1. 1) ¿Imatataj ruwananchej kasqa yachayniyoj runasman tukunapaj? 2) ¿Jehová Diosta kasukuy yanapawasunmanchu?

JEHOVÁ DIOSQA yachayniyoj. Tukuymantaj mana michʼakuspa yachayta qon. Chayrayku Biblia niwanchej: “Sichus qankunamanta pillapis pisi yachayniyoj chayqa, Diosmanta mañakullachunpuni. Diostaj yachayta payman qonqa. Imaraykuchus Diosqa tukuyman mana michʼakuspa qon, mana rimaspallataj”, nispa (Sant. 1:5). Yachayniyoj runasman tukunapajqa, Jehová Diosta kasukunanchej tiyan. Payta kasukuspaqa, astawan payman qayllaykusunchej, sajra ñanmantataj karunchakusunchej (Pro. 2:10-12). Ajinamanta Diospa munakuyninpi kallasunpuni, wiñay kausaytataj japʼisunchej (Jud. 21).

2. ¿Imaynatataj reparasunman Jehová Dios allinninchejpajpuni kʼamiriwasqanchejta?

² Juchasapa runas kasqanchejrayku chayri imayna familiapichus uywasqa kasqanchejrayku, wakin kutisqa pillapis kʼamiwajtinchej mana kusikunchejchu. Jehová Diostaj munakuwasqanchejrayku, allinninchejta munasqanraykutaj jasutʼiwanchej, yachachiwanchejtaj. Chaytaqa payta kasukuspa reparasunman. Chayrayku Biblia niwanchej: ‘Jehová Diospa wanachisunanpaj castigasusqantaqa amapuni  pisipaj qhawaychu, wawáy. Imaraykuchus Jehová Diosqa, pitachus munakun, chayta castigan’, nispa (Pro. 3:11, 12; Hebreos 12:5-11 leey). Jehová Diosqa sumajta rejsiwasqanchejrayku, pantajtinchej cheqan ñanman kutirichinawanchejpaj kʼamiwanchej. Qhepan parrafospitaj, yachakusunchej sapa ujninchej imaynatachus Diosta kasukunapaj kallpachakunanchej kasqanta, imaynatatajchus tatas wawasninkuta pantajtinku yanapananku kasqantapis. Yachakullasuntaj, imayna sonqowanchus ancianospa yuyaychaykunasninta japʼikuna kasqanta, Diostapis kasukunapuni kasqanta.

3. ¿Imaynatataj tatas wawasninkuta yanapankuman allin imaspi yuyanankupaj?

³ Sapa ujninchej yachakunanchej tiyan, allin imaspi yuyayta, allin kajtataj ruwayta, imaynatachus uj wawita bicicletata apaykachayta yachakun, ajinata. Uj wawa bicicletata apaykachayta yachakushajtenqa, tatan bicicletapi tanqaykachan mana urmananpaj. Chantá wawan yachakusqanman jinataj, pisimanta pisi wawanta saqen sapallanña bicicletata apaykachananta. Ajinallatataj tatasqa pacienciawan, mana saykʼuspataj wawasninkuta Jehová Dios nisqanman jina cheqanchananku, yachachinankutaj tiyan. Ajinamanta wawasninkoqa yachayniyoj runasman tukonqanku, allin imaspi yuyanqanku, nitaj munayninkuwan atipachikonqankuchu (Efe. 6:4).

4. ¿Imajtintaj mosoj runa kaywan pʼachallikunanchejpuni kasqa?

⁴ Kuraj runas kaspaña bautizakojkunapis, allin imaspi yuyayta yachakunallankutaj tiyan, cheqan kajtapuni ruwanankupaj. Ichapis kuraj runasqa, allin kajta reparayta yachankuña. Chaywanpis kallpachakunanku tiyan, wiñay tukusqa cristianosman tukunankupaj. Chaypajqa ‘mosoj runa kaywan pʼachallikunanku’ tiyan, Jesucristo jinataj imatapis ruwanankupaj kallpachakunanku tiyan (Efe. 4:23, 24). Mosoj runa kaywan pʼachallikuspaqa, Diospa munayninpa contranpi kaj imasta, kay mundoj sajra imasninta munapayayta ima qhesachasunchej. Chantapis kay tiempopi allin yuyaywan kausakusunchej, cheqan kajta ruwaspa, Diosta yupaychaspataj (Tito 2:12).

5. ¿Juchapi urmaspapis sayarikuyta atisunmanchu?

⁵ Entero runas juchasapas kanchej (Ecl. 7:20). Chayrayku munayninchejwan mana atipachikunapaj kallpachakojtinchejpis, pantasunpuni. Chaywanpis Biblia niwanchej: “Cheqan runaqa qanchis kutita urman, chantaqa uj qanchis kutillatataj sayarikun”, nispa (Pro. 24:16). Juchapi urmaspa sayarikunapajqa, Jehová Dioslla atiyninwan yanapawasunman (Filipenses 4:13 leey). Diosqa atiyninwan yanapallawasunmantaj mana munayninchejwan atipachikunapaj.

6. ¿Imastataj ruwasunman Diospa Palabranta sumajta ukhunchanapaj? (28 paginapi fotosta qhawariy).

⁶ Munayninchejwan mana atipachikunapajqa, Diospa yanapayninta mañakuna, Bibliata estudiana, yachakusqanchejpitaj tʼukurina. Bibliata mana ukhunchayta atillanchejchu chay, nitaj gustawanchejchu chayqa, Jehová Dioswan yanapachikuna. Payqa Palabranta mayta yachayta munananchejpaj yanapawasun (1 Ped. 2:2). Diospa Palabranta sumajta estudianapajqa tiempochakuna, Diospa yanapaynintataj mañakuna. Bibliata estudiayman yachasqa kanapajtaj, ichá primeritosta pisi tiempollata estudiasunman. Ajinata ruwajtinchejqa, pisimanta pisi Diospa Palabranta estudiaspa astawan miskʼirichikusunchej. Chantapis Diospa Palabranpi tʼukuriy astawan gustawasunchej (1 Tim. 4:15).

7. ¿Imatataj uj tata ruwasqa precursor kananpaj?

⁷ Munayninchejwan mana atipachikusunchu chayqa, Jehová Diospaj astawan llankʼayta atisunman. Uj tatamanta parlarina. Payqa reparakusqa manaña tukuy sonqochu predicamushasqanta. Chayrayku tukuy sonqo runasman predicamunanpaj, precursor regular kananta nikusqa. Chaypajqa precursoresmanta parlaj yachaqanasta revistasninchejpi leerisqa. Jehová Diospa yanapaynintataj mañakusqa, munayninwan  mana atipachikuspa allin imasta ruwananpaj. Ajinamantataj Jehová Diosman astawan qayllaykusqa. Chayrayku wakin kutisqa precursor auxiliar jina llankʼayta qallarisqa. Precursor regular kayta munasqanraykutaj, mana waj imaspirajchu musphaykachasqa. Jinamanta pisi tiemponman precursor regular kayta atisqa.

8, 9. ¿Imatataj wawasninchejman yachachinanchej kasqa sumaj runasman tukunankupaj?

⁸ Tatasqa wawasninkuta uywananku tiyan, “Jehová Dios nisqanman jina cheqanchaspa, yachachispataj” (Efe. 6:4). Runas mayta sajrayasqankurayku, ashkha tatasqa mana Jehová Dios nisqanman jina wawasninkuta uywayta atillankuchu (2 Tim. 3:1-5). Chayrayku wawasmanqa, nacekusqankumantapacha allin kajta, mana allin kajmanta reparayta yachachinanchej tiyan, sumaj runasman tukunankupaj (Rom. 2:14, 15).

⁹ Wawasqa, tatasninku munakuywan yachachejtinku, tatasninkuta kasukuyta atillanku. Reparankutaj mana munaynillankuta ruwayta atisqankuta, sajra kajta ruwajtinkutaj ñakʼarinankuta. Chayrayku wawasninchejta Bibliawanpuni yachachinanchej, cheqanchananchejtaj tiyan, manataj munayninchejman jinachu, nitaj runas yuyasqankuman jinachu. Imajtinchus runasqa, sapa lugarpi imaymanata ninku, imaynatachus wawasta uywanamanta.

10. Tatas, ¿imatataj Noemanta yachakusunman?

¹⁰ Tatasqa Noemanta mayta yachakusunman. Uj pacha Jehová Diosqa, Noeta kamacherqa uj arcata ruwananta. Noetaj mana yacharqachu imaynatachus ruwananta. Chayrayku Noeqa Jehová Diospi atienekuspa, nisqanman jinapuni arcata ruwarqa (Gén. 6:22). Noé, Jehová Diosta kasukuspa arcata ruwasqanrayku, paywan familianwanqa Jatun Parapi salvakorqanku. Chantapis Noeqa, sumaj tata karqa Jehová Diospa kamachisqasninta kasukusqanrayku. Payqa wawasninman Diosmanta sumajta yachacherqa, chay tiempomanta runas millay sajra imasta ruwajtinkupis. Wawasninrí paymanta yachakorqanku Diosta ñaupajman churayta (Gén. 6:5).

11. ¿Imatataj uj hermano nisqa tatasnin Diosmanta sumajta yachachisqanmanta?

¹¹ Noqanchejpis Noé jina Diosta kasukuna, nisqanman jinapuni wawasninchejta uywaspa. Chaypajqa Bibliaman jina, publicacionespi yuyaychakusqanman jinataj wawasninchejta yachachina. Paykunataj jatunña kaspa, sumajta yachachisqanchejmanta ichapis agradecekuwasunchej. Chaymanta parlaspa uj hermano nerqa: “Tatasneyqa Diosmanta sumajta yachachiwarqanku. Paykunaqa mayta kallpachakorqanku, Diospa Palabranta sonqoyman churanankupaj. Chayraykutaj Jehová Diosman astawan qayllaykorqani”, nispa. Chaywanpis wakin wawasqa, tatasninku Diosmanta yachachejtinkupis, Jehová Diosmanta karunchakunku. Ajina kajtinpis, wawasninchejpa sonqonman Diospa Palabranta churanapaj kallpachakojtinchejqa, karunchakojtinkupis sonqonchej mana juchachawasunchu. Astawanpis wawasninchej Diospa llajtanman kutinpunankuta suyakusun.

12, 13. 1) ¿Jehová Diosta kasukushasunmanchu qharqosqa wawasninchejwan parlaspa? 2) ¿Imatataj uj mama nisqa wawan congregacionman kutinpusqantawan?

 ¹² Wakin tatasqa, Jehová Diosta mana kasukuyta atillankuchu, wawanku congregacionmanta qharqochikojtin. Uj hermanamanta parlarina. Paypa warmi wawanqa, congregacionmanta qharqochikusqanrayku wasinmanta ripusqa. Pay nin: “Publicacionesninchejpi mayta maskʼarqani qharqosqaswan parlariy allillan kasqanta ninanta, ajinamanta wawaywan, allchhiywan ima karikunaypaj”, nispa. Chaywanpis qosanqa, reparachisqa wawan congregacionman kutinpunanqa paymantaña kasqanta. Reparachillasqataj Jehová Diosta kasukunanku aswan allin kasqanta.

¹³ Jinamanta watasninman, wawankoqa congregacionman kutinpusqa. Chaymanta parlaspa, maman nin: “Kunanqa waway casi sapa día wajyarimuwanpuni chayri mensajesta apachimuwan. Noqata qosaytawan mayta munakuwayku, qharqosqa kashajtin Jehová Diosta kasukusqaykurayku. Wawaywanqa sumajtapuni apanakuyku”, nispa. Chayrayku wawanchej congregacionmanta qharqosqa kashan chayqa, Jehová Diosta kasukuna, tukuy sonqotaj paypi atienekuna, amataj yachasqallanchejpi atienekunachu (Pro. 3:5, 6). Chantapis amapuni qonqanachu Jehová Diosqa munakuwasqanchejrayku castigawasqanchejta. Manallataj qonqananchejchu tiyan, Jehová Dios, wawanchejrayku, tukuy runaspa juchankuraykutaj kʼata Wawanta qosqanta. “Imaraykuchus mana munanchu ni pi chinkachisqa kananta” (2 Pedro 3:9 leey). Chayrayku tukuy tatasqa Jehová Diospa kamachiykunasninta kasukunapaj kallpachakunallanchejpuni tiyan, mana kasukuyta atinapaj jina kajtinpis. Amataj kamachiykunasninta pʼakinachu.

14. Diospa Llajtanta Kamachejkuna, ¿imaynasmantataj yanapawanchej?

¹⁴ Jehová Diosqa, nerqa kamachisninta sumajta qhawananta, yachachinanta, sajra kajmantataj jarkʼananta. Chayrayku payqa, Jesusta churarqa kamachisninta qhawananpaj. Jesustaj ‘allin mayordomo yuyayniyojta’ chayri Diospa Llajtanta Kamachejkunata churarqa, tukuy cristianosta necesitasqankuman jina tiemponpi Diospa Palabranwan mikhunawan jina kallpachananpaj (Luc. 12:42). Diospa Llajtanta Kamachejkunaqa, discursoswan, publicacioneswan, waj imaynasmantawan Bibliamanta yachachiwanchej. Kausayninchejta chayri yuyayninchejta cheqanchanapajqa, ichapis uj discurso yanapawarqanchej chayri uj publicacionpi yachakusqanchej. Chaykunawan yanapachikusqanchejmantaqa kusikunanchej tiyan. Imajtinchus saqeshanchej Jehová Diospuni cheqan ñanman kutirichinawanchejta (Pro. 2:1-5).

15. ¿Imatataj ruwasunman ancianosmanta yachakunapaj?

¹⁵ Jesusqa congregacionpi ancianosta churallantaj, hermanosta qhawanankupaj. Bibliataj niwanchej, ancianosqa Diosmanta ‘regalos jina’ kasqankuta (Efe. 4:8, 11-13). Sapa ujninchejtaj ancianosmanta mayta yachakusunman. Chaypajqa, “allinta kausakusqankuta qhawarispa, paykuna jina creeyniyoj” kanapaj kallpachakusunman. Chantapis may sumajpuni kanman yuyaychawasqanchejta kasukunanchej. Imajtinchus Bibliaj nisqanman jinapuni yuyaychawanchej (Hebreos 13:7, 17 leey). Ancianosqa munakuwanchej. Jehová Diosman astawan qayllaykunanchejtataj munanku. Paykunaqa, uj hermano tantakuykunamanta faltakusqanta chayri llakisqa kashasqanta reparaspa, usqhayllata yanaparinankupaj kallpachakunku. Chay hermanota sumajta uyarinku, kallpacharinku, Bibliaj nisqanman jinataj yuyaycharinku. Chayqa reparachiwanchej Jehová Diosqa munakuwasqanchejrayku ancianosta churasqanta.

16. ¿Imatataj ruwananchej kanman ancianos mana manchachikuspa yuyaycharinawanchejpaj?

¹⁶ Ancianospajqa, mana facilchu pantaj hermanosta yuyaycharinanku. Imaynachus unay tiempopi Diospa kamachisninpaj mana facilchu karqa, ajina. David juchanta pakaykuyta munajtin,  Natanpajqa ichapis mana facilchu karqa Davidta yuyaycharinan (2 Sam. 12:1-14). Apóstol Pablopajpis ichá mana facilchu karqa, Pedrota kʼamirinan. Pabloqa Pedrota kʼamerqa puraj uya kasqanrayku (Gál. 2:11-14). Chayrayku ancianos mana manchachikuspa yuyaycharinawanchejpajqa, kʼumuykukoj sonqo kana, tukuy sonqo yuyaychawasqanchejta japʼikuna, yuyaycharishawajtinchejtaj ama phiñakunachu. Chantapis yuyarikuna Diospuni munakuwasqanchejrayku ancianosnejta yuyaychashawasqanchejta. Ajinamanta allin riwasun, ancianospis ruwanankuta kusiywan juntʼanqanku.

17. ¿Imaynatataj uj hermanata ancianos yanapasqanku?

¹⁷ Uj hermana nin: “Niraj Jehová Diosmanta yachakushaspaqa, sajra imasta ruwarqani. Bautizakuspañapis yuyarqani ni imarayku Jehová Dios munakunawanta. Jinapi manchayta umphuyaporqani. Chayrayku ancianoswan parlarerqani. Paykunaqa mana pʼenqaypichu rikhurichiwarqanku. Manaqa kallpachawarqanku, sonqochawarqankutaj. Sapa tantakuy tukukusqantawantaj, ashkha ruwanasniyoj kaspapis waturiwajpuni kanku imaynachus kashasqaymanta. Jehová Diosqa, hermanosnejta, ancianosnejtataj mayta kallpachawarqa. Ajinamantataj mayta munakuwasqanta repararqani. Jehová Diosmantaqa mañakuni paypa qayllallanpipuni kanaypaj”, nispa.

18, 19. 1) ¿Imataj aswan llakiy jasutʼichikuychu chayri mana kasukuychu? 2) ¿Imataj kasqa Cainwan Sedequiaswan ima?

¹⁸ Mana mayqen jasutʼiypis chay ratoqa kusikunapaj jinachu, manaqa llakikunapaj jina. Chaywanpis aswan llakiy ima jasutʼiytapis chayri ima yuyaychaytapis qhesachayqa (Heb. 12:11). Chayta sumajta reparanapajqa, Cainmanta Sedequiasmantawan parlarina. Cainqa hermanonta wañuchiyta munarqa chejnikusqanrayku. Chayta Jehová Dios reparasqanraykutaj, Cainta nerqa: “Imaraykutaj jinata phiñakunki, uyaykipis uj jinayanri? Sichus allinta ruwawaj chayqa, mana jina uyayojchu kawaj. Qanqa mana allintachu ruwanki, chayrayku juchaqa atipasuytaña munashan. Manachus jina kawaj chayqa, juchata atipawaj”, nispa (Gén. 4:6, 7). Chaywanpis Cainqa Jehová Diosta mana kasukorqachu. Jinapitaj hermanonta wañurpacherqa. Chayraykutaj wañupunankama mayta ñakʼarerqa (Gén. 4:11, 12). Sichus Caín Jehová Diosta kasukunman karqa chayqa, mana ñakʼarinmanchu karqa.

¹⁹ Sedequiasmantañataj parlarina. Payqa Jerusalenpi rey karqa, qʼewakoj, sajra kajllatapunitaj ruwaj. Pay gobernashajtenqa Jerusalén llajta soldadoswan muyuykusqa kasharqa, sinchʼi yarqhaypitaj kasharqanku. Jehová Diostaj, Jeremiasnejta Sedequiasta yuyaycharqa sajra ruwaykunasninta saqepunanpaj. Chaywanpis Sedequiasqa Jehová Diosta mana kasukuspa, sajra imasllatapuni ruwarqa. Chayraykutaj Sedequiasqa maytapuni ñakʼarerqa (Jer. 52:8-11). Reparanchej jina, Jehová Diosqa mana qhasitachu kʼamiwanchej manaqa allinninchejpajpuni (Isaías 48:17, 18 leey).

20. 1) ¿Imataj kanqa Jehová Diosta mana kasukojkunawan? 2) ¿Imatataj Jehová Dios niwanchej?

²⁰ Kay tiempomanta runasqa, Jehová Diospa yuyaychaykunasninta qhesachanku, kʼamisqasnintapis pisipaj qhawanku. Chaywanpis Diosta mana kasukojkunaqa, tumpamantawan manchayta ñakʼarenqanku (Pro. 1:24-31). Chayrayku Jehová Diospa yuyaychaykunasninta kasukuspa yachayniyoj runaman tukuna. Jehová Diospis jinata niwanchej: “Yuyaychasqaymanta chʼipakuy, amataj qonqayman churaychu. Chay nisqasniyman jina ruway, imaraykuchus chaymin kawsayniykeqa”, nispa (Pro. 4:13).