1. ¿Imatataj Jesús ruwayta atin?

JESUSQA runaspa sonqonkuta sumajta entienden. Kay jallpʼapi kashaspa, payqa ‘kusikojkunawan kusikorqa, waqajkunawantaj waqarqa’ (Rom. 12:15). Uj kuti, Jesuspa 70 discipulosnin predicacionpi sumaj risqanmanta kusisqas kasharqanku. “Chaypacha Jesusqa mayta kusikorqa” (Luc. 10:17-21). Waj kutipitaj, Lázaro wañupusqanmanta runasta “waqajta rikuspa sonqon wawayarqa, sinchʼitataj llakikorqa” (Juan 11:33).

2. ¿Imaraykutaj Jesús runasmanta khuyakorqa?

² Jesusqa mana juchayoj kaspapis, juchasapa runasmanta khuyakorqa, paykunawantaj pacienciakorqa. Ajina karqa runasta munakusqanrayku. Ñaupaj yachaqanapi yachakorqanchej jina, Jesuspa sonqon runasrayku “tʼikarerqa” (Pro. 8:31). Runasta mayta munakusqantaj, paykunata entiendenanpaj tanqarqa. Apóstol Juan Jesusmanta nerqa: “Payqa yachallarqa imachus runaj sonqonpi kasqanta”, nispa (Juan 2:25). Jesusqa runasmanta llakikorqa, khuyakorqataj. Ashkha runastaj Jesús paykunata munakusqanta reparaspa, sumaj willaykunata japʼikorqanku. Jesús jina kanapaj astawan kallpachakusun chayqa, predicacionpi aswan sumaj riwasun (2 Tim. 4:5).

3, 4. 1) ¿Imaraykutaj runasman predicananchej tiyan? 2) ¿Imatá kay yachaqanapi yachakusun?

³ Apóstol Pabloqa, Diosmanta runasman willamunanpuni kasqanta yacharqa. Noqanchejpis predicananchejpuni kasqanta yachallanchejtaj (1 Cor. 9:16). Runasmanta khuyakusun chayqa, mana obligasqa jinachu predicasun. Manachayqa Diosmanta willarisun paykunamanta llakikusqanchejrayku, yanapayta munasqanchejraykutaj. Biblia nin: “Aswan kusiy  wajman qoriy, qorichikunamanta nisqaqa”, nispa (Hech. 20:35). Chay yuyaywan predicasun chayqa, aswan kusiywan runasman willamusun.

⁴ Kay yachaqanapi, predicanchej chay runasmanta khuyakuyta yachakusun. Ñaupajtaqa parlarisun, imatachus Jesús runasmanta yuyasqanta, imatachus paymanta yachakunanchejta ima. Chantá runasta Jesús jina khuyakunapaj, tawa imasta yachakusun (1 Ped. 2:21).

5. ¿Pikunamantataj Jesús khuyakorqa?

⁵ Imaynatachus Jesús runasta khuyakusqanmanta parlarina. Uj pacha, Jesusqa discipulosninwan predicaj risqankumanta saykʼusqas kasharqanku. “Paykunaqa mana mikhunallankupajpis tiempoyojchu karqanku”. Chayrayku Jesús paykunata nerqa: “Jakuchej chʼinnejman, uj chhikallantapis samarikunaykichejpaj”, nispa. Jinapis ashkha runas paykunata qhatirerqanku. Chay runasta rikuspa, ¿imatá Jesús ruwarqa? Paykunata “khuyakorqa * mana michejniyoj ovejas jina kasqankurayku. Chantá paykunaman tukuy imata yachacherqa” (Mar. 6:30-34).

6. Isaías 61:1, 2 nisqanman jina, ¿imaraykutaj Jesús runasmanta khuyakorqa?

⁶ Rikunchej jina, Jesusqa runasmanta khuyakorqa “mana michejniyoj ovejas jina” kasqankurayku. Jesusqa ichapis repararqa, chay runasmanta wakin pobres kasqankuta, familiankuta mikhuchinankupajtaj diantinta trabajasqankuta. Ichá wakenqa familiarninku wañupusqanrayku, phutisqas kasharqanku. Jesustaj chay runaspa llakiyninkuta sumajtachá entienderqa. Yachakorqanchej jina, paypis ichá ajina llakiykunallapitaj rikukorqa. Jesusqa paykunamanta llakikusqanrayku, Diosmanta willaspa sonqocharqa (Isaías 61:1, 2 leey).

7. ¿Imatá Jesusmanta yachakusunman?

 ⁷ ¿Imatá Jesusmanta yachakusunman? Kay tiempopis runasqa, “mana michejniyoj ovejas jina” kashanku, imaymana problemasniyojtaj. Noqanchejtajrí paykunata sumaj willaykunawan sonqochasunman (Apo. 14:6). Chayrayku Yachachejninchej Jesús jina, sumaj willaykunata willamunchej. Chaytataj ruwanchej “llampʼu sonqoyojkunata”, “wajchakunatataj” khuyakusqanchejrayku (Sal. 72:13). Runasta khuyakusqanchejrayku, paykunata yanapayta munanchej.

8. 1) ¿Imatá ruwasunman predicanchej chay runasmanta khuyakunapaj? 2) Predicashaspa, ¿pi jinataj kananchej tiyan?

⁸ Predicanchej chay runasmanta khuyakunapajqa, imatachus piensasqankuta, imaynachus kashasqankutawan reparana. Chantá paykunaj lugarninkupi churakuna, chayman jinataj ruwana * (Mat. 7:12). Chaypaj tawa imasmanta parlarisun. Ñaupajtaqa, imatachus sapa runa necesitasqanpi piensarina. Predicaj rispaqa, sumaj doctor jina kananchej tiyan. Sumaj doctorqa, mana chay ratochu tratamientota qowanchej, manaqa sumajtaraj tapuriwanchej imanchejchus nanawasqanchejta. Chantá uyariwasqanchejtawan, onqoyninchejta taripananpaj analisista ruwachiwanchej. Chaymantaraj tratamientota qowanchej. Noqanchejpis predicashaspa kikillantataj ruwananchej tiyan. Tukuy runasman kikinta predicanamantaqa, sapa runa ima llakiyniyojchus kasqanta, imastachus piensasqantawan reparana. Chantá chayman jina predicana.

9. ¿Imatataj runasmanta mana yachanchejchu?

⁹ Noqanchejqa mana yachanchejchu sapa runa ima llakiyniyojchus kasqanta. Nillataj yachanchejchu imapichus chay runa creesqanta, imaraykutajchus chaypi creesqantapis (Pro. 18:13). Chayta yachanapajqa, sumaj yuyaywan tapurina (Pro. 20:5). Maypichus predicanchej chaypi runas mana phiñakunkuchu chayqa, kay imasmanta tapurisunman: trabajonkumanta, familiankumanta, imatachus piensasqankuta, waj imastawan ima. Ajinamanta paykunallataj willawasun imamantachus yachayta munasqankuta. Chayta yachaspañataj, Jesús jina imamantachus parlarinanchejta yachasun (1 Corintios 9:19-23 kikinchay).

10. 2 Corintios 4:7, 8 nisqanman jina, ¿imataj yanapallawasunmantaj runasmanta khuyakunapaj?

¹⁰ Iskay kaj, runaspa kausayninkupi piensarina. Chayta ruwaspaqa, problemasninkumanta khuyakusun. Imajtinchus noqanchejpis, tukuy runas jinallataj problemasniyoj kanchej (1 Cor. 10:13). Yachanchejtaj kay  tiempopi kausayqa may llakiy kasqanta. Noqanchejqa Jehová Diospa yanapaynillanwan aguantanchej (2 Corintios 4:7, 8 leey). Chayrayku Jehovata mana rejsejkunaj kausayninkoqa, aswan llakiyrajchá. Chaypi piensarispa, Jesús jina paykunamanta khuyakusun, “allin kawsaymanta sumaj” willaytataj willarisun (Isa. 52:7).

11. ¿Imataj hermanonchej Sergeyta runasta khuyakunanpaj yanapasqa?

¹¹ Sergey sutiyoj hermanonchejmanta parlarina. Payqa niraj Jehovata rejsishaspa, manchali kasqanrayku runaswan parlayta manchachikoj. Ajinapi Bibliata estudiayta qallarerqa. Pay nin: “Bibliata estudiashaspa, yachakusqayta wajkunaman willarinaypuni kasqanta yachakorqani. Jinapis ‘ni jaykʼaj chayta ruwayta atiymanchu’ nej kani”, nispa. Chaywanpis hermanonchej Sergeyqa, Diosta mana rejsej runaspa kausayninpi piensarerqa. Pay nin: “Bibliamanta yachakuspa kusisqa karqani, llakiyniytapis qonqaj kani. Yacharqanitaj wajkunapis Diosmanta yachakuyta necesitasqankuta”, nispa. Chaypi piensarispa, hermanonchejqa niña predicayta manchachikorqachu. Pay nin: “Predicacionqa manaña manchali kanaypaj yanapawarqa, Bibliaj yachachiykunasninpis astawan sonqoypi saphichakorqa”, nispa. *

12. ¿Imaraykutaj Bibliamanta yachakojkunawan pacienciakunanchej kasqa?

¹² Kinsa kaj, Bibliamanta yachakojkunawan pacienciakuna. Noqanchejqa Bibliaj wakin yachachiykunasninta sumajta entiendenchej. Jinapis yachachishanchej chay runasqa, ichapis ni jaykʼaj chay yachachiykunata uyarerqankuchu. Ashkha runastaj creenciasninkuman manchay chʼipasqas kashanku. Ichapis chay creenciasninku familiankuman, llajtankuman, chayri maypichus tiyakusqankuman ujchan. ¿Imaynatá paykunata yanaparisunman?

13. ¿Imawantaj runasta yachachisqanchejta kikinchasunman?

 ¹³ Uj mosoj puente ruwakushajtin, runasqa thanta puententa pasankuraj. Chayrayku mana chay ratochu thanta puenteta urmachinku. Jinapis mosoj puente tukukojtenqa, thanta puenteta urmachinku. Ajinallataj runasta yachachiywanpis. Runasman creesqankuta chay rato saqenankuta ninamantaqa, Bibliaj nisqanta jatunpaj qhawanankupaj yanaparina. Bibliaj nisqan sonqonkuman chayajtenqa, ñaupa creenciasninkuta sapitankumanta saqenqanku. Jinapis mana chay ratochu chayta ruwayta atenqanku (Rom. 12:2).

14, 15. ¿Imaynatá estudionchejman paraisomanta entiendechisunman? Uj hermanoj ruwasqanmanta parlariy.

¹⁴ Estudiosninchejwan pacienciakunanchej tiyan. Paykunaqa mana ujllapichu Bibliaj nisqanta entiendenqanku, nitaj chay ratochu japʼikonqanku. Khuyakuyniyoj kaspaqa, Bibliaj nisqanta pacienciawan entiendechisun. Kaypi piensarina: Bibliaqa niwanchej kay jallpʼapi kʼachitu paraisopi wiñaypaj kausakunanchejta. Jinapis ashkhas chayta mana yachankuchu. Yachanku chaytaj tumpallata entiendenku. Wakenqa tukuy ima wañuypi tukukusqanta yuyanku. Wakintajrí kʼacha runas cieloman ripusqankuta creenku. ¿Imaynatá chay runasta yanapasunman?

¹⁵ Uj hermanoj ruwasqanmanta parlarina. Payqa estudiosninta entiendechinanpaj, ñaupajta Génesis 1:28 versiculota leeripoj kasqa. Chantá tapurej kasqa: “¿Maypitaj chantá imaynatataj Diosninchej runas kausakunankuta munasqa?”, nispa. Ashkhastaj nej kasqanku: “Kay jallpʼapi, allintataj kausakunanchejta munasqa”, nispa. Chantá Isaías 55:11 versiculotañataj leeripoj kasqa, tapurejtaj kasqa: “¿Diosninchej munayninta cambiasqachu?”, nispa. Runastaj “mana” nej kasqanku. Tukuchananpajtaj Salmo 37:10, 11 versiculosta leeripoj kasqa, tapurejtaj kasqa: “Biblia nisqanman jina, ¿imaynatataj runas tumpamantawan kausakonqanku?”, nispa. Ajinata yachachispa, hermanonchejqa ashkhasta entiendechin paraíso kay jallpʼapi kananta.

16. Proverbios 3:27 nisqanman jina, ¿imaspitaj runasta yanaparisunman?

¹⁶ Tawa kaj, imaynatachus runasta yanaparinapi piensarina. Ichapis wasiyoj mana allin horapi kashajtinpuni predicaj chayasunman. Jina kajtin, perdonta mañakuytawan waj rato kutinanchejta nisunman. Chayrí uj runa yanaparinata necesitan chayqa, chay rato yanaparina. Ichapis onqosqa chayri viejitoña kasqanrayku, niña wasinmantapis llojsiyta atinchu. Jina kajtin, paykunamanta khuyarikusunman (Proverbios 3:27 leey).

17. ¿Imaynatá uj hermananchej uj señorata khuyakusqa?

¹⁷ Uj hermana imaynatachus uj señorata khuyakusqanmanta parlarina. Hermananchejqa,  chay señoraj qhari wawitan wañupusqanta yachaspa, payman uj cartata apachisqa. Chay cartapitaj, tukuynin familianta sonqochananpaj Bibliamanta wakin versiculosta churapusqa. Chay cartaqa, chay familiata mayta yanapasqa. Señoraqa hermanaman waj cartapi jinata nisqa: “Qaynaqa qʼala llakisqapuni kasharqani. Cartitaykitaj mayta sonqochawarqayku. Anchatapuni agradecekuyki, maytapuni yanapawarqayku. Cartaykita casi 20 kutistapuni leerqani. Chay jina manchay kʼacha palabraswan sonqochawarqayku. Familiantin maytapuni agradecekuyku”, nispa. Llakisqa kajkunamanta khuyakusunchej chayqa, runasta hermananchej jina yanapariyta atisun.

18. 1 Corintios 3:6, 7 nisqanman jina, ¿imaraykutaj mana llakikunanchejchu tiyan runas mana uyariyta munawajtinchej?

¹⁸ Runa masinchejta Jehovata rejsinankupaj yanapajtinchejpis, noqanchejmanta maychus kajllata yuyananchej tiyan. Imaraykuchus Jehová Dios runasta astawan yanapashan (1 Corintios 3:6, 7 leey). Jehová Diosninchej runasta payman pusamun (Juan 6:44). Sapa runataj imayna sonqoyojchus kasqanman jina, ajllanan tiyan sumaj willaykunata japʼikunantachus manachus (Mat. 13:4-8). Chantapis Jesusmanta yuyarikuna. Pay tukuymanta aswan sumaj yachachej kajtinpis, ashkhas paypa willasqanta mana japʼikorqankuchu. Chayrayku mana llakikunanchejchu tiyan, kay tiempopi runas mana uyariyta munawajtinchej.

19. Predicacionpi runasta khuyakojtinchej, ¿imaynataj kasun?

¹⁹ Predicashaspa runasmanta khuyakusun chayqa, aswan sumaj riwasun, aswan kusisqataj predicasun. Runasta yanaparispa sonqo juntʼasqa kasun. “Wiñay kausayta japʼinankupaj” jina kajkunatataj, Diosman chimpanankupaj yanapasun (Hech. 13:48). Chayrayku “atishaspaqa, tukuypaj allin kajta ruwana” (Gál. 6:10). Ajinamanta Diosninchej Jehovata jatunchaspa kusisqa kasun (Mat. 5:16).