ASHKHA runas waj suyusman ripunku sumaj kausayta maskʼaspa. Paykunamanta wakintaj hermanosninchej kanku. Jinapis ashkha hermanos, hermanaspis, lugarninkupi ashkha predicajkuna necesitakusqanta yachaspa, suyunkuman kutipushanku. Paykunaqa Jehová Diosta, runa masinkutawan munakusqankurayku, chaypi yanapakuyta munanku (Mat. 22:37-39). ¿Imatataj chay hermanos kutipunankupaj ruwarqanku? Chantá, ¿ima bendicionestataj japʼerqanku? Chayta yachanapaj Camerún suyuman kutipoj hermanosninchejmanta parlarina. Camerunqa Africaj ujnin suyun kashan.

Onésime sutiyoj hermanoqa, 1998 watapi Camerunmanta riporqa, 14 watastataj waj suyupi tiyakorqa. Payqa reunionpi uj discursota uyarisqa. Discursota qoj hermanoqa, predicacionmanta parlaspa nisqa: “Iskay pescadorespi piensarina. Paykunaqa mana kikin lugarpichu pescadota japʼishankuman. Ujnenqa ashkha pescadosta japʼishanman, ujnintaj pisillata. Chay pisillata japʼej pescador, ¿pachallanpichu qhepakunman? Chayrí, ¿maypichus ashkha pescados tiyan chaymanchu rinman?”.

Hermano Onesimeqa, chay kikinchayta uyarispa, Camerunman kutipuypi piensarisqa. Imaraykuchus chaypeqa, ashkha runas Bibliamanta yachakuyta munanku. Jinapis ashkha watasta waj suyupi tiyakusqanrayku, kutipuyta manchachikorqa. Imajtinchus payqa, mana yacharqachu yachaykukuyta atinantachus manachus. Chayrayku Onesimeqa, qallariypi sojta killallapaj Camerunman rerqa. Chantá 2012 watapi chayman tiyakoj riporqapuni.

Hermano Onesimeqa nin: “Watejmanta calorman yachaykukunay karqa, imaynatachus kaymanta runas kausakusqankumanpis. Tiyakorqani chay suyupi salonesqa, sumaj asientosniyoj kanku. Kaypitaj tablamanta ruwasqa asientosllapi chukukunay karqa. Jinapis yachachikusqanta uyarispaqa, qonqapuni imapichus chukushasqayta”. Chay ultimotaqa asirispa nerqa.

Hermano Onesimeqa, 2013 watapi Geraldinewan casarakorqa. Geraldineqa 9 watasta Franciapi tiyakuytawan Camerunman kutiporqa. Paykunaqa casarakuytawan, Jehová Diospaj llankʼayta ñaupajman churarqanku. Chayta ruwasqankurayku, ¿ima bendicionestataj japʼerqanku? Onésime nin: “Diospa Gobiernonmanta Willajkunapaj Escuelaman invitawarqayku, Betelpipis uj tiempota yanapakorqayku. Qayna watataj congregacionniykumanta 20 runas bautizakorqanku. Sutʼita reparani, maypichus ashkha pescados tiyan, chaypi kashasqayta”, nispa (Mar. 1:17, 18). Geraldinetaj nin: “Mana yuyallarqanipischu kay chhika bendicionesta japʼinaytaqa”, nispa.

Judithqa Estados Unidosman riporqa. Jinapis payqa Jehová Diospaj astawan llankʼayta munarqa. Pay nin: “Camerunman familiayta visitaj rispaqa, ashkha runaswan Bibliata estudiayta qallarej kani. Jinapis kutipunay ratotaqa, tukuyninkuta saqepoj  kani. Chayrayku waqarikuspa ripoj kani. Sapa Camerunman rejtiy jinallapuni kaj”, nispa. Judithqa Camerunman kutipuyta munaspapis, mana atillarqachu. Estados Unidospeqa trabajonpi sumajta ganakusharqa. Chay qolqewantaj onqosqa tatanta yanapasharqa. Jinapis Judithqa Jehová Diospi atienekuspa Camerunman kutiporqa. Pay nin: “Imaschus Estados Unidospi kapuwarqa chayta faltacharqani. Chayrayku yachaykukunaypaj Jehová Diosmanta yanapata mañakorqani. Paytaj congregacionesta waturej hermanonejta, señorannejta ima kallpachawarqa”, nispa.

Chay watasta yuyarikuspa Judith nin: “Kinsa watasllapi tawa runasta bautizakunankupaj yanaparqani. Chaytaj may kusiypuni noqapajqa”, nispa. Chaymantataj Judithqa precursora especial karqa. Chantá Sam-Castel sutiyoj hermanowan casarakorqa. Kunantaj iskayninku congregacionesta waturispa yanapakushanku. Tatanwanrí, ¿imataj karqa? Judithwan familianwanqa, waj suyupi hospitalta tarisqanku. Chay hospitaltaj tatanta gratislla operasqa. Kunantaj tatanqa sanitollaña kashan.

Victorqa Canadá suyuman tiyakoj riporqa. Payqa chaypi universidadpi estudiasharqa. Jinallapi Torremanta Qhawaj revistapi leesqa, imatachus Jehová Dios universidadpi estudiaymanta yuyasqanta. Chaypi piensariytawan universidadmanta llojsiporqa, uj oficiotataj yachakorqa. Victor nin: “Chay oficiowanqa usqhayllata trabajota tarerqani. Chaymantataj precursor regular karqani. Chaytaqa maytapuni munarqani”, nispa. Aswan qhepamantaj, Victorqa Carolinewan casarakorqa. Uj pacha Camerunman risqanku. Chaypitaj Betelta visitashajtinku, hermanosqa paykunaman nisqanku: “Kayman predicaj jampuychej”, nispa. Victor nin: “Imatachus hermanos niwasqaykupi señoraywan piensarerqayku. Mana imapis ripunaykupaj jarkʼashawarqaykuchu. Chantapis pisi imasllawanña kausakusharqayku. Chayrayku riyta atillaykuman karqa”, nispa. Carolineqa tumpa onqosqeta karqa. Jinapis paykunaqa Camerunman riporqankupuni.

Chayaytawanqa precursores regulares jina sirviyta qallarerqanku. Paykunaqa Bibliamanta yachakuyta munajkunata tukuy atisqankuta yanapariyta munarqanku. Victorwan Carolinewanqa, tantakusqanku qolqellawan uj tiempota kausakorqanku. Qolqenku tukukojtintaj, watejmanta Canadaman trabajakoj kuterqanku. Chaypi uj mashkha killasta trabajaytawan, Camerunman kutillarqankutaj. Chaypitaj precursoresllapuni karqanku. ¿Ima bendicionestataj japʼerqanku? Diospa Gobiernonmanta Willajkunapaj Escuelaman rerqanku, chantá precursores especiales karqanku. Kunantaj salonesta ruwaspa yanapakushanku. Victor nin: “Jehová Diospaj yaparisqata llankʼaspaqa, astawan reparayku yanapawasqaykuta”, nispa.

Alainqa 2002 watapi, Alemaniamanta uj universidadpi estudiasharqa. Chay wataqa, Joven, ¿qué harás con tu vida? nisqa tratadota leesqa. Chayta leespataj, Jehová Diospaj astawan llankʼayta munasqa. Chantá 2006 watapi, Escuela de Entrenamiento Ministerial nisqaman wajyarisqanku. Chay escuelamantataj Camerunman kachasqanku. Chaytaj paypa suyunpuni karqa.

Alainqa Camerunpi khuskan diapaj trabajota tarikorqa. Aswan qhepamantaj, sumaj pagasqa trabajota tarisqa. Jinapis chay trabajoman yaykuspaqa, niña ñaupajta jinachu predicasharqa. Chayrayku precursor especial kananpaj invitajtinku, chay rato “ya” nerqa. Patronnin astawan pagayta munajtinpis, Alainqa trabajonmanta llojsiporqa. Aswan qhepamantaj, Stéphanie sutiyoj hermanawan casarakorqa. Stephaniepis watasta Franciapi tiyakorqa. Ima llakiykunawanchus Camerunpi tinkusqanmanta parlarina.

 Stéphanie nin: “Kayman chamuytawanqa onqoykachayta qallarerqani. Jinapis tratamientosta ruwaspa, kunanqa sanolla kani”, nispa. Alainwan Stephaniewanqa, Jehovapaj llankʼasqankumanta ashkha bendicionesta japʼinku. Alain nin: “Uj pacha Katé nisqa ranchitoman rerqayku. Chaypeqa ashkha runas Bibliamanta yachakuyta munarqanku. Chayrayku telefononejta paykunawan estudiarqayku. Chay estudiosniymantaqa iskay bautizakorqanku. Kunantaj chay lugarpi uj grupitoña tiyan”, nispa. Stephanietaj nin: “Uj runata Jehovaman kausayninta qopunanpaj yanapayqa, manchay kusiypuni. Jehová Diosta kaypi sirvispa, ashkha bendicionesta japʼiyku”, nispa. Kunanqa Alainwan Stephaniewan congregacionesta waturispa yanapakushanku.

Giseleqa Italiapi medicinata estudiashaspa bautizakorqa. Payta yachachej qhariwarmeqa, precursores karqanku, pisi imasllawantaj kusisqa kausakoj kanku. Giseleqa chayta rikuspa, paypis Jehovapaj astawan llankʼayta munarqa. Chayrayku niraj universidadta tukushaspaña, precursora regular karqa.

Giseleqa Jehovata astawan sirvinanpaj Camerunman ripuyta munarqa. Jinapis tumpa iskayrayasqa kasharqa. Pay nin: “Italiapi tiyakunaypaj permisoyta mana pierdeyta munarqanichu. Chantapis Camerunman ripuspaqa, familiaymanta, amigosniymantapis karupi kayman karqa”, nispa. Jinapis mayo de 2016 watapi, Camerunman riporqapuni. Aswan qhepamantaj hermano Leoncewan casarakorqa. Camerunmanta sucursaltaj, paykunata Ayos nisqa lugarman kachasqa. Chay lugarpeqa ashkha predicajkuna necesitakorqa.

¿Imaynatá paykunata Ayospi rerqa? Gisèle nin: “Semanasta mana luzniyoj kaj kayku. Ni celulartapis cargachiyta atejchu kayku. Chayrayku qhasilla celularniyoj karqayku. Chantapis llantʼawan waykʼuyta yachakorqani. Yakumanpis tutan linternitawan kʼanchakuspa rej kayku. Imajtinchus chay horastaqa, pisi runaslla yakuman rej kanku. Yakutataj carretillapi apakamoj kayku”, nispa. ¿Imataj Giseletawan Leoncetawan chayta ruwanankupaj yanaparqa? Gisèle nin: “Jehová Dios atiyninwan yanapawarqayku. Qosaywanpis purajmanta kallpachanakorqayku. Familiasniyku, amigosniykupis kallpachallawarqaykutaj. Wakin kutistaj qolqesitutapis apachimuwaj kayku”, nispa.

Hermanchej Gisèle, ¿kusisqachu kashan Camerunman risqanmanta? Pay nin: “Arí, ancha kusisqapuni kashani. Qallariypi wakin imasmanta llakikojtiykupis, manaña llakikuykuchu. Qosaypis noqapis, imatachus ruwanayku karqa, chaytapuni ruwashasqaykuta yachayku. Jehová Diospi atienekuyku, astawantaj payman qayllaykuyku”, nispa. Giselewan Leoncewanqa Diospa Gobiernonmanta Willajkunapaj Escuelaman rerqanku. Kunantaj uj tiempota precursores especiales jina sirvishanku.

Pescadoresqa pescadosta japʼinankurayku, paratapis wayratapis mana manchachikunkuchu. Suyunkuman predicaj kutejkunapis, yachanku wakin llakiykunapi rikukunankuta. Jinapis allin sonqoyoj runasman Diospa Gobiernonmanta yachachinankurayku, tukuy sonqo kutipunku. Chaywantaj Jehovaj sutinta munakusqankuta rikuchinku. Paytaj chay hermanospa ruwasqankuta mana qonqanqachu (Neh. 5:19; Heb. 6:10). Ichá qanpis waj suyupi tiyakushanki, lugarniykipitaj ashkha predicajkuna necesitakun. Jina kajtin, allin kanman lugarniykiman kutipunayki. Chayta ruwajtiyki, Jehová Diosqa mayta bendecisonqa (Pro. 10:22).