1. Jatun juchapi urmasqankurayku, ¿imatataj wakin hermanos yuyanku?

APÓSTOL Pablotaqa, cheqan kajta ruwayta munashajtin, sajra kajllaman sonqon aysaj. Chayrayku uj kuti, jinata nerqa: “¡Ay, imanallasajtaj!”, nispa (Rom. 7:24). Kay tiempopipis, Pablo jinallataj llakikunchej, phutikunchejtaj. Imajtinchus Diosta kusichiyta munaspapis pantanchejpuni. Wakin hermanos jatun juchapi urmasqankurayku, jinata yuyanku: “Jehová Diosqa ni jaykʼaj perdonawanqachu”, nispa.

2. 1) ¿Imatataj Biblia niwanchej Jehová Diospi atienekojkunamanta? 2) ¿Imasmantataj qhepan parrafospi yachakusunchej? (“ Pakakuna llajtas, ¿imawanpis ninakunchu?”, nisqata leeriy).

² Bibliaqa nin, Jehová Diospi atienekojkuna mana juchachasqa kanankuta (Salmo 34:22 leey). Israelitasmanta parlarina. Unay tiempopi Jehová Diosqa, israelitasman kamacherqa pakakuna llajtas kananta. Chay llajtaspeqa, pakakoj kanku mana yuyasqallamanta runata wañuchejkuna. Chay kamachiytaj tukukaporqa 33 watapi, Pentecostés fiestapi. Kunantaj, qhepan parrafospi yachakusunchej imayna ñawiwanchus Jehová Dios juchallikojkunata, pesachikojkunatapis qhawasqanta. Yachakullasuntaj imajtinchus Israelpi pakakuna llajtas kasqanta, imaraykuchus Jehová Diospi pakakuna kasqantapis. Chantá yachakullasuntaj imatachus ruwana kasqanta Jehová Dios khuyakunawanchejpaj,  perdonanawanchejpaj ima.

3. ¿Imatataj israelitas ruwananku kasqa runata wañuchejwan?

³ Jehová Diospa sonqon nanaj, pi israelitallapis runata wañuchejtin. Chayrayku uj israelita pi runallatapis wañuchejtin, ‘chay wañusqa runaj aswan qaylla kaj familian chay wañuchej israelitata, wañuchinan karqa’ (Núm. 35:19). Imajtinchus Jehová Diosqa, israelitasman ajinata kamacherqa: ‘Amapuni runataqa wañuchinkichejchu, maypichus tiyakunkichej, chay jallpʼaspi. Runa wañucheyqa chay jallpʼasta chʼichichanman. Chaymantaqa manaña waj imata qona atikunchu. Manachayqa jinata ruwaj runaqa wañuchisqallataj kanan tiyan’, nispa (Núm. 35:33, 34).

4. Uj israelita mana yuyasqallamanta runata wañuchejtin, ¿imatataj ruwayta atinman kasqa?

⁴ Pi israelitallapis mana yuyasqallamanta runata wañuchejtenqa, juchayoj karqa runata wañuchisqanmanta (Gén. 9:5). Jinapis Jehová Diosqa mana yuyasqallamanta runata wañuchejtaqa khuyakoj. Chayrayku chay runaqa, ayqekuyta atej, sojta pakakuna llajtasmanta ujninman. Chay runataj pakakuna llajtamanta mana llojsinanchu karqa, kuraj kaj sacerdote wañupunankama (Núm. 35:15, 28).

5. Pakakuna llajtas kasqan, ¿imatataj reparachiwasunman?

⁵ Uj kuti Jehová Diosqa, Josueman jinata nerqa: “Israelitasman niy pakakuna llajtasta wakichinankuta”, nispa. Arí, Jehová Diospuni israelitasta kamacherqa, pakakuna llajtasta ajllanankuta (Jos. 20:1, 2, 7, 8). Chayta yachaytaj reparachiwanchej Jehová Dios israelitasta khuyakusqanrayku, chay pakakuna llajtasta ajllanankuta kamachisqanta. Reparachillawanchejtaj noqanchejpis Jehová Diospi pakakuyta atisqanchejta.

6, 7. 1) Israelmanta kurajkuna, ¿imastataj ruwaj kasqanku mana yuyasqallamanta wañuchej runata yanapanankupaj? (8 paginapi dibujota qhawariy). 2) Mana yuyasqallamanta runata wañuchej, ¿kurajkunawan parlarinankupunichu kasqa?

⁶ Pi israelitallapis mana yuyasqallamanta runa masinta wañuchejtenqa, pakakuna llajtaman ayqenan karqa. ‘Chay llajtaj punkunman chayaspataj, willakunan karqa chay llajtapi kaj kurajkunaman imajtinchus jamusqanta. Paykunataj chay llajtaman yaykuchispa, rikuchinanku karqa, maynejpichus tiyakunanta’ (Jos. 20:4). Pisi tiemponmantaj, kurajkunaqa mana yuyasqallamanta wañuchej runata, kachananku karqa ima llajtapichá runata wañucherqa, chay llajtaman. Chay llajtamanta kurajkuna, mana yuyasqallamanta wañuchisqantachus manachus ninankupaj (Números 35:24, 25 leey). Chay kurajkuna mana yuyasqallamanta wañuchisqankuta nejtinkutaj, pakakuna llajtaman kutichipullajtaj kanku.

⁷ Jehová Diosqa, mana yuyasqallamanta runata wañuchejkunata khuyakunanpajqa, kamacherqa Israelmanta kurajkunawan parlarinankuta. Ajinamanta khuyasqa kanankupaj, mana sajra ruwayman yachaykukunankupaj ima. Chaymanta parlaspa uj yachayniyoj runa, jinata nerqa: “Mana yuyasqallamanta runata wañuchejqa, kurajkunawan mana parlamojtin, wañuchisqa kayta aterqa, Diospa kamachisqanta mana kasukusqanrayku”, nispa. Mana yuyasqallamanta runata wañuchejqa, kurajkunawan parlananpuni karqa. Kurajkunaj yuyaychasqantataj kasukunan karqa, mana wañuchisqa kananpaj. Sichus runata wañuchej, mana pakakuna llajtaman rinmanchu karqa chayqa, payta wañuchiyta atinman karqa, wañojpa aswan qaylla kaj familian.

8, 9. ¿Imaraykutaj juchallikojkuna ancianoswan parlarinankupuni kasqa?

⁸ Kay tiempopipis, uj hermano jatun  juchapi urmajtenqa, ancianoswan parlarinanpuni tiyan. Ancianostaj Jehová Diosman kutirinankupaj yanapananku tiyan. Chantá, ¿imaraykutaj juchallikojkuna ancianoswan parlarinankupuni kanman? Imaraykuchus Jehová Diosqa, ancianosta churarqa juchallikojkunata yanapanankupaj (Sant. 5:14-16). Ancianosqa churasqallataj kanku, juchankumanta pesachikojkunata Jehová Diosman kutirichinankupaj. Chantá juchallikojta yuyaycharillankutaj manaña watejmanta kikin juchapi urmananpaj (Gál. 6:1; Heb. 12:11). Chantapis ancianosqa, wakichisqa kanku juchankumanta pesachikojkunata kallpachanankupaj, sonqochanankupaj ima. Jehová Diosqa ancianosmanta jinata nin: ‘Loco para wayramanta pakakunapaj jina kanku’, nispa (Isa. 32:1, 2). Arí, Jehová Diosqa ancianosta churan khuyakuwasqanchejrayku.

⁹ Juchallikoj hermanos, ancianoswan parlarejtinku, yanapanta maskʼajtinkutaj, sonqo tiyasqa kanku. Kunantaj hermano Danielmanta parlarina. Payqa uj jatun juchapi urmasqa. Pay nin: “Juchallikusqaymantaqa mana chay ratochu ancianosman willakorqani. Imajtinchus yuyarqani ancianos mana yanapanawankuta”, nispa. Jinapis Danielqa, manchachikoj juchan yachakunanmanta. Jehová Diosmanta perdonta mañakojtinpis, sonqon juchachallarqapuni. Chayrayku ancianosman juchanta willakorqa. Daniel nin: “Ancianosman juchayta rimariytaqa manchachikorqani. Jinapis ancianoswan parlarerqani. Paykunawan parlarisqaytawantaj, sonqoyqa phaj niwarqa. Jehová Dioswantaj tukuy sonqo parlariyta atillarqani”, nispa. Kunantaj Danielpa sonqonqa manaña juchachanchu, siervo ministerial jinataj llankʼashan.

10. Mana yuyasqallamanta runata wañuchej, khuyasqa kananpaj, ¿imatataj ruwanan kasqa?

¹⁰ Mana yuyasqallamanta runata wañuchejqa, khuyasqa kananpaj usqhayllata pakakuna llajtaman ayqekunan karqa (Josué 20:4 leey). Chay llajtapitaj qhepakunan karqa, kuraj kaj sacerdote wañupunankama. Chayrayku mana yuyasqallamanta runata  wañuchejqa, trabajonta, wasinta ima saqepunan karqa. Manañataj viajaytapis aterqachu (Núm. 35:25). * Mana yuyasqallamanta runata wañuchej, pakakuna llajtamanta llojsipojtenqa, runata wañuchisqanmanta “ima dakuwan” nishanmanpis jina karqa. Chantapis payta wañuchiyta atinkuman karqa.

11. Uj hermano juchapi urmajtin, ¿imatataj ruwanan kasqa Jehová Dios khuyakunanpaj?

¹¹ Kay tiempopipis juchapi urmaj hermanoqa, manaña sajra imasta ruwananchu tiyan. Nitaj juchapi urmananpaj jina imastapis ruwananñachu tiyan. Ajinamantataj Jehová Diosqa khuyakonqa. Uj kuti Corintomanta cristianos juchankumanta pesachikuspa, imatachus ruwasqankumanta apóstol Pabloqa, jinata nerqa: “Juchamanta llimphuchakorqankichej, sajra kajtataj chejnerqankichej. Chantapis Diosta manchachikorqankichej, pesachikuyta munarqankichej, mana allin kajta cheqanchanapajtaj tukuy sonqo kallpachakorqankichej”, nispa (2 Cor. 7:10, 11). Manaña juchallikunapaj tukuy sonqo kallpachakusunchej chayqa, Jehová Diosman rikuchisun pesachikusqanchejta.

12. ¿Imastataj saqepunanchej kasqa ima juchapipis mana urmananchejpaj?

¹² Juchapi urmajtinchej Jehová Dios khuyakunawanchejpajqa, imaschá juchaman urmanapaj tanqawanchej, chay imasta saqepuna (Mat. 18:8, 9). Amigosninchej Jehová Dios chejnisqan imasta ruwanapaj tanqawajtinchejqa, paykunawan amaña masichakunachu. Sichus machachina imasta tomay gustawanchej chayqa, ama machanakama tomanachu. Manataj allinchu kanman maypichá tomachiwasunman chayman rinanchej. Chantapis khuchichakuypi mana urmanapajqa, ama khuchichakuymanta videosta qhawanachu. Amallataj telepi chayri Internetpipis millay imasta qhawanachu. Chantá nillataj khuchichakuypi urmanapaj jina imatapis ruwanachu. Jehová Diospa kamachiykunasninta kasukojtinchejqa, tukuy imapi allinpuni riwasunchej. Chantapis mana munanchejchu Jehová Dios noqanchejmanta karunchakunanta. Astawanqa munanchej qayllaykamunawanchejta, munakunawanchejtataj (Isa. 54:7, 8).

13. Mana yuyasqallamanta runata wañuchej, ¿imaraykutaj pakakuna llajtapi kusisqa tiyakuyta atinman kasqa?

¹³ Pakakuna llajtapiña kaspa mana yuyasqallamanta runata wañuchejqa, niña manchachikunanchu karqa. Imajtinchus Jehová Dios nerqa, chay llajtas ‘pakakunapaj kasqanta’ (Jos. 20:2, 3). Jehová Diosqa nerqa mana yuyasqallamanta runata wañuchejqa, uj kutillata juzgasqa kananta, chay jucharayku. Chantapis wañojpa aswan qaylla kaj familianqa, pakakuna llajtaman mana yaykuyta atejchu. Chay runa wañuchejta wañuchinanpaj. Mana yuyasqallamanta runata wañuchejqa pakakuna llajtapiña kaspa, Jehová Diospa jarkʼayninpi kasharqa. Mana yuyasqallamanta runata wañuchejqa, mana carcelpi jinachu karqa. Imajtinchus payqa pakakuna llajtapi trabajayta, runa masinta yanapayta, Jehová Diostapis yupaychayta aterqa. Arí, pakakuna llajtapeqa kusisqa tiyakuyta aterqa.

14. ¿Jehová Dios juchanchejmanta yuyarikullanpunichu pesachikojtinchejpis?

¹⁴ Wakin hermanosqa, juchankumanta pesachikojtinkupis, sonqonku juchachallanpuni. Wakin hermanostaj ninku: “Jehová Diosqa ni jaykʼaj perdonawanqachu”, nispa. Noqanchej ajinata ninchej chayqa, yuyarikunanchej tiyan Jehová Diosqa juchanchejta qonqayman churasqanta. Chayrayku ama saqenachu tiyan, sonqonchej juchachanallawanchejtapuni. Hermano Danieltapis sonqon juchachallarqapuni. Jinapis  ancianoswan parlarejtin, sonqon tiyaykorqa. Imaraykuchus ancianosqa sajra ruwayninta qonqapunanpaj yanaparqanku. Daniel nin: “Jehová Dios khuyakuwasqanrayku perdonawasqanta yachaspa, sonqo tiyasqa karqani. Jehová Dios juchayta karuman churasqanta yuyarikuspataj, niña ujtawan chay juchamanta yuyarikunichu”, nispa. Imaynatachus mana yuyasqallamanta runata wañuchej pakakuna llajtapiña kaspa, mana manchachikunanchu karqa wañojpa aswan qaylla kaj familian taripaspa wañuchinanta. Ajinallatataj Jehová Dios juchanchejta perdonawajtinchejqa, mana yuyananchejchu tiyan, chay juchamanta castiganawanchejta (Salmo 103:8-12 leey).

15, 16. 1) ¿Jesús Kuraj kaj Sacerdotenchej jina yanapashawanchejchu? 2) ¿Jehová Dios perdonawasunmanchu?

¹⁵ Noqanchejqa mana iskayrayananchejchu tiyan Jehová Dios khuyakunawanchejmanta. Imaraykuchus noqanchejrayku Jesús wañorqa. Chayrayku apóstol Pabloqa, jinata nerqa: ‘Diosman graciasta qoni. Imaraykuchus paymin kacharichiwan juchamanta Señorninchej Jesucristonejta’, nispa (Rom. 7:25). Pablo chayta nerqa, Jehová Dios Jesucristonejta juchasninta perdonasqanpi atienekusqanrayku. Jesucristo kausayninta qosqanrayku, sonqonchejta qhasi manakaj ruwaykunamanta llimphuchan, sonqo tiyasqa kananchejpaj (Heb. 9:13, 14). Jesucristo Kuraj kaj Sacerdotenchej kasqanrayku, ‘Diosman qayllaykunapaj yanapawasunman, salvawasunmantaj. Imaraykuchus payqa kausashallanpuni, Diosmanta yanapata mañapunawanchejpaj’ (Heb. 7:24, 25). Unay tiempopi kuraj kaj sacerdoteqa, israelitasta yanapaj Jehová Dioswan allinyakunankupaj. Kay tiempopipis Jesucristo Kuraj kaj Sacerdotenchej kasqanrayku, astawanraj yanapawanchej Jehová ‘Dios khuyakunawanchejpaj, jinallataj jatun khuyakuyninta qonawanchejpajpis’ (Heb. 4:15, 16).

¹⁶ Jehová Diospi pakakunapajqa, Jesús juchanchejrayku wañusqanpi creenanchej tiyan. Nitaj yuyanachu Jesús wajkunaraykulla wañusqanta (Gál. 2:20, 21). Jesús kausayninta qosqanrayku, Jehová Diosqa juchasninchejta perdonayta atiwanchej, wiñaypajtaj kausakuyta atinchej. Arí, Jehová Diosqa khuyakuwasqanchejrayku kʼata Wawanta qorqa.

17. Jehová Diospi, ¿imajtintaj pakakunanchej kanman?

¹⁷ Israelpi pakakuna llajtas kasqanta yachayqa, yanapawanchej entiendenapaj Jehová runasmanta khuyakusqantapuni. Chantapis reparachillawanchejtaj, Jehová Dios runaj kausayninta jatunpaj qhawasqanta. Reparachillawanchejtaj imaynatachus ancianos juchallikojkunata yanapasqankuta. Jinallataj imaynatachus sonqomantapacha pesachikuna kasqanta. Reparallarqanchejtaj imaynatachus Jehová Dios juchanchejta qonqayman churasqanta. Chayrayku Jehová Diospi pakakunanchejpuni tiyan (Sal. 91:1, 2). Qhepan semanataj astawan pakakuna llajtasmanta parlarisunchej. Yachakusuntaj Jehová Dios jina khuyakuywan maychus kajta ruwanata.