1. ¿Imatataj kay tiempopi tukuy runas ajllananchejpuni kashan?

 JEHOVALLA tukuy imata kamachinanpaj derechoyoj, Satanastaj millay sajra enemigon. Tukuy runastaj kay tiempopi ajllananchejpuni kashan Jehovatachus chayri Satanastachus apoyananchejta. Imajtinchus wiñay kausayta japʼinanchejqa chaymanta kashan (Mat. 25:31-33, 46). “Manchay ñakʼariy” tiempopeqa tukuy runas uj marcawan marcachikusun. Chay marcaman jinataj wiñay kausayta japʼisun chayri chinkachisqas kasun (Apo. 7:14; 14:9-11; Eze. 9:4, 6).

2. 1) ¿Imata ruwanapajtaj kallpachawanchej Hebreos 10:35-39? 2) ¿Imajtintaj Apocalipsis libromanta yachakunanchej may allinpuni?

² (Hebreos 10:35-39 leey). Diospa Gobiernonta apoyayta ajllanchejña chayqa, may sumaj. Maytachá munanchej wajkunatapis chayta ruwanankupaj yanapayta. Chaypajqa imatachus Apocalipsis libro nisqan mayta yanapawasunman. Chay libropeqa willawanchej Jehovaman churanakojkunawan imachus kananta. Chantá willallawanchejtaj Gobiernollanta apoyajkuna ima bendicionestachus japʼinanchejta. Chaykunata yachakunanchejqa may allinpuni. Imajtinchus yanapawasun Jehovata tukuy sonqo sirvinallapajpuni. Chantapis chay yachakusqanchejwanqa wajkunata yanapasunman Jehovata sirviyta ajllanankupaj, sirvinallankupajpunitaj.

3. ¿Ima tapuykunamantaj kay yachaqanapi kutichisun?

³ Kay yachaqanapeqa kay tapuykunaman kutichisun: ¿Imatataj japʼenqanku Diospa Gobiernonta apoyajkuna? ¿Imataj kanqa Apocalipsis libromanta puka millay phiña animalta apoyajkunawan?

4. Apóstol Juan, ¿mayqen grupotataj rikorqa cielopi Jesustawan khuska?

⁴ Apóstol Juanqa mosqoypi jina rikorqa iskay grupo runas Jehovaj Gobiernonta apoyashasqankuta, wiñay kausaytataj japʼisqankuta. Ñaupaj kaj grupopeqa 144.000 runas kanku (Apo. 7:4). Paykunaqa kay jallpʼamanta cieloman rinku Jesuswan khuska gobernamunankupaj (Apo. 5:9, 10; 14:3, 4). Juanqa paykunata rikorqa Jesuswan khuska Sion orqo patapi sayashajta (Apo. 14:1).

5. ¿Imataj tumpamantawan kanqa kay jallpʼapiraj kaj ajllasqa cristianoswan?

⁵ Apostolespa tiemponmanta kay tiempokama ashkha runastaña ajllakun 144.000 kajkunamanta kanankupaj (Luc. 12:32; Rom. 8:17). Jinapis Juanqa uyarerqa qhepa pʼunchaykunapeqa, chay 144.000 runasmanta pisillaña kay jallpʼapi kausashanankuta. Kay jallpʼapiraj kaj ajllasqa cristianosqa, niraj manchay ñakʼariy tiempo qallarishajtin wiñaypaj sellasqa kanqanku, nisunman Jehová paykunaman wiñaypaj tʼinkankuta qoponqa (Apo. 7:2, 3; 12:17). Chaymantataj manchay ñakʼariy tiempo kashajtin cieloman oqharisqa kanqanku, chaypiña kaj ajllasqa cristianoswan khuska kanankupaj. Cielopiña kashanku chay ajllasqa cristianosqa wañupunankukama tukuy sonqo Jehovata sirverqanku. Paykunaqa tukuyninku cielomanta Jesuswan khuska Diospa Gobiernonpi kamachimonqanku (Mat. 24:31; Apo. 5:9, 10).

6, 7. 1) ¿Pikunataj kanku Juanpa rikusqan iskay kaj grupo? 2) Cieloman rinapaj ajllasqa kaspapis chayri kay jallpʼapi kausakuyta suyakuspapis, ¿imajtintaj mana iskayrayananchejchu tiyan Apocalipsis 7 capitulomanta profecías juntʼakunanmanta?

⁶ Juanqa cielopi kaj grupota rikuytawan, “may chhika” runastañataj rikorqa. Iskay kaj grupoqa 144.000 ajllasqa cristianosmanta nisqa mana yupay atina kanku (Apo. 7:9, 10). ¿Pikunataj paykuna kanku? Juan uyarisqanman jina paykunaqa “manchay ñakʼariymanta llojsimojkuna kanku, jatun ropasninkutataj Corderoj yawarninpi tʼajsaspa yurajyacherqanku” (Apo. 7:14). May chhika runasmanta kajkunaqa, manchay ñakʼariymanta kausashaj llojsiytawan kay jallpʼapi kausakonqanku, ashkha bendicionestataj japʼenqanku (Sal. 37:9-11, 27-29; Pro. 2:21, 22; Apo. 7:16, 17).

⁷ Cieloman rinapaj ajllasqa kaspapis chayri kay jallpʼapi kausakuyta suyakuspapis, mana iskayrayananchejchu tiyan Apocalipsis 7 capitulomanta profecías juntʼakunanmanta. Chay profeciasta juntʼakojta rikoyqa, may sumajpuni kanqa iskaynin grupospi kaj Jehovaj kamachisninpaj. Chaypachaqa maytapuni kusikusun Jehovaj Gobiernonta apoyayta ajllasqanchejmanta. ¿Imatawantaj Apocalipsis libro niwanchej manchay ñakʼariy tiempomanta? (Mat. 24:21).

8. ¿Imaynamantá manchay ñakʼariy tiempo qallarenqa chanta imatá ashkha runas ruwanqanku?

⁸ Ñaupaj yachaqanapi yachakorqanchej jina, kay mundomanta gobiernosqa tumpitamantawan Jatun Babiloniata, nisunman mundontinmanta tukuynin llulla religionesta chinkarparichenqanku (Apo. 17:16, 17). Ajinamanta manchay ñakʼariy tiempo qallarenqa. Chayta rikuspa, ¿ashkha runaschu Jehovata yupaychayta qallarenqanku? Mana. Bibliaqa Apocalipsis 6 capitulopi rikuchiwanchej chay tiempopi Jehovata mana sirvejkunaqa, kay mundomanta gobiernospi, kay mundoj qhapaj kayninpiwan yanapata maskʼanankuta. Chay imastataj orqo chhankaswan kikinchan. Jehovataj mana Gobiernonta apoyasqankurayku  paykunata enemigosninta jina qhawanqa (Luc. 11:23; Apo. 6:15-17).

9. ¿Imajtintaj Jehovaj testigosnin manchay ñakʼariy tiempopi sutʼi rejsiy kanqanku chanta imataj paykunawan kanqa?

⁹ Manchay ñakʼariy tiempoqa ancha llakiypuni kanqa. Jehovaj testigosnintaj sutʼi rejsiy kanqanku. Imajtinchus paykunallaña Jehovata sirvishanqanku, manapunitaj ‘millay phiña animalta’ apoyanqankuchu (Apo. 13:14-17). Chayta rikuspa Jehovaman churanakojkunaqa maytapuni phiñakonqanku. Chayraykutaj uj qotu naciones jallpʼantinpi mayta Diospa llajtanta qhatiykachanqanku. Paykunamanta parlaspataj Bibliaqa nin Magogmanta Gog Diospa llajtanpa contranpi oqharikusqanta (Eze. 38:14-16).

10. Apocalipsis 19:19-21 nisqanman jina, ¿imatá Jehová ruwanqa llajtanta mayta qhatiykachashasqankuta rikuspa?

¹⁰ ¿Imatá Jehová ruwanqa llajtanta mayta qhatiykachajtinku? Payllataj kutichiwanchej: “Sinchʼi phiñakuyniy phatanqa”, nispa (Eze. 38:18, 21-23). Chanta, ¿imataj kanqa? Apocalipsis 19 capítulo chayta sutʼinchan. Jehovaqa Wawanta kachamonqa llajtanta jarkʼananpaj, enemigosnintataj atipananpaj. Jesustaj mana sapallanchu kanqa. Paywanqa kanqanku ‘cielomanta soldados’ nisunman ángeles, 144.000 ajllasqa cristianoswan khuska (Apo. 17:14; 19:11-15). Chanta, ¿imapitaj chay maqanaku tukukonqa? Jehovaman churanakoj tukuynin runas, organizaciones ima tukuchisqa kanqanku (Apocalipsis 19:19-21 leey).

11. Jatun Babilonia chinkachisqa kasqanmanta kusiy kajtinpis, ¿imamantataj aswan kusiyraj kanqa?

¹¹ Jehová enemigosninta chinkachisqantawan, payta tukuy sonqo sirvej cristianosqa maytapuni kusikonqanku. Jatun Babilonia chinkachisqa kasqanmanta, cielopi jatun kusiy kajtinpis, chaypachaqa aswan kusiyraj kanqa (Apo. 19:1-3). Imajtinchus Apocalipsis libro nisqanman jina, ‘Corderoj casamienton’ kanqa (Apo. 19:6-9).

12. Apocalipsis 21:1, 2 nisqanman jina, ¿maykʼajtaj Corderoj casamienton kanqa?

¹² ¿Maykʼajtaj Corderoj casamienton kanqa? 144.000 ajllasqa cristianosqa Armagedón guerra qallarinanpaj tukuyninkuña cielopi kashanqanku. Jinapis Corderoj casamientonqa manaraj chaypachachu kanqa (Apocalipsis 21:1, 2 leey). Chay casamientoqa kanqa Armagedón guerra pasaytaraj, Jehovaj tukuynin enemigosnin chinkachisqa kasqankutawan (Sal. 45:3, 4, 13-17).

13. ¿Imataj kanqa Corderoj casamientonpi?

¹³ ¿Imataj kanqa Corderoj casamientonpi? Uj casamientopeqa uj qhariwan uj warmiwan ujchaykukunku. Ajinallatataj Corderoj casamientonpipis, Rey Jesucristowan ‘novianwan’ ujchaykukonqanku, nisunman 144.000 kajkunawan. Chaymantapachataj uj mosoj gobierno kay jallpʼata 1.000 watasta kamachiyta qallarenqa (Apo. 20:6).

14, 15. Apocalipsis 21 capitulopi 144.000 kajkunata, ¿imawantaj kikinchakun? (Kay revistaj tapanpi dibujota qhawariy).

¹⁴ Apocalipsis 21 capitulopeqa 144.000 kajkunata kikinchakun uj kʼachitu llajtawan, ‘Mosoj Jerusalenwan’ (Apo. 21:2, 9). Chay llajtaqa “12 cimiento rumisniyoj karqa, chaykunapitaj kasharqa 12 sutis, Corderoj 12 apostolesninpa sutisninku”. Chayta rikuspa Juanqa tʼukorqachá. Imajtinchus sutinta ujnin rumipi qhelqasqata rikorqa. Juanqa maytachá chaymanta kusikorqa (Apo. 21:10-14; Efe. 2:20).

 ¹⁵ Chay Mosoj Jerusalenqa ni mayqen llajtawan kikinchu. Ancho callenqa chʼuwa qorimanta, 12 punkusninpis 12 perlas karqanku, perqasnin, cimientosninpis kʼachanchasqa karqa tukuy laya valorniyoj rumiswan. “Chay llajtaqa cuadrado karqa, largonman, anchonmanpis chhikankamalla” (Apo. 21:15-21). Jinapis Juanqa repararqa uj ima faltasqanta. Pay nerqa: “Chay llajtapeqa mana ima templotapis rikorqanichu, Tukuy Atiyniyoj Jehová Diosmin chay llajtaj templonqa, jinallataj Corderopis. Chay llajtaqa mana intiwan kʼanchachikunanchu tiyan, nillataj killawanpis, Diospa jatun kaynin kʼanchaykusqanrayku, Corderotaj kʼanchanan kasqanrayku”, nispa (Apo. 21:22, 23). Mosoj Jerusalenmanta kajkunaqa Jehovawan kanqanku (Heb. 7:27; Apo. 22:3, 4). Jehovawan Jesuswantaj chay llajtaj templon kanku.

16. Diospa Gobiernon 1.000 watasta kamachishajtin, ¿ima bendicionestaj runaspaj kanqa?

¹⁶ Ajllasqa cristianosqa, chay mosoj llajtapi piensarispa maytapuni kusikunku. Kay jallpʼapi kausakuyta suyakoj cristianospis, chay llajtapi piensarinallankutaj tiyan. Chay Mosoj Jerusalenqa, Diospa Gobiernon 1.000 watasta kamachishajtin, may chhika bendicionesta kay jallpʼaman apamonqa. Juanqa rikorqa chay bendiciones ‘kausayta qoj yakuyoj mayu’ jina kasqankuta. “Mayoj puraj chimpanpitaj kausay sachʼas” karqa. “Chay sachʼaspa laqhesnenqa nacionesta jampinapaj karqa” (Apo. 22:1, 2). Chay tiempopi kausaj runasqa, chay tukuy bendicionesta japʼiyta atenqanku. Diosta kasukojkunaqa, pisimanta pisi mana pantaj runasman tukonqanku. Chaypeqa manaña kanqachu onqoykuna, nanaykuna, nitaj llakiymanta waqaypis (Apo. 21:3-5).

17. Diospa Gobiernon 1.000 watasta kamachishajtin, ¿pikunataj may chhika bendicionesta japʼenqanku? (Apocalipsis 20:11-13).

¹⁷ ¿Pikunataj chay bendicionesta japʼenqanku? Ñaupajtaqa Armagedón guerrata kausashaj pasaj may chhika runas, mosoj jallpʼapi nacekoj wawitas ima. Jinapis mana paykunallachu japʼenqanku. Apocalipsis 20 capituloqa nin wañusqas kausarimunankuta (Apocalipsis 20:11-13 leey). Chanta, ¿pikunataj kausarimonqanku? ‘Cheqan runas’. Paykunaqa kanku Jehovata tukuy sonqo sirvispa wañuporqanku chaykuna. Kausarimullanqankutaj ‘mana cheqan runaspis’. Paykunaqa kanku niraj wañupushaspa mana Jehovata rejsiyta  aterqankuchu chaykuna (Hech. 24:15; Juan 5:28, 29). ¿Chay niytachu munan Diospa Gobiernon 1.000 watasta kamachimushajtin tukuy runaspuni kausarimunankuta? Mana. Pikunachus niraj wañupushaspa nipuni Jehovata sirviyta munarqankuchu chaykunaqa, mana kausarimonqankuchu. Paykunaqa Jehovata sirviyta aterqanku, jinapis mana munarqankuchu. Chaywantaj rikucherqanku mana paraisopi kausakuyta munasqankuta (Mat. 25:46; 2 Tes. 1:9; Apo. 17:8; 20:15).

18. ¿Imaynataj runas kanqanku 1.000 watas tukukuyta?

¹⁸ Waranqa watas tukukuyta, runasqa manaña pantaj runaschu kasun. Chaypachaqa Adán ima llakiykunamanchus vendeykuwasqanchejmanta kacharichisqa kasun (Rom. 5:12). Adanpa rikhurichisqan juchaqa, wiñaypaj chinkachisqa kanqa. Ajinamanta chay 1.000 watas tukukojtin, jallpʼapi kausaj runasqa mana pantajkunaman tukusun. Chaytaj wañuymantapis kausarishasunman jina kanqa (Apo. 20:5).

19. ¿Imajtintaj qhepa kaj prueba kananpuni tiyan?

¹⁹ Jesusqa Satanás tukuy imapi urmachiyta munajtinpis, manapuni Diosta wasancharqachu. Mana pantaj runasrí, ¿ajinallatatajchu ruwanqanku Satanás paykunata pruebaman churajtin? Chay tapuytaqa sapa uj kutichinanku kanqa 1.000 watas tukukojtin, Satanastaj chinkay ukhumanta kacharichisqa kajtin (Apo. 20:7). Qhepa kaj pruebapi Jehovata mana wasanchajkunaqa, wiñay kausayta japʼenqanku. Chaymantapachataj niña ujtawan juchaj esclavosninchu kanqanku (Rom. 8:21). Jinapis Jehovaj contranpi oqharikojkunaqa, Diablo jina, demoniosnin jinataj wiñaypaj chinkachisqa kanqanku (Apo. 20:8-10).

20. Apocalipsis libromanta profeciasta estudiaytawan, ¿imayná kashanchej?

²⁰ Kay kinsa yachaqanaspi Apocalipsis libromanta yachakuytawan, ¿imayná kashanchej? Apocalipsis libromanta profecías juntʼakunanta yachaspa, ¿imatá nisunman? Maytachá munashanchej runasta invitayta noqanchejwan khuska Jehovata sirvinankupaj (Apo. 22:17). Imaschus aswan qhepaman kananta yachaytawan may kusisqaschá kashanchej, apóstol Juan jinatajchá ninchej: “¡Amén! Jamuy Señor Jesús”, nispa (Apo. 22:20).