HERMANO Alfredoqa karu lugarpi kaj congregacionman cambiakorqa. * Pay nin: “Congregacionmanta cambiakushajtiy, hermanos amigosniyman tukunankumantachus manachus manchachikusharqani, jinallataj hermanosman allinta rijchʼanaytachus manachus”, nispa.

Kunallanraj congregacionmanta cambiakorqanchej chayqa, ichá mancharisqallataj kashanchej. Kunantaj yachakusunchej imatachus ruwanata waj congregacionman yachaykukunapaj. Imatatajchus ruwanata mana usqhayllata yachaykukojtinchej. Yachakullasuntaj imaynatachus waj congregacionmanta jampoj hermanosta yanapanata.

Imaynatachus uj sachʼata waj lugarman plantamunapaj saphisninta kʼutunchej, ajinallatataj noqanchejpis congregacionmanta cambiakushaspaqa, amigosninchejta saqerqanchej, chay congregacionpi ruwanasninchejtapis. Chantapis imaynatachus uj sachʼa waj jallpʼapi watejmanta saphichakunan tiyan, ajinallatataj noqanchejpis waj congregacionpiña kaspa, watejmanta hermanoswan masichakunanchej tiyan. Imajtinchus qallariypeqa, waj congregacionman mana yachaykukuyta atillasunmanchu. Jinapis Bibliamanta wakin versículos yanapawasunchej.

Diospa Palabranta sapa día leej runaqa, “mayu kantupi sachʼa jina, tiempompi poqoj, laqhesnenqa qʼomerllapuni, manataj qawinchu. Tukuy ima ruwasqanqa ñawpajman rin allinta” (Sal. 1:1-3).

Uj sachʼa wiñanallanpajpuneqa, yakuta necesitan. Noqanchejpis Diospi astawan atienekunapajqa, Bibliata sapa día leenanchej tiyan. Tantakuykunamanpis rinapuni tiyan. Chantá familianchejwan chayri sapallanchejpi, Bibliataqa ukhunchananchejpuni tiyan. Diosman astawan qayllaykunapajtaj, kallpachakunallapuni tiyan, ñaupaj congregacionninchejpi jina.

“Pichus wajkunata sajsachejqa, paypis sajsachisqallataj kanqa” (Pro. 11:25).

Uj mosoj congregacionman usqhayta yachaykukunapajqa, predicacionman mana faltakuspa rinapuni. Kevinqa anciano jina llankʼashan, nintaj: “Waj congregacionman chayaytawan, señoraywan precursores auxiliares karqayku. Ajinamanta rejserqayku ashkha hermanosta, precursoresta, maypichus predicaj kanku chaynejtapis. Ajinamanta congregacionman yachaykukullarqayku”, nispa. Hermano Rogermantañataj parlarina. Payqa karupi kaj congregacionman cambiakorqa. Pay nin: “Waj congregacionman yachaykukunapajqa, predicaj llojsinapuni. Congregacionpitaj imallapipis yanaparikunapuni. Ichapis Tantakuna Wasita pichaysikusunman chayri pillapis tantakuyman faltakojtin partenta ruwasunman. Manachayri mayqen hermanollatapis tantakuykunaman pusasunman. Imallapipis yanapakojtinchejqa, hermanosqa imata ruwanapajpis wajyarikuwasunpuni”, nispa.

‘Sonqonchejta jatunta kicharina’ (2 Cor. 6:13).

Waj Congregacionman chayaspaqa, hermanoswan kʼachas kana. Hermana Melisamanta parlarina. Payqa familianwan waj congregacionman riporqa. Pay nin: “Niraj tantakuy qallarishajtin chayri tantakuy tukukojtin, hermanoswan parlarinaykupaj tiempocharikojpuni kayku. Ajinamanta hermanostaqa astawan rejserqayku, sutisninkutapis yachakorqaykupacha.  Hermanostataj wasiykuman wajyarikojpuni kayku. Ajinamanta hermanoswan sumaj amigosman tukorqayku. Hermanos wajyarimunawaykupajqa, celularniykoj numeronta qojpuni kayku. Hermanostajrí imata ruwanapajpis wajyamuwajpuni kayku, pujllarinapajpis”, nispa.

Hermanoswan mana parlariyta atillankichu chayqa, ichapis parlarinaykipaj asiriwaj. Asirejtiykeqa hermanos parlarillasonqanku. Imajtinchus Biblia nin: “Kusiy ñawiwan qhawayqa sonqota kusichin”, nispa (Pro. 15:30). Hermana Raquelmanta parlarina. Payqa wasinmanta karupi kaj congregacionman cambiakorqa. Pay nin: “Noqaqa manchali kani. Chayrayku maymanchus riporqani chay congregacionmanta hermanoswan parlarinaypaj, mayta kallpachakunay karqa. Congregacionmanta wakin hermanastaj, noqa jina pillawanpis parlariyta manchachikullajtaj kanku. Paykunawan parlarinaypajtaj mayta kallpachakoj kani”, nispa. Chayrayku niraj tantakuy qallarishajtin chayri tantakuy tukukusqantawan hermanoswan parlarinapuni.

Jinapis waj congregacionman mana yachaykukuyta atispaqa, ichá llakikuyta qallarisunman. Ajinapi rikukojtinchejqa, kallpachakunallapuni hermanoswan amigos kanapaj.

Imaynatachus wakin sachʼas, waj jallpʼapi mana chay ratochu saphichakunku. Ajinallatataj noqanchejpis, ichá mana chay ratochu mosoj congregacionman yachaykukusunman. Jinapis Bibliamanta wakin versículos yanapawasunchej.

“Mana saykʼuspa allin kajta ruwanallapuni. Imaraykuchus mana saykʼuspaqa, maychus tiemponpi poqoyta oqharisunchej” (Gál. 6:9).

Waj congregacionmanqa pisimanta pisi yachaykukunchej. Misionerosmanta parlarina. Paykunataqa Galaad Escuelamanta karu lugaresman kachanku. Paykunataj mana wasinkuman kutipunkupachachu. Imajtinchus kachasqa karqanku chay lugarman yachaykukunankupaj, hermanostaraj rejsinku, chay lugarpa costumbresninkutapis. Chaymantaraj llajtankuman kutinku.

Alejandromanta parlarina. Payqa ashkha kutispi congregacionesmanta cambiakusqa. Reparasqataj waj congregacionman yachaykukuy mana facilchu kasqanta. Chayrayku pay nin: “Waj congregacionman ripusqaykutawan uj kuti señoray niwarqa: ‘Tukuy amigasneyqa ñaupaj kaj congregacionpi kashanku’”, nispa. Chantá Alejandroqa señoranta yuyarichisqa, kikillantataj nisqanta iskay wata ñaupajta. Yuyarichillasqataj chay iskay wataspi hermanosta yanapasqanta, mana rejsisqan hermanaspis sumaj amigasninman tukusqankuta.

“Ama imamantapis tapukuychu: Imajtintaj ñawpa tiemposqa kay tiemposmanta nisqaqa aswan allin karqa? nispa. Chay jina tapukoyqa mana yachayniyojpatachu” (Ecl. 7:10).

Amapuni ñaupaj congregacionninchejta mosoj congregacionninchejwan kikinchanachu. Ichapis mosoj congregacionninchejmanta hermanosninchejqa, mana pillawanpis parlariyta atillankumanchu chayri sutʼi simis kankuman. Jinapis ama hermanosninchejta qhawaranachu. Imaynatachus hermanos pantasqasninchejta mana qhawaranankuta munanchejchu, ajinallatataj noqanchejpis pantasqankuta ama qhawaranachu. Chayrayku waj congregacionman ripojtinchejqa, allin kanman tukuy  hermanosninchejta sonqomantapacha munakunapaj kallpachakunanchej (1 Ped. 2:17).

“Mañakullaychejpuni qosonqachejtaj” (Luc. 11:9).

Jehová Diospa yanapayninta mañakunallapuni. Hermano Davidmanta parlarina. Payqa anciano, nintaj: “Waj congregacionman yachaykukunapajqa, Jehová Diospa yanapayninta mañakunapuni”, nispa. Hermana Raquelpis kikillantataj nin: “Qosaywan hermanosmanta karunchasqa jina kasqaykuta yuyajtiykoqa, Diosmanta mañakuyku, reparachinawaykupaj imapichus pantasqaykuta. Hermanoswan masichakunaykupajtaj kallpachakuyku”, nispa.

Wawasninchej mana waj congregacionman yachaykukuyta atishankuchu chayqa, Diosmanta paykunawan mañakuna. Hermanostapis wasinchejman wajyarikusunman, wawasninchej paykunawan masichakunankupaj.

¿Imaynasmantá waj congregacionmanta jampoj hermanosta yanapasunman? Paykunawan amigos kanapaj kallpachakusunman. Familiapi Diosta yupaychanapajpis wajyarikullasunmantaj. Chayri JW Broadcasting nisqa videota paykunawan qhawarisunman. Predicajpis paykunawan llojsisunman, wasinchejmanpis wajyarikusunman. Waj jinasmantapis yanaparikullasunmantaj. Ichá tʼukurisunman waj congregacionman ripojtinchej, imastachus hermanos noqanchejpaj ruwanankuta munasqanchejpi, chayllatataj noqanchejpis ruwapusunman waj congregacionmanta jampoj hermanospaj (Mat. 7:12).

Hermano Carlosmanta parlarina. Pay nin: “Waj congregacionman chayasqaykutawanqa, uj hermana uj listata qowarqayku. Chay listapeqa willasharqa ima tiendaspichus baratollapi vendesqankuta. Chay listaqa maytapuni yanapawarqayku”, nispa. Waj lugarmanta jampoj hermanostaqa, yuyaycharisunman imaynatachus vistikunankuta chiri lugarespi jinallataj qʼoñi lugarespipis. Willarillasunmantaj chay lugarmanta costumbresta, imaspichus runas creesqankutapis. Chayta waj lugarmanta jampoj hermanos yachajtinkoqa, predicacionpi runaspa sonqonman chayayta atenqanku.

Hermano Alfredoqa, waj congregacionpi wata kurajtaña kashan. Pay nin: “Hermanosta rejsinaypaj kallpachakorqani. Kunantaj hermanosqa familiay jina kanku, may kusisqataj kashani. Amigosniypis may ashkha kanku”, nispa.