JESUSQA unayña nerqa: “Cheqamanta cosechanaqa ashkha, oqharejkunarí pisilla kanku. Chayrayku cosechaj Dueñonmanta mañakuychej cosechanman oqharejkunata kachamunanpaj”, nispa (Luc. 10:2). Oqharejkuna pisilla kasqankuta Myanmar suyupi sutʼita rikukushan. Imaraykuchus chay suyupeqa 4.200 hermanoslla tiyan. Paykunataj 55 millonesman jina predicananku tiyan.

Jinapis ‘cosechaj Dueñon’ Jehová Diosqa waj suyusmanta hermanospa sonqonta kuyuricherqa, Myanmarman predicaj ripunankupaj. Kunantaj qhawarisunchej imaschus chay hermanosta yanapasqanta Myanmarman ripunankupaj, ima bendicionestatajchus japʼisqankuta.

Kazuhiro sutiyoj hermanomanta parlarina. Payqa Japonmanta, precursor regulartaj. Uj kutipi, payqa tʼuku onqoywan japʼichikuspa yuyayninta chinkachisqa, hospitalmantaj apasqanku. Doctortaj nisqa iskay watata manaña autota manejananta. Kazuhirotaj chayta uyarispa mayta llakikusqa, sonqonpitaj nikusqa: “Imanasajtajri, ¿imaynatá precursorllapuni kasajri?”, nispa. Chantá sonqomantapacha Jehová Diospa yanapanta mañakusqa precursorllapuni kananpaj.

Kazuhiro nin: “Onqoykusqaymanta killanman jina, ujnin amigoy enterakusqa tʼuku onqoywan japʼichikusqayta. Payqa Myanmarpi Diosta sirvisharqa. Wajyamuwaspataj niwarqa: ‘Kaypeqa precursorllapuni kanaykipaj mana autoyojpunichu kanayki tiyan. Kaypi runasqa microllapi purikunku’, nispa. Noqataj doctorta taporqani, onqosqa kaspapis Myanmarman viajayta atisqaytachus manachus. Doctortaj niwarqa: ‘Viajayta atiwaj. Astawanpis Myanmarmanta uj doctorta presentasqayki. Payqa kunitan kay llajtapi kashan. Tʼuku onqoymantataj sumajta yachan. Watejmanta tʼuku onqoy japʼisojtenqa pay yanapasonqa’, nispa. Jinamanta Jehová Dios uyariwasqanta repararqani”, nispa.

Chantá Kazuhiroqa chay rato Myanmar sucursalman cartata apachisqa. Chay cartapi nisqa: “Señoraywan Myanmarpi precursores jina sirviyta munayku”, nispa. Phishqa diasninmantaj sucursalmanta kutichisqanku: “Jampuychej, ashkha precursoresta necesitayku”,  nispa. Kazuhirowan señoranwantaj autosninkuta vendesqanku, visata orqhokusqanku, Myanmarmantaj avionpi viajasqanku. Kunantaj kusisqa Mandalay llajtapi señas congregacionpi sirvishanku. Kazuhiro nin: “Myanmarman jampuspaqa repararqayku Salmo 37:5 nisqan kausayniykupi juntʼakusqanta. Chay versiculopi nin: ‘Diospa makisninman kausayniykita churay. Paypi atienekuy, paytaj yanapasonqa’”, nispa.

Myanmarpeqa 2014 watapi uj jatun tantakuy apakorqa. Ashkha hermanostaj waj suyusmanta chay tantakuyman risqanku. Monique sutiyoj hermanapis chay tantakuyman risqa. Payqa Estados Unidosmanta, 34 watasniyojtaj. Pay nin: “Jatun tantakuy pasasqantawan Jehová Diosman nerqani Myanmarman kutinaypaj yanapanawanta. Tatasniymanpis chayta willarillarqanitaj. Tatasniytaj ‘rillay’ niwarqanku. Jinapis Myanmarman mana chay ratochu kuterqani”, nispa. Kunantaj willariwasun imajtinchus mana chay ratochu kutisqanta.

Pay nin: “Repararqani qolqe mana alcanzanawanta Myanmarman ripunaypaj. Chaytaqa repararqani Jesuspa nisqanpi tʼukurispa. Pay nerqa imata ruwanapajpis ñaupajta qolqenchejtaraj qhawarikuna kasqanta (Luc. 14:28). Noqataj piensarerqani qolqe viajanaypaj alcanzanawanpichus manachus, wakin diasllata trabajajtiy qolqe alcanzanawanpichus manachus”, nispa.

Monique nillanpuni: “Uj kutipi patronay oficinanman wajyawarqa. Noqataj mancharisqa kasharqani ‘trabajomantachá wijchʼuwanqa’ nispa. Chaywanpis sumajta trabajasqaymanta agradecekuwarqa, sueldotapis yapariwarqa. Chay yapariwasqan qolqewantaj viajanaypaj alcanzawarqa”, nispa.

Jinamanta Moniqueqa diciembre de 2014 watapi Myanmarman riporqa. Pay nin: “May kusisqa kashani kaypi Jehová Diosta sirvispa. Kinsa runasman Bibliamanta yachachishani. Ujnenqa 67 watasniyoj. Payqa saludarinawanpaj kusisqa abrazaykuwan. Chay señoraqa Diospa sutin Jehová kasqanta yachaspa waqarikorqa. Pay niwarqa: ‘Mana Diospa sutinta yacharqanichu. Kunanpuni Diospa sutinta uyarishani, awelitaña kashanipis’, nispa. Chay señora waqarikushajtenqa noqapis waqarikullarqanitaj. Ajina runasta uyarispa, pisi hermanoslla kanku chaypi yanapakuspaqa sonqo juntʼasqa kani”, nispa. Hermananchej Moniqueqa kunallanraj uj jatun bendicionta japʼerqa. Payqa Reinomanta Willajkunapaj Escuelaman rerqa.

Waj suyusmanta hermanos Myanmarman ripullasqankutaj, 2013 watamanta Anuario librota leesqankurayku. Li sutiyoj hermanamanta parlarina. Payqa Asiamanta, 30 watasniyojtaj. Payqa semanantin trabajaj, 2013 watamanta Anuario librota leesqanraykutaj Myanmarman ripuyta munasqa. Pay nin: “2014 watapi Myanmarpi uj jatun tantakuy apakorqa. Noqataj chayman rerqani. Chaypitaj uj qhariwarmita rejserqani. Paykunaqa Myanmarpi chino parlaypi kaj grupopi yanapakushasqanku. Chinota parlasqayraykutaj chay grupota yanapakoj riporqani. Kunantaj Moniquewan Myanmarpi sirvishayku. Jehová Diospa yanapayninwan wakin diasllata uj escuelapi trabajanaykupaj trabajota tarerqayku. Cuartotapis chay escuela qayllapi tarerqayku. Myanmarpi yanapakuspa kusisqa kashani, chay lugarpi calorta ruwamojtinpis chayri mana llajtay jinachu kajtinpis. Myanmarmanta runasqa pisi imasllawan kausakunku. Chantapis paykunaqa saludakunkupuni, Diosmantapis uyarinankupaj tiempochakunkupuni. Sonqoy qhallallarin Myanmarpi hermanos ashkhayashasqankuta rikuspa. Ajinamanta reparani Myanmarpi sirvinayqa Jehová Diospa munayninpuni kasqanta”, nispa.

Pisi hermanoslla kanku chay lugaresman ripoj hermanosqa, sutʼita repararqanku Jehová Dios mañakusqankuta  uyarisqanta. Hermano Jumpeimanta señoran Naomantawan parlarina. Jumpeiqa 37 watasniyoj, señorantaj 35 watasniyoj. Paykunaqa Japonpi señas congregacionpi sirvishaspa Myanmarman ripusqanku. Jumpei nin: “Señoraywanqa munarqaykupuni waj suyuman yanapakoj ripuyta. Congregacionniymanta uj hermano Myanmarman ripusqanrayku, noqaykupis chayman riporqayku. Pisi qolqella kapuwajtiykupis mayo de 2010 watapi riporqayku. Myanmarmanta hermanostaj chunka makiwan japʼikuwarqayku. Myanmarpi señaspi kaj videosta rikuchejtiyku runasqa tʼukulla qhepakunku. Maytapuni kusikuyku Myanmarman yanapakoj jampusqaykumanta”, nispa.

Qolqemanta parlaspa Jumpei nin: “Waqaychasniykoqa 3 watallapaj alcanzawarqayku. Watatawan wasita alquilakunaykupajtaj niña qolqe alcanzawarqaykuchu. Chayrayku señoraywan Jehová Diospa yanapanta mañakorqayku. Jinallapitaj sucursalmanta uj carta chayamuwarqayku. Chay cartapitaj nisharqa uj tiempota precursores especiales kanaykuta. Jinamanta repararqayku Jehová Dios mana saqerpariwasqaykuta. Astawanpis repararqayku tukuy imaymanamanta yanapashawasqaykuta”, nispa. Jumpeiqa señoranwan kunallanraj Reinomanta Willajkunapaj Escuelaman rerqanku.

Hermano Simonemanta señoran Annamantawan parlarina. Simoneqa Italiamanta, 43 watasniyojtaj. Señorantaj Nueva Zelandamanta, 37 watasniyojtaj. Anna nin: “2013 watamanta Anuario librota leesqaykurayku Myanmarman riporqayku”, nispa. Qosantaj nin: “Mayta kusikuni Myanmarman jampusqaykumanta. Kaypeqa pisi imasllawan kausakuyku. Chayrayku Jehová Diospaj astawan llankʼayta atiyku. Kaypi yanapakuspaqa, sutʼita reparayku Jehová Dios tukuy imaymanasmanta cuidashawasqaykuta, yanapashawasqaykutataj”, nispa (Sal. 121:5). Annataj nin: “Pisi imasllawan kausakusqaykumanta sonqoy mayta tʼikarin. Imajtinchus qosaywan astawan parlarikuyku, aswan ujchasqataj kayku. Chantapis sumaj amigosniyoj kayku. Runastaj mana Testigosta chejnikunkuchu. Astawanpis Bibliamanta yachakuyta munanku”, nispa.

Anna nillantaj: “Uj kuti mercadopi uj universitariaman predicarqani. Astawan yachakuyta munasqanraykutaj kutinayta nerqani. Kutejtiytaj amiganwan suyawarqa. Qhepanta kutinaypajtaj waj amigasninpiwan suyawarqa. Qhepanpitaj aswan ashkhawan suyawarqa. Kunantaj enteronkumanta phishqawan Bibliata estudiashani”, nispa. Qosan nin: “Campomanta runasqa manchay kʼachas kanku, imatapis yachaytapuni munanku. Casi tukuypis Bibliamanta yachakuyta munanku. Chayrayku tiempo faltawayku runasman yachachinaykupaj”, nispa.

Niraj Myanmarman ripushaspa imatachus wakin hermanos ruwasqankuta qhawarina. Hermano Sachiomanta señoran Mizuhomantawan parlarina. Paykunaqa Japonmanta kanku. Mizuho nin:  “Qosaywanqa pisi hermanoslla kanku chaypi yanapakuymanta wañoj kayku. 2013 watamanta Anuario librotaj sonqoykuta kuyuricherqa. Chaypi leerqayku ashkha experienciasta Myanmar suyumanta. Chayrayku Myanmarman riyta munarqayku”, nispa. Qosantaj nin: “Semanata Myanmarman qhawarej rerqayku, imaynachus kausay kasqanta tantearimunaykupaj. Chaypitaj repararqayku Myanmarman ripunaykupuni kasqanta”, nispa.

Hermano Rodneymanta, señoran Janemantawan parlarina. Paykunaqa Australiamanta kanku, 50 watasniyoj jinataj. Iskay wawasniyojtaj kanku, ujninpa sutenqa Jordan, ujninpatataj Danica. Familiantintaj 2010 watamantapacha Myanmarpi sirvishanku. Rodney nin: “Runas Diosmanta yachakuyta munasqankuta rikuspa tʼukulla kasharqayku. Tukuy familiasta niyman pisi hermanoslla tiyan chayman yanapakoj ripunankuta. Imajtinchus waj ladoman ripusqaykurayku familia jina astawan Jehová Diosman qayllaykorqayku. Ashkha jovenesqa tiemponkuta usuchinku celularesnillankuwan musphaspa, autoyoj kayta munaspa, trabajollaman qokuspa, waj imaswan ima. Wawasniykutajrí tiemponkuta churanku waj parlaypi sumajta predicayta amañaspa, Bibliata mana rejsej runaswan imaynatachus parlariyta yachakuspa. Tiemponkuta churallankutaj reunionespi waj parlaypi sumajta comentayta yachakuspa, congregacionpi yanapakuspa ima”, nispa.

Hermano Olivermantañataj parlarina. Payqa Estados Unidosmanta, 37 watasniyojtaj. Pay nin: “Waj ladoman ripunaypaj ashkha imasta saqeporqani. Chaytaj allinniypaj karqa. Imajtinchus yachakorqani imapi rikukuspapis Jehová Diospi atienekunay kasqanta. Waj lugarmanta hermanoswan predicaspataj, repararqani Jehová Diospa Gobiernonta ñaupajmanpuni churana kasqanta”, nispa. Kunantaj Oliverwan señoran Annawanqa kusisqa chino parlaypi yanapakushanku.

Hermana Trazelmanta parlarina. Payqa Australiamanta, 52 watasniyojtaj. Payqa 2004 watamantapacha Myanmarpi yanapakushan. Pay nin: “Karu lugarespi yanapakamuyta atinkichej chayqa, chayman ripuychej. Imajtinchus kausayniypi rikorqani Jehová Dios yanapawasqanta waj lugarman yanapakoj ripusqayrayku. Kaypeqa may kusisqa, sonqo juntʼasqataj Diosta sirvishani”, nispa.

Chay experienciasqa, mayta kallpachawanchej karu lugaresman predicaj ripunapaj chayri maypichus ni jaykʼaj predicakorqachu chay lugaresman ripunapaj. Myanmarman ripojkunaqa nishanku: “Jamuriychej ari, yanaparinawaykupaj”, nispa.