1. ¿Imaynatataj Jesús predicarqa chantá imaynatá yachachisqasnin predicarqanku? (Kay revistaj tapanpi dibujota qhawariy).

JESUSQA kay jallpʼapi kashaspa tukuy sonqo predicarqa. Munantaj yachachisqasninpis kikillantataj predicananchejta (Juan 4:35, 36). Jesuspa discipulosnenqa paywan kashaspa tukuy sonqo predicarqanku (Luc. 10:1, 5-11, 17). Jinapis Jesusta enemigosnin presochaytawan wañuchejtinku, paykunaqa niña predicasharqankuchu (Juan 16:32). Jesustaj kausarimuytawan, yachachisqasninta kallpacharqa tukuy atisqankuta predicanallankupajpuni. Paykunaqa Jesús cielopiña kashajtinpis ajinallatapuni predicarqanku. Chayrayku enemigosninkoqa nerqanku: “¿Imaraykutaj chanta yachachiyniykichejwan Jerusalenman juntʼaykuchinkichejri?”, nispa (Hech. 5:28).

2. ¿Imaynatá Jehová Dios ñaupa tiempomanta cristianosta bendicerqa?

² Jesusqa ñaupa tiempomanta cristianosta predicanankupaj maytapuni yanaparqa, Jehová Diostaj chay ruwasqankupi bendicerqa. Chayrayku may chhika runas sumaj willaykunata japʼikorqanku. Pentecostés 33 watapeqa 3 mil runas jina bautizakorqanku (Hech. 2:41). Chaymanta aswan qhepamantaj, Jesuspa yachachisqasnenqa astawan astawan yapakushallarqankupuni (Hech. 6:7). Chantapis Jesús nerqa, qhepa pʼunchaykunapi may chhika runas sumaj willaykunata japʼikunankuta (Juan 14:12; Hech. 1:8).

3, 4. 1) ¿Imaraykutaj hermanosninchej wakin lugarespi mana predicayta atillankuchu? 2) ¿Imatataj kay yachaqanapi yachakusun?

³ Tukuypis kusisqa predicanapaj kallpachakunchej. Wakin lugarespeqa predicayta atillanchej. Imaraykuchus ashkha runas Bibliamanta yachakuyta munanku. Chayrayku ashkha hermanostaqa, tukuyman yachachinankupaj mana tiempo alcanzanchu. Jinapis wakin lugarespi mana predicayta atillankuchu. Imaraykuchus pisi runasllata wasisninkupi tarinku, chay runastaj mana Bibliamanta yachakuyta munankuchu.

 ⁴ Tiyakunchej chaypi mana predicayta atillanchejchu chayqa, kay yachaqanamanta yuyaychaykuna mayta yanapawasun. Kay yachaqanapi yachakusun, imastachus wakin hermanos ashkha runaswan parlarinankupaj ruwasqankuta. Chantá yachakullasuntaj runas mana uyariwajtinchejpis, imaraykuchus kusisqallapuni predicananchej kasqanta.

5. ¿Imaspitaj ashkha hermanos rikukunku?

⁵ Ashkha hermanosqa mana runasta wasisninkupi taripayta atillankuchu. Imaraykuchus ashkha runasqa jatuchaj edificiospi chayri urbanizacionespi tiyakunku. Chaykunamantaj mana pitapis yaykuchillankuchu, chayri invitasqa kajkunalla yaykuyta atinku. Wakin lugarespitaj hermanosqa wasimanta wasi predicayta atillanku. Jinapis pisi runasllata tarinku. Chantapis wakin hermanosqa campospi predicanku, chay lugarespitaj pisi runaslla tiyakunku. Chayrayku uj wasimanta waj wasiman rinankupajqa, karusta purinanku tiyan. Wakin kutistaj ni pita tarinkuchu. Noqanchejpis chay imaspi rikukunchej chay, ¿imatá ruwasunman kusisqallapuni predicanapaj, aswan ashkha runaswantaj parlarinapaj? Qhepan parrafospi chayta qhawarisun.

6. ¿Imajtintaj predicacionta pescadota japʼiywan kikinchasunman?

⁶ Jesusqa predicacionta pescadota japʼiywan kikincharqa (Mar. 1:17). Pescadota japʼej runaqa, diasta ni uj pescadota japʼispapis mana saykʼupunchu, astawanpis imatachus ruwananta ruwallanpuni. Payqa waj horaspi pescaj rin, chayri waj lugaresman pescaj rin, manachayri waj jinamanta pescan. Noqanchejpis kikillantataj predicacionpi ruwasunman. Qhawarina imaynatachus chayta ruwanata.

7. Waj horaspi predicasun chay, ¿imataj kanqa?

⁷ Waj horaspi predicaj rina. Runas wasinkupi sayanku chay horaspi predicaj risun chayqa, ashkha runaswan parlarisun. Imajtinchus runasqa wasinkuman mayllamantapis chayapunkupuni. Ashkha hermanosqa tardeyaykuyta chayri chʼisiyaykuyta predicanku. Imaraykuchus chay horaspi astawan ashkha runasta tarinku. Chantapis runasqa chay horasta tiempituyoj kanku, parlariytataj munallanku. David sutiyoj ancianomanta mayta yachakusunman. Paywan compañeronwanqa uj rato predicaytawan, mayqen wasispichus mana ni pi karqachu chayman watejmanta kutinku. Pay nin: “Ni pi uyarimuwarqaykuchu chay wasisman watejmanta kutispaqa, ashkha runasta tariyku”, nispa. *

8. ¿Imaynatá Eclesiastés 11:6 nisqanman jina predicacionpi ruwasunman?

⁸ Kay yachaqanapaj ajllasqa textoqa, yuyarichiwanchej mana saykʼuspa predicanallatapuni. Chaypi nin: “Tutamanta mujuta tarpuy, chʼisiyanankamataj mana samarispa tarpullaypuni, imaraykuchus mana yachankichu mayqenchus allin kananta, kaychus, jaqaychus, chayri iskayninchus allin kananta”, nispa (Ecl. 11:6, TNM). Davidmanta ñaupaj parrafopi parlarerqanchej. Payqa mana saykʼuspa predicallarqapuni. Payqa uj wasiman ashkha kutista kutispa, uj runata tarerqa. Chay runaqa Bibliamanta yachakuyta munarqa. Hermanomantaj nisqa: “Pusaj watata jinaña kaypi tiyakuni, jinapis primera vez rikushani uj testigota punkuyta takaykamojta”, nispa. Hermano David nerqa: “Ni pita tarerqanchejchu chay wasisman kutispaqa, ashkha runasta tarinchej. Chay runasmanta ashkhastaj, willasqanchejta uyarillawanchej”, nispa.

9. ¿Imatataj wakin hermanos ruwanku, mana wasisninkupi tarisqanku runasman predicanankupaj?

⁹ Waj lugarespi predicana. Wakin hermanosqa wasisninkupi mana tarinkuchu chay runasman predicanankupaj, waj lugarespi predicanku. Jatuchaj edificiospeqa mana wasimanta wasi jina  predicayta atikullanchu. Chayrayku ashkha hermanosqa chay edificiospi tiyakoj runasman predicanankupaj, callespi chayri carritoswan predicanku. Ajinamanta chay runaswan uyapura parlariyta atillanku. Ashkha hermanosqa reparanku parquespi, mercadospi, negociospi ima runasqa, Bibliamanta parlariyta munallasqankuta, chayri publicacionesninchejta japʼikullawasqanchejta. Boliviapi congregacionesta waturej hermanonchej Floiran nin: “Mercadosman, negociosmanqa, una de la tardemanta tres de la tardekama jina predicaj riyku. Imaraykuchus chay horaspeqa, mana chaykama ocupasqaschu kashanku. Chayrayku paykunawanqa Bibliamanta sumajta parlariyku, wakinmantaj Bibliamanta yachachiyta qallariyku”, nispa.

10. ¿Imaynasmantataj predicasunman tukuy runasman chayanapaj?

¹⁰ Waj jinasmanta predicana. Ichapis uj wasimanqa ashkha kutistaña predicaj rinchej. Wasiyojta nipuni wasinpi taripaspataj, waj horaspi maskʼaj rinchej. Jinapis nipuni taripanchejchu chay, ¿imatá ruwasunman? Hermananchej Katarína nin: “Mana wasisninkupi taripanichu chay runasmanqa, uj cartitata saqeni. Chaypitaj nini, imatachus paykunaman predicayta munarqani chayta”, nispa. Hermananchej Katarinamanta yachakunchej, tukuy runasman predicanapajqa, tukuy imaynamanta predicanapaj kallpachakunanchej kasqanta.

11. ¿Imaraykutaj ashkha runas Diosmanta willasqanchejta mana uyariyta munankuchu?

¹¹ Ashkha runasqa yuyanku Bibliamanta, Diosmanta ima yachakuyta mana necesitasqankuta. Wakenqa mana Diospi creenkuchu kay mundopi imaymana millay imas kasqanrayku.  Wakintaj religionesta kamachejkuna puraj uyas kasqankurayku, mana Bibliamanta yachakuyta munankuchu. Wakin runastaj trabajollankupi, familiallankupi, chayri problemasnillankupi yuyasqankurayku, mana reparankuchu Bibliaj nisqan paykunata yanapayta atisqanta. Chayraykutaj Diosmanta willasqanchejta mana uyariyta munawanchejchu. Jina kajtin, ¿imatá ruwasunman runasman kusiywan predicanallapajpuni? Qhepan parrafospi chayta qhawarisun.

12. ¿Imaynatataj Filipenses 2:4 nisqanman jina predicacionpi ruwasunman?

¹² Wajkunamanta llakikuna. Ashkha runasqa Bibliamanta willasqanchejta, qallariypi mana uyariyta munawanchejchu. Jinapis paykunaqa tukuy sonqo yanapariyta munasqanchejta reparaspa, aswan qhepaman Bibliamanta willajtinchej uyarillawanchej (Filipenses 2:4 leey). Davidpa nisqanta qhawarinallapuni. Pay nin: “Pillapis mana Bibliamanta yachakuyta munasqanta niwajtiykoqa, chay rato Bibliata, publicacionesta ima maletinniykuman jallchʼaykakapuyku. Chaymantataj tapuriyku imaraykuchus mana Bibliamanta yachakuyta munasqanta”, nispa. Runasqa sutʼita reparanku paykunata yanapariytapuni munasqanchejta. Ichapis paykunaqa imamantachus parlasqanchejta qonqaponqanku. Jinapis paykunawan kʼachas kasqanchejtaqa yuyarikonqankupuni. Chayrayku runas mana Bibliamanta yachayta munasqankuta niwajtinchejqa, paykunawan kʼachas kana, amataj imatapis nirpanallachu. Chayta ruwajtinchejqa, reparanqanku yanapariytapuni munasqanchejta.

13. ¿Imatá ruwasunman runas willasqanchejta uyarinawanchejpaj?

¹³ ¿Imastataj ruwanchej runasta yanapariyta munaspa? Predicashaspa runasta yanaparinapaj jina, chayri uyariyta munanankupaj jina parlarinchej. Wasiyoj wawitasniyoj kasqanta reparanchej chay, ¿imatá ruwasunman? Paywan parlarisunman, wawasta uywanapaj chayri familiapi kusisqa kausakunapaj imastachus Biblia yuyaychasqanmanta. Chayta ruwajtinchejqa ichá uyariyta munallawasun. Chayri, ¿imamantá parlarisunman, uj wasita ashkha chapasniyojta chayri candadosniyojta rikuspa? Chay wasiyojwan parlarisunman kay mundopi suwa miraykushasqanmanta chayraykutaj manchisqalla kausakusqanchejmanta. Sutʼincharisunmantaj chay imasqa tumpamantawan wiñaypaj chinkananta. Runaswan Bibliamanta parlarishaspaqa, sutʼita reparachina Bibliaqa mayta yanapayta atiwasqanchejta. Hermananchej Katarinamanta watejmanta parlarina. Pay nin: “Noqaqa piensarinipuni imaynatachus Biblia kausayniypi yanapawasqanpi”, nispa. Chayrayku payqa tukuy sonqo runaswan parlarin, runastaj chayta sutʼita reparanku.

14. Proverbios 27:17 nisqanman jina, ¿imajtintaj may allin uj compañerowan predicananchej?

 ¹⁴ Wajkunawan yanapachikuna. Ñaupa tiempopi, apóstol Pabloqa Timoteoman yachacherqa imaynasmantachus predicananta, yachachinanta ima. Chantá nerqa, wajkunatapis kikillantataj yanapananta (1 Cor. 4:17). Noqanchejpis Timoteo jina, congregacionpi experienciayoj hermanoswan mayta yanapachikusunman (Proverbios 27:17 leey). Shawn sutiyoj hermanomanta parlarina. Payqa uj tiempota campopi precursor karqa. Chay lugarmanta runastaj, casi tukuyninku religionniyoj kasqankurayku, mana paypa willasqanta uyariyta munajchu kanku. ¿Imataj payta yanaparqa kusisqallapuni predicananpaj? Pay nin: “Atikusqanman jina uj compañerowanpuni predicaj rej kani. Compañeroywanqa uj wasimanta waj wasiman rej jina, parlarej kayku aswan sumajta predicanaykupaj imastachus ruwanaykumanta. Wakin kutisqa, wasiyoj imatachus niwasqaykumanta parlarej kayku. Chantataj piensarej kayku, qhepan wasipi ajinallatataj niwajtiyku, imatachus ninaykupi”, nispa.

15. ¿Imajtintaj Jehovamanta mañakunanchejpuni tiyan predicaj rinapaj?

¹⁵ Jehovamanta yanapata mañakuna. Sapa predicaj rinapaj, Jehovaj yanapanta mañakuna. Imaraykuchus atiynillanwan imatapis ruwayta atisun (Sal. 127:1; Luc. 11:13). Chantapis Jehovamanta mañakushaspaqa, sutʼita nina imapichus yanapanawanchejta. Paymanta mañakusunman, allin sonqoyoj runasta, chayri paymanta yachakuyta munaj runasta tarinapaj yanapanawanchejta. Chaymantataj, tukuy runasman predicanapaj kallpachakuna.

16. ¿Imaraykutaj Bibliata sapallanchejpi estudiay kusisqallapuni predicanapaj yanapawanchej?

¹⁶ Bibliata sapallanchejpi sumajta estudianapaj tiempochakuna. Biblia nin: “Qankunallataj sutʼita reparankichej, Diospa munaynenqa kʼacha, cheqan, payta kusichejtaj kasqanta”, nispa (Rom. 12:2). Bibliata sumajta estudiaspaqa, Jehovata aswan sumajta rejsinchej. Ajinamantataj mana iskayrayaspa wajkunaman predicanchej. Hermananchej Katarína nillanpuni: “Repararqani, creeypi aswan sinchʼi sayasqa kanaypajqa, Diosmanta wakin imasta astawan sutʼita entiendenay kasqanta. Chayrayku astawan estudiarqani, imaschus tukuy imata Ruwaj Dios kasqantapuni rikuchisqanta. Chantá estudiallarqanitaj Bibliaqa Diospa Palabranpuni kasqanta sutʼita yachanaypaj. Chaymanta estudiallarqanitaj, Jehovaj testigosnin Diospa llajtanpuni kasqankumanta mana iskayrayanaypaj”, nispa. Hermananchej Katarinataqa, Bibliata sapallanpi estudiasqan mayta yanaparqa sinchʼi creeyniyoj kananpaj, kusisqallapunitaj predicananpaj.

17. ¿Imaraykutaj Jesús kusisqallapuni predicarqa?

¹⁷ Jesusqa runas mana uyariyta munajtinkupis, kusisqallapuni predicarqa. Imaraykuchus payqa yacharqa, runas Diosmanta yachakunankupuni kasqanta. Chaypajtaj tukuy runasta yanapariyta munarqa. Chantapis yachallarqataj Diospa Gobiernonmanta willayta mana uyariyta munajkunaqa, aswan qhepaman uyariyta munanankuta. Familianwantaj ajinapuni karqa. Jesús kinsa wata khuskanniyojta predicasqanpi, ni mayqen hermanon discipulonman tukorqachu (Juan 7:5). Paykunaqa Jesús kausarimusqanmantaraj, cristianosman tukorqanku (Hech. 1:14).

18. ¿Imaraykutaj predicashallanchejpuni?

¹⁸ Noqanchejqa mana yachanchejchu, Diospa Gobiernonmanta willajtinchej, pikunachus paypa kamachisninman tukunankuta. Wakin runasqa, mana chay ratochu Diosmanta yachakuyta munanku. Wakintaj, willasqanchejta mana uyarispapis, kʼachas kasqanchejta, kusisqallapunitaj willasqanchejta rikuspa, ichapis aswan qhepaman “Diosta jatunchanqanku” (1 Ped. 2:12).

19. Kay 1 Corintios 3:6, 7 nisqanman jina, ¿imatataj mana qonqananchejchu tiyan?

 ¹⁹ Noqanchejqa Diosmanta willaspa plantanchej, qarpanchej ima. Jinapis Jehová Dioslla ‘wiñachin’ (1 Corintios 3:6, 7 leey). Etiopía suyumanta hermanonchej Getahun nin: “Pisillata predicakun chay lugarpi, 20 watas kurajta sapallay testigo karqani. Jinapis kunanqa 14 publicadores kayku. Kunankamaqa 13 runasña bautizakunku. Chaykunamantataj señoray, kinsa wawasniy ima kanku. Reunionesmanqa 32 runas jina jamunku”, nispa. Hermanonchej Getahunqa may kusisqa kashan. Imaraykuchus payqa, runas mana uyarejtinkupis mana saykʼuporqachu. Astawanpis pacienciawan suyakorqa, Jehová kʼacha sonqoyoj runasta llajtanman pusamunanta (Juan 6:44).

20. ¿Imajtintaj nisunman minapi chayri qhoyapi pʼampasqa minerosta yanapaj runas jina kasqanchejta?

²⁰ Jehovapajqa tukuy runas may valorniyoj kanchej. Chayrayku Jehovaqa, niraj kay mundoj tukukuynin chamushajtin, ashkha runasta llajtanman pusaykamushan. Chay llankʼaypitaj Wawanwan khuska yanapakojta saqewanchej (Isa. 2:2). Piensarina uj mina chayri qhoya minerosta pʼampaykusqanpi. Chay minerosta salvanankupajqa ashkhas yanapakunku. Chay minerosta wakillan salvajtinkupis, tukuyninku imaynallamantapis sumajta yanapakunku. Predicasqanchejwanpis kikillantaj. Mana yachanchejchu, predicasqanchejrayku mashkha runaschus Satanaspa sajra mundonmanta kacharichikunankuta. Jinapis sutʼita yachanchej, Jehovaqa noqanchejnejta, chayri mayqen hermanonejllatapis, runasta yanapayta atisqanta. Hermano Andreas Boliviapi tiyakun. Pay nin: “Kayta sutʼita yachani. Bibliamanta yachakoj bautismoman chayananpajqa, tukuy hermanos yanapakunku”, nispa. Chayrayku kusisqallapuni predicanapaj kallpachakuna. Chayta ruwasun chayqa, Jehová Dios bendeciwasun, predicaspataj aswan kusisqa kasun.