Wiñasqayman jina, runas mana allin imasta ruwasqankuta nipuni allinpajchu qhawarqani. Franciamanta runasqa, waj suyusmanta jampoj runasta mayta chejnikoj kanku. Noqataj chay jampojkunaj wawasninkuwanpuni kayta munaj kani, futboltapis paykunawan pujllaj kani. Chantapis mamayqa Polonia suyumanta karqa. Chayrayku tukuy laya runas allinta, mana chejninakuspataj kausakunankuta munarqani.

Kay 1957 watapi cuartelman rerqani. Chaypachaqa jovenllaraj kasharqani. Chay wataspi Argeliaqa, Franciawan guerrapi kasharqa. Noqataj grupoymanta soldadoswan kasharqani Argeliaj orqosninpi tutanpi guardiata ruwaspa. Imaraykuchus chay lugarespeqa manchay maqanakus kasharqa. Uj chʼisi sapallay guardiata ruwaspa, arena bolsas wasapi ametralladoray japʼirisqa kasharqani. Jinallapi uj runaj purisqanta jina uyarerqani. Gravetataj mancharikorqani. Imaraykuchus mana munarqanichu ni pita wañuchiyta, nitaj wañuchinawankutapis. Chayrayku qhaparikorqani: “¡Diosníy yanapariway ari!”, nispa. Chay runaj purisqanta jina uyarispaqa, yuyarqani uj enemigo soldado kasqanta. Jinapis mana soldadochu kasqa, manaqa monte burrolla kasqa. Chayta rikuytawan sonqoy tiyaykorqa. Chay jinapi  rikukuspa, guerrata rikuspa ima kausayniypi piensarerqani. Nikorqanitaj: “¿Imapajtaj kausanchej?, ¿Dios noqanchejmanta llakikunmanchu?, ¿maykʼajllapis kay jallpʼapi allin kausay kanmanchu?”, nispa.

Chaymanta tiemponman tatasniyta visitarej rerqani. Chaypitaj uj testigota rejserqani. Payqa francés parlaypi uj Bibliata qowarqa. Chayqa Santa Biblia nisqa karqa, catolicospatataj karqa. Argeliaman kutipuytawan chay Bibliata leeyta qallarerqani. Apocalipsis capítulo 21 versículos 3, 4 nisqantaj mayta tʼukuchiwarqa. Chaypi nin: “Diospa toldonqa runas chaupipi kashan [...]. Payqa ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj qhapariypis, nitaj nanaypis”, nispa. * Ni jaykʼaj ajinataqa leerqanirajchu. Chayrayku nikorqani: “Kaypi nisqan, ¿cheqapunichu kanman?”, nispa. Imajtinchus chay kutispeqa mana yacharqanichu ni imata Diosmanta, nitaj Bibliamantapis.

1959 watapi cuartelta tukucharqani. Chaypachataj François sutiyoj testigota rejserqani. Payqa Bibliamanta ashkha imasta yachachiwarqa, Diospa sutintapis (Sal. 83:18). Payqa sutʼinchariwarqa Jehovaqa kay mundomanta sajra ruwaykunata chinkachinanta, kay jallpʼata uj paraisoman tukuchinanta, Apocalipsis 21:3, 4 imatachus nisqantapis juntʼananta.

Bibliaj nisqanqa cheqapuni karqa, sonqoymantaj chayarqa. Jinapis iglesiasta kamachejkunapaj maytapuni phiñakorqani. Denunciaytataj munarqani mana Bibliaj nisqanta allintachu yachachisqankumanta. Chaypi reparakorqani tatay jinallapuni piensashasqayta. Chay ratotaj paykunata imatapis ruwarpanaypaj karqani.

François, waj hermanos ima yanapawarqanku manaña anchata rabiakunaypaj. Paykunaqa sutʼinchariwarqanku cristianosqa mana runasta chejnikunanchejchu kasqanta, astawanpis Diospa Gobiernonmanta willamunanchej kasqanta. Jesustaj chaytapuni ruwarqa, yachachisqasninmantaj, kamacherqa chayllatataj ruwanankuta (Mat. 24:14; Luc. 4:43). Chantapis yachakunallaytaj karqa runaswan ima religionmanta kajtinkupis kʼachamanta, respetowantaj parlarinay kasqanta. Biblia nin: “Señorpa kamachenqa mana churanakunanchu tiyan. Astawanqa tukuywan kʼacha kanan tiyan”, nispa (2 Tim. 2:24).

Kausayniyta cambiaytawan 1959 watapi, asamblea de circuitopi bautizakorqani testigo jina. Chaypitaj Angèle sutiyoj hermanitata rejserqani, paytaj sonqoyta suwarpariwarqa. Congregacionninmantaj visitarej rej kani, 1960 watapitaj casarakorqayku. Payqa manchay kʼacha, sumaj warmitaj. Uj jatun regalo Jehová Diosmanta (Pro. 19:14).

Watas pasasqanman jina, mayta yachakorqani experienciayoj hermanosmanta. Paykunamanta yachakorqani, Jehovamanta mana atinapaj jina ruwayta japʼispaqa, llampʼu sonqo kana kasqanta. Proverbios 15:22 nisqantataj kasukunata. Chaypi nin: “Allin rinanqa ashkha yuyaychajkunapi kashan”, nispa.

1964 watapitaj repararqani, Biblia chayta nisqanqa cheqapuni kasqanta. Chay watallapitaj  congregacionesta waturinayta niwarqanku. Ajinamanta congregacionesta waturerqani hermanosta kallpachanaypaj, Jehovaman astawan qayllaykunankupajtaj yanaparqani. Chaypachaqa 27 watasniyojllaraj karqani, manataj imatapis sumajta yacharqanirajchu. Chayraykutaj anchata pantaj kani. Jinapis pantasqasniymanta yachakorqani. Astawanqa sumaj experienciayoj hermanosmanta yachakorqani. Paykunaqa sumajtapuni yuyaychawarqanku.

Uj experienciata yuyarikunipuni. París llajtapi uj congregacionta waturisqaytawan, uj experienciayoj hermano niwarqa: “¿Iskaynillanchej parlarisunmanchu?”, nispa. Noqataj nerqani: “Arí hermanóy”, nispa.

Payqa tapuriwarqa: “Louis, ¿pitataj uj doctor yanapan, onqosqastachu chayri sano runastachu?”, nispa.

Noqataj nerqani: “Onqosqasta ari”, nispa.

Paytaj niwarqa: “Ajinapuni. Jinapis reparani congregacionpeqa, sinchʼi sayasqa kajkunallawan astawan kasqaykita. Por ejemplo, uj ancianollawan parlajta rikuyki. Congregacionpeqa ashkha hermanos niraj unaychu testigos kanku, wakintaj manchiskiris kanku, wakintajrí kallpacharinata necesitashanku. Allin kanman paykunawan karinaykipaj tiempochakunayki, wasinkuman rispataj paykunawan khuska mikhurinayki”, nispa.

Chay hermanoqa sumajtapuni yuyaychariwarqa. Pay Jehovaj ovejitasninta munakusqanqa, sonqoyta kuyuricherqa. Chayrayku yuyaychariwasqanman jina ruwanaypaj kallpachakorqani. Maytapuni Jehovaman agradecekuni chay jina hermanos Diospa llajtanpi kasqankumanta.

1969 watapi 1973 watapiwan iskay asambleas internacionalespi Departamento de Alimentos nisqapi encargadota churawarqanku. Chay asambleasqa Colombes llajtapi ruwakorqa (París). 1973 watapi, asambleapeqa 60 mil runaspaj jina waykʼunayku karqa, phishqa diatataj. Manchay mancharisqapuni kasharqani. Jinapis chayta ruwanaypajqa, imatachus Proverbios 15:22 nisqanta kasukuy mayta yanapawarqa. Chaypajqa, Diosta yupaychaypi sinchʼi sayasqa hermanoswan yanapachikorqani. Chay hermanosmanta wakenqa carniceros, tarpuyta yachajkuna, waykʼojkuna, rantiyta yachajkuna ima karqanku. Paykunaj yanapayninwanqa, chay llankʼayta juntʼayta aterqayku.

 1973 watapi señoraytawan khuska wajyariwarqayku, Francia suyupi kaj Betelpi sirvinaykupaj. Betelpi qowarqanku chay llankʼayqa, mana atinapaj jinallataj karqa. Imaraykuchus Camerún suyupi tiyakoj hermanosman, imaynallamantapis publicacionesta chayachinay karqa. Chay suyupeqa, 1970 watamanta 1993 watakama, hermanosta mana Jehová Diosta yupaychajta saqerqankuchu. Chayrayku tʼukulla kasharqani imaynatachus chayta ruwanaymanta. Francia sucursalta kamachej hermanotaj, tʼukulla kashasqayta reparawarqasina. Chayrayku kallpacharinawanpaj niwarqa: “Camerún suyumanta hermanosqa publicacionesta necesitanku. Imaynallamantapis chayachinapuni tiyan”, nispa. Chaytapunitaj ruwarqayku.

Ashkha kutista Camerún suyoj muyuyninpi kaj suyusman viajarqani. Chay suyuspa fronterasninpeqa, Camerún suyumanta ancianoswan tantakoj kayku. Chay hermanosqa karqanku sumaj yuyayniyoj, mana manchachikojtaj. Paykunaqa yanapawarqanku, Camerún suyuman imaynallamantapis sapa killapaj publicacionesta apaykunaykupaj. Jehová Diostaj maytapuni yanapawarqayku. Imaraykuchus 20 watasta jina hermanosmanqa, mana faltachispa publicacionesta chayacherqaykupuni. Chay publicacionesqa karqanku Torremanta Qhawaj revista, Nuestro Servicio del Reino nisqa folleto ima. Chay folletoqa sapa killa llojsej.

Señoraywan rejsinakushasqaykumantapacha, repararqani pay Jehovata mayta munakusqanta. Chaytataj astawanraj repararqani casarakusqaykutawan. Casarakorqayku chay chʼiseqa pay niwarqa, Jehovaman uj mañakuypi ninayta payta qhariwarmi jina tukuy atisqaykuta sirviyta munasqaykuta. Jehová Diostaj uyariwarqaykupuni.

Señoray Angèleqa Jehovapi astawan confianaypaj yanapawarqa. 1973 watapi Betelman wajyariwajtiyku, mana riyta munallarqanichu. Imaraykuchus congregacionesta waturispa kusisqa  kasharqani. Jinapis señorayqa yuyarichiwarqa, Jehovata sirvinaykupaj payman kausayniykuta qopusqaykuta. Pay niwarqa: “Jehovaj llajtan imatachus ruwananchejta niwanchej chayqa, chayta ruwananchej tiyan”, nispa (Heb. 13:17). Jinata niwajtin ni ima niyta aterqanichu. Chayrayku Betelman sirvej riporqayku. Señorayqa kʼacha, sumaj yuyayniyoj, Jehovatataj mayta munakun. Pay ajina kasqanqa, mayta yanapawayku qhariwarmi jina sumajta kausakunaykupaj, kausayniykupi allin imastapuni ajllanaykupaj ima.

Kunanqa mayorcitosña kayku. Jinapis señorayqa kʼachallapuni, maytataj yanapallawanpuni. Diospa llajtanpi ashkha escuelasqa inglés parlayllapi ruwakun. Chayrayku chay escuelasman rinaykupajqa, inglesta aswan sumajta yachakunaykupaj señoraywan astawan kallpachakorqayku. Chayrayku 75 watasniyoj jinaña kaspapis, inglés parlaypi kaj congregacionman riporqayku. Noqaqa Francia sucursalta kamachejkunamanta ujnin kani. Chayrayku inglesta yachakunaypaj, mana tiempoy kallarqachu. Jinapis señoraywan purajmanta yanapanakorqayku. Kunanqa 80 watasniykuta pasaykuña. Jinapis reunionespajqa, inglés parlaypi, francés parlaypiwan wakichikushallaykupuni. Congregacionniykupeqa tukuy atisqaykuta yanapakuyku, reunionespi, predicacionpi ima. Jehovaqa inglesta yachakunaykupaj, mayta yanapawarqayku.

2017 watapi, Jehovamanta uj jatun bendicionta japʼerqayku. Señoraytawan noqatawan Sucursalespi Kamachejkunapaj Warmisninkupajwan Escuelaman invitawarqayku. Chay escuelaqa Pattersonpi kaj Centro Educativo de la Watchtower nisqapi ruwakun (Nueva York).

Jehovaqa uj Sumaj Yachachejninchej (Isa. 30:20). Chayrayku kamachisninta jóvenes kajtinchejpis chayri machitus kajtinchejpis llajtanpi sumajta yachachiwanchej (Deu. 4:5-8). Joven hermanosqa, kausayninkupi allin imasta ajllanku, sumaj cristianosmantaj tukunku Jehovaj yuyaychasqanta sumajta japʼikuspa, experienciayoj hermanospa yuyaychasqankutataj kasukuspa. Ajinamanta Proverbios 9:9 nisqan paykunapi juntʼakun. Chaypi nin: “Yachayniyojman yachachiy, paytaj aswan yachayniyoj kanqa. Cheqan runaman yachachiy, paytaj astawan yachanqa”, nispa.

Wakin kutisqa yuyarikunipuni Argeliaj orqosninpi kashajtiy uj chʼisi imachus pasasqanta. Chaymantaqa 60 watas jinaña pasan. Chaypachaqa ni yuyallarqanipischu kay jina kusisqapuni kausakunaytaqa. Wajkunamantaqa maytapuni yachakuni. Jehová Diosqa mayta yanapawarqayku kusisqa kausakunaykupaj. Chayrayku Jehovamanta, payta munakoj hermanosmanta, hermanasmanta ima yachakunaykupaj, tukuy atisqaykuta kallpachakushallaykupuni.