Jehovaqa “amén” nisqanchejta sumajpaj qhawan
JEHOVÁ DIOSQA payta yupaychasqanchejta jatunpaj qhawan. Payqa sumajta uyariwanchej, manataj qonqanchu jatunchananchejpaj imastachus ruwasqanchejta (Mal. 3:16). “Amén” palabrapi piensarina. Ichapis may chhika kutistaña “amén” ninchej. Jehová Diosninchej, ¿yachanmanchu mashkha kutistachus “amén” nisqanchejta? Arí. Chayrayku “amén” palabrata astawan entiendena. Yachakunataj imaynatachus Bibliapi chay palabrata oqharikusqanta.
ISRAELITAS NENQANKU: “AJINA KACHUN”
“Amén” palabraqa, qhechuapi “ajina kachun” chayri “cheqamanta” niyta munan. “Amén” palabraqa, hebreo parlaymanta jamun. Chaytaj niyta munan, “nisqanchejta juntʼay, atienekunapaj jina kay”. Wakin kutisqa “amén” palabrata oqharej kanku uj juramentota ruwanankupaj. Ñaupa tiempopi, uj runaqa juramentota ruwaytawan “ajina kachun” nej. Chaywantaj mana llullakusqanta, nisqasninmanta cuentata qonanta ima rikuchej (Núm. 5:22). Sichus uj runa imatapis ruwananta niytawan “amén” nej chayqa, chay nisqanta juntʼananpuni karqa (Neh. 5:13).
Deuteronomio libroj 27 capitulonpi, “ajina kachun” palabra ashkha kutista rikhurin. Sumaj jallpʼaman yaykusqankutawan, israelitasqa iskay orqos chaupipi Leyta uyarinankupaj tantakorqanku. Chay orqosqa Ebal, Gerizim nisqa karqanku. Israelitas chaypi kashajtinku, tukuynin Leyta uyarerqanku. Chayta mana kasukojtinku imapichus rikukunankuta nikojtintaj, tukuyninku qhaparerqanku “ajina kachun” nispa (Deu. 27:15-26). Chaypacha may chhika qharis, warmis, wawas ima kasharqanku (Jos. 8:30-35). Paykunaqa chay kutipi imatachus nisqankuta, nichá ni jaykʼaj qonqakorqankuchu. Imajtinchus nisqankuta juntʼarqanku. Biblia nin: “Josué kawsashajtin, israelitasqa kʼachata kawsarqanku Tata Diospa kamachisqanta kasuspapuni, jinallataj tukuy kurajkunanku kawsanankukama. Chay kurajkunaqa Tata Dios imastachus paykunapaj ruwapusqanta allinta yacharqanku”, nispa (Jos. 24:31).
Jesuspis, imatachus nisqan ciertopuni kasqanta rikuchinanpaj, “amén” palabrata oqharerqa. Jinapis payqa uj jinamanta oqharerqa. Parlayta tukuytawan “amén” ninanmantaqa, Jesusqa imatachus nisqanta “amén” palabrawan qallarej. Ajinamanta chay nisqan ciertopuni kasqanta rikuchej. Jesuspa nisqasninpeqa “amén” palabrata, “cheqatapuni” chayri “cheqamantapuni” nispa qhechuapi churakun. Wakin kutitaj Jesusqa “amén” palabrata iskay kutita oqharej (Mat. 5:18; Juan 1:51). Ajinata oqharispaqa, imatachus nisqan cheqamantapis cheqa kasqanta rikuchej. Payqa ajinata niyta aterqa, Jehovaj tukuy nisqan juntʼakunanpaj atiyniyoj kasqanrayku (2 Cor. 1:20; Apo. 3:14).
“TUKUYNIN AYLLU KUTICHERQA: AJINA KACHUN, NISPA. CHANTÁ TATA DIOSTA YUPAYCHARQANKU”
Israelitasqa “amén” palabrata oqharej kanku, Jehovaman takishaspa, paymanta mañakushaspa ima (Neh. 8:6; Sal. 41:13). Uj mañakuyta uyariytawan “amén” nispaqa, paykunapis mañakushankuman jina kaj. “Amén” nisqankoqa, Diosta yupaychayninkuwan ujchasqa kasharqa. Ajina karqa, maypachachus rey David Jehovaj trato ruwasqan arcata Jerusalenman aparqa, chaypacha. Chay kutipeqa uj jatun fiestata Jehovapaj ruwarqanku. Rey Davidtaj uj takiypi tukuy israelitaspaj Jehová Diosmanta mañakorqa (1 Cró. 16:8-36). Chay sumaj mañakuyta uyariytawan, “tukuynin ayllu kuticherqa: Ajina kachun, nispa. Chantá Tata Diosta yupaycharqanku”. Ajinata uj sonqolla nisqankoqa tukuypaj kusiy karqa.
Ñaupa tiempomanta cristianospis, Jehovata jatunchashajtinku “amén” palabrata oqharillajtaj kanku. Bibliata wakin qhelqajkunapis, cartasninkupi “amén” palabrata churarqanku (Rom. 1:25; 16:27; 1 Ped. 4:11). Apocalipsis libro nin, cielopi kausajkunaqa Jehová Diosta “¡Amén! ¡Aleluya!” nispa jatunchasqankuta (Apo. 19:1, 4). Ñaupa cristianospis, tantakuypi uj mañakuyta uyariytawan “amén” nej kanku (1 Cor. 14:16). Jinapis mana qhasitachu chay palabrata oqharej kanku.
¿IMARAYKUTAJ “AMÉN” NINCHEJ?
“Amén” palabrata astawan entiendespa, yachanchej imaraykuchus Diosmanta mañakushaspa “amén” nispa tukuchasqanchejta. Noqanchej orakushaspa “amén” ninchej chayqa, sonqomantapacha chayta nisqanchejta rikuchinchej. Tantakuypi mañakuyta uyariytawan “amén” ninchej chaytaj, sonqollanchejpi chayta nejtinchejpis, chay mañakuypi nikusqanwan de acuerdo kasqanchejta ninchej. ¿Chayraykullachu “amén” ninchej? Chayta qhawarina.
Mañakuykunata sumajta uyarispa, Diosta yupaychanchej. Wajkuna mañakushajtinku, respetowan uyarinanchej tiyan. Ajinallamanta chʼuwa sonqowan “amén” niyta atisun. Jehovataqa mana “amén” nispallachu mañakuypi yupaychanchej, manachayqa chay mañakuyta sumajta uyarispapis.
Hermanoswan aswan ujchasqa kanchej. Tantakuykunapi oracionta ruwakushajtin, tukuyninchej imatachus chay mañakuypi nikusqanta uyarinchej (Hech. 1:14; 12:5). Chay mañakuy tukukusqantawan uj kunkalla “amén” nispataj, hermanospura aswan ujchasqa kanchej. Sonqollanchejpi chayri jatunmantapis “amén” nisqanchejqa, Jehová Dios uyarinawanchejpaj yanapawanchej.
“Amén” nispaqa Jehová Diosta jatunchanchej.
Jehová Diosta jatunchanchej. Diosqa payta yupaychanapaj imallatapis ruwasqanchejta, sumajta yachan (Luc. 21:2, 3). Diosninchejqa yachallantaj imachus sonqonchejpi kasqanta. Tantakuyta telefonollapi uyarisunman chaypis, Jehovaqa “amén” nisqanchejta uyariwanchej. “Amén” nispaqa, congregacionwan khuska payta yupaychanchej.
Yachakunchej jina, “amén” neyqa may sumajpuni. Perspicacia libro nisqanman jina, “amén” nej runaqa “nisqanta juntʼananta nishan, imatachus nikusqanta allinpaj qhawashan, chantá imachus sonqonpi kasqanta rikuchishan”. Chayrayku “amén” nispaqa, Jehovaj sonqonta kusichinchej (Sal. 19:14).
