Chaypacha Iskay kaj Guerra Mundial kasqanrayku, Alemaniamanta soldadosqa suyuykuta japʼikapunayasharqanku. Gobiernoyku Alemania parte kasqanrayku, curaqa misapi gobiernota apoyanapaj tanqawaj kayku. Manchayta tanqawasqaykurayku manchariymanta kharkatej kayku. Chaypachasqa casi tukuypis pakayllamanta uj radiota uyarej kayku. Chay radiopi uyarej kayku imastachus gobiernoj contranpi wakin soldados ruwashasqankuta. Septiembre de 1944 watapitaj, curaqa gobiernoj contranpi kajkunatañataj apoyarqa. Paykunata apoyasqanraykutaj Diosman agradecekunanpaj misata ruwarqa. Curata ajinata ruwajta rikuspaqa manaña curaspi creerqanichu.

Tatayqa Iskay kaj Guerra Mundial pasayta wañuporqa. Chay kutipajqa, kuraj hermanay casarakorqaña, Bélgica suyupitaj tiyakusharqa. Chayrayku mamayta cuidanay karqa. Jinapi uj empresapi trabajota conseguikorqani. Chay empresapichá jubilakusaj nisharqani. Chaywanpis patronniy, wawasnin ima allin católicos kasqankurayku, uj problemapi rikukorqani.

1953 watapi kuraj hermanay waturikuwarqayku. Payqa Jehovaj Testigonman tukusqa. Chayrayku Bibliawan sutʼinchawarqayku católicos infiernomanta, trinidadmanta, alma mana wañusqanmantawan yachachisqanku llulla kasqanta. Noqataj “Bibliayki mana catolicochu” nerqani. Chaywanpis pisi tiemponman repararqani maychus kajllata yachachiwasqanta. Jinapi kuraj hermanayqa, La Atalaya nisqa revistasta qowarqa. Noqataj tutasnin chay revistasta kantumanta leerqani. Pisi tiemponmantaj repararqani Testigos cheqa religionpuni kasqankuta. Chaywanpis manchachikorqani Testigoman tukuyta. Imaraykuchus yuyarqani Testigoman tukuspaqa trabajomanta wijchʼuchikunayta.

Ashkha killasta Bibliata, La Atalaya nisqa revistatawan sapallay estudiarqani. Jinata estudiashaspa Testigospa reunionesninman rerqani. Chay reunionespeqa repararqani hermanos mayta munanakusqankuta. Chaytaj sonqoymanpuni chayawarqa. Chantá sojta killasta uj experienciayoj hermanowan Bibliata estudiarqani. Chaymantataj septiembre de 1954 watapi bautizakorqani. Pisi  tiemponmantaj mamaywan sullkʼa hermanaypiwan bautizakorqanku.

Mamayqa 1958 watapi wañuporqa. Wañupusqanmanta maytapuni llakikorqani. Semanasninmantaj uj asamblea internacionalman rerqani. Chaytaj Estados Unidospi apakorqa. Wasiyman kutipuspataj manaña pitapis cuidanaychu karqa. Chayrayku trabajomanta llojsipuspa precursor jina llankʼayta qallarerqani. Jinapi rejserqani Danièle sutiyoj precursorata. Payqa sonqo kʼajaywan predicaj. Mayo de 1959 watapitaj paywan casarakorqani.

Señorayqa uj karu lugarpi precursora especial jina sirviyta qallarisqa. Chay lugaresmanta runasqa allin católicos kasqanku. Chayrayku señorayqa paykunaman mana manchachikuspa predicananpaj mayta kallpachakusqa. Chantapis chay lugarespi bicicletapi predicasqa. Señoraywanqa juicio pʼunchay cerquitapiña kasqanta yacharqayku. Chayrayku tukuy atisqaykuta predicarqayku (Mat. 25:13). Señorayqa mayta yanapawarqa Jehová Diospaj tukuy atisqayta llankʼanaypaj.

Casarakusqaykumanta diasninmanqa, congregacionesta waturispa sirviyta qallarerqayku. Ajinamanta pisi imasllawan kausakuyta yachakorqayku. Por primera vez uj congregacionta waturikushajtiykoqa, Tantakuna Wasipi puñorqayku. Imaraykuchus chay congregacionpi 14 publicadoreslla karqanku. Manataj ni mayqen hermanojta campito karqachu alojanawaykupaj.

Ashkha ruwanasniyoj karqayku. Señoraytaj chay ruwanasman yachaykukullarqa. Sapa kuti ancianoswan parlarinaypaj tantakojteyqa, señorayqa mana quejakuspa autopi suyawaj. Iskay watallata congregacionesta waturispa sirverqayku. Chay wataspitaj yachakorqayku qhariwarmi kausaypeqa sumajta parlarikuna kasqanta, purajmantataj yanapanakuna kasqanta (Ecl. 4:9).

1962 watapeqa Galaad Escuelaman rerqayku clase 37 nisqaman, chaytaj Estados Unidospi apakorqa. Chay escuelapeqa chunka killasta karqayku. 100 estudiantestaj karqayku, ashkha qhariwarmistaj mana iskayninkupunichu invitasqas karqanku. Entero estudiantesmantaqa 13 qhariwarmislla karqayku. Noqaykupajqa chay escuelaman risqayku uj jatun bendición karqa. Maytapuni kusikuni creeypi sumaj sayasqa hermanoswan rejsinakusqaykumanta. Rejsinakorqayku Frederick Franzwan Ulysses Glasswan Alexander Macmillanwan ima.

Chay escuelapeqa yachachiwarqayku Diospa ruwasqasninta sumajta qhawarinata. Chayrayku wakin sábado tardesqa, kʼachitu lugaresman pusawaj kayku. Lunesnintaj examenpi tapuwaj kayku chay kʼachitu lugarespi imastachus qhawasqaykumanta. Chay lugaresta qhawamusqaykumanta saykʼusqa Betelman kutipoj kayku. Chay lugaresman pusawaj kayku chay hermanosqa, imastachus qhawasqaykuta mana qonqanaykupaj watuwaj kayku. Uj kutipitaj tardentinta purisqaykupi mayta saykʼorqayku. Chay kutipi cielopi kaj imasta qhawanapaj wasiman rerqayku. Chaypitaj yachakorqayku uj meteoro chhanka, mana kikinchu kasqanta uj meteorito chhankawan. Chantá uj museopi niwarqayku uj caimán mana kikinchu kasqanta uj cocodrilowan. Betelman kutipushajtiykutaj, chay lugaresman pusawarqayku  chay hermanoqa, tapuriwarqayku: “¿Uj meteoro kikinchu kasqa uj meteoritowan?”, nispa. Señorayqa manchay saykʼusqa kasqanrayku nerqa: “Mana kikinchu, meteorito chhankaqa jatuchaj kirusniyoj”, nispa.

Galaad Escuelata tukusqaykutawantaj, Franciaman kachawarqayku Betelpi sirvinaykupaj. Betelpeqa warmiywan 53 watas kurajta sirverqayku. 1976 watapitaj niwarqanku Sucursalpi coordinador jina sirvinayta. Maypi jinataj kachawaj kanku wakin suyusta visitanaypaj. Chay suyustaj kasharqanku Africapi, Europapi, Asiapiwan. Chay suyuspeqa Testigos prohibisqas kasharqanku. Chay suyusta visitashaspa Gabón suyuman chayarqayku. Chay suyoqa Africapi kashan. Gabón suyupeqa 1970 watamantapacha Testigos prohibisqas kasharqanku. Gabonpi kashaspañataj señoraywan alojamientoman rerqayku. Chay alojamientota atiendejtaj niwarqa: “Caballero, fronterapi kaj policiasta wajyariy”, nispa.

Señorayqa sumajta qhawaykachashasqanrayku policiasta rikuytawan chhichispa niwarqa: “Policías chayamunkuña, amaña wajyaychu”, nispa. Policiastaj alojamiento punkupi autonkuta sayarpacherqanku. Policías chamusqankuta señoray willariwasqanrayku uj hermanoman wakin documentosta jaywayta aterqani. Chaymantataj policías apakapuwarqayku.

Policías apashawajtiykutaj sonqoypi nikorqani: “Señorayqa mana manchachikunchu. Chantapis Jehová Diosta ñaupajmanpuni churan. Payqa noqapaj uj sumaj bendición”, nispa. Señoraywanqa mana chay kutillapichu policiaswan japʼichikorqayku. Ashkha kutispi, señorayqa ruwanasniyta mana juntʼanaypaj jina kashajtiy mayta yanapawarqa.

Betelpi sirveyqa qallariymantapacha mayta gustawarqayku. Niraj Galaad Escuelaman rishajtiyku, señorayqa phishqa killasllapi inglesta yachakorqa. Chayrayku watasninman Betelpi publicacionesta traducispa trabajarqa. Betelpeqa sonqo juntʼasqa sirverqayku. Congregacionespi yanapakojtiykutaj sonqoyku astawanraj qhallallarej. Estudiosmanqa trenpi rej kayku. Estudiosmantataj tuta Betelman kutipoj kayku. Saykʼuspapis mayta kusikoj kayku runasman Jehová Diosmanta yachachisqaykurayku. Jinallapi señoray mayta onqoykorqa, manañataj Diospaj chaykama llankʼayta aterqachu.

1993 watapeqa, doctores nerqanku señoray cáncer de mama nisqa onqoyniyoj kasqanta. Chayrayku operachikorqa, aswan fuerte jampiswantaj tratamientota ruwachikorqa. 15 watasninmantaj watejmanta cáncer onqoywan onqoykullarqataj. Chay cancertaj aswan fuerte karqa. Chaywanpis trabajon mayta gustasqanrayku, allinyarispa publicacionesta traducispa trabajallarqapuni.

Cancerwan señoray mayta sufrejtinpis, mana yuyallarqaykupischu Betelmanta ripuyta. Betelpeqa mana tukuychu yacharqanku señoray may onqosqa kasqanta (Pro. 14:13). Señorayqa casi 80 watasniyojña kaspapis, manapis onqosqachu kanman jina purej, kusisqallapuni kasqanrayku. Llakiynillanpi yuyananmantaqa wajkunata yanapananpaj kallpachakoj. Wajkunatataj qhechi ninrilla uyarej, imaraykuchus yacharqa sumajta uyarispa wajkunata sonqochananta (Pro. 17:17). Señorayqa cancerniyoj kaj  hermanasta mayta yanaparqa mana llakiyninkuwan atipachikunankupaj.

Tiemponmantaj señorayqa manaña diantinta trabajayta aterqachu. Pisillataña ruwayta atejtinpis, mayta yanapawarqa ruwanasniyta juntʼanallaypajpuni. Por ejemplo chaupi pʼunchaytaqa cuartoykupi mikhunata qʼoñi qʼoñisituta suyachiwaj, chaymantataj samarikoj kayku (Pro. 18:22). Señoray mayta yanapawasqanrayku Sucursalpi coordinador jina 37 watasta sirverqani.

Señorayqa mana llakiywan atipachikojchu, nitaj “wañupullaymanñapis” nejchu. Chaywanpis sonqoyku mayta nanawarqayku señoray watejmanta cancerwan onqoykojtin. Chaynejta watejmanta aswan fuerte jampiswan tratamientota ruwachikorqa, ruwachikullarqataj radioterapia nisqa tratamientota. Chay tratamientosta ruwachikusqanrayku manaña puriyta aterqachu. Sumaj traductora kashaspapis manaña sumajta parlayta aterqachu. Chay jinata rikuspaqa sonqoy mayta nanawarqa.

Wakin kutisqa yuyayku llakiyniyku mana aguantanapaj jina kasqanta. Chaywanpis Jehová Diospa yanapayninta mañakuykupuni. Chantapis tukuy sonqo creeyku Jehová Dios yanapanawaykuta. Payqa mana saqenqachu llakiywan atipachikunaykuta (1 Cor. 10:13). Sapa pʼunchay Diosman agradecekuykupuni Palabrannejta sonqochawasqaykumanta, hermanosnejta yanapawasqaykumanta, Betelpi kaj doctoresnejta yanapawasqaykumanta ima.

Ni imata ruwanaykuta yachaspaqa Jehová Diospa yanapanta mañakuykupuni. Uj pachaqa señoray manaña yuyayninpichu kasharqa fuerte jampiswan tratamientota ruwachikusqanrayku. Mana yacharqanichu imatachus ruwanayta. Ni doctorpis yacharqachu imachus pasashasqanta. Chay doctorqa 23 watasta señorayta atienderqa kanpis. Jinallapi cancermanta sumajta yachaj doctorta tarerqayku. Chaypi repararqani Jehová Dios yanapashawasqaykuta.

Mana llakiywan atipachikunaykupajqa, mana llakikojchu kayku imachus qʼayantin kananmanta. Chantachá Jesús nerqa: “Sapa pʼunchaypa llakiynenqa kallan”, nispa (Mat. 6:34). Llakiypi kashaspa asireyqa may sumajpuni. Uj pacha señorayqa iskay killata ni ima tratamientota ruwachikorqachu. Chay killaspi asirispa niwaj: “Sanoña kani”, nispa (Pro. 17:22). Señorayqa onqoyninwan mayta sufrispapis kallpawan mosoj takiykunasninchejta takirin.

Señorayta mana llakiyninwan atipachikojta rikuspaqa, may kallpachasqa kani. 57 watasña casarasqa kashayku. Tukuy kausayniykupitaj señorayqa sumajta cuidawarqa. Chayrayku mana runtuta estrellayllatapis yachachiwarqachu. Onqoykojtinraj yachakorqani platosta mayllayta, ropata tʼajsayta, waykʼuytapis. Wakin kutisqa vasosta pakʼerqani. Chaywanpis kusikuni imallatapis señoraypaj ruwapuspa. *

Señorayqa may onqosqa kashan, noqataj awelitoña kaspa manaña wakin imasta ruwayta atinichu. Ajinapi rikukusqayrayku reparani sanitollaraj kashaspa qhariwarmis tiempochakunanku kasqanta parlarikunankupaj, khuska imatapis ruwanankupaj chayri imatapis jaywarinakunankupaj (Ecl. 9:9). Chantapis mana llakiynillanchejpichu yuyananchej tiyan. Imaraykuchus llakiynillanchejpi yuyaspaqa, mana reparayta atisunchu ima bendicionestachus japʼishasqanchejta (Pro. 15:15).

Jehová Diosrayku imastachus ruwasqaymanta yuyarikuspaqa, reparani Jehová Dios may chhika bendicioneswan juntʼachiwasqaykuta. Chayrayku uj salmista jina niyman: “Tata Diosqa noqawan kʼacha karqa”, nispa (Sal. 116:7).