómo disfrutar la lectura de la Biblia?”, nisqa yachaqana llojserqa. Chay yachaqanapeqa ashkha yuyaychaykuna, uj recuadro ima karqa. Chay recuadrota kʼutuspataj, Bibliapi waqaychayta aterqanchej. Chay yachaqanaqa kuraj runastapis yanapallarqataj. Uj casarasqa warmi, 24 watasniyoj, wawasniyoj ima nin: “Bibliata mana leeyta atillaspapis, chay revistaj yachaqananpi yuyaychakusqanman jina ruwashani. Kunanqa Bibliata leespa mayta miskʼirichikuni. Imajtinchus reparani Bibliaj librosnenqa mana churanakusqanta. Kunan sutʼita entiendeni Biblia imamantachus parlashasqanta. Ni jaykʼajtaj ajinata kusikorqanichu Bibliata leespa”, nispa.

17, 18. ¿Imaynatá tukuy runaspaj publicacionesta leey yanapawasunman? Sutʼinchay.

¹⁷ Tukuy runaspaj publicacionesninchej. Kay 2008 watamantapacha Torremanta Qhawaj revista orqhokun congregacionespi estudianapaj, mayqenchus Jehovaj testigosnillanpaj wakichisqa kashan. Chantapis tukuypaj revista kapullawanchejtaj. ¿Imaynatataj chay revistawan yanapachikuyta atisunman? Tantakuna Wasipi kashasqanchejpi tʼukurina. Niraj tukuypaj umallirichiy qallarishajtin, pitachus wajyarerqanchej chay runa chayamun. Umallirichiy kashajtintaj maytachá tʼukurishanchej wajyarerqanchej chay runa chay umallirichiyta uyarispa imaynachus kashasqanpi, imaynatachus chay umallirichiy kausayninpi yanapananpi ima. Chay umallirichiypi ajinata tʼukureyqa, chay umallirichiymanta astawan agradecesqa kanapaj yanapawasun.

¹⁸ Ichapis ajinallatataj yuyasunman, tukuypaj orqhosqa publicacionesta leerispa. Sutʼincharinapaj, tukuypaj Torremanta Qhawaj revistapi, Internetpi jw.org nisqapi yachaqanasqa, Jehovata mana rejsej runas, Bibliata entiendeyta atinankupaj jina parlaypi kashan. Noqanchejpis chay yachaqanasta leespaqa, Bibliaj yachachiyninta aswan sutʼita entiendenchej, jatunpajtaj qhawanchej. Chantapis chay yachaqanasta leeyqa, creeyninchejmanta willaypi waj jinasmanta sutʼinchanapaj yanapawanchej. ¡Despertad! revistapis Jehová kasqanpi creenallapajpuni yanapawanchej. Chantapis chay revistaqa imapichus creesqanchejmanta sutʼinchanapaj yachachiwanchej (1 Pedro 3:15 leey).

19. ¿Imaynatá Jehovaman agradecesqas kasqanchejta rikuchisunman cheqa yachachiyta qowasqanchejmanta?

¹⁹ Cheqamantapuni Jehovaqa cheqa yachachiyta may ashkhata allinninchejpaj qowanchej (Mat. 5:3). Chayrayku tukuy ima yanapasta qowasqanchejta leenallapuni, chayman jinataj kausakunallapuni. Ajinamantataj Jehovaman agradecekusqanchejta rikuchisun, pichus allinninchejpaj yachachiwanchej (Isa. 48:17).