Inglés parlaypi 1 de enero de 1918 watamanta La Atalaya revistapi, qallariyninpi jinata nerqa: “¿Imataj 1918 watapi kanqari?”, nispa. Chay wataqa Europapi Primera Guerra Mundialpi manchayta maqanakusharqanku. Chaywanpis chay guerra tukukunanpaj jinaña kasharqa. Chayrayku hermanosninchej jinallataj tukuy runaspis sumaj kausay kananta suyasharqanku. Chay tiempopi hermanosninchejqa, Bibliamanta Yachaqajkuna sutiwan rejsisqa karqanku.

8 de enero de 1918 watapi, Estados Unidosmanta presidente Woodrow Wilsonqa autoridadeswan tantaykukorqa. Chaypitaj 14 imasmanta parlarqa “chʼajwasta chinkachinapaj”. Por ejemplo nerqa, uj suyu waj suyuwan chʼajwasta allinchanankupaj parlaspa uj acuerdoman chayanankuta. Nillarqataj: ‘Allin kanman armasta pisiyachinanchej, tukuy nacionestaj ujchaykukuspa uj organizacionta sayarichinanchej, tukuy nacionesta yanapananpaj’, nispa. Tiemponmantaj chay presidente nisqanman jina ashkha naciones ujchaykukuspa, Sociedad de Naciones nisqa organizacionta sayaricherqanku. Chantapis uj acuerdoman chayarqanku Primera Guerra Mundial tukukunanpaj. Chay acuerdotaj Tratado de Versalles sutikorqa.

Hermanosninchejqa 1917 watapi ashkha llakiykunapi rikukorqanku. * Chaywanpis 1918 watapi tukuy imapis allinyananpaj jina kasharqa. Imajtinchus Centralninchejpi uj sumaj tantakuypi churanakojkunata atipakorqa.

Chay tantakoyqa 5 de enerota ruwakorqa. Chay tantakuy qallarinanpajqa hermano Richard Barber Diosmanta mañakorqa. Chantá willakorqa 1917 watapi imaynatachus predicakusqanmanta. Chaymantataj junta directivata ajllayta qallarerqanku. Barbertaj nerqa: “Allin kanman hermano Joseph Rutherford, kay sojta hermanoswan ima junta directivapi cargoyoj kananku”, nispa. Jinapis Betelmanta ripoj hermanosqa churanakorqanku. Churanakoj partemanta uj abogadotaj nerqa: “Paykunamanta nisqaqa, kay qanchis hermanos cargoyoj kachunku”, nispa. Chay qanchis hermanosqa churanakoj partemanta karqanku. Jinapis Rutherfordta, sojta hermanostawan ajllarqanku.

Chay tantakuypi kaj hermanostaj kusisqas nerqanku: “Kay tantakoyqa allinpuni karqa”, nispa.

Hermanosninchejqa El misterio terminado nisqa librowan mayta predicaj kanku. Ashkha runastaj chay librota leespa Diosmanta yachakorqanku.

Hermanonchej Edwardmanta parlarina. Payqa Canadá suyumanta karqa, congregacionesta waturispataj sirverqa. Pay nerqa: “Uj qhariwarmeqa El misterio terminado nisqa librota phishqa semanaspi leeytawan nerqa: ‘Kaymá verdadqa’, nispa. Chantá bautizakorqanku, sumajtataj ñauparerqanku”, nispa.

Uj runapis El misterio terminado nisqa librota leesqa. Chantá yachakusqanta amigosninman willarisqa. Chay runa imaynatachus Bibliata estudiayta qallarisqanmanta nin: ‘Callepi purishaspa ujllata sienterqani ladrillowan chʼanqaykamuwasqankuta. Pero uj librolla kasqa. Chay libroqa El misterio terminado nisqa libro kasqa. Wasiypitaj enteronta  leerqani. Chantaraj enterakorqani uj pastor rabiamanta chay librota ventananta choqamusqanta. Chay librota choqamusqanraykutaj ashkha runas Diosmanta yachakorqanku. Chay pastorqa manachá yuyallarqapischu chay libromanta may chhika runas yachakunankuta. Walejtachá chay librowan japʼichiwarqa. Kunanqa Diosta yupaychashayku’, nispa.

Ashkha runasqa chay pastor jinallataj El misterio terminado nisqa librota mana rikullaytapis munarqankuchu. Canadá suyumanta autoridadespis kamacherqanku manaña chay librowan predicakunanta. Chayta kamacherqanku 12 de febrero de 1918 watapi. Chay autoridadesqa nerqanku chay libro gobiernoj contranpi parlashasqanta, guerrasmanpis mana rinapaj tanqashasqanta. Pisi tiemponmantaj Estados Unidosmanta autoridadespis manaña saqerqankuchu chay librowan predicakunanta. Chantapis gobiernoqa Betel wasiman, kinsa lugarespi kaj oficinasmanwan policiasta kachaykorqa. Chay policiasqa documentosta maskʼasqanku Diospa llajtanta ñaupajman apajkunata juchachanankupaj. 14 de marzo de 1918 watapitaj, juzgadopi kajkunaqa, nerqanku manaña El misterio terminado nisqa librota apaykachakunanta. Chayta nerqanku chay libro uj leyta pʼakishasqanta yuyasqankurayku, guerrasman rinapaj jarkʼashasqanta nisqankurayku ima.

7 de mayo de 1918 watapi, autoridadesqa uj ordenta orqhospa pusaj hermanosta wisqʼaykucherqanku. Paykunaqa karqanku: Giovanni DeCecca, George Fisher, Alexander Macmillan, Robert Martin, Frederick Robison, Joseph Rutherford, William Van Amburgh, Clayton Woodworth ima. Paykunata wisqʼaykuchinankupaj nisqanku, leyta pʼakisqankuta, sajras kasqankuta, gobiernoj contranpi oqharikusqankuta, mana cuartelman riyta munasqankuta ima. 3 de junio de 1918 watapitaj wisqʼasqa hermanosta juicioman aparqanku. Chay juiciopi hermanosninchejta pierdechinankupaj autoridadesqa sumajtaña yachachinakusqanku.

Estados Unidosmanta fiscal nerqa: “Uj ley nisqanman jina, ni pipis ruwanmanchu gobiernoj contranpi propagandasta. Chay leytataj valechinanchejpuni tiyan”, nispa. Chaywanpis chay leyqa mana jarkʼajchu verdadta parlaj librosta ruwajkunata. Chayrayku hermanosqa chay ley allinchakunanta mañarqanku. Chaywanpis autoridadesqa 16 de mayo de 1918 watapi nerqanku chay ley mana allinchakunanta. Chay kutimanta parlaspa uj documentopi jinata nin: “El misterio terminado nisqa libroqa gobiernoj contranpi parlashan. Chay libroqa manchay peligroso. Imajtinchus soldadosta tanqan mana guerrasman rinankupaj, runastapis tanqan mana cuartelman rinankupaj”, nispa.

20 de junio de 1918 watapi juradosqa nerqanku chay pusaj hermanos juchayoj kasqankuta. Qʼayantenqa juez nerqa: “Kay runasqa Alemania soldadosmanta nisqaqa aswan peligrosos kanku. Chayrayku paykunaqa manchay castigasqas kananku tiyan”, nispa. Chantá iskay semananman pusajnintinta  carcelpi wisqʼaykucherqanku. Wakin hermanosqa 10 wataspaj wisqʼasqas karqanku, wakintaj 20 wataspaj.

1918 watapi policiasqa manchayta hermanosninchejta qhatiykacharqanku. Tukuy ima ruwasqankutataj investigarqanku. Chayrayku policiaspa documentosninkupi nisharqa, hermanosninchej ni jaykʼaj predicayta saqenankuta.

Florida llajtapi correosmanta encargadotaj jinata policiasman nerqa: “Chay hermanosqa chʼisisnin wasimanta wasi runasta visitashanku, chʼajwastataj rikhurichishallankupuni”, nispa.

Hermanonchej Frederick Franzmanta parlarina. Payqa aswan qhepaman Diospa Llajtanta Kamachejkunamanta ujnin karqa. Uj coronelqa paymanta policiasman jinata nisqa: “Frederickqa El misterio terminado nisqa libro vendekunanpaj mayta yanapakusqa”, nispa.

Hermanonchej Charles Fekelmantañataj parlarina. Payqa aswan qhepaman Diospa Llajtanta Kamachejkunamanta ujnin karqa. Autoridadesqa paypa cartasninta qhawaykusqanku, carcelmantaj wisqʼaykuchisqanku El misterio terminado nisqa librowan predicasqanrayku. Paytaqa killatapuni Baltimore llajtapi wisqʼaykusqanku. Nisqankutaj: “Payqa Austriamanta enemigonchej”, nispa. Hermanonchej Charlesqa mana manchachikuspa policiasman Diospa Palabranmanta sutʼinchasqa. Payqa yuyarikusqa apóstol Pabloj nisqanta. Pablo nerqa: “¡Ay noqamanta, manachus sumaj willaykunata willasaj chayqa!”, nispa (1 Cor. 9:16). *

Hermanosninchejqa wasimanta wasi predicashaspa runasta firmacherqanku pusaj hermanosninchejta autoridades carcelmanta kacharipunankupaj. Hermananchej Anna nin: “Hermanosta carcelmanta kacharichinankupaj, wasimanta wasi rerqayku uj documentota firmachispa. Runasmanqa nej kayku, qhasimanta chay pusaj hermanosta wisqʼaykusqankuta”, nispa.

Hermanosninchejqa qhatiykachasqas kaspapis, ashkha asambleasta ruwarqanku, creeyninku sinchʼillapuni kananpaj. Chay watasmanta inglés parlaypi Torremanta Qhawaj revista nisqanman jina, 1918 watapi 40 kurajpuni asambleas ruwakusqa. Chay revistapi nishallarqataj: “Ashkhas cartasta apachimorqanku asambleas ruwakusqanmanta. Pasaj wataspeqa wakin killasllapi asambleas ruwakoj, kunanrí sapa killa ruwakorqa”, nispa.

Llampʼu sonqoyoj runasqa Diosmanta yachakullarqankupuni. Cleveland llajtapi uj asamblea apakushajtin 1.200 tantakorqanku, 42 runastaj bautizakorqanku. Uj jovencitoqa chay asambleapi bautizakusqanmanta maytapuni kusikusqa.

1918 wata tukukuyta hermanosninchejqa, Brooklynpi kaj wakin oficinasta venderparqanku. Centralninchejtataj Pensilvaniapi sayaricherqanku. Diospa llajtanta ñaupajman apajkunataj carcelpi wisqʼasqallapuni kasharqanku. Ajinapis hermanosninchejqa nerqanku centralninchejpi 4 de enero de 1919 watapi uj tantakuy apakunanta.

Hermanosninchejqa predicallarqankupuni. Suyarqankutaj tukuy imapis allinyananta. Chayrayku 1919 watapaj Isaías 54:17 versiculota ajllarqanku. Chay versículo nin: “Mana mayqen arma ruwasqankupis qanta chinkachisunampaj jina kanqachu”, nispa. Chay tiempomanta hermanospajqa uj sumaj cambio kananpajña kasharqa. Chay cambioqa creeyninkuta mayta kallpacharqa.