WAKIN kuteqa Moisespa Leyninman jinapuni ruwaj kanku. Deuteronomio 24:14, 15 versiculosmanta parlarina. Chaypi nin: ‘Wajcha peonniykichejwanqa maychus kajta ruwankichej, qankunaj llajta masiykichejpis kachun, chayri llajtaykichejpi tiyakoj forasteropis kachun. Chaytachus ruwankichej chayqa, mana Tata Diosman qankunaj contraykichejta qhaparenqachu, qankunataj mana juchachasqachu kankichej’, nispa.

Chayta sutʼincharinapaj, uj peonmanta parlarina. Payqa ichapis 650 watas chaynejta Jesús niraj jamushajtin kausakunman karqa. Payqa uj día jornalninta manasina juntʼayta atisqachu. Chayraykutaj patronnenqa ropasninta qhechusqa. Jinapi chay peonqa, uj autoridadpaman rispa yanapanta mañakamusqa. Peonqa chay autoridadman jinata nisqa: ‘Uj día jornalniyta mana juntʼayta atisqayrayku, patronneyqa ropasniyta japʼikaporqa. Jinapis noqaqa jumpʼi suruyta trabajarqani. Llankʼaj masisniypis rikuwarqanku. Paykunaqa nisunkuman maytapuni trabajasqayta. Chayrayku patronniyman niripuway ari, ropasniyta kutichipunawanta. Khuyarikullaway ari’, nispa. Chay peonpa nisqantaqa uj pʼalta rumipi jina qhelqasqanku. Chaytataj kunallanraj tarisqanku Israelpi.

Chay peón autoridadman imatachus nisqanmanta parlaspa, uj yachayniyoj runa Simon Schama sutiyoj, jinata nerqa: “Chay peón ropasninta patronnin kutichipunanta mañakusqanqa, maychus kajlla karqa. Chaytaj reparachiwanchej, chay peón Moisespa Leyninta rejsisqanta. Payqa yachanmanchá karqa, uj patrón peonninman pagonta qopunanpuni kasqanta. Imaynatachus Levítico libro, Deuteronomio libro ima nisqanman jina”, nispa.