1, 2. Kay 1 Timoteo 6:20 nisqanman jina, ¿imatataj Pablo Timoteoman nerqa?

WAKIN kutisqa valorniyoj imasninchejta, confianzapaj qhawanchej chaywan japʼichikuyta yachanchej. Wakin runastaj qolqenkuta bancopi jallchʼanku mana chinkachinankupaj, chayri mana suwachikunankupaj.

² (1 Timoteo 6:20 leey). Apóstol Pabloqa Timoteoman nerqa, Diosmanta manchay valorniyoj imasta japʼisqanta. ¿Imastaj chay valorniyoj imas karqa? Timoteoqa imatachus Dios runaspaj munasqanta yacharqa. Chantapis Jehová Diosqa, Timoteota kamacherqa “sumaj willaykunata” willananta (2 Tim. 4:2, 5). Pabloqa Timoteoman nerqa, imatachus Dios qosqanta allinta waqaychananta. Jehová Diosqa noqanchejmanpis manchay valorniyoj imasta qollawanchejtaj. ¿Imastaj chaykuna kanku? ¿Imaynatá chaykunata qhawana tiyan? Chayta kaypi yachakusun.

3, 4. ¿Imajtintaj Bibliaj yachachiykunasnin may valorniyoj kanku?

³ Jehová Diosqa manchay kʼacha kasqanrayku, Palabranpi cheqa kajta yachachiwanchej. Chay yachachiykunataj may valorniyoj kanku. Imajtinchus Jehová Diosman qayllaykunapaj, kusisqa kausakunapajtaj yanapawanchej. Chay yachachiykunata japʼikuspa, chayman jinataj kausakuspaqa, llulla yachachiykunamanta librakunchej, niñataj millay kausaypichu purinchej (1 Cor. 6:9-11).

⁴ Jinapis Bibliaj yachachiykunasnenqa, mana chayraykullachu may valorniyoj kanku. ¿Imaraykutaj? Jehová Diosqa chay yachachiykunata llampʼu sonqoyoj runasllaman rejsichin, nisunman “allin sonqoyoj” kajkunallaman (Hech. 13:48). Paykunaqa yachanku, Jehová ‘allin kamachi yuyayniyojnejta’ yachachiwasqanchejta. Chayrayku paykunaj yachachisqankuta tukuy sonqo japʼikunku (Mat. 11:25; 24:45). Bibliaj yachachisqantaqa, mana  sapallanchejmanta entiendeyta atisunmanchu. Chayrayku chay yachachiykunata entiendeyqa, qorimantapis aswan valorniyoj (Pro. 3:13, 15).

5. ¿Ima llankʼaytataj Jehová Dios qowanchej?

⁵ Jehová Diosqa uj sumaj llankʼayta qowanchej. Payqa kamachiwanchej, runasman paymanta, imastachus ruwayta munasqanmantawan yachachimunanchejta (Mat. 24:14). Chay yachachiyta japʼikojkunataj, Diospa familianman yaykunku, wiñay kausaytataj suyakunku. Chayrayku Bibliamanta yachachisqanchejqa may valorniyoj (1 Tim. 4:16). Chay sumaj llankʼaypi ashkhata chayri pisillata ruwaspapis, runasta salvakunankupaj yanapanchej (1 Tim. 2:3, 4). Chantapis Dioswan khuska llankʼashanchej. Chaytaj may sumajpuni (1 Cor. 3:9).

6. ¿Imatá wakin ñaupa cristianos ruwarqanku?

⁶ Timoteoj tiemponmanta wakin cristianosqa, Dioswan khuska llankʼayta pisipaj qhawarqanku. Paykunamanta ujqa Demas karqa. Payqa mundoj imasninta munakusqanrayku, Pablota saqerparqa (2 Tim. 4:10). Figelowan Hermogeneswanpis, Diospa qosqan llankʼayta pisipaj qhawarqanku. Paykunaqa Pablo jina qhatiykachasqa kaytasina manchachikorqanku. Chayraykusina niña Diospaj llankʼarqankuchu (2 Tim. 1:15). Himeneo, Alejandro, Fileto imataj Diosta wasancharqanku, cheqa kajmantataj tʼaqakorqanku (1 Tim. 1:19, 20; 2 Tim. 2:16-18). Tukuy chay runasqa, creeypi uj tiempota sinchʼita sayarqanku. Jinapis Diospa qosqan valorniyoj imasta, pisipaj qhawarqanku.

7. ¿Imastataj Satanás ruwan Diosmanta japʼisqanchej valorniyoj imasta pisipaj qhawananchejpaj?

⁷ Satanasqa Diosmanta japʼisqanchej valorniyoj imasta, pisipaj qhawananchejta munan. ¿Imastataj chaypaj ruwan? Payqa peliculasnejta, Internetnejta, musicasnejta, waj imasnejta ima, yuyayninchejta chʼichichayta munan. Satanasqa chayta ruwan, Jehová Diosta mana kasukunanchejpaj. Chantapis runaswan qhatiykachachiwanchej, chayri juchaman tanqachiwanchej. Payqa chaywan manchachiyta munawanchej niña predicananchejpaj. Chantapis Satanasqa, Diosta wasanchajkunaj yachachiyninkuwan engañayta munawanchej. Ajinamanta Diospa llajtanmanta orqhonawanchejpaj (1 Tim. 6:20, 21).

8. ¿Imatataj Danielpa kausaynin yachachiwanchej?

⁸ Mana allinta qhawarikuspaqa, Diospa Palabranpi yachakusqanchejta pisipaj qhawayta qallarisunman. Danielwan * ajina karqa. Payqa videojuegoswan pujllanamanta wañurej. Pay nin: “Chunka wataypi videojuegoswan pujllayta qallarerqani. Pujllaj kani chay juegostaj, kʼachituslla karqanku. Jinapis pisimanta pisi maqanakusmanta, layqeriosmanta juegoswan  pujllayta qallarerqani”, nispa. Danielqa sapa día 15 horastapuni pujllaj. Pay nillanpuni: “Sapa día pujllanallapi kaj kani, pujllaj kani chay juegostaj millay karqanku. Sonqoypeqa yacharqani Jehová Diosmanta karunchakapushasqayta. Jinapis sonqoyqa manaña juchachawajchu. Yuyarqanitaj Bibliaj nisqanta mana kasunaypunichu kasqanta”, nispa. ¿Imatá Danielpa kausaynin yachachiwanchej? Imaswanchus kusirikusqanchejqa, pisimanta pisi Jehová Diosmanta karunchawasunman. Paymanta karunchakusunman chaytaj, Palabranpi yachakusqanchejta niña valechisunmanchu.

9. Kay 1 Timoteo 1:18, 19 nisqanman jina, ¿piwantaj Timoteota Pablo kikinchasqa?

⁹ (1 Timoteo 1:18, 19 leey). Pabloqa Timoteota uj soldadowan kikincharqa. Chantá payman nerqa: ‘Sumaj maqanakupi maqanakullaypuni’, nispa. Pabloqa mana waj soldadoswan maqanakunamantachu parlasharqa, manaqa creeypi sinchʼita sayanamanta. Noqanchejpis guerrapi maqanakoj soldados jina kanchej. ¿Imaraykú soldados jina kanchej? ¿Imatá ruwasunman Cristoj sumaj soldadosnin kanapaj? Chayta yachanapaj, soldadosmanta phishqa imasta yachakusun. Chaytaj Bibliaj yachachiyninmanta sumajta chʼipakunapaj yanapawasun. Qhepan parrafospi chaymanta parlarisun. 

10. Diosta tukuy sonqo yupaychana nispa, ¿imamantá parlashanchej, chanta imajtintaj chayta ruwana?

¹⁰ Diosta tukuy sonqo yupaychanapaj kallpachakuna. Uj soldadoqa, mana tropanta wasanchanchu. Chantapis pitachus munakun, chayri imatachus valorniyojpaj qhawan chayta, tukuy kallpanwan jarkʼan. Apóstol Pabloqa Timoteota nerqa, Diosta tukuy sonqo yupaychananta. Chaywanqa nisharqa Jehová Diosta munakunanta, nitaj jaykʼajpis wasanchananta (1 Tim. 4:7). Noqanchejpis Jehová Diosta tukuy sonqo yupaychasun chayqa, ni jaykʼaj paymanta karunchakusunchu (1 Tim. 4:8-10; 6:6).

11. ¿Imaraykú allin kajta ruwayman yachaykukuna tiyan?

¹¹ Allin kajta ruwayman yachaykukuna. Uj soldadoqa niraj guerraman rishaspa, maqanakuyman amañakun chayri yachaykukun. Timoteoqa Pabloj yuyaychasqanta kasukusqanrayku, Cristoj sumaj soldadon karqa. ¿Imatá Pablo payman yuyaycharqa? Pabloqa Timoteoman nerqa sajra munayninta atipananta, allin cristiano kananpaj kallpachakunanta, hermanoswan masichakunantataj (2 Tim. 2:22). Timoteoqa chaykunata ruwayman yachaykukunan karqa. Noqanchejpis sajra munayninchejta atipayta munanchej chayqa, allin kajta ruwayman yachaykukunanchej tiyan (Rom. 7:21-25). Sapa día aswan sumaj cristianos kanapajpis, chayllatataj ruwananchej tiyan (Efe. 4:22, 24). Allin kajta ruwayman yachaykukuspaqa, diantinta trabajasqanchejrayku saykʼusqa kaspapis, mana reunionesman faltakusunchu (Heb. 10:24, 25).

12. ¿Imataj yanapawasun Bibliamanta aswan sumajta yachachinapaj?

¹² Uj soldadoqa armasninta sumajta apaykachananpaj, kutin kutita practican. Cristianospis Diospa Palabranta sumajta rejsinanchej tiyan. Ajinamanta chaywan sumajta yachachisun (2 Tim. 2:15). Reunionespeqa imaynatachus Bibliawan yachachiyta yachakunchej. Noqanchejqa yachanchej, Bibliaj yachachiykunasnin runasta mayta yanapayta atisqanta. Chayta runasman entiendechinapajqa, noqanchejraj Bibliata sumajta estudiananchej tiyan. Chayrayku creeyninchejta sapa kuti Diospa Palabranwan kallpachana. Jinapis mana Bibliata leenallachu tiyan, manaqa leesqanchejpi tʼukurina tiyan. Chay versiculosta astawan entiendenapajtaj, publicacionesninchejta qhawaykurina. Ajinamanta Bibliaj nisqanta sumajta entiendesun  (1 Tim. 4:13-15). Bibliata entiendespataj, wajkunamanpis yacharichiyta atisun. Jinapis mana Bibliata leepunallachu tiyan, manaqa imaynatachus Biblia paykunata yanapasqanta entiendechina tiyan. Diospa Palabranta sapa kuti estudiaspaqa, aswan sumaj yachachejkuna kasun (2 Tim. 3:16, 17).

13. Hebreos 5:14 nisqanman jina, ¿imaraykutaj allinta reparayta yachananchej tiyan?

¹³ Reparayta yachana. Uj soldadoqa imaschus kausayninta wañuy pataman churanman, chaypi piensarin. Chayta reparaspataj, chay imasmanta qhawarikun. Noqanchejpis imaschus Jehovamanta karunchawasunman, chaypi piensarinanchej tiyan. Chayta reparaytawantaj, chay imasta mana ruwanapaj kallpachakunanchej tiyan (Pro. 22:3; Hebreos 5:14 leey). Chayrayku imawanchus kusirikunata sumajta ajllana tiyan. Telepi programas, peliculaspis, millay imaswan juntʼa kayta yachanku. Chay millay imasta qhawasunman chayqa, Jehová Diosmanta pisimanta pisi karunchakusunman. Chayrayku mana chay imasta qhawanchejchu. Chantapis Jehová Diosqa chay millay imasta chejnikun. Millay kausayniyoj runastaj llakiyllaman chayanku, wajkunatapis llakichinku (Efe. 5:5, 6).

14. ¿Imatataj Daniel reparasqa, chanta imatataj ruwasqa?

¹⁴ Pusaj parrafopi Danielmanta parlarerqanchej. Payqa reparakorqa maqanakuykunamanta, layqeriosmanta juegospi pujllayqa, mana allinchu kasqanta. Chayrayku manaña pujllananpaj, Watchtower Library nisqawan yanapachikusqa. Ajinamanta Danielqa chay millay videojuegosta qonqarqa. Chantapis ima juegosmanchus inscribisqa karqa, chaykunata wisqʼaporqa. Pikunawanchus pujllaj chaykunamantapis karunchakaporqa. Pay nin: “Internetpi juegoswan pujllanaymantaqa, waj imaspi pujllakoj kani. Hermanoswanpis astawan masichakoj kani”, nispa. Danielqa precursortaj ancianotaj kashan.

15. ¿Imaraykutaj Diospa llajtanta wasanchajkunata mana uyarinanchejchu tiyan?

¹⁵ Diospa llajtanta wasanchajkunata uyareyqa, pantachiwasunman. Chaytataj Timoteo jina sumajta entiendenanchej tiyan (1 Tim. 4:1, 7; 2 Tim. 2:16). Diosta wasanchajkunaqa, iskaychachinawanchejrayku hermanosninchejmanta, Diospa llajtanmantapis llullasta parlanku. Chay parlasqankuta creesunman chayqa, creeyninchej pisiyanman. Chayrayku amapuni chay runasta creenachu. Paykunaqa ‘chʼichi yuyayniyoj kanku, cheqa kajtataj mana  entiendenkuchu’. Chantapis churanakuykunata, chʼajwasta ima jatarichiyta munaspalla parlanku (1 Tim. 6:4, 5). Chay runasqa hermanosninchejpi manaña atienekunanchejpaj, llulla cuentosninkuta creechiyta munawanchej.

16. ¿Imapajtaj kallpachakunanchej tiyan?

¹⁶ Ama waj imaspi yuyanachu. Timoteoqa “Cristo Jesuspa sumaj soldadon jina”, Dios qorqa chay llankʼayta juntʼaypi yuyanan karqa. Paypa yuyaynenqa mana qhapajyaypichu, nitaj waj imasta ruwaypichu kanan karqa (2 Tim. 2:3, 4). Noqanchejpis pay jinallataj kallpachakunanchej tiyan, mana tukuy imayoj kayta munanapaj. ‘Qhapajyayta munasunman’ chayqa, Jehová Diosta niña munakusunmanchu, Palabranta pisipaj qhawasunman, niñataj predicayta munasunmanchu (Mat. 13:22). Chayrayku kapuwasqallanchejwan sonqo juntʼasqa kananchej tiyan. Kallpanchejpis tiemponchejpis, Diospa Gobiernonta ñaupajman churanapaj kanan tiyan (Mat. 6:22-25, 33).

17, 18. ¿Imatataj ruwasunman Diosmanta mana karunchakunapaj?

¹⁷ Ñaupajmantaña piensarina imatachus ruwanapi. Uj soldadoqa enemigosmanta jarkʼakunanpaj, ñaupajmantaña piensarin imatachus ruwananpi. Noqanchejpis imapis urmachinawanchejpaj jina kajtin, chay rato imatapis ruwana tiyan. Ajinamanta Jehová Dios qowasqanchej valorniyoj imasta, sumajpaj qhawallasunpuni. ¿Imataj chaypaj yanapawasun? Ñaupajmantaña piensarinanchej tiyan, mana urmanapaj imatachus ruwanapi.

¹⁸ Mayuman tʼajsakoj riyta yachajqa, yaku oqeyamojtin chayri qʼopata apamuyta qallarejtin, yachan mayu yapakamunanta. Chayrayku chay rato ayqekun mana yakuwan apachikunanpaj. Noqanchejpis Internetta, peliculasta, chayri teleta qhawashaspaqa, yachanchej Diosta wasanchaj runaspa parlasqanku, maqanakuykuna, chayri millay imas rikhurimuyta atisqanta. Chayrayku ñaupajmantaña piensarina tiyan, chaykuna rikhurimojtin imatachus ruwanata. Ajinamanta chay imas rikhurimojtin, chay rato imatapis ruwasun. Imatachus ruwananchejta sutʼita yachaspaqa, mana Diosmanta karunchakusunchu, llimphu kausayniyojllapunitaj kasun (Sal. 101:3; 1 Tim. 4:12).

19. Jehová Dios qowasqanchej imasta valorniyojpaj qhawasun chay, ¿imataj kanqa?

¹⁹ Jehová Diosqa Palabranpi ashkha imasta yachachiwanchej, chaytataj runasman yachachinanchejta kamachiwanchej. Chay iskay imasta manchay valorniyojpaj qhawananchej tiyan. Chayta ruwasun chayqa, sonqonchejqa mana juchachawasunchu, nitaj qhasipajchu kausasun. Chantapis runasta Jehová Diosta rejsinankupaj yanapasqanchejmanta kusikusun. Jehová Diospa yanapayninwanqa, imatachus yachachiwasqanchejta ni jaykʼaj pisipaj qhawasunchu. Runasmanpis paymanta willamullasunpuni (1 Tim. 6:12, 19).