1. ¿Imajtintaj kusisqa kanapaj Diosta necesitanchejpuni?

 CHEQAMANTAPUNI kusisqa kayqa mana uj rato kusirpakuyllachu. Runasqa tukuy kausayninchejpi kusisqa kayta atisunman. ¿Imaynamanta? Jesusqa Orqopi Yachachishaspa nerqa: “Kusisqa kanku Diosta necesitasqankuta reparakojkunaqa”, nispa (Mat. 5:3). Jesusqa yacharqa runasqa Ruwawajninchej Jehovata rejsiyta, yupaychayta ima mayta munanapaj jina ruwasqa kasqanchejta. Chayrayku runasqa ‘Diosta necesitasqanchejta’ reparakunchej. Jehová ‘kusikuyniyoj Dios’ kasqanraykutaj, payta yupaychajkunapis kusisqallataj kayta atinchej (1 Tim. 1:11).

2, 3. 1) Jesús nisqanman jina, ¿pikunataj kusisqa kayta atillankutaj? 2) ¿Imamantataj kay yachaqanapi yachakusun, chanta imaraykutaj chayta yachakunanchejpuni tiyan?

² ¿Ni ima llakiyniyojchu kana kanman kusisqa kanapaj? Mana. Jesusqa Orqopi Yachachishaspa tʼukunapaj jina kayta nerqa: “Kusisqa kanku llakikojkunaqa”, nispa. Ichá pipis manchay llakisqa kashanman juchasninrayku chayri problemaspi rikukusqanrayku. Ajinapi rikukuspapis Jesús nisqanman jinaqa kusisqa kayta atin. Jesusqa nillarqataj. “Kusisqa kanku cheqan kajrayku qhatiykachasqa kajkunaqa”, nispa. Chantá nillarqataj: “Kusisqa kankichej runas noqarayku rimasojtiykichej”, nispa (Mat. 5:4, 10, 11). Ajina llakiykunapi rikukojtinchejpis, ¿imaynatá cheqamantapuni kusisqa kayta atisunman?

³ Jesusqa mana nerqachu kusisqa kanapajqa mana ni ima llakiyniyoj kananchej kasqanta. Manachayqa nerqa Diosta necesitasqanchejta reparakunanchej kasqanta, paymantaj qayllaykunanchej kasqanta (Sant. 4:8). ¿Imatá chaypaj ruwasunman? Kay yachaqanapeqa cheqamantapuni kusisqa kanapaj kinsa imasta ruwanata qhawarisun.

4. ¿Imatá ñaupajta ruwananchej tiyan cheqamanta kusisqa kanapaj? (Salmo 1:1-3).

⁴ ÑAUPAJ KAJ: Cheqamantapuni kusisqa kanapajqa Diospa Palabranta leenanchej, estudiananchejtaj tiyan. Jesusqa Diospa Palabranta mikhunawan kikincharqa. Runaspis animalespis kausanapajqa mikhunanchej tiyan. Jinapis runaslla Diospa Palabranta leeyta atinchej, necesitanchejpunitaj chayta ruwayta. Chayrayku Jesús nerqa: “Runaqa mana tʼantallawanchu kausanqa, astawanqa Jehová Diospa siminmanta tukuy llojsimoj palabraswan kausanqa”, nispa (Mat. 4:4). Chayrayku sapa día Diospa Palabran Bibliata leenanchej tiyan. Uj salmista nerqa: ‘Kusisqamin Jehová Diospa leyninta mayta munakojqa. Tuta pʼunchay Diospa leyninta leejqa’, nispa (Salmo 1:1-3 leey).

5, 6. 1) ¿Imatá Bibliapi yachakuyta atisunman? 2) ¿Imaynamantá Bibliata leey yanapawasunman?

⁵ Jehovaqa munakuwasqanchejrayku, kusisqa kanapaj imatachus ruwananchejta Biblianejta niwanchej. Bibliapi yachakunchej imapajchus Dios kausayta rikhurichisqanta, imaynatachus amigosnin kayta atisqanchejta, juchasninchejta perdonanawanchejpajpis imatachus ruwananchej kasqanta. Yachakullanchejtaj ima sumaj suyakuytachus Dios qowasqanchejta (Jer. 29:11). Biblianejta tukuy chay imasta yachakuspaqa, may kusisqapuni kanchej.

⁶ Yachanchej jina, kausayninchejpajpis Bibliapi ashkha sumaj yuyaychaykunas kan. Chay yuyaychaykunaman jina kausakuspaqa kusisqa kanchej. Llakiykunasninchejrayku desanimasqa kashanchej chayqa, Diospa Palabranta astawan leerina, chaypitaj tʼukurina.  Jesús nerqa: “Diospa palabranta uyarispa kasukojkunamin kusisqaqa kanku”, nispa (Luc. 11:28).

7. ¿Imatá ruwasunman Diospa Palabranta leespa astawan yanapachikunapaj?

⁷ Diospa Palabranta leeshaspaqa ama usqhayllata leerpanachu, manaqa miskʼirichikunapaj jina leena. Kaywan kikincharina: Pillapis mayta gustawasqanchej mikhunitata waykʼuripuwasunman. Noqanchejtaj ancha apurasqa kashasqanchejrayku, chayri problemasninchejpi yuyashasqanchejrayku, mana saborninta sientespalla usqhayllata oqoykusunman. Tukuykuytawantaj ancha usqhayllata mikhuykusqanchejta reparakusunman. Jina kajtenqa arrepientekusunman mana calmallawan mikhusqanchejmanta, nitaj miskʼirichikusqanchejmanta. Bibliata leeywanpis kikillantaj pasawasunman. Wakin kuteqa usqhayllata leerpasunman, nitaj tiempochakusunmanchu imatachus yachachisqanwan miskʼirichikunapaj. Chayrayku Bibliata leesqanchejwan miskʼirichikunapajqa tiempochakuna. Chaypajtaj chaypipis kashasunman jina yuyana, nisqankutapis uyarishasunman jina yuyana, leesqanchejpitaj tʼukurina. Tukuy chayta ruwaspaqa aswan kusisqa kasun.

8. ¿Imaynatá “allin kamachi yuyayniyoj” ruwananta juntʼashan? (Sutʼinchaynintawan qhawariy).

⁸ Jesusqa ‘allin kamachi yuyayniyojta’ churarqa, sumaj yachachiykunata mikhunata jina tiemponpi qonawanchejpaj, chayrayku sumaj alimentasqa kashanchej (Mat. 24:45). b Allin kamachi yuyayniyojqa chay sumaj yachachiykunata Bibliaman jinapuni wakichin (1 Tes. 2:13). Chay sumaj yachachiykunataj yanapawanchej imaynatachus Jehová yuyasqanta yachanapaj, chaytaj Bibliapi kashan. Chayrayku leenanchej tiyan Torremanta Qhawaj revistata, ¡Rijchʼariy! revistata, jw.org nisqapi rikhurej yachaqanastapis. Chantapis wakichikunanchej tiyan chaupi semanapi tantakuyninchejpaj, semana tukukuypi tantakuyninchejpajpis. JW Broadcasting^® nisqapis, sapa killa parlayninchejpi llojsimun chayqa, qhawananchej tiyan. Sichus Bibliata leellasunpuni, estudiallasunpunitaj chayqa, cheqamanta kusisqa kanapaj imatawanchus ruwananchej kasqanta, ruwayta atillasuntaj.

9. ¿Imatá ruwanallanchejtaj tiyan cheqamanta kusisqa kanapaj?

⁹ ISKAY KAJ: Cheqamanta kusisqa kanapajqa Jehovaj kamachiykunasninman jina kausakunanchej tiyan. Uj salmista nerqa: “Kusisqamin Jehová Diosta manchachikoj runaqa. Kusisqamin Diospa ñanninta purej runaqa”, nispa (Sal. 128:1). Jehovata manchachikoyqa niyta munan payta respetay, respetasqanchejraykutaj imatachus mana allinpaj qhawasqantaqa mana ruwanchejchu (Pro. 16:6). Chayrayku kallpachakullanchejpuni imachus allin, imatajchus mana allin kasqanmanta Diospa kamachiykunasninman jina kausakunapaj. Chay kamachiykunasnintaj Bibliapi kashan (2 Cor. 7:1). Imastachus Jehová munakun chay imasta ruwaspa, chantá imastachus Jehová chejnikun chay imasta chejnikuspa aswan kusisqa kasun (Sal. 37:27; 97:10; Rom. 12:9).

10. Jehovaj kamachiykunasninta yachaspapis, ¿imatataj ruwanallanchejtaj tiyan? (Romanos 12:2).

¹⁰ (Romanos 12:2 leey). Uj runaqa yachanman Jehovalla niyta atisqanta imachus allin, imatajchus mana allin kasqanta. Jinapis kamachiykunasninta kasukunallantaj tiyan. Sutʼincharinapaj: Uj runaqa yachanman carreterapi imayna velocidadwanchus manejakunanpaj  gobiernolla leyesta churayta atisqanta. Chaywanpis chay leyesta mana kasukuyta munanmanchu, autotataj usqhayllata manejanman. Noqanchejtajrí Jehovaj kamachiykunasninta yachaspapis, chay kamachiykunasninta kasukuspalla rikuchisun Jehovata kasukuy allinninchejpaj kasqanta (Pro. 12:28). Davidpis ajinallatataj yuyarqa, chayrayku Jehovata nerqa: “Qanmin kausay ñanta rejsichiwanki. Allinpaj qhawawajtiykeqa sonqo juntʼasqa kani. Paña ladoykipi kaspaqa wiñaypaj kusisqa kasaj”, nispa (Sal. 16:11).

11, 12. 1) Problemaspi kashaspa chayri llakisqa kashaspa, ¿imamantataj qhawarikunanchej tiyan? 2) ¿Imaynatataj Filipenses 4:8 yanapawanchej imawanchus kusirikunata allinta ajllanapaj?

¹¹ Llakisqas, desanimasqas kaspaqa, mana chay imasllapi yuyanapaj ichapis kusirikuyta munasunman imallawanpis. Chaytaj mana juchachu. Jinapis allinta qhawarikunanchej tiyan Jehovaj chejnisqan imasta ama ruwanapaj (Efe. 5:10-12, 15-17).

¹² Apóstol Pabloqa Filipensesman Cartata qhelqashaspa, cristianosta nerqa kay imaspi yuyanallankutapuni: ‘tukuy ima cheqan kajpi, tukuy ima llimphu kajpi, tukuy ima allin kajpi, tukuy ima kʼacha kajpi’ (Filipenses 4:8 leey). Pabloqa mana imawanchus kusirikunamantapunichu parlasharqa, jinapis chay nisqanqa yanapawanchej imawanchus kusirikunanchejta allinta ajllanapaj. Chay versiculota kaytapis nishanman jina leerina: “Yuyallaychejpuni chay takiykuna llimphuchus manachus kasqanpi, chay películas, libros, videojuegospis allinchus manachus kasqanpi”. Chayta ruwaspaqa reparayta atisun mayqentachus Dios allinpaj qhawasqanta, mayqentatajchus mana allinpajchu qhawasqanta. Noqanchejqa Jehovaj kamachiykunasninman jinapuni kausakuyta munanchej (Sal. 119:1-3). Chayta ruwaspataj, cheqamanta kusisqa kanapaj llimphu sonqowan kinsa kaj imata ruwayta atillasuntaj (Hech. 23:1).

13. ¿Imatawantaj ruwananchej tiyan cheqamanta kusisqa kanapaj? (Juan 4:23, 24).

¹³ KINSA KAJ: Jehovata yupaychayta ñaupajmanpuni kausayninchejpi churana. Jehová Ruwawajninchej kasqanrayku payllata yupaychananchej tiyan (Apo. 4:11; 14:6, 7). Chayrayku Jehovata yupaychay kausayninchejpi aswan importante kanan tiyan. Paytataj munasqanman jina yupaychananchej tiyan, nisunman “espirituman jina, cheqa kajman jinataj” (Juan 4:23, 24 leey). Munanchej Diosqa espíritu santonwan yanapanawanchejta, ajinamanta payta yupaychasqanchej Bibliapi nisqanman jina kananpaj. Maypichus tiyakunchej chaypi Jehovaj testigosnin prohibisqa kajtinkupis, Jehovata yupaychayqa aswan importantepuni kanan tiyan. Kay tiempopi hermanosninchej, hermanasninchejpis pachajmanta astawan carcelpi kashanku Jehovaj testigosnin kasqankuraykulla. c Chaywanpis kusisqa kanku, imaraykuchus tukuy atisqankuta ruwanku Diosmanta mañakunankupaj, estudianankupaj, wajkunamanpis Diosmanta, Gobiernonmanta ima willarinankupaj. Runas contranchejta parlajtinkupis, qhatiykachawajtinchejpis kusisqa kanchej, imajtinchus yachanchej Jehová noqanchejwan kashasqanta, tʼinkanawanchejtataj (Sant. 1:12; 1 Ped. 4:14).

14. Tayikistanmanta uj joven hermanota, ¿imataj pasarqa chanta imaraykutaj?

¹⁴ Hermanosninchejpa kausayninkupi reparanchej chay kinsa imasta ruwaspaqa, ima  llakiypi kaspapis cheqamanta kusisqa kayta atisqanchejta. Hermanonchej Yovidón Boboyonovmanta parlarina. Payqa Tayikistanmanta, 19 watasniyoj kashajtintaj mana cuartelman riyta munarqachu. 4 de octubre de 2019 watapi wasinmanta a la fuerza aparqanku, ashkha killasta carcelman wisqʼaykorqanku, suwata jinataj tukuy imata ruwaykorqanku. Hermanitota chay jinata ruwasqankoqa noticiaspi llojserqa ashkha nacionespi. Chay noticiaspi nerqanku hermanotaqa mayta maqaykusqankuta juramento militarta ruwachiyta munaspa, soldado ropata churachiyta munaspa ima. Chaymantataj uj juzgadopi juchacharqanku, waj lugarmantaj kacharqanku sinchʼita llankʼananpaj. Chaymantaña chay suyumanta presidente nerqa juchachasqankuta niña juntʼananta, kamacherqataj kacharipunankuta. Ajina llakiypi rikukuspapis hermano Yovidonqa mana Jehovata wasancharqachu, kusisqallapunitaj karqa. ¿Imajtin? Payqa tukuy chay tiempopi Diosta necesitasqanta manapuni qonqakorqachu.

15. ¿Imaynatataj Yovidón carcelpi wisqʼasqa kashaspapis Jehovamanta yachakullarqapuni?

¹⁵ Carcelpi kashaspa Yovidonqa Jehovamanta yachakullarqapuni mana Bibliayoj, nitaj publicacionesniyoj kajtinpis. ¿Imaynamantá chayta ruwayta aterqa? Hermanosqa mikhunata apapuspa, chay mikhuna bolsaspi  sapa día estudianapaj textosta anotapoj kanku. Ajinamanta Bibliata sapa día leellajpuni, chaypitaj tʼukurej. Carcelmanta llojsimuytawan manaraj sinchʼi pruebaspi rikukojkunaman kay yuyaychayta qon: “Aswan allin niraj carcelman yaykushaspa Jehovamanta astawan yachakunaykichej. Chaypajtaj Bibliata, publicacionesninchejtapis leenaykichejpuni tiyan”, nispa.

16. ¿Imapi yuyananpajtaj Yovidón kallpachakorqa?

¹⁶ Yovidonqa Jehovaj kamachiykunasninman jina kausakorqa. Sajra imaspi yuyananmanta, sajra imasta ruwananmantaqa Jehovapi, imatachus pay allinpaj qhawasqanpi yuyananpaj kallpachakorqa. Diospa kʼachitu ruwasqasninta qhawaj, chaypitaj tʼukurej. Sapa paqarin pʼisqetuspa takiyninkuwan rijchʼarej. Tutasnintaj estrellasta, killata ima qhawarej. Pay nerqa: “Jehová chay jina sumaj imasta ruwapuwasqanchejqa asirichiwaj, kallpachawajtaj”, nispa. Jehová chay tukuy imasta qowasqanchejmanta, Bibliamanta yachachiwasqanchejmanta ima agradecekuspaqa kusisqa kanchej. Chay kusiytaj aguantanapaj kallpata qowanchej.

17. Yovidón jina llakiypi rikukojkunata, ¿imaynatá 1 Pedro 1:6, 7 yanapanman?

¹⁷ Yovidonqa Jehovata yupaychaytapis ñaupajman churarqa. Payqa yacharqa cheqa Diosta manapuni wasanchananchu kasqanta. Jesús nerqa: “Jehová Diosniykita yupaychanayki tiyan, pay sapallantataj sirvinayki tiyan”, nispa (Luc. 4:8). Comandantespis soldadospis munarqanku religionninta saqechiyta. Paytajrí sapa día, sapa tuta maytapuni Jehovamanta yanapata mañakorqa aguantananpaj, payta mana wasanchananpaj. Yovidonta ajinata qhasimanta mayta sufrichejtinkupis manapuni Jehovata wasancharqachu. Yovidonta niraj wasinmanta apashajtinku, niraj maqashajtinku, niraj carcelman wisqʼaykushajtinku creeynenqa niraj sinchʼichu karqa. Kunantaj chay jina pruebaspi rikukusqanrayku creeynenqa aswan sinchʼi. Chayrayku Yovidonqa mayta kusikun (1 Pedro 1:6, 7 leey).

18. ¿Imaynatá kusisqallapuni kayta atisunman?

¹⁸ Jehovaqa yachan cheqamanta kusisqa kanapaj imatachus ruwananchej kasqanta. Noqanchejpis chay kinsa imasta ruwasun chayqa, ima llakiypi rikukuspapis kusisqallapuni kayta atisun. Chantapis kayta niyta atisun: “Kusisqamin uj llajta Jehová Dios chay llajtaj Diosnin kajtenqa”, nispa (Sal. 144:15).