1. ¿Ima llakiypitaj forastero hermanos rikukusqanku?

UJ PACHA, apóstol Pedroqa, 62, 64 watas chaynejpi, forastero hermanosman uj cartata qhelqarqa kallpacharinanpaj. Chay hermanosqa “Pontopi, Galaciapi, Capadociapi, Asiapi, Bitiniapi ima chʼeqerasqa” kasharqanku (1 Ped. 1:1). Paykunaqa “nina larwaypi jina ñakʼarichisqa” kasharqanku. Chantapis Pedro nisqanman jina, ‘tukuy imaj tukukuyninpa qayllanpi’ tiyakusharqanku. Imajtinchus Jerusalenqa, chunka watanman jina thuñisqa kanan karqa. Chayrayku kallpacharinata, yuyaycharinatataj necesitarqanku. Kunantaj qhawarina imachus paykunata yanapasqanta mana llakiywan atipachikunankupaj (1 Ped. 4:4, 7, 12).

2, 3. ¿Imajtintaj Pedro hermanosta kallpachasqa wasinkuman wajyarinakunankupaj? (Patapi kaj dibujota qhawariy).

² Wajkunataqa munakusqanchejrayku, kʼachas kasqanchejrayku ima wasinchejman wajyarikunchej. Chayraykuchá Pedroqa tiemponmanta hermanosta, kay jinata yuyaycharqa: “Qankunapura wasiykichejman wajyarinakuychej”, nispa (1 Ped. 4:9). Arí, Pedroqa hermanosta kallpachasharqa, rejsinakojtinkuñapis paykunapura wasinkuman wajyarinakunankupaj. Chaytaj allinninkupaj karqa.

 ³ Imajtinchus wasinkuman wajyarinakuspaqa, aswan ujchasqas kankuman karqa. Ajinamantataj ima llakiytapis atipayta atillankuman karqa. Kay tiempopipis ‘qhepa pʼunchaykunapi’ tiyakusqanchejrayku, aswan ujchasqa kananchej tiyan (2 Tim. 3:1). Chaypajqa, hermanosninchejta wasinchejman wajyarikunanchejpuni tiyan. Ajinallamanta astawan rejsinakusun. Ichá yuyarikunchej, uj hermanota astawan rejsisqanchejta, wasinman wajyarikuwasqanchejrayku chayri wasinchejman wajyarikusqanchejrayku.

4. ¿Imasmantataj qhepan parrafospi yachakusunchej?

⁴ Qhepan parrafospi yachakusunchej, imaynasmantachus hermanospura wasinchejman wajyarinakuna kasqanta. Yachakullasuntaj, imajtinchus mana manchachikunachu kasqanta hermanosta wajyarikuyta. Chantapis yachakusun imastachus ruwana kasqanta pillapis wajyarikuwajtinchej.

5. ¿Imaynatataj yanapasunman kunallanraj tantakuykunaman jamojkunata?

⁵ Tantakuykunapi. Tantakuykunaman jamojkunataqa tukuy sonqo japʼikunanchej tiyan, astawanqa mosojkunata. Imajtinchus Jehová Diosqa tukuyta tantakuykunaman wajyarikuwanchej (Rom. 15:7). Tantakuykunaman kunallanraj jamojkunataqa, chunka makiwan japʼikunanchej tiyan. Nitaj qhawarananchejchu tiyan imayna rijchʼayniyojchus kasqankuta, imayna vestisqachus kasqankutapis (Sant. 2:1-4). Ichá uj runa tantakuyman primera vez jamuspa sapallan tiyakushanman. Ajina kajtenqa, allin kanman paywan tiyarikunanchej. Chantapis yanaparisunman tantakuypi imamantachus parlakushasqanta entiendenanpaj, Bibliata leena kajtintaj versiculosta maskʼapusunman. Ajinamanta chay runaqa, tantakuyman jamusqanmanta kusikonqa. Chayta ruwaspaqa Bibliaj nisqanta juntʼasunchej. Biblia nin: “Kallpachakullaychejpuni wajkunata kʼachamanta japʼikunaykichejpaj”, nispa (Rom. 12:13).

6. ¿Pikunatataj wasinchejman wajyarikunanchejpuni kanman?

⁶ Imitallatapis mikhurikunapaj wajyarikuna. Ñaupa tiempopi runasqa, mikhurikunankupaj pillatapis wajyarikojpuni kanku. Chaywantaj rikuchej kanku amigosninku kayta munasqankuta, allintataj kausakuyta munasqankuta (Gén. 18:1-8; Jue. 13:15, 16; Luc. 24:28-30). Noqanchejpis wajkunata wasinchejman wajyarikunanchej tiyan, astawanqa congregacionninchejmanta hermanosta. Ajinamanta hermanosninchejwan aswan ujchasqa kasunchej, ima llakiypi rikukuspapis yanapanakuyta atisunchej. Chayrayku 2011 watapi Diospa Llajtanta Kamachejkunaqa, nerqanku Estados Unidos Betelpi Torremanta Qhawaj revistata estudianapaj tantakoyqa, manaña las seis y cuarenta y cincotachu qallarinanta, manaqa las seis y cuartota. Ajinamanta Betelpi trabajajkuna, chay chʼisi cuartosninkuman wajyarinakunankupaj. Waj Betel Wasispipis kikillantataj ruwarqanku. Chayrayku Betelpi trabajajkunaqa, aswan ujchasqas kanku.

7, 8. ¿Allinchu kanman discursantesta wasinchejman wajyarikunanchej?

⁷ Wakin hermanosqa congregacionninchejman discursota qoj jamunku. Wakin kutistaj congregacionesta waturej hermano visitariwanchej chayri Betelmanta uj hermano. Paykunatataj wasinchejman wajyarikusunman, imitallatapis mikhurikunapaj (3 Juan 5-8 leey).

⁸ Uj hermanamanta parlarina. Payqa Estados Unidosmanta, nintaj: “Qosaywanqa sapa kuti discursantesta, señorankutawan wasiykuman wajyarikuykupuni. Paykunawantaj mayta kusirikuyku. Sapa hermanoj experienciantaj, maytapuni kallpachawayku. Chayrayku hermanosta wajyarikuytapuni munayku”, nispa.

9, 10. 1) ¿Pikunatataj wasinchejpi alojarisunman? 2) Mana jatun wasiyoj kaspapis, ¿hermanosta alojariyta atisunmachu?

⁹ Hermanosta alojarisunman. Ñaupa tiempopi Diospa kamachisnenqa, wakin visitasta alojarej kanku (Job 31:32; File. 22). Noqanchejpis  congregacionesta waturej hermanosta wasinchejpi alojarisunman. Chantapis alojarillasunmantaj Tantakuna Wasista ruwaysikuspa yanapakoj hermanosta, jinallataj precursorespaj escuelaman jamojkunata. Wakin hermanosqa wasinkuta pierderqanku terremoto kasqanrayku chayri inundaciones kasqanrayku. Paykunatapis alojarillasunmantaj wasinkuta sayarichinankukama. Nitaj yuyanachu jatuchaj wasisniyoj hermanoslla alojayta atisqankuta. Paykunaqa ichapis wasinkupi alojankupuni. Noqanchejpis mana jatun wasiyoj kaspapis, hermanosta alojayta atillasunmantaj.

¹⁰ Uj hermanomanta parlarina. Payqa Corea del Sur nisqa suyumanta. Pay nin: “Hermanosta alojaytaqa mana munallajchu kayku. Imajtinchus chay kutillaraj casarakorqayku. Uj juchʼuy wasipitaj tiyakorqayku. Jinapis ashkha kutispi precursoresta alojasqaykoqa, mayta kallpachawarqayku. Repararqaykutaj Jehová Diosta sirvej, Gobiernontataj ñaupajman churaj qhariwarmisqa, kusisqa kasqankuta”, nispa.

11. ¿Imaraykutaj allin kanman congregacionninchejman jampoj hermanosta wasinchejman wajyarikunanchej?

¹¹ Congregacionninchejman jampoj hermanosta wasinchejman wajyarikuna. Ichá wakin hermanos, precursorespis congregacionninchejman jampunkuman, yanapa necesitakusqanrayku chayri sucursalmanta hermanos kachamusqankurayku. Congregacionninchejman jampoj hermanosqa, maypichus predicanchej chay lugarman, waj hermanosman ima, ichá mana yachaykukuyta atillankumanchu. Ichá parlayninchejtapis mana yachakuyta atillankumanchu. Chayrayku allin kanman paykunata wasinchejman wajyarikunanchej, imitallatapis mikhurikunapaj. Chantapis paykunawan pasearimusunman. Ajinamanta paykunawan sumajta rejsinakusunchej, congregacionninchejmanpis yachaykukuyta atillanqanku.

12. ¿Imatataj yachakusunman uj qhariwarmi misionerosmanta?

¹² Wasinchejman pillatapis wajyarinapajqa, mana wakatapunichu ñakʼana (Lucas 10:41, 42 leey). Imatachus uj hermano nisqanmanta parlarina. Pay nin: “Warmiywan misioneros jina sirviyta qallarishajtiyku, jovenesllaraj karqayku. Wasiykutapis mayta faltacharqayku. Chayrayku uj chʼisi warmiy may llakisqa kasharqa, nitaj sonqochayta atishallarqanichu. Jinallapi las siete y mediata jina, uj estudio punkuykuta takamorqa. Payqa rejsinawaykupaj jamusqa, kinsa naranjastataj aparinpuwasqayku. Wasiman pasaykuchispataj, yakituta qorerqayku. Chantá tecitota, chocolatetawan tomarikorqayku. Chay kutipajqa suajili parlayta niraj yacharqaykuchu, paypis nillataj inglesta yacharqachu. Chayraykutaj astawan kallpachakorqayku chay lugarmanta hermanosta rejsinaykupaj. Ajinamanta may kusisqa karqayku”, nispa.

13. ¿Imajtintaj may sumajpuni hermanosta wasinchejman wajyarikunanchej?

¹³ Wajkunata wasinchejman wajyarikuyta mana manchachikunanchejchu tiyan. Imajtinchus hermanosta wasinchejman wajyarikuspaqa, paykunawan sumajta parlarikunchej, amigos ruwakunchej, nitaj sapayakunchejchu. Chaywanpis wakenqa mana wasinkuman wajyarikuyta atillankuchu. Kunanqa chaymanta astawan parlarina.

14. Hermanosta wajyarikunapaj mana tiempochakushanchejchu chay, ¿imatataj ruwasunman?

¹⁴ Hermanosta wajyarikunapaj tiempochakuna, kallpachakunataj. Jehová Diospa kamachisnenqa may ocupasqa kashanchej, llajtanpi ashkha ruwanasniyoj kasqanchejrayku. Chayrayku hermanosta wasinchejman wajyarikunapaj ichá mana tiempochakuyta atillanchejchu chayri may saykʼusqa kashanchej. Ajinapi rikukushanchej chayqa, allin kanman qhawarikunanchej imasmanchus tiemponchejta churashasqanchejta. Ajinamanta wakin ruwanasta saqespa hermanosninchejta wajyarikuyta atillasun, wajyariwajtinchejpis tiempochakuyta atillasun. Bibliapis niwanchej: “Ama qonqaychejchu wajkunata wasiykichejman wajyarikuyta”, nispa (Heb. 13:2).  Chayrayku hermanosta wasinchejman wajyarikunapajqa, mayta kallpachakunanchej tiyan. Chaypajtaj ichapis wakin imitasta manaña ruwananchejchu kanqa.

15. ¿Imamantataj wakin hermanos pʼenqakunkuman?

¹⁵ Hermanosta wajyarikuyta ama pʼenqakunachu. Ichapis hermanosta wasinchejman wajyarikuyta mana aterqanchejchu manchachikusqanchejrayku chayri imamantachus parlanata mana yachasqanchejrayku. Manachayri ichá pʼenqakorqanchej wajcha kasqanchejrayku mana tukuy imata qoyta atinanchejmanta. Chaywanpis mana chay imasmanta pʼenqakunanchejchu tiyan. Hermanosninchejtaqa wajyarikusunman mana sumaj wasiyoj kaspapis. Imajtinchus wasinchejta llimphituta, kʼuchunchasqatataj japʼejtinchej, visitasninchejqa mana pʼenqakonqankuchu.

16, 17. Hermanosta wasinchejman wajyarikuspa, ¿imasmantataj mana llakikunachu kanman?

¹⁶ Pillatapis wasinchejman wajyarikuspaqa, ichapis imatachus qorinanchejta mana yachaspa anchata llakikusunman. Chaymanta parlaspa Gran Bretaña suyumanta uj anciano, jinata nin: “Invitadosniyta suyashaspaqa, imatachus qorinayta mana yachaspa mayta llakikuni. Chaywanpis hermanoswan cafecituta tomarispa, parlarispataj mayta kusikuni”, nispa. May allinpuni wajkunaj allinninta maskʼayqa (Fili. 2:4). Wakin hermanosqa, experienciasninkumanta parlarispa mayta kallpachanakunku. Noqanchejpis hermanosta wasinchejman wajyarikuspa, experienciasninkuta willarinawanchejta nisunman. Uj ancianopis jinata nin: “Congregacionniymanta hermanosta wasiyman wajyarikunipuni. Imaynatachus Jehová Diosta rejsisqankuta yachaspataj, paykunata aswan sumajta entiendeni, astawantaj rejsini”, nispa. Invitadosninchejwan kʼachas kaspaqa, paykunata kusichisunchej, noqanchejpis kusisqas kasunchej.

¹⁷ Uj precursoramanta parlarina. Payqa precursorespaj escuelaman jamojkunata, wasinpi alojaytapuni yachaj. Pay nin: “Hermanosta alojaytaqa mana munajchu kani. Imajtinchus pʼenqakoj kani, wasiy juchʼuylla kasqanrayku, mesitasniypis, sillitasniypis maukʼasña kasqankurayku. Uj kutitaj, uj hermana mayta kallpachawarqa. Payqa precursorespaj escuelapi yachachejpa señoran karqa. Pay niwarqa: ‘Qosaywan congregacionesta waturikushaspa, wajcha hermanoswan alojakuspaqa, aswan kusisqa kayku. Imaraykuchus paykunaqa, Jehová Diospaj astawan llankʼanankupaj kallpachakunku. Nitaj qhapajyaytachu maskʼanku, manaqa kapusqallankuwan kausakunku’, nispa. Chaytaj yuyarichiwarqa, imatachus mamay niwasqaykuta uñitasllaraj kashajtiyku. Payqa niwaj kayku: ‘Aswan allin munakuypi qʼomerkunata mikhunaqa’”, nispa (Pro. 15:17). Hermanosta alojarinapajqa mana llakikunanchejchu tiyan, wasinchej juchʼuysitu kasqanmanta, chayri maukʼa cosaslla kapuwasqanchejmanta. Imajtinchus aswan allin hermanosta munakusqanchejrayku wasinchejman wajyarikunanchej.

18, 19. ¿Yanapawasunmanchu mana allinta apanakunchej chay hermanota wasinchejman wajyarikuy?

¹⁸ Hermanosta kurajninchejta jina qhawana. Ichapis congregacionninchejmanta uj hermanowan mana allintachu apanakunchej. Sajrita kasqanta yuyasqanchejrayku chayri contranchejpi ima sajratapis ruwasqanrayku. Chayta mana qonqayta atisqanchejraykutaj, ichá payta mana wasinchejman wajyarikuyta munasunmanchu. Chay hermanowan mana allinyakusunchej chayqa, payta chejnikuyta qallarisunman.

¹⁹ Bibliaqa niwanchej wajkunawan kʼachas kaspaqa, enemigosninchejwanpis allinta kausakuyta atisqanchejta (Proverbios 25:21, 22 leey). Mana allinta apanakunchej chay hermanota wasinchejman wajyarikojtinchejqa, paywan allinyakuyta atisun, paymantataj allinta yuyasun. Chantapis reparayta atisunchej, Jehová Diosqa payta kʼacha kasqanrayku llajtanman pusamusqanta (Juan 6:44). Hermanosninchejta munakusqanchejrayku wasinchejman wajyarikusunchej chayqa, paykunawan sumaj amigos kasunchej. Tukuy sonqo hermanosta wasinchejman wajyarikunapajqa, Filipenses 2:3 versiculoj nisqan mayta  yanapawasunman. Chaypi nin: “Astawanqa kʼumuykukoj sonqo kaspa, wajkunata qankunamanta aswan kurajta jina qhawaychej”, nispa. Hermanosninchejta kurajninchejta jina qhawasunchej chayqa, reparayta atisunchej sinchʼi creeyniyoj kasqankuta, llakiypi rikukuspapis sinchʼita sayasqankuta chayri noqanchejmanta nisqa aswan kʼacha kasqankuta. Chaykunata reparaspataj astawan paykunata munakusunchej, wasinchejmanpis wajyarikuyta atillasunchej.

20. Invitawarqanchej chay hermanoman wasinman rinanchejta nerqanchej chay, ¿imajtintaj allin kanman rinanchejpuni?

²⁰ Uj kuti Davidqa, Diosman nerqa: “Pitaj wasiykipi tiyakuyta atinman?”, nispa (Sal. 15:1). Biblia nisqanman jina, Diospa wasinpi tiyakuyta atin, nisqanta juntʼaj runalla, mana allin rejtinpis (Sal. 15:4). Chayrayku uj hermano wasinman wajyarikuwajtinchej rinanchejta nerqanchej chayqa, rinanchejpuni tiyan. Mana rejtinchejqa, chay hermano wasinman wajyarikunawanchejpaj tiempochakusqan, tukuy imatapis ruwasqan qhasilla kanman (Mat. 5:37). Wakin hermanosqa, uj hermano wasinman invitarejtin rinankuta nispañapis, “mana atisajchu” ninku waj hermano wasinman invitasqanrayku. Chaytataj ruwanku aswan sumaj mikhuna kananta yuyasqankurayku. Chayta ruwayqa manapuni allinchu. Imajtinchus wajyarikuwarqanchej chay hermanota, pisipaj qhawashasunman, nitaj munakushasunmanchu. Chayrayku rinanchejta nerqanchej chayqa rinanchejpuni tiyan, imatachus qoriwasqanchejtapis tukuy sonqo japʼikunanchej tiyan (Luc. 10:7). Manapuni riyta atispataj, allin kanman ñaupajmantaña mana riyta atinanchejta willarinanchej. Chayta ruwaspaqa munakusqanchejta, allinninkutataj maskʼasqanchejta rikuchisunchej.

21. ¿Tukuypis kikin costumbresniyojchu kasqanchej?

²¹ Wajyarikuwanchej chay hermanota kusichinapajqa, mayta kallpachakunanchej tiyan. Imaraykuchus mana kikin costumbresniyojchu kanchej. Wakin lugarespeqa mana phiñakunkuchu mana invitasqalla pillapis wasinman chayajtin, wakin lugarespitajrí phiñakunku. Wakin lugarespitaj invitadosmanqa, aswan sumajnin kajta mikhuchinku, wakin lugarespitajrí invitadospis, wajyarikojkunapis kikin mikhunata mikhunku. Wakin lugarespitaj invitadosqa imallatapis aparinkupuni, wakin lugarespitajrí mana. Wakin lugarespitaj mana phiñakunkuchu invitayta munasqan runa, mana atinanta nejtin. Wakin lugarespitajrí “mana atisajchu” nejkunata mana allinpajchu qhawanku.

22. ¿Imaraykutaj hermanosta wasinchejman wajyarikunanchejpuni kasqa?

²² Pedro nerqa: “Tukuy imaj tukukuynenqa qayllaykamunña”, nispa (1 Ped. 4:7). Arí, jatun ñakʼariy tiempoqa aswan qayllapiña kashan. Chay tiempopeqa ni jaykʼaj jina llakiypi rikukusunchej. Chay tiempo chayamunankamaqa, hermanosninchejta tukuy sonqo munakunapaj astawan kallpachakunanchej tiyan. Chayrayku Biblia niwanchej: “Qankunapura wasiykichejman wajyarinakuychej”, nispa (1 Ped. 4:9). Arí, hermanosninchejta wasinchejman wajyarikoyqa may allinpuni.