NOQAQA 1934 watapi nacekorqani. Tatayqa Fred sutikun, mamaytaj Edna. Paykunaqa nacekunaypaj 20 watastaña Jehová Diosta sirvisqanku. Tatasniyman mayta agradecekuni Diosta munakunaypaj yanapawasqankumanta. Noqaykoqa tiyakorqayku Parsons ranchitupi. Chayqa Estados Unidospi kashan. Congregacionniypeqa casi tukuy cieloman ripunankupaj ajllasqa cristianos karqanku. Reunionesman, predicacionmanpis mana faltakuspa rej kayku. Sapa sábado tardetaqa callesta purej runasman predicaj kayku. Wakin kutisqa mayta saykʼoj kayku, jinapis tatay heladosta rantipuwaj kayku.

Congregacionniykupi pisilla kajtiykupis, ashkha comunidadespi, haciendaspi ima predicaj kayku. Haciendayoj runasqa, publicacionesmanta qolqeta qonawaykumantaqa verdurasta, runtusta, wallpasta ima qowaj kayku. Tatayqa chay publicacionesta pagaspaña orqhoj. Chayrayku chay qowasqayku imastaqa mikhukapoj kayku.

Tatasneyqa uj tocadiscota ranterqanku predicanaykupaj. Noqaqa juchʼuyllaraj kasqayrayku mana chay tocadiscowan predicayta atejchu kani. Chaywanpis mayta gustachikoj kani discosta churaspa. Chay discospeqa hermano Rutherfordpa discurson grabasqa kasharqa. Chaytaqa tatasniy churachiwaj kanku revisitasninkuman rispa chayri Bibliata estudiachishaspa.

Tatayqa predicanaykupaj autoykoj techonpi uj jatun parlanteta churarqa. Ashkha runas uj discursota uyarinankupajqa, takiykunataraj tocachej kayku. Chay discurso tukukusqantawantaj, Diosmanta yachakuyta munajkunaman publicacionesta jaywaj kayku.

Uj kutipi uj ranchitumanta policiasqa tatayman nerqanku: “Kay parquepeqa mana grabacionesta tocachiyta atiwajchu. Imajtinchus runasqa domingosta samarikoj jamunku. Chaywanpis kay parquej jawanpi tocachiyta atiwaj”, nispa. Tataytaj chʼinsitumanta policiata kasukuspa autonta parquej jawanpi sayaykucherqa. Grabasqa discursostataj tocacherqa runas uyarinallankupajpuni. Tataywan kuraj hermanoy Jerrywan noqawan ima chay jinasmanta predicaspa mayta gustachikoj kayku.

1939 watapeqa, campañas ruwakorqa mana predicajta saqewarqaykuchu chay lugarespi pisi tiempollapi predicakunanpaj. Uj kutipeqa chaupi tutata rijchʼarerqayku, autopitaj hora y mediatapuni Joplin llajtitaman viajarqayku. Chaypitaj chʼinsitullamanta punku urasman tratadosta saqerqayku. Tratadosta saqeytawantaj sutʼiyay horasta chay llajtaj jawanpi tinkorqayku. Ajinata llajtaj jawanpi tinkoj  kayku yachanaykupaj tukuyniyku kashasqaykuta. Uj hermano faltajtintaj yachaj kayku policías presochasqankuta.

Chay tiempopeqa predicallajtaj kayku letrerosta warkhukuspa. Chay letrerosta warkhukuspa callesninta marchaj kayku. Uj kutipi hermanosqa wasiymanta marchaspa llojserqanku letrerosta warkhukuspa. Chay letrerospi nisharqa: “Religionqa trampa, manakaj engaño”, nispa. Chay letrerowanqa uj kilómetro y mediotapuni marcharqanku, chantá wasiyman kutinporqanku. Runasqa tʼukulla hermanosta marchajta qhawarqanku. Manataj pipis hermanosman churanakorqankuchu.

Familiaywanqa asambleasman rinaykupaj Texas departamentoman viajajpuni kayku. Tatayqa ferrocaril empresapi trabajaj. Chayrayku asambleasman, familiaresniykuta visitanaykupaj ima trenpi gratis viajaj kayku. Mamay partemanta tioy Fredqa señoranwan Texaspi tiyakoj. Tioyqa 1900 watas chaynejta Jehová Diosmanta yachakusqa. Payqa joven kashaspa bautizakusqa, mamayman tiasniymanpis Diosmanta willarisqa. Texasmanta hermanosqa tioy Fredta sumajta rejserqanku. Imaraykuchus tioyqa chay lugarpi congregacionesta waturikuspa sirvisqa. Tioyqa manchay kʼacha karqa, asirichiwajpunitaj kayku. Paymantaqa yachakorqani Jehová Diosta ñaupajmanpuni churana kasqanta.

1941 watapeqa San Luis llajtapi uj jatun asamblea apakorqa. Chay asambleapeqa tukuy wawasta, jovenestawan uj lugarsitupi tiyachiwarqayku hermano Rutherfordpa discursonta uyarinaykupaj. Chay discursoj titulonqa “Hijos del Rey” nisqa karqa. 15 mil kuraj wawaspuni karqayku. Discurso tukukusqantawantaj hermano Rutherfordwan waj hermanospiwan enteroykuman Hijos nisqa librota qowarqayku.

Abril de 1943 watapeqa Kansaspi uj juchʼuy asamblea apakorqa. Chay asambleaqa “Llamada a la Acción” nisqa sutikorqa. Chay asambleapeqa, willakorqa chay kutimantapacha reunionespi Diosmanta Parlayta Yachanapaj tantakuy ruwakunanta. Willakullarqataj reunionespi 52 leccionesniyoj folleto apaykachakunanta. Chay asambleapi bautizakorqani qhasa yakuyoj estanquepi. Chantá killasninman Diosmanta Parlayta Yachanapaj tantakuypi por primera vez parteyta qorqani.

1951 watapi colegiota tukorqani. Piensasharqanitaj imatachus kausayniywan ruwanaypi. Kuraj hermanoy Jerry Betelpi sirvisqanrayku, noqapis Betelman riyta munarqani. Chayrayku Brooklyn Betelman rinaypaj uj solicitudta juntʼacherqani. Pisi tiemponmantaj Betelpi sirvinaypaj wajyawarqanku. Betelpeqa 10 de marzo de 1952 watapi sirviyta qallarerqani. Betelpi sirviyqa, yanapawarqa Diosman astawan qayllaykunaypaj.

 Betelpeqa publicacionesta imprimispa yanapakuyta munarqani. Jinapis ni jaykʼaj publicacionesta imprimispa trabajarqanichu. Imaraykuchus mesero jina yanapakunayta niwarqanku. Chaymantataj waykʼuspa yanapakorqani. Chaykunapi trabajayqa mayta gustawarqa, waykʼuytapis yachakorqani. Cocinapi turnopi trabajasqayrayku, tiempoy tiyapuwaj bibliotecapi Bibliata estudianaypaj. Bibliata estudiasqayqa yanapawarqa Diosman astawan qayllaykunaypaj, creeypi aswan sumaj sayasqa kanaypaj, Betelpi sirvinallaypajpuni ima. Hermanoy Jerryqa 1949 watapi Betelmanta llojsiporqa. Chaymantataj casarakorqa. Hermanoyqa señoranwan Brooklyn llajtapi tiyakorqanku. Paykunaqa mayta yanapawarqanku, kallpachawarqankutaj Betelpi sirviyta qallarishajtiy.

Betelman chayasqaymanta pisi tiemponman hermanosqa, discursantesta ajllasharqanku Betelpa sutinpi discursanankupaj. Noqatapis Betelpa sutinpi discursanaypaj ajllawarqanku. Brooklyn Betelmanta qayllapi kaj congregacionesman rej kani. Chay congregacionespi uj horata discursaj kani, chantá hermanoswan predicaj kani. Ancha kaspa, Betelmantapacha 322 kilometrospi tarikoj congregacionesman riyta atej kani. Por primera vez Betelpa sutinpi congregacionesta visitashaspaqa, kharkaterqani. Chay congregacionesta visitanaypajqa trenpi viajaj kani. Uj domingopi 1954 watapi manchayta ritʼiykamorqa. Noqataj Betelman trenpi kutisharqani. Jinallapi tren sayarparqa, motornin chay jina chiriwan fregakusqanrayku. Chayrayku chay trenpi sutʼiyarqani. Estación de trenmanqa las cinco de la mañanata chayarqani. Waj trenta japʼiytawantaj Betelman tardeta chayarqani. Mala nochesqa kaspapis cheqanta trabajaj rerqani. Chay jinaspi rikukuspapis, mayta kusikoj kani sabadosta chayri domingosta hermanosta kallpacharispa, paykunawan masichakuspa ima.

Chantá Betelpi trabajayta qallarisqaymanta killasninman, radiopi yanapakamunayta niwarqanku. Chay radioqa WBBR sutikorqa, chaytaj uj edificioj iskay kaj pisonpi kasharqa. Sapa semana chay radiopi uj qotu hermanos Bibliata estudiaj kanku, runas uyarinankupaj. Noqataj chay qotu hermanosmanta ujnin karqani. Hermano Macmillanpis chay radiopi yanapakullarqataj. Payqa Betelpi unaytaña sirvisqa. Tukuy jovenespajtaj uj sumaj ejemplo karqa. Payqa ashkha problemaspi rikukuspapis Jehová Diosta sirvillarqapuni.

1958 watapeqa Galaad Escuelamanta graduakojkunata yanapaspañataj trabajarqani. Paykunata yanapaj kani, maymanchá kachasqa karqanku chay suyuman viajanankupaj pasajesta rantispa. Chay suyusman yaykunankupaj documentostapis tramitaysej kani. Chay wataspeqa avionpi viajay valesqa karqa. Chayrayku wakin misioneroslla avionpi viajaj kanku. Africaman chayri Asiaman kachasqa misionerosqa barcospi viajaj kanku. Watasninman misionerosqa avionpi viajayta qallarerqanku pasajes rebajasqanrayku.

1960 watapeqa trabajoy yapakorqa. Imajtinchus 1961 watapaj avionesta alquilanay karqa hermanos asambleasman viajanankupaj. Hermanosqa Estados Unidosmantapacha Europaman viajananku karqa. Imajtinchus Europapi ashkha lugarespi, ashkha asambleas internacionales apakorqa. Noqapis Alemaniaman alquilasqa avionpi viajarqani, asambleaman rinaypaj. Asamblea pasaytataj kinsa betelitaswan uj autota alquilakorqayku. Chay autopeqa Italia Betelman viajarqayku. Chaymantataj Franciaman pasarqayku. Franciamantataj Pirineos nisqa lomasta pasaytawan Españaman chayarqayku. Españapeqa chay watas Diosmanta willay prohibido karqa. Mayta  kusikorqayku Barcelonamanta hermanoswan rejsinakuspa. Paykunamanqa publicacionesta regalosta jina qorqayku. Chaymantataj Amsterdamman viajarqayku. Amsterdammantataj Estados Unidosman avionpi kutiporqayku.

1962 watapitaj 583 hermanosta yanapanay karqa asambleas internacionalesman viajanankupaj. Chay asambleasqa “Buenas Nuevas Eternas” nisqa sutikorqa. Apakorqataj 1963 watapi Europapi, Asiapi, Pacífico sur nisqapi, Hawaipi, Californiapi ima. Chantapis chay hermanosqa pasananku karqa Líbano suyunta Jordania suyuntawan, Bibliapi parlaj lugaresta rejsinankupaj. Chay 583 hermanosta yanaparqayku pasajesta rantipuspa, alojamientosta reservapuspa, waj suyusman yaykunankupaj documentosta tramitaspa ima.

29 de junio de 1963 watapi Lilawan casarakorqani. Payqa Misurimanta karqa, kinsa watastañataj Betelpi sirvisharqa. Casarakusqaykumanta semananmantaj asambleas internacionalesman viajaj hermanoswan khuska viajarqayku. Chayarqayku Greciaman, Egiptoman, Libanoman ima. Libanomantataj avionpi Jordaniaman viajarqayku. Jordaniapeqa Jehovaj testigosnin prohibisqas kasharqanku, chaynejta hermanostapis mana Jordaniaman yaykojta saqesharqankuchu. Chayrayku mana yacharqaykuchu yaykuchinawaykutachus manachus. Jinapis aeropuertoman chayaytawanqa wakin hermanosta rikorqayku jatun letreroyoj suyashawasqaykuta. Chay letreropi nisharqa: “Walejtapuni jamunkichej”, nispa. Maytataj kusikorqani Abrahán, Isaac, Jacob ima tiyakorqanku chay lugaresta rejsispa, Jesuswan apostolesninwan predicarqanku chay lugaresta rejsispa ima. Ñaupa cristianosqa chay lugarespi predicayta qallarisqanku “jallpʼaj kʼuchusninkama” chayanankupaj (Hech. 13:47).

Casarakusqaymanta 55 watasña pasan. Kunankamataj señorayqa tukuy imapi sumajta yanapashallawanpuni. Iskayniyku Españaman Portugalmanwan ashkha kutista viajarqayku chay suyuspi Testigos prohibisqa kashajtinku. Chay kutispi chay suyusmanta hermanosta kallpacharqayku, chantapis publicacionesta waj imastawan apaporqayku. Mana chayllachu, Españapeqa carcelpi kaj hermanostapis visitarqayku. Mayta kusikuni paykunata uj discursowan kallpacharisqaymanta.

1963 watamantapacha asambleas internacionalesman viajaj hermanosta yanaparqani. Chay hermanosqa viajarqanku Africaman, Americaman, Australiaman, Europaman, Hawaiman, Lejano Oriente nisqaman, Nueva Zelandaman, Puerto Ricoman ima. Señoraywanqa ashkha asambleasman rerqayku. Por ejemplo 1989 watapi Poloniapi apakoj asambleaman rerqayku. Chay asambleapeqa Rusiamanta ashkha hermanos kasharqanku. Paykunamanta casi tukuytaj  por primera vez asambleaman jamusqanku. Chay hermanosmanta wakenqa Diosta sirvisqankurayku ashkha watasta carcelpi wisqʼasqa kasqanku.

Chantá asignallawarqankutaj wakin suyusmanta Betel wasista, misionerosta ima visitarispa kallpacharinaypaj. Ultimotaqa Corea del Sur suyuta visitarqayku. Chay suyupeqa Suwon llajtapi 50 hermanos carcelpi kasharqanku. Paykunatataj visitarerqayku. Paykunaqa kusisqas kasharqanku, maytataj munasharqanku carcelmanta kacharichisqa kaytawan Jehová Diosta sirvillaytapuni. Chay hermanosta rejseyqa mayta kallpachawarqayku (Rom. 1:11, 12).

Jehová Diosqa maytapuni llajtanta bendecin. Imajtinchus bautizakusharqani chay wataqa 100 mil willajkuna jinalla karqanchej. Kunantaj 8 millonesmanta astawanña kanchej 240 suyuspi, llajtaspi ima. Diospa llajtan yapakunanpajqa misioneros mayta yanapakorqanku waj suyusman predicaj rispa. May kusisqataj kashani misionerosta yanapasqaymanta. Paykunataqa yanaparqani waj suyuman yaykunankupaj documentosninkuwan.

Mayta kusikuni jovenmantapacha Jehová Diosta sirvisqaymanta, Betelman rinaypaj solicitudta juntʼachisqaymantawan. Jehová Diostaj chaykunata ruwasqaymanta bendecishallawanpuni. Betelpi señoraywan sirvispa may kusisqa kashani. Brooklyn llajtapi ashkha congregacionespi may chhika watasta sirvisqaymantapis kusisqallataj kashani. Chay congregacionesmanta hermanoswanqa sumajta masichakorqayku.

Kunankamaqa señoraywan Betel wasillapipuni sirvishayku. Noqaqa 84 kurajniyojña kani. Betelpitaj correosta entregaspa, apachispataj trabajashani.

Diospa llajtanmanta kayqa, may sumajpuni. Imaraykuchus reparani Malaquías 3:18 versiculopi nisqan juntʼakusqanta. Chaypi nin: “Chaypacha qankuna ujtawan reparankichej pichus cheqan runa, pitajchus mana cheqan runa kasqanta; reparallankichejtaj pichus Diosta yupaychasqanta, pitajchus mana yupaychasqantawan”, nispa. Sapa día kay sajra mundomanta runasqa astawan sajrayashanku, manchay llakisqastaj kashanku. Jehová Diosta sirvejkunarí kay sajra mundopi kausakuspapis kusisqas kashanchej. Imajtinchus yachanchej tumpamantawan Diosninchej sajra runasta chinkachinanta. Maytataj kusikunchej Diospa Gobiernonmanta willayta atisqanchejmanta (Mat. 24:14). Kay sajra mundo chinkajtenqa, sumaj kausay kanqa. Chay día chayamunantataj mayta suyakushanchej. Imajtinchus Jehová Diospa kamachisnenqa manaña onqosunchu, wiñaypajtaj kusisqa kausakusunchej.