1. Apocalipsis libro nisqanman jina, ¿imatataj Satanás ruwashan Diospa kamachisninwan?

 APOCALIPSIS libropeqa nin Diospa Gobiernonqa cielopi kamachishasqantaña, Satanastaj kay jallpʼaman wijchʼuchikamusqanta (Apo. 12:1-9). Chayraykutaj cielopi kajkunaqa kusikunku, jallpʼapi kausakojkunataj aswan ashkha problemaspi rikhurinchej. Imajtinchus Satanasqa kay jallpʼapi Jehovaj kamachisninwan rabianta pagachikushan (Apo. 12:12, 15, 17).

2. ¿Imataj yanapawasun sinchʼita sayanapaj?

² Satanás qhatiykachawajtinchejpis, ¿imataj yanapawasunman sinchʼillatapuni sayanapaj? (Apo. 13:10). Chaypajqa yanapawasun imachus aswan qhepaman kananta yachay. Apóstol Juanqa Apocalipsis libropi nerqa, ima bendicionestachus tumpamantawan japʼinanchejta. Ujnin bendicionqa kanqa, Jehová Diospa enemigosnin chinkachisqa kananku. Qhawarina imatachus Apocalipsis libro paykunamanta nisqanta, imatajchus paykunawan kananta.

3. Juan mosqoypi jina rikusqan imasmanta, ¿mayqenkunataj wakinkuna kanku?

³ Apocalipsis libropi apóstol Juan mosqoypi jina rikusqan imasqa, kikinchaykunalla kanku. Jehová Diospa enemigosnintaqa millay phiña animaleswan kikinchakun. Juanqa mosqoypi jina rikorqa “uj millay phiña animalta mar qochamanta llojsimushajta, chunka wajrasniyojta, qanchis umasniyojta” (Apo. 13:1). Rikullarqataj chaypa qhepanta ‘waj millay phiña animalta jallpʼamanta llojsimushajta’. Chay millay phiña animalqa uj sierpe jina parlan, “ninatapis cielomanta jallpʼaman uraykuchimun” (Apo. 13:11-13). Chaymantataj rikorqa ‘uj puka millay phiña animalta’, patanpitaj uj khuchi warmi tiyasqata. Chay kinsa  millay animalesqa Diospa enemigosninwan ninakunku. Mayqenkunachus Jehová Diospa contranpi, Gobiernonpa contranpiwan ashkha watasta oqharikorqanku. Chayrayku yachananchejpuni tiyan pikunachus paykuna kasqankuta (Apo. 17:1, 3).

4, 5. ¿Imaynatá Daniel 7:15-17 yanapawanchej Apocalipsis libropi phiña animales pikunawanchus ninakusqanta entiendenapaj?

⁴ Pikunachus Diospa enemigosnin kasqankumanta niraj parlashaspa, ñaupajtaqa qhawarina chay millay phiña animales, khuchi warmipis pikunawanchus ninakusqankuta. Chaypajqa qhawarina imatachus Biblia chaykunamanta sutʼinchasqanta. Apocalipsis libropi millay phiña animalesmanta parlakusqanqa, Bibliaj waj librosninpipis rikhurillantaj. Por ejemplo, profeta Danielqa mosqoypi jina rikorqa, ‘tawa jatuchaj animalesta mar qochamanta llojsimushajta’ (Dan. 7:1-3). Danielllataj nin chay jatuchaj animalesqa, ‘tawa reyeswan’ chayri gobiernoswan ninakusqankuta (Daniel 7:15-17 leey). Chayqa reparachiwanchej Apocalipsis libropi millay phiña animalesqa, gobiernosllawantaj ninakusqankuta.

⁵ Apocalipsis libropi Juan mosqoypi jina rikusqan imasmanta wakinta allinta qhawarina. Chay rikusqan imas imatachus niyta munasqanta entiendenapajqa, Biblia sumajta yanapawasun. Ñaupajtaqa millay phiña animalesmanta parlarisun, qhawarisuntaj pikunawanchus ninakusqankuta. Chantá qhawarisun imachus chay millay phiña animaleswan kananta. Chaymantataj qhawarisun imatachus noqanchej yachakuyta atisqanchejta.

6. Apocalipsis 13:1-4 versiculospi qanchis umasniyoj millay phiña animal, ¿pikunawantaj ninakun?

⁶ Qanchis umasniyoj millay phiña animal, ¿pikunawantaj ninakun? (Apocalipsis 13:1-4 leey). Chay millay phiña animalqa chʼejchi leonman rijchʼakun, jinapis chakisnenqa jukumarejta jina, simintaj leonpata jina, chunka wajrasniyojtaj. Tawa parrafopi yachakorqanchej jinataj, Daniel 7 capitulopi parlan chay tawa jatuchaj animalesqa chay jina rijchʼayniyojllataj kanku. Apocalipsis libropitaj nin uj millay phiña animalllapi chay tawantin imas rikukusqanta, manataj tawa animaleschu kasqankuta. Chay millay phiña animalqa mana uj atiyniyoj gobiernollawanchu ninakun. Apocalipsis libroqa nin atiyta japʼisqanta kamachinanpaj “tukuy ayllusta, tukuy laya runasta, tukuy laya parlayniyojkunata, tukuy nacionestawan”. Chayrayku mayqen gobiernomantapis aswan atiyniyoj (Apo. 13:7). Chaynejta chay millay phiña animalqa ninakun, “tukuy tiempo runa masinta chakisnin uraman” churaj gobiernoswan (Ecl. 8:9). *

7. ¿Imawantaj millay phiña animalpa qanchis umasnin ninakun?

⁷ ¿Imawantaj chay millay phiña animalpa qanchis umasnin ninakun? Chayta entiendenapajqa yanapawasunman Apocalipsis capítulo 17. Chaypeqa parlan 13 capitulopi parlasqan millay phiña animalpa lantinmanta. Apocalipsis 17:10 nin: “Qanchis reyes tiyan: Phishqaqa urmankuña, ujqa kashan, ujnintaj niraj chayamunchu, chayamuspatajrí uj pisi tiempollata kanan tiyan”, nispa. Satanaspa atiyninpi tukuynin kaj gobiernosmantaqa, qanchis gobiernos millay phiña animalpa qanchis umasninwan ninakunman. Imajtinchus manchay atiyniyoj karqanku. Chay atiyniyoj gobiernospa jallpʼasninkupitaj Diospa llajtanmanta ashkhas tiyakorqanku chayri Diospa llajtanta chay gobiernos qhatiykacharqanku. Apóstol Juanpa tiemponpajqa, phishqa atiyniyoj gobiernos manaña karqankuchu: Egipto, Asiria, Babilonia, Medopersia, Grecia ima. Juan  mosqoypi jina millay phiña animalta rikushajtintaj, Roma sojta kaj atiyniyoj gobierno kasharqa. Chantá, ¿mayqentaj qanchis kaj último gobierno kanman karqa? Chayta qhawarina.

8. ¿Mayqen atiyniyoj gobiernotaj millay phiña animalpa qanchis kaj último uman?

⁸ Daniel libroj profeciasnenqa reparachiwanchej, mayqen gobiernochus millay phiña animalpa qanchis kaj último uman kasqanta. ¿Mayqen atiyniyoj gobiernotaj kamachishan kay tiempopi, nisunman “Señorpa pʼunchayninpi”? (Apo. 1:10). Chay atiyniyoj gobiernoqa kashan Gran Bretañawan Estados Unidoswan. Chayrayku nisunman chay iskay atiyniyoj suyus, Apocalipsis 13:1-4 versiculospi millay phiña animalpa qanchis kaj uman kasqanta.

9. ¿Piwantaj ninakun millay phiña animal cordero jina iskay wajrasniyoj?

⁹ Apocalipsis 13 capitulopi niwanchej imatachus ruwasqanta millay phiña animalpa qanchis kaj uman, nisunman Gran Bretañawan Estados Unidoswan. Chaypi nin uj ‘cordero jina iskay wajrasniyoj kasqanta, uj sierpe jinataj parlayta qallarisqanta’. Chay millay phiña animalqa “manchay jatuchaj señalesta ruwan, ninatapis cielomanta jallpʼaman uraykuchimun runaspa rikunanta” (Apo. 13:11-15). Apocalipsis 16 chantá 19 capítulo sutichan ‘llulla profeta’ nispa (Apo. 16:13; 19:20). Danielpis imatachus chay atiyniyoj gobierno, nisunman Gran Bretañawan Estados Unidoswan ruwanankumanta parlaspa nerqa: “Manchay tʼukunatapuni tukuchenqa”, nispa (Dan. 8:19, 23, 24). Chaytapunitaj ruwarqa Segunda Guerra Mundialpi. Imajtinchus Gran Bretañamanta, Estados Unidosmantawan cientificosqa, ujchaykukuspa bombas atómicas nisqata ruwarqanku. Iskay bombasta kachaykojtinkutaj, Segunda Guerra Mundial tukukorqa. Jinamanta chay iskay nacionesqa, ‘ninata cielomanta jallpʼaman uraykuchimorqanku’.

10. ¿Imawantaj ninakun millay phiña animalpa lantin? (Apocalipsis 13:14, 15; 17:3, 8, 11).

¹⁰ Waj phiña animalmantañataj parlarina. Chay phiña animalqa, qanchis umasniyoj phiña animalman rijchʼakun. Jinapis puka color. Apocalipsis libroqa nin ‘millay phiña animalpa lantin’ kasqanta, ‘pusaj kaj reytaj’ (Apocalipsis 13:14, 15; 17:3, 8, 11 leey). * Juan mosqoypi jina rikusqanman jina chay reyqa, rikhurerqa chantá chinkarqa, watejmantataj rikhurerqa. Chaytaj sumajtapuni japʼichin, imachus Naciones Unidasta pasasqanwan, mayqenchus jallpʼantinmanta gobiernosta ujchasqa kanankupaj yanapayta munan. Qallariypeqa Sociedad de Naciones nisqa sutiwan sayarichisqa karqa. Segunda Guerra Mundialpitaj manaña karqachu. Aswan qhepamantaj Organización de las Naciones Unidas nisqa sutiwan watejmanta rikhurimorqa.

11. ¿Imatataj gobiernos ruwashanku chanta imaraykutaj mana manchachikunanchejchu tiyan?

¹¹ Chay millay phiña animalesqa nisunman gobiernosqa, imatachus ruwasqankuwan chayri parlasqankuwan, runasta tanqanku Jehovaman, llajtanman ima churanakunankupaj. Chaywantaj paykunaqa jallpʼantinmanta ‘reyesta tantaykushanku’ “Armagedón” guerrapaj, nisunman ‘Tukuy Atiyniyoj Diospa jatun pʼunchayninpaj’ (Apo. 16:13, 14, 16). Jinapis chay guerrataqa mana manchachikunanchejchu tiyan. Imajtinchus tukuy atiyniyoj Jehová Diosninchejqa, Gobiernonta apoyajkunata chaypi salvawasun (Eze. 38:21-23).

12. ¿Imataj kanqa tukuynin millay phiña animaleswan?

¹² ¿Imataj tukuynin phiña animaleswan kanqa? Apocalipsis 19:20 nin: “Chay millay phiña  animaltaj presochasqa karqa, llulla profetapis paywan khuska presochasqallataj karqa, pichus paypa ñaupaqenpi señalesta ruwaspa chʼaukiyarqa millay phiña animalpa marcanta churachikojkunata, jinallataj lantinta yupaychajkunatapis chay. Iskayninkutaj kausashaj wijchʼuykusqa karqanku azufrewan laurashaj nina qochaman”, nispa. Reparanchej jina, Jehová Diosqa kay mundomanta enemigosninta kamachishajtillankuraj wiñaypaj chinkarparichenqa.

13. ¿Imaraykutaj kallpachakunanchej tiyan ni tumpitallatapis politicaman chhapukunapaj?

¹³ ¿Imatá yachakunchej? Cristianosqa Diosta, Gobiernollantawan tukuy sonqo apoyananchej tiyan (Juan 18:36). Chayrayku kallpachakunanchej tiyan ni tumpitallatapis politicaman chhapukunapaj. Jinapis chayqa ichá mana atikullanmanchu. Imajtinchus gobiernosqa munanku tukuy imapi apoyananchejta. Chay gobiernosta apoyajkunataj, millay phiña animalpa marcanwan marcachikushanku (Apo. 13:16, 17). Chay marcasqa kajkunataqa, niña Jehová allinpajchu qhawan, nitaj wiñay kausaytapis japʼiyta atenqankuchu (Apo. 14:9, 10; 20:4). Chayrayku gobiernos paykunata apoyananchejpaj tukuy imata ruwajtinkupis, amapuni kay mundomanta politicaman chhapukunachu.

14. ¿Imata rikuspataj apóstol Juan maytapuni tʼukorqa? (Apocalipsis 17:3-5).

¹⁴ Apóstol Juanqa rikullarqataj, uj warmita uj millay phiña animalpa patanpi tiyasqata. Chayta rikuspataj ‘maytapuni tʼukorqa’ (Apo. 17:1, 2, 6). Chay warmeqa ‘atiyniyoj khuchi warmi’, sutintaj “Jatun Babilonia”. Payqa “jallpʼamanta reyeswan khuchichakuy juchapi purin” (Apocalipsis 17:3-5 leey).

15, 16. ¿Piwantaj “Jatun Babilonia” ninakun chanta imaraykutaj chayta ninchej?

¹⁵ ¿Pitaj “Jatun Babilonia”? Kay warmeqa mana gobiernoswan ninakunmanchu. Imajtinchus Apocalipsis libroqa nin jallpʼamanta reyeswan khuchichakusqanta, nisunman gobiernoswan (Apo. 18:9). Chay warmi uj puka millay phiña animalpa patanpi tiyasqa kasqanqa niyta munan, gobiernosta munayninta ruwachiyta munasqanta. Chay khuchi warmeqa nillataj kay mundomanta comercianteswanpis ninakunmanchu. Imajtinchus Apocalipsis libropeqa, waj partepi paykunamanta parlan, sutichantaj ‘jallpʼapi kaj comerciantes’, nispa (Apo. 18:11, 15, 16).

¹⁶ Bibliapeqa “khuchi warmi” chayri “wasanchaj” palabrasta oqharikullantaj santosta yupaychajkunamanta parlanapaj chayri kay mundoj amigosninman tukojkunamanta parlanapaj (Eze. 16:2, 35, 36; Sant. 4:4). ‘Llimphu doncella’ chayri ‘mana piwanpis puñuykoj’ palabrastataj oqharikun, Jehovata mana wasanchaspa sirvej runasmanta parlanapaj (2 Cor. 11:2; Apo. 14:4). Ñaupa tiempomanta Babilonia llajtaqa, llulla religionesmanta juntʼa karqa. Chayrayku Jatun Babiloniaqa, tukuy llulla yupaychaykunawan ninakun. Imajtinchus Jatun Babiloniapeqa kay mundomanta tukuynin llulla religiones kashanku (Apo. 17:5, 18; kaymanta astawan yachakunaykipajqa Torremanta Qhawaj 15 de junio de 2012, páginas 17, 18, párrafos 15-17 leeriy. Leerillaytaj ¿Imatapunitaq Biblia yachachin? libroj yapanpi, “¿Imataq ‘Jatun Babiloniarí’?” nisqata).

17. ¿Imataj Jatun Babiloniawan kanqa?

¹⁷ ¿Imataj Jatun Babiloniawan kanqa? Apocalipsis 17:16, 17 nin: “Chay rikusqayki chunka wajras, jinallataj chay millay phiña animalpis, chay khuchi warmita chejnispa tukuy imanta qhechonqanku, qʼalallatataj saqerpayanqanku. Aychanta mikhuykonqanku, ninawantaj qʼalata ruphaykuchenqanku. Diosmin sonqonkuman churarqa paypa munayninta ruwanankupaj”, nispa. Jehovaqa gobiernosman yuyayta qonqa  kay mundomanta tukuynin llulla religionesta chinkarpachinankupaj. Chaytataj ruwachenqa puka millay phiña animalnejta, nisunman Naciones Unidasnejta (Apo. 18:21-24).

18. ¿Imatá ruwananchej tiyan amapuni Jatun Babiloniaman chhapukunapaj?

¹⁸ ¿Imatá yachakunchej? Tukuy atisqanchejta kallpachakuna Jehovata yupaychasqanchej “mana chʼichiyoj llimphu” kananpaj (Sant. 1:27). Jatun Babiloniaqa llulla yachachiykunawan, costumbreswan, layqerioswan, millay kausaywan ima juntʼa kashan. Noqanchejtajrí amapuni chaykunaman chhapukunachu. Astawanpis runasta ninallapuni: “Llojsipuychej chay llajtamanta”, nispa. Llojsiponqanku chayqa, Jehovaqa mana paykunata Jatun Babiloniaj juchasninmanta juchachanqachu (Apo. 18:4).

19. ¿Pitaj “jatun puka sierpe”?

¹⁹ Apocalipsis libroqa parlallantaj ‘uj jatun puka sierpemanta’ (Apo. 12:3). Chay jatun sierpeqa Jesuswan angelesninwan ima maqanakun (Apo. 12:7-9). Chantapis Diospa llajtanta qhatiykachan, gobiernosmantaj atiyta qon (Apo. 12:17; 13:4). ¿Pitaj chay jatun sierpe? Payqa ñaupa katari, “pichus sutichasqa Diablo, Satanastaj” chay (Apo. 12:9; 20:2). Paytaj Jehovaj tukuynin enemigosninta kamachishan.

20. ¿Imataj kanqa jatun sierpewan?

²⁰ ¿Imataj kanqa jatun sierpewan? Apocalipsis 20:1-3 nin uj ángel Satanasta chinkay ukhuman wijchʼuykunanta. Chaypi Satanasqa carcelpi jina 1.000 watasta wisqʼasqa kanqa. Jinamanta manaña nacionesta chʼaukiyanqachu chay tiempo juntʼakunankama. Chaymantataj Satanaswan supaykunasninwanqa “azufre nina qochaman” wijchʼuykusqa kanqanku. Chaytaj niyta munan wiñaypaj chinkachisqa kanankuta (Apo. 20:10). Satanaswan supaykunasninwan kay jallpʼamanta chinkachisqa kajtinku, kausayqa may sumajpuni kanqa.

21. Apocalipsis libropi imastachus apóstol Juan rikusqanta leeytawan, ¿imajtintaj kusikunchej?

²¹ Apóstol Juan mosqoypi jina imastachus rikusqanta entiendeyqa mayta kallpachawanchej. Kay yachaqanapeqa yachakorqanchej, pikunachus Jehovaj enemigosnin kasqankuta, imachus paykunawan kanantapis. Arí, “kusisqamin pichus kay palabrasta jatunmanta leejqa. Kusisqallataj kanku” chaypi qhelqasqa kaj imasta uyarejkunapis (Apo. 1:3). Jinapis Jehovaj enemigosnin chinkachisqa kajtinku, ¿ima bendicionestataj japʼenqanku Jehovata tukuy sonqo sirvejkuna? Chayta qhepan yachaqanapi yachakusun.