1. ¿Imajtintaj mayta kusikunchej?

MAYTA kusikunchej Diospa llajtan ashkhayashasqanmanta. Imajtinchus qayna wataqa 10.000.000 runasmanta astawan Bibliamanta yachakorqanku. May chhika runastaj Jesuspa Wañuyninta Yuyarinapaj tantakuyman jamorqanku. Chaypitaj yachakorqanku Jehová Dios Wawanta qospa juchamanta kacharichiwasqanchejta (1 Juan 4:9). Ajinamanta Diospa kamachisnenqa runaspa ñaupaqenpi ruwasqasninchejwan kʼancharishanchej.

2, 3. 1) ¿Mana kikin parlayta parlaspapis kay mundopi lliphipirisunmanchu? 2) ¿Imatataj qhepan parrafospi yachakusunchej?

² Jallpʼantinmanta hermanosqa mana kikin parlayllatachu parlanchej. Chaywanpis Jehová Diostaqa, uj familia jina jatunchayta atinchej (Apo. 7:9). Chayrayku mana kikin parlayta parlaspapis chayri maypi tiyakuspapis kay mundopi lliphipirishanchej (Fili. 2:15).

³ Qhepan parrafospi yachakusunchej imaynatachus kʼanchanata predicaspa, ujchasqa kaspa, rijchʼarisqa kaspa ima. Ajinamanta runas ruwasqasninchejta rikuspa Jehová Diosta jatunchanankupaj (Mateo 5:14-16 leey).

4, 5. 1) ¿Ruwasqasninchejwan runasta yanapasunmanchu Jehová Diosta jatunchanankupaj? 2) ¿Imajtintaj allin kasqa kʼachamanta runasta parlapayananchej? (21 paginapi fotota qhawariy).

⁴ Kay 1 de junio de 1925 watamanta inglés parlaypi Torremanta Qhawaj revistapi, ujnin yachaqananpi jinata nerqa: ‘Kay qhepa pʼunchaykunapi Señorninchej allin ñawiwan qhawanawanchejpajqa lliphipirinanchej tiyan, nisunman predicamunanchej tiyan. Chantapis Diospa nisqasninman jina kausakunanchej tiyan’, nispa. Reparanchej jina runaspa ñaupaqenpi lliphipirisunman predicamuspa, runasta Jesuspa yachachisqasninman tukuchimuspataj (Mat. 28:19, 20). Ruwasqasninchejwanpis wajkunata yanapasunman Jehová Diosta jatunchanankupaj. Imajtinchus runasqa, predicashajtinchej imastachus ruwashasqanchejta, imaynachus kashasqanchejtapis qhawashawanchej. Chayrayku allin kanman predicashaspa runasta kʼachamanta saludarinanchej. Ajinamanta allin ñawiwan qhawawasun, Jehová Diostapis jatunchanqanku.

⁵ Jesusqa discipulosninman nerqa: “Uj wasiman yaykuspaqa, chaypi tiyakojkunata napaykuychej”, nispa (Mat. 10:12). Jesús predicarqa chay lugarespi, runasqa visitarejkunata wasinkuman pasaykuchejpuni kanku. Chaywanpis kay tiempopeqa, wakin lugarespi runasqa mana wasinkuman pasaykuchillawasunmanchu. Astawanpis wasiyojkunaqa phiñakunku, rabiakunkutaj punkunkuta takaykusqanchejmanta. Jinapis kʼachamanta, munakuywantaj paykunata parlapayajtinchejqa, sonqonkuta tiyaykuchisunman. Carritowan predicashajtinchejpis kʼachallamanta saludarejtinchejqa runasqa uyariwasunman, publicacionestapis apakunkuman, Bibliamantapis yachakuyta qallarinkuman.

6. ¿Imaynatataj uj qhariwarmi machitu hermanos predicaj kasqanku?

⁶ Uj qhariwarmi machitu hermanosmanta parlarina. Paykunaqa Inglaterramanta kanku, uj escuelaj ladonpitaj tiyakunku. Paykunaqa onqoykusqankurayku manaña wasimanta wasi predicayta atinkuchu. Chayrayku wasinku punkupi uj mesitapi publicacionesta churaspa predicanku. Paykunaqa tatasta yanapananpaj jina kaj publicacionesta mesitankuman churanku. Imajtinchus ashkha tatas escuelaman rinku wawasninkuta recogej. Wakin tatasqa Waynaspata sipaskunapta tapukuyninku nisqa librosta apakunku wakin folletostawan. Chay machitu hermanostaqa uj precursora acompañan. Paykuna runaswan kʼachas kasqankuraykutaj uj tata Bibliamanta yachakuyta qallarerqa.

7. ¿Imaynatataj yanapasunman waj llajtamanta ayqekamojkunata?

⁷ Pasaj wataspi ashkha runasqa waj llajtasman ayqekorqanku. Paykunamanqa Jehová Diosmanta willarisunman. Chaypajqa parlayninkupi imaynatachus saludarinata yachakusunman. Chayta yachakunapajtaj JW Language nisqa programawan yanapachikusunman. Chantapis parlayninkupi wakin tapuykunata yachakusunman. Chaymantataj Internetpi jw.org nisqapi videosta, publicacionesta ima parlayninkupi rikuchisunman (Deu. 10:19).

8, 9. 1) ¿Imapajtaj Cristiano Kausayninchej tantakuy yanapawanchej? 2) ¿Imatataj tatas wawasninkuman yachachinanku kasqa?

⁸ Jehová Diosqa sumajta predicayta yachachiwanchej Cristiano Kausayninchej nisqa tantakuynejta. Chay tantakuypeqa yachakunchej imaynatachus uj revisitata ruwananchejta, imaynatachus Bibliamanta yachachiyta qallarinanchejtapis.

⁹ Tantakuykunasninchejman jamojkunaqa, mayta tʼukunku wawas comentajtinku. Chayrayku allin kanman tatas wawasninkuta comentayta yachachinanku. Wakin runasqa  Bibliamanta yachakuyta qallarerqanku wawitasta tantakuypi comentajta uyarisqankurayku. Imajtinchus wawitasqa sonqetunkumantapacha comentanku (1 Cor. 14:25).

10. ¿Imajtintaj tatas familiapi Diosta yupaychayta ruwananku kasqa?

¹⁰ Runasqa Jehová Diosta jatunchayta munallankumantaj familianchej ujchasqa kajtin. Chayrayku tatasqa kallpachakunanku tiyan familiapi Diosta yupaychanapaj tantakuyta sapa semana ruwanankupaj. Ashkha familiasqa chay tantakuypi JW Broadcasting nisqa videota qhawanku. Chantataj parlarikunku imatachus yachakusqankumanta. Chantapis tatasqa wawasninkuman mana machu runasman jinachu yachachinanku tiyan. Chayrayku kallpachakunanku tiyan wawasmanqa wawasman jina yachachinankupaj, jovenesmantaj jovenesman jina (Sal. 148:12, 13).

11. ¿Imatataj ruwasunman congregación ujchasqa kananpaj?

¹¹ Tukuyninchej yanapakusunman congregación ujchasqa kananpaj. Chayrayku allin kanman jovenesqa machitu hermanoswan amigos ruwakunanku. Jovenesqa, tapurinkuman imachus paykunata yanapasqanta Jehová Diosta tukuy sonqo sirvinallankupajpuni. Jinamanta purajmanta kallpachanakunankupaj. Chantapis machitus chayri jóvenes kaspapis, tukuyninchej tantakuykunaman jamojkunata chunka makiwan japʼikusunman. Chaypajqa allin kanman asirispa saludarinanchej, uj asientota maskʼapunanchej, hermanostataj rejsichinanchej.

12. ¿Imastataj predicacionmanta encargados ruwankuman machitu hermanosta yanapanankupaj?

¹² Predicacionmanta encargado kajkunaqa, machitu hermanosta mayta yanapankuman tukuy sonqo predicanallankupajpuni. Predicacionmanta encargadosqa, machitu hermanosta ninkuman, maymantachá predicacionman llojsinku chay chayllapi predicanankuta. Chantapis jovenesta machitu hermanoswan predicachinkuman. Ajinamanta machitu hermanosqa, reparanqanku paykunamanta llakikusqankuta. Imajtinchus machitu hermanos, onqosqa hermanospis mayta llakikunku manaña ñaupajta jinachu predicayta atisqankumanta (Lev. 19:34).

13. ¿Imatataj ruwasunman hermanosninchejwan uj sonqolla kʼachata kausakunapaj?

¹³ Israelitasqa Jehová Diosta ujchasqas sirvispa, mayta kusikoj kanku. Chayrayku  uj salmista nerqa: “May jina sumajpuni wawqepura uj sonqolla kʼachata kawsanankoqa”, nispa (Salmo 133:1, 2 leey). Chantá nillarqataj: “Chay allin kawsayqa rijchʼakun ima munay qʼapayniyoj jawina aceiteman”, nispa. Noqanchejpis kay tiempopi hermanosninchejwan uj sonqolla kʼachata kausakusunman. Chaypajqa hermanosninchejta kʼachamanta parlapayana, paykunamantataj khuyakuna. Ajinamanta congregacionpi hermanosninchejwan allinta kausakusunchej, ujchasqataj kasunchej. Chayrayku kallpachakuna tukuy hermanosta allinta rejsinapaj (2 Cor. 6:11-13).

14. ¿Imastataj ruwasunman vecinosninchej Jehová Diosmanta yachakuyta munanankupaj?

¹⁴ Tukuy tiempo kʼachas kanapaj kallpachakuna. Ichapis vecinosninchejqa kʼachas kasqanchejta reparaspa Jehová Diosmanta yachakuyta munankuman. Chayrayku allin kanman piensarinanchej vecinosninchej kʼacha runasta jinachus chayri sajra runasta jinachus qhawawasqanchejpi. Piensarillasunmantaj vecinosninchej allin ñawiwan qhawanawanchejpaj, wasinchejta kʼuchunchasqatachus chayri tʼustitachus japʼisqanchejpi. Chantapis piensarisunman wajkuna yanapanata necesitashajtinku yanapasqanchejpichus manachus. Chantapis allin kanman hermanosninchejta tapurinanchej, kʼachata kausakusqankurayku vecinosninku, escuelamanta compañerosninku, trabajomanta compañerosninku, familiaresninku ima imastachus paykunamanta nisqankuta (Efe. 5:9).

15. ¿Imaraykutaj rijchʼarisqallapuni kananchej kasqa?

¹⁵ Kay qhepa pʼunchaykunapi predicacionpi kʼancharinallanpajpuneqa rijchʼarisqallapuni kananchej tiyan. Jesuspis ashkha kutista yachachisqasninman nerqa: “Rijchʼarisqallapuni kaychej”, nispa (Mat. 24:42; 25:13; 26:41). Chaywanpis manchay ñakʼariy tiempo karupiraj kasqanta yuyasunchej chayqa, mana rijchʼarisqa kayta atillasunchu, nisunman predicamunapaj mana kallpachakullasunchu (Mat. 24:21). Ajinamantataj pisimanta pisi predicamuyta qonqapusunman.

16, 17. Kay sajra tiempopi, ¿imatataj ruwasunman wakichisqallapuni kanapaj?

¹⁶ Kay sajra tiempopi ni jaykʼaj jina, sumaj ruwaykunata ruwaspa rijchʼarisqa kananchej tiyan. Imajtinchus Jehová Diosqa sajra runasta chinkachenqapuni (Mat. 24:42-44). Chay día chayamunankamataj pacienciawan suyakuna, wakichisqataj kana. Chaypajqa sapa día Bibliata leena, Diosmantataj mañakunallapuni (1 Ped. 4:7). Chantapis unaytaña Jehová Diosta sirvej hermanosmanta yachakuna. Ichá wakin hermanospa experienciasninkuta leerisunman. Por ejemplo 15 de abril de 2012 watamanta Torremanta Qhawaj revistapi, 18 al 21 paginaspi, kay experienciata tarisunman: Qanchis chunka watasta “judío runaj pʼachanmanta japʼiykuku[ni]” nisqata.

¹⁷ Tiemponchejta mana usuchinapajqa, Jehová Diosta tukuy imaymanasmanta sirvina. Chantapis tukuypaj allin kajta ruwana, hermanosninchejtapis waturikuna. Ajinamanta kusisqa kasunchej, tiempopis ima jina pasaponqa (Efe. 5:16). Jehová Diospa kamachisnenqa pasaj 100 wataspi mayta predicarqanku. Noqanchejtaj kay tiempopi astawanraj predicashanchej Jehová Diospa yanapayninwan. Chaytataj may chhika runas reparashanku.

18, 19. ¿Imaynasmantataj ancianos yanapawasunman ujchasqallapuni kanapaj?

¹⁸ Jehová Diosqa, pantaj runas kajtinchejpis sirvinallanchejtapuni munan. Yanapanawanchejpajtaj  ancianosta “regalosta jina” qowarqanchej (Efesios 4:8, 11, 12 leey). Chayrayku ancianos waturikuwajtinchejqa, tukuy sonqo yuyaychariwasqanchejta japʼikuna.

¹⁹ Uj qhariwarmimanta parlarina, paykunaqa Inglaterramanta kanku. Chay qhariwarmeqa, kausayninkupi problemasniyoj kasqankurayku ancianoswan parlarisqanku yanapachikunankupaj. Hermanoj señoranqa ancianosman nisqa: “Qosayqa mana yanapawanchu Jehová Diosman qayllaykunaypaj”, nispa. Qosantaj pantasqanta reconocespa ancianosman nisqa yachachishaspa mana entiendechikuyta atillasqanta, maypi jinallataj familiapi Diosta yupaychasqankuta. Ancianostaj chay hermanota kallpacharisqanku Jesusmanta yachakunanta. Imaynatachus Jesús discipulosninta kʼachamanta yanaparqa, ajinata paypis señoranta yanapananpaj. Chantá ancianosqa señoranta yuyaychasqanku qosanwan pacienciakunanta. Chantapis ancianosqa iskayninkuta yuyaychasqanku, imaynatachus wawasninkuwan familiapi Diosta yupaychanankuta (Efe. 5:21-29). Chay hermanoqa ancianospa yuyaychasqankuta japʼikuspa chayman jina ruwasqa. Ancianostaj uyarikusqanmanta chay hermanota allinta ruwasqanta nisqanku. Chantá iskayninkuta yuyaychasqanku kallpachakunallankutapuni Jehová Diosta tukuy sonqo sirvinankupaj, Diospitaj atienekunankuta. Reparanchej jina chay qhariwarmi ujchasqallapuni karqanku, ancianos kʼachamanta yuyaychasqankurayku.

20. ¿Sumaj ruwaykunasninchejwan runasta yanapasunmanchu?

²⁰ Biblia niwanchej: “Kusikuyniyojmin kanku Diosta tukuy manchachikojkuna, pikunachus kamachisqasninta ruwajkunaqa”, nispa (Sal. 128:1). Ñaupaj parrafospeqa yachakorqanchej runaspa ñaupaqenpi kʼanchayta atisqanchejta predicaspa, ujchasqa kaspa, rijchʼarisqa kaspataj. Kay imasta ruwallasunpuni chayqa, may kusisqa kasunchej. Chantapis runasqa sumaj ruwasqasninchejta rikuspa, cielopi kashaj Tatanchej Jehová Diosta jatunchayta munanqanku (Mat. 5:16).