1. ¿Imataj karqa Bibliamanta yachakusqanchejta amigosninchejman, familiaresninchejman ima willarejtinchej?

BIBLIAMANTA yachakushaspaqa, repararqanchej yachakusqanchej cheqapuni kasqanta. Chaytaj maytapuni kusichiwarqanchej. Imajtinchus yachakusqanchejqa sutʼi karqa. Chayrayku ichá yuyarqanchej tukuy chayta yachakuyta munanankuta. Mayta munarqanchej runas Bibliaj nisqanwan yanapachikunankuta, uj sumaj suyakuyniyojtaj kanankuta (Sal. 119:105). Chayrayku imastachus yachakushasqanchejta kusiywan willarerqanchej amigosninchejman, familiaresninchejman ima. Jinapis paykunamanta ashkhasqa mana uyariwarqanchejchu.

2, 3. Jesuspa yachachisqanta, ¿runas uyarerqankuchu?

² Runas Diosmanta willasqanchejta mana uyariwajtinchejqa, mana tʼukunanchejchu tiyan. Jesustapis Diospa atiyninwan milagrosta ruwajtinpis, ashkha runasqa nillataj uyarerqankuchu. Uj pacha Jesusqa, Lazarota kausarichimorqa, enemigosnintaj mana chayta negayta aterqankuchu. Jinapis judiospa religionninkuta kamachejkunaqa, manapuni Jesusta Mesiasta jinachu qhawarqanku. Astawanpis paykunaqa, Jesusta, Lazarota ima wañuchiyta munarqanku (Juan 11:47, 48, 53; 12:9-11).

³ Jesusqa yacharqa ashkha runas, pay Mesías kasqanta mana creenankuta (Juan 5:39-44). Chayrayku Jesusqa, Juanpa yachachisqasninman nerqa: “Kusisqamin noqarayku mana pantajqa”, nispa (Mat. 11:2, 3, 6). ¿Imaraykutaj Jesusta qhesacharqanku? Chayta qhepan parrafospi qhawarisun.

4. ¿Imastataj kay yachaqanapi yachakusun?

⁴ Kay yachaqanapi, qhepan yachaqanapiwan yachakusun imaraykuchus Jesuspa tiemponmanta runas payta qhesachasqankuta. Yachakullasuntaj imaraykuchus kay tiempomanta runaspis, Diosmanta willasqanchejta mana uyariyta munasqankuta. Chantá yachakullasuntaj  Jesusmanta mana karunchakunapajqa, paypi sinchʼita creenanchej kasqanta.

5. ¿Imaraykutaj wakin runas mana creenkumanchu karqa Jesús Mesiaspuni kasqanta?

⁵ Ashkha runasqa Jesusta qhesacharqanku maymantachus kasqanrayku, ima familiapitajchus uywasqa kasqanrayku. Paykunaqa yacharqanku Jesús sumaj yachachej kasqanta, milagrostapis ruwasqanta. Jinapis paykunaqa, uj wajcha carpinteroj wawanta jinalla qhawarqanku. Chantapis Jesusqa Nazaretmanta karqa, chay llajtitataj nisina ancha rejsisqachu karqa. Natanaelpis, niraj Jesuspa discipulon kashaspa nerqa: “¿Atinmanchu Nazaretmanta ima allinpis rikhurimuyta?”, nispa (Juan 1:46). Ichapis Natanaelqa kay jinata yuyarqa: “Ni creenichu chay llajtitamanta Mesías rikhurinantaqa”, nispa. Chayri ichá Natanaelqa, Miqueas 5:2 nisqanpi piensashanman karqa. Chaypeqa nin Mesías Belenpi nacekunanta manataj Nazaretpichu.

6. Jesuspa tiemponmanta runas, ¿imata ruwaspataj reparankuman karqa Jesús Mesiaspuni kasqanta?

⁶ Diosmanta Qhelqasqaspi, ¿imatataj Mesiasmanta nerqa? Profeta Isaiasqa nerqa, Mesiaspa enemigosnenqa paypa kausayninmanta mana yachayta munanankuta (Isa. 53:8). Mesiaspa kausayninmantaqa ashkha profecías karqa. Chayrayku Jesuspa tiemponmanta runas, chay tukuynin profeciasta estudianankupaj tiempochakunkuman karqa chayqa, reparankuman karqa Jesusqa Belenpi nacekusqanta, Rey Davidpa familianmantataj kasqanta (Luc. 2:4-7). Maypichus Jesús nacekusqanqa, Miqueas 5:2 profeciaj nisqanman jinapuni kasharqa. Chanta, ¿imaraykutaj runas mana creerqankuchu Jesús Mesiaspuni kasqanta? Imaraykuchus runasqa, mana allinta yachaspalla imatapis Jesusmanta parlaj kanku. Chayraykutaj paymanta karunchakaporqanku.

7. ¿Imasta yuyasqankuraykutaj ashkha runas mana Jehovaj testigosnin kayta munankuchu?

⁷ Kay tiempopipis runasqa Jesuspa tiemponpi jinallataj yuyanku. Jehová Diospa llajtanpeqa, casi tukuy wajcha runaslla kanchej. Chayrayku ashkha runasqa, ‘mana yachayniyojta, mana kasuy runasta jinalla’ qhawawanchej (Hech. 4:13). Iglesiaspi yachachejkunamanta wakenqa, religionespa rejsisqa universidadesninkuman chayri escuelasninkuman rinku, Diosmanta yachachiyta yachakunankupaj. Ashkha runasqa yuyanku mana chay escuelasman risqanchejrayku, Bibliamanta yachachinapaj mana wakichisqachu kasqanchejta. Wakintaj ninku Jehovaj testigosnenqa, Estados Unidosmanta religión kasqanta. Jinapis Jehovaj testigosnenqa ni khuskanpis Estados Unidosmantachu kanku. Wakintaj niwanchej mana Jesuspi creesqanchejta. Kay qhepa wataspitaj runasqa, suwasmanta tumpawanchej, Gobiernoj contranpi kashasqanchejtataj niwanchej. Chayraykutaj ashkha runasqa, mana munankuchu Jehovaj testigosnin kayta. Imajtinchus mana Jehovaj llajtanmanta tukuy imatachu yachanku.

8. Hechos 17:11 nisqanman jina, ¿imatataj ruwananchej tiyan Diospa llajtanmanta astawan yachananchejpaj?

⁸ ¿Imatá ruwasunman mana Jesusmanta karunchakunapaj? Tukuy imata allinta qhawaykurina tiyan. Lucas librota qhelqajqa chayta ruwarqa. Payqa qallariymantapacha imaschus kasqanta sumajta waturerqa. Imaraykuchus payqa munarqa, qhelqasqanta leejkuna Jesusmanta uyarisqanku, cheqapuni kasqanta yachanankuta (Luc. 1:1-4). Bereapi kaj judiospis Lucas jinallataj ruwarqanku. Paykunaqa Jesusmanta sumaj willaykunata uyarispa, Diosmanta Qhelqasqaspi qhawaykurerqanku jinapunichus manachus kasqanta yachanankupaj (Hechos 17:11 leey). Noqanchejpis paykuna jinallataj tukuy imata sumajta qhawaykurina tiyan. Diospa llajtan imatachus yachachiwasqanchejta, sumajta Bibliawan kikincharina tiyan. Chantapis imatachus Diospa llajtan kay tiempopi ruwashasqanta sumajta yachana tiyan. Chay tukuy imasta ruwajtinchejqa, runas Diospa llajtanmanta mana allin imasta parlajtinku, mana creesunchu.

9. ¿Imatataj runas ruwarqanku Jesús mana señalta rikuchiyta munajtin?

⁹ Jesuspa tiemponmanta wakin runasqa, paypa yachachisqanta mana creerqankuchu. Astawanpis chay runasqa Jesusta nerqanku, Mesiaspuni kasqanta rikuchinanpaj “cielomanta uj señalta rikuchinanta” (Mat. 16:1). Ichapis paykunaqa Jesusmanta chayta mañarqanku, Daniel 7:13, 14 profeciata mana allinta entiendesqankurayku. Jinapis chay profecía juntʼakunanpajqa, manaraj tiempochu karqa. Paykunaqa Jesuspa yachachisqanpi reparananku karqa, paypuni Mesías kasqanta. Jinapis mana repararqankuchu. Astawanpis Jesús ni ima señalta rikuchejtin, paymanta karunchakaporqanku (Mat. 16:4).

10. ¿Imaynatataj Jesús juntʼarqa profeta Isaiaspa nisqanta?

¹⁰ Diosmanta Qhelqasqaspi, ¿imatataj Mesiasmanta nerqa? Profeta Isaías nerqa: “Payqa mana qhaparenqachu, nitaj jatunmanta parlanqachu, manataj callespipis sinchʼita parlanqachu”, nispa (Isa. 42:1, 2). Jesusqa Diosmanta willashaspa, mana qhaparispachu purerqa, nitaj jatunpaj qhawachikuytachu munarqa. Jesusqa mana jatuchaj templosta ruwacherqachu. Nillataj runas jatunpaj qhawanankupaj jina ropata churakorqachu. Nitaj runas sumaj sutiswan rejsinankutapis munarqachu. Rey Herodesqa Jesusta juzgashaspa, uj milagrota ruwananta mañarqa. Jesustaj wañuy patapi kashaspapis, mana chay kutipi ima milagrotapis ruwarqachu (Luc. 23:8-11). Jesusqa kay jallpʼapi kashaspa ashkha milagrosta ruwarqa. Jinapis payqa Diospa Gobiernonmantapuni astawan willarqa. Chayrayku discipulosninman nerqa: “Chaypajmin jamuni”, nispa (Mar. 1:38).

11. ¿Imasraykutaj ashkha runas Diosmanta yachachisqanchejta mana uyariyta munankuchu?

¹¹ Kay tiempopipis runasqa Jesuspa tiemponpi jinallataj yuyanku. Kay tiempomanta runasqa tʼukunku, may chhikachachaj iglesias, valesqa imaswan kʼachanchasqa kasqanmanta. Tʼukullankutaj iglesiasta kamachejkuna, jatunpaj qhawachikunankupaj jina sutiswan rejsichikusqankumanta. Paykunaqa tʼukullankutaj, ima costumbrestachus iglesiaspi ruwakusqanmanta. Nitaj yachankuchu imaraykuchus chay costumbresta ruwakusqanta. Ajinamanta chay iglesiasman rej runasqa, ni imata Diosmanta yachakunkuchu. Jinapis reunionesninchejman rej runasqa, yachakunku imatachus Jehová Dios ruwananchejta munasqanta.  Tantakuna Wasisninchejqa llimphitu, manataj tʼukunapaj jina valesqa imaswan kʼachanchasqachu. Congregacionesta ñaupajman apajkunapis, mana jatunpaj qhawachikunankupaj jina ropasta churakunkuchu. Nitaj jatunpaj qhawachikunankupaj jina sutiswan rejsichikunkuchu. Chantá imapichus creesqanchej, imastachus yachachisqanchejpis Diospa Palabranman jinapuni kashan. Jinapis runasqa, mana waj religiones jinachu Diosta yupaychasqanchejrayku, nitaj yuyasqankuman jinachu yachachisqanchejrayku, mana uyariyta munawanchejchu.

12. Hebreos 11:1, 6 nisqanman jina, ¿imapitaj sinchʼita creenanchej tiyan?

¹² ¿Imatá ruwasunman mana Jesusmanta karunchakunapaj? Apóstol Pabloqa Romapi tiyakoj cristianosman nerqa: “Uj runaqa palabrata uyarisparaj chaypi creen. Palabratataj uyarin, pipis Cristomanta willajtin”, nispa (Rom. 10:17). Chayrayku sinchʼi creeyniyoj kananchejqa, mana iglesiaspi ruwanku chay imasta ruwanamantachu kashan, manaqa Bibliata sumajta estudianamanta. Imajtinchus iglesiaspi ruwasqanku manchay sumajman rijchʼakojtinpis, mana Bibliaj nisqanman jinachu kashan. Noqanchejqa Bibliamanta yachakusqanchej cheqapuni kasqanpi sinchʼita creenanchej tiyan. Imajtinchus “mana creeyniyoj kaspaqa, manapuni Diospa ñaupaqenpi allinpaj qhawasqa kayta atisunmanchu” (Hebreos 11:1, 6 leey). Chayrayku cheqa religionpipuni kashasqanchejta yachanapajqa, mana cielomanta uj señaltapunichu rikunanchej tiyan. Astawanpis sinchʼi creeyniyoj kanapajqa, Bibliaj yachachisqanta sumajta estudiana tiyan. Ajinamanta cheqa kajpipuni kashasqanchejta reparasun, manataj imamantapis iskayrayasunchu.

13. ¿Imaraykutaj Jesuspaj ashkha runas phiñakorqanku?

¹³ Juanpa discipulosnenqa tʼukorqanku, Jesuspa discipulosnin mana ayunasqankumanta. Jesustaj paykunaman sutʼincharqa discipulosnenqa mana ayunanankuchu kasqanta, imaraykuchus payqa kausakusharqaraj (Mat. 9:14-17). Jinapis fariseoswan Jesusman churanakoj runaswanqa, payta juchacharqanku mana costumbresninkuta ruwasqanmanta. Chayrayku Samarikuna Pʼunchaypi Jesús onqosqasta sanoyachejtin, mayta phiñakorqanku (Mar. 3:1-6; Juan 9:16). Chay runasqa Samarikuna Pʼunchayta ruwanapuni  kasqanta nej kanku. Jinapis paykunallataj chay nisqankuta pʼakej kanku. Imaraykuchus chay pʼunchaypeqa templopi negociosninkuta ruwallaj kanku. Jesús chayta ruwasqankumanta juchachajtintaj, mayta phiñakoj kanku (Mat. 21:12, 13, 15). Chantapis uj pacha Jesús Nazaretpi kaj Sinagogapi yachachishajtin, payta uyarejkunaqa mayta phiñakorqanku. Imajtinchus Jesusqa israelitaswan paykunata kikinchaspa reparacherqa, imatapis paykunallapaj munasqankuta, pisi creeyniyojtaj kasqankuta (Luc. 4:16, 25-30). Ashkha runasqa Jesusmanta karunchakaporqanku, mana suyasqankuman jinachu imatapis ruwasqanrayku (Mat. 11:16-19).

14. ¿Imaraykutaj Jesús juchacharqa runaspa rikhurichisqanku kamachiykunata, costumbresta ima?

¹⁴ Diosmanta Qhelqasqaspi, ¿imatataj Mesiasmanta nerqa? Jehovaqa profeta Isaiasnejta nerqa: “Kay runasqa simillankuwan jatunchawanku, simillankuwan yupaychawanku, sonqonkutajrí noqamanta karupi kashan. Noqata yupaychawasqankoqa runaspa wakichisqallan, mayqentachus runaslla kamachinku, chay”, nispa (Isa. 29:13). Jesús ashkha costumbresta juchachasqanqa allillan kasharqa. Imaraykuchus chay costumbresqa mana Diosmanta qhelqasqaspi nisqanman jinachu karqa. Wakin runasqa Bibliaj nisqasninta jatunpaj qhawanankumantaqa, runaspa rikhurichisqanku kamachiykunata, costumbresta ima aswan jatunpaj qhawarqanku. Chayta ruwaspataj Jehová Diosta, kachamusqan Mesiastapis qhesacharqanku.

15. ¿Imaraykutaj ashkha runas Jehovaj testigosninpaj phiñakunku?

¹⁵ Kay tiempopipis runasqa, Jesuspa tiemponpi jinallataj yuyanku. Noqanchejqa mana ruwanchejchu diachakusta, Navidadta, nitaj waj costumbrestapis. Imaraykuchus chay costumbresqa mana Bibliaj nisqanman jinachu kashan. Chayraykutaj ashkha runasqa noqanchejpaj phiñakunku. Wakin runastaj noqanchejpaj phiñakunku, tiyakunchej chay suyoj fiestasninta mana ruwasqanchejrayku, chayri wañusqasta pʼampanapaj costumbresta mana ruwasqanchejrayku. Chay costumbresqa mana Bibliaj nisqanman jinachu kashan. Noqanchejpaj phiñakoj runastaj ichapis yuyanku, Diosta yupaychasqanku allillan kasqanta. Jinapis costumbresninkuta ruwallanqankupuni, nitaj Bibliaj nisqanta kasukonqankuchu chayqa, Diosqa mana paykunata allinpaj qhawanqachu (Mar. 7:7-9).

16. Salmo 119:97, 113, 163-165 nisqanman jina, ¿imata ruwananchejpajtaj kallpachakunanchej tiyan?

¹⁶ ¿Imatá ruwasunman mana Jesusmanta karunchakunapaj? Jehová Diospa kamachiykunasninman jina kausakunapaj kallpachakuna (Salmo 119:97, 113, 163-165 leey). Jehová Diosta munakusun chayqa, chejnisqan costumbresta ni imarayku ruwasunchu. Astawanqa ima kajtinpis Jehovata munakullasunpuni.

17. ¿Imaraykutaj ashkha judíos Jesuspaj phiñakorqanku?

¹⁷ Jesuspa tiemponmanta wakin runasqa, usqhayllata munarqanku uj mosoj gobierno kamachinanta. Paykunaqa mayta suyasharqanku, Mesías romanospa kamachiyninmanta kacharichinanta. Chayrayku Jesusta reyninku kananpaj churayta munarqanku, Jesustaj mana munarqachu (Juan 6:14, 15). Jinapis judiospa religionninkuta kamachejkunawan waj runaswanqa, mancharisqas kasharqanku, Jesús romanospa kamachiyninmanta kacharichinanmanta. Imaraykuchus paykunamanqa romanos atiyta qorqanku wakin imasta ruwanankupaj. Romanospa kamachiyninmanta kacharichisqa kaspataj, paykunaqa niña atiyniyojchu kankuman karqa imata ruwanankupajpis. Chayrayku ashkha judiosqa Jesuspaj phiñakorqanku.

18. Mesiasmanta, ¿ima profeciastataj ashkhas mana valechejchu kanku?

¹⁸ Diosmanta Qhelqasqaspi, ¿imatataj Mesiasmanta nerqa? Ashkha profeciasqa Mesiasmanta nerqa maqanakupi atipaj kananta. Jinapis ashkha profecías nillarqataj ñaupajtaqa juchasninchejraykuraj  wañunan kasqanta (Isa. 53:9, 12). Chanta, ¿imaraykutaj judíos Mesiasmanta pantasqata yuyarqanku? Imaraykuchus paykunaqa, llakiykunasninkupi mana yanapaj profeciasta, mana valechejchu kanku (Juan 6:26, 27).

19. ¿Imaraykutaj ashkha runas Diosmanta willasqanchejta mana uyariyta munankuchu?

¹⁹ Kay tiempopipis runasqa, Jesuspa tiemponpi jinallataj yuyanku. Kay tiempomanta ashkha runasqa, mana politicaman chhapukusqanchejrayku Diosmanta willasqanchejta mana uyariyta munawanchejchu. Paykunaqa eleccionespi pillapajpis votananchejtapuni munanku. Jinapis noqanchejqa sutʼita yachanchej uj runata kamachinawanchejpaj ajllakuspaqa, Jehová Diosta qhesachashasqanchejta (1 Sam. 8:4-7). Runasqa mayta munanku escuelasta, hospitalesta ruwachinanchejta, chayri imaynallamantapis runasta yanapananchejta. Jinapis noqanchejqa kausayninchejpi predicacionta ñaupajman churanchej, manataj kay mundomanta problemasta allinchaytachu. Chayrayku ashkha runasqa, mana Diosmanta willasqanchejta uyariyta munankuchu.

20. Mateo 7:21-23 versiculospi Jesús nisqanman jina, ¿imatataj kausayninchejpi ñaupajta ruwananchej tiyan?

²⁰ ¿Imatá ruwasunman mana Jesusmanta karunchakunapaj? (Mateo 7:21-23 leey). Noqanchejqa, Jesús imatachus kamachiwasqanchejtapuni kausayninchejpi ñaupajta juntʼayta munanchej (Mat. 28:19, 20). Ama saqenachu kay mundomanta políticos umanchejta muyuchinawanchejta. Nillataj kay mundomanta chʼajwasta allinchayta munaspa umanchejta muyuchikunachu. Noqanchejqa mayta runa masisninchejta munakunchej, problemasniyoj kasqankumantataj llakikunchej. Jinapis paykunataqa mayta yanapasunman Diospa Gobiernonmanta yachachispa, Jehová Diosman qayllaykunankupaj yanapaspa ima.

21. ¿Imapajtaj sinchʼita kallpachakunallanchejpuni tiyan?

²¹ Kay yachaqanapeqa yachakorqanchej, Jesuspa tiemponmanta runas, tawa imasrayku paymanta karunchakapusqankuta. Kay tiempopipis chay imasraykullataj wakin runasqa mana willasqanchejta uyariyta munawanchejchu. Jinapis mana chay tawa imasllamantachu sumajta qhawarikunanchej tiyan. Qhepan yachaqanapeqa tawa imasmantawan parlarisun. Tukuy atisqanchejta kallpachakunallapuni mana Jesusmanta karunchakunapaj, sinchʼi creeyniyojllapunitaj kanapaj.