AJINATA nisharqa Informador nisqa hojitapi. * Chayqa diciembre de 1937 watapi llojserqa (chayqa Londresllapaj karqa). Chay hojitapi nerqa: “Chunka wataspi pisilla yapakorqa”, nispa. Ajinapuni kasqanta rikuchinanpajtaj, ñaupaj paginanpi willarqa 1928 watamanta 1937 watakama mashkhatachus willakusqanta.

¿Imaraykú Gran Bretañapi pisillataña predicakusharqa? Congregacionesqa ñaupajta jina kikillantapuni ruwasharqanku, chayraykusina mana ñauparisharqankuchu. Sucursalpis nisqa tukuynin suyuta predicanapajqa, 200 precursores jinalla necesitakusqanta. Chay precursorestaj congregacioneswan predicanankumantaqa, karu lugaresman kachasqa karqanku. Chantapis sucursalqa precursores kayta munajkunata nerqa, tukuy Gran Bretañapiña willakusqanta, Europapi waj suyusmantaj rinankupaj kallpacharqa. Ashkha precursores waj suyusman predicaj ripullajpuni kanku. Wakenqa Franciaman riporqanku, francés parlayta pisillata yachaspapis chayri manapis.

Informador hojitaj ujnin yachaqananqa, 1937 watapi Gran Bretañamanta hermanosta kallpacharqa, uj millón horasta 1938 watapi predicanankupaj. Chaytaj atikullanman karqa, sapa killa uj publicador 15 horasta predicajtin, sapa precursortaj 110 horasta. Hermanosta yuyaychakorqa, gruposta ruwaspa sapa día 5 horasta predicanankuta. Yuyaychakullarqataj yachakuyta munajkunaman kutinankuta, astawanqa qhasi diasnin tardeyaykuyta.

Chay yuyaychaykunata uyarispa ashkha hermanos kusikorqanku. Hermana Hilda Padgett nerqa: “Sucursalqa astawan predicanaykupaj minkʼashawarqayku, chaytaqa ashkhas suyasharqayku. May allintaj riwarqayku”, nispa. * Wallis apellidoyoj hermanataj nerqa: “Sapa día 5 horasta predicayqa sumajpuni karqa. Señorpaj diantinta llankʼayqa, maytapuni kusichikun. [...] Saykʼusqa kutinpuspapis, kusisqa kasharqayku”, nispa. Stephen Miller sutiyoj jovenpis, usqhayta willana kasqanta repararqa, atishaspataj yanapakuyta munarqa. Payqa nin: “Hermanosqa diantinta bicicletaswan grupospi predicaj kanku. Qʼoñi tiempopitaj, grabasqa umallirichiykunata tardesninpi uyarichej kanku”, nispa. Chantapis hermanosqa letreroswan marchaspa predicaj kanku, callespitaj revistasta runasman jaywaj kanku.

Informador hojitaqa nillarqataj, waranqa precursores necesitakusqanta. Chantapis waj jinamanta predicakunanta nikorqa, maypichus precursores congregacionwan khuska predicankuman karqa, yanapanankupaj, kallpachanankupaj ima. Hermana Joyce Ellis (soltera apellidon Barber) nin: “Ashkha hermanosqa reparasharqanku precursores kananku kasqanta. Noqapis 13 watayojlla kajtiypis precursora kayta munarqani”, nispa. Payqa julio de 1940 watapi 15 watasniyoj kashajtin precursora  karqa. Aswan qhepaman Joyceqa Peterwan casarakorqa. Petertaj Informador hojitaj nisqanta leeytawan, precursor kananpi tʼukurerqa. Kay junio de 1940 watapitaj 17 watasniyoj kashajtin, 105 kilometrosta bicicletapi Scarborough llajtakama rerqa. Chaypitaj precursor jina llankʼayta qallarerqa.

Chay tiempopi mosoj precursoresqa, tukuy atisqankuta ruwarqanku. Uj qhariwarmi chayta ruwarqa, qosaqa Cyril Johnson sutikorqa, warmintaj Kitty. Paykunaqa precursores kanankupaj wasinkuta, kapuyninkutawan venderqanku. Cyril nin: “Chayta ruwasqaykoqa sumajpuni karqa. Ni imamanta pesachikuykuchu”, nispa.

Precursores usqhayta yapakusqankurayku, ñaupajman apaj hermanosqa imaynatachus paykunata yanapanankuta yuyaychakorqanku. Paykunaqa precursorespaj llajtaspi wasis kananta nerqanku. Precursorestataj khuska llankʼanankuta nikorqa, pisillata gastanankupajtaj uj wasillapi tiyakunankuta. Hermano Jim Carr, 1938 watapi siervo de zona nisqa karqa (kunantaj congregacionesta waturej nikun). Payqa chay nisqankuman jina ruwarqa. Chayrayku Sheffield llajtapi uj jatun wasita precursorespaj alquilarqanku, chay wasita qhawananpajtaj wakichisqa hermanota churarqanku. Chay lugarmanta hermanosqa qolqewan, waj imastawan qospa yanapakorqanku. Jim nerqa: “Tukuy yanapakorqanku sumaj llojsinanpaj”, nispa. Chay wasiman 10 precursores tiyakoj riporqanku, Diosta yupaychaypi ruwanasninkutataj sumajta juntʼaj kanku. “Tutamanta sapa pʼunchay ukhunchanapaj folletota khuska leej kanku”, chantá “sapa uj maypichus predicananku karqa chayman rej kanku”.

Chay hojitaj nisqantaqa publicadores, precursores ima kasukorqanku. Kay 1938 watapitaj uj millón horasta predicarqanku. Hermanosqa astawan revisitasta, estudiosta ruwarqanku, publicacionestapis astawan saqerqanku. Phishqa watasllapi publicadoresqa casi kinsa jinastawan yapakorqanku. Predicanankupaj kallpachakusqankoqa hermanosta kallpacharqa guerra tiempopipis predicanallankupajpuni.

Kay tiempopeqa, Armagedón maqanakuy qayllitapiña kashan, Gran Bretañapi precursorestaj yapakullantaj. Pasaj 10 wataspi precursoresqa astawan ashkhayarqanku, kay 2015 octubre killapajqa 13.224 karqanku. Chay precursoresqa yachanku Diospa tukuy atisqankuta llankʼasqankoqa mana ni imawan kikinchakusqanta.