Kay tiempopeqa, imaynapunichus apóstol Pabloj rijchʼaynin kasqanta mana yachayta atisunmanchu. Chayrayku publicacionesninchejpeqa apóstol Pablo dibujasqalla kashan.

Chaywanpis apóstol Pablo imayna rijchʼayniyojchus kasqantaqa, Hechos de Pablo y Tecla nisqa libropi tumpata nishan. Chay libroqa 150 wata chaynejta qhelqakorqa. Chay libropi nin: “Pabloqa karqa juchʼuy runalla, pʼajlita, rosquito, kallpasapa, kʼiski cejasniyoj, senqasapitataj”, nispa. Chay libromantaqa, 1 de marzo de 1902 watamanta Torremanta Qhawaj revistapi parlakorqa.

Hechos de Pablo y Tecla nisqa libromanta parlaspa, uj diccionariopi nin: “Chay libroqa maychus kajllata parlan”, nispa. 150 watas chaynejtataj, runasqa chay librota leejpuni kanku. Chayrayku chay libroqa griego parlaypi, waj parlaykunapi ima ochentapuni karqa. Chaynejtataj publicacionesninchejpi chay libro nisqanman jina apóstol Pablota dibujakun.

Chaywanpis apóstol Pabloj rijchʼayninta yachanamantaqa, aswan allin imastachus ruwasqanta yachananchej. Payqa, cristianoman tukorqa, Jesús payman rikhurisqanrayku. Chantapis Jesusqa Pablota ajllarqa mana judío kajkunaman willananpaj (Hech. 9:3-5, 15; 22:6-8). Chaywanpis runasqa, apóstol Pablomanta nej kanku: “Payqa mana imachu, parlasqanpis mana kasu ruwana”, nispa (2 Cor. 10:10). Chayta parlajtinkupis, Jehová Diosqa Pablota yuyaycharqa Bibliamanta wakin librosta qhelqananpaj.

Chantapis apóstol Pabloqa, kʼumuykukoj sonqoyoj karqa, imajtinchus mana nerqachu imayna rijchʼayniyojchus kasqanta, nitaj jatunchakorqachu niraj cristianoman tukushaspa imastachus ruwasqanmanta (Hech. 26:4, 5; Fili. 3:4-6). Astawanpis apóstol Pabloqa jinata nerqa: “Noqaqa apóstoles ukhupi aswan juchʼuypaj qhawakuni. Manataj apóstol nisqa kanaypaj jinachu kani”, nispa (1 Cor. 15:9). Chantapis nillarqataj: “Noqaqa Diospaj tʼaqasqa kajkunamanta aswan juchʼuymantapis, aswan juchʼuyraj kani. Jinapis Diosqa jatun khuyakuyninta rikuchiwarqa. Ajinamanta Cristoj mana yupay atina bendicionesninmanta sumaj willaykunata, mana judío kajkunaman willanaypaj”, nispa (Efe. 3:8). Chayrayku apóstol Pabloj rijchʼayninta yachanamantaqa, aswan allin imatachus runasman willasqanta yachananchej.