1. ¿Imastataj ruwanchej hermanosninchejta munakusqanchejrayku?

DIOSPA kamachisnenqa may rejsisqa kanchej purajmanta munanakusqanchejrayku (1 Juan 4:16, 21). Wakin kutisqa hermanosninchejta munakusqanchejrayku, paykunata yanapanapaj kausayninchejta wañuy pataman churanchej. Tukuy tiempotaj hermanosninchejta munakusqanchejrayku kʼachamanta parlapayanchej, tukuy imaymanamantataj yanapanchej. Hermanosninchejwan kʼachas kaspaqa Jehová Dios jina ruwashanchej (Efe. 5:1).

2. ¿Imatataj Jesús Tatan jinapuni ruwasqa?

² Señorninchej Jesusqa Tatan jinapuni ruwarqa. Jesusqa kʼachamanta, miskʼi simiwan wajkunata parlapayaj. Pay nerqa: ‘Noqaman jamuychej tukuy saykʼusqa kajkuna, llasa qʼepiyojkunapis, noqataj samarichisqaykichej. Noqaqa llampʼu sonqo, kʼumuykukoj sonqotaj kani’, nispa (Mat. 11:28, 29). Jesús jina ruwaspaqa, mana kallpayoj wajchapi yuyasunchej, Diospis allinpaj qhawawasunchej, ajinamantataj kusisqas kasunchej (Sal. 41:1). Qhepan parrafospitaj yachakusunchej  imaynatachus familia ukhupi, congregacionpi, predicacionpipis wajkunaj allinninta maskʼanata.

3. ¿Imaynataj señoranpi yuyaj qosa kasqa? (28 paginapi fotosta qhawariy).

³ Familia ukhupeqa, qosa warminpa allinninta maskʼanan tiyan (Efe. 5:25; 6:4). Bibliapis nin: “Qosas, sapa ujniykichej warmiykichejwan khuska kausakuychej, imaynachus kasqankupi yuyaspa”, nispa (1 Ped. 3:7, notanta qhawariy). Señoranpi yuyaj qosaqa, mana señoranta pisipajchu qhawan, wakin imaspi mana kikinchu kajtinpis (Gén. 2:18). Chantapis señoranta mana kʼumuykachachinchu, astawanpis respetan, llakiynintapis entienden. Canadamanta uj hermana nin: “Qosayqa llakisqa kashajtiy sumajta uyariwan. Manataj niwanchu: ‘Qhasillata llakikushanki’, nispa. Astawanpis kʼachamanta yanapariwan. Pantasqata yuyashajtiytaj munakuywan reparachiwan”, nispa.

4. ¿Imastataj mana ruwananchu kasqa señoranpi yuyaj qosa?

⁴ Señoranpi yuyaj qosaqa, mana waj warmiswan coqueteanchu, nitaj munapayanchu (Job 31:1). Nitaj Internetpipis mensajesnejta wajkunawan coqueteanchu, nillataj Internetpi millay imasta qhawanchu. Jehová Diosta munakusqanrayku, sajra kajtataj chejnisqanrayku warmillanta munakun (Salmo 19:14; 97:10 leey).

5. ¿Imaynataj qosanta respetaj warmi kasqa?

⁵ Uj qosa Jesús jina ruwajtin, señoranqa payman kʼumuykukoj sonqo kayta atillanqa (Efe. 5:22-25, 33). Qosanta respetaj warmeqa, qosan congregacionmanta ruwanasninwan ocupasqa kashajtin chayri congregacionpi problemas kasqanrayku llakisqa kashajtin, mana rabiachinchu, astawanpis kʼachamanta parlapayan. Chaymanta parlaspa Gran Bretañamanta uj hermano nin: “Señorayqa wakin kuti llakisqa kashasqayta reparawan. Llakisqata rikuwaspataj Proverbios 20:5 nisqanman jina imachus llakichishawasqanta rimarichiwan. Wakin kutisqa allinyarinaytaraj suyarin llakiyniymanta tapurinawanpaj. Jinamantataj llakiykunasniyta willarillani, congregacionmanta problemasllata mana willanichu”, nispa.

6. ¿Imaynatataj wawasman yachachisunman wajkunaj allinninkutaraj maskʼananku kasqanta?

⁶ Tatasqa ejemplonkuwan wawasninkuta yachachinkuman. Imajtinchus wajkunaj allinninkuta maskʼajtinku, wawasninkupis wajkunaj allinnillantataj maskʼanqanku. Tatasqa wawasninkuman yachachinallankutaj tiyan wajkunaj allinninkutaraj maskʼayta. Por ejemplo yachachinkuman Tantakuna Wasipi mana correykachanachu kasqanta. Yachachillankumantaj hermanoswan mikhurinapaj tantasqa kashaspa kurajkunaraj sirvikunanku kasqanta. Tukuy hermanospis wawasta yanapallasunmantaj. Uj wawa punkuta kicharipuwajtinchej chayri imallatapis ruwapuwajtinchejqa “allinta ruwanki” nisunman. Ajinamanta chay wawitaqa kusikonqa, reparanqataj wajkunata yanapay allinpuni kasqanta (Hech. 20:35).

7. 1) ¿Imaynatataj Jesús lojtʼitoj allinninta maskʼasqa? 2) ¿Imaynatá Jesús jina ruwasunman?

⁷ Jesús Decápolis nisqa chaynejpi kashajtin, “runasqa uj lojtʼu khaku runata pusamorqanku” (Mar. 7:31-35). “Jesustaj runas chaupimanta chay runata wajnejman pusaspa” sanoyacherqa. Ichapis Jesusqa chay runata wajnejman pusarqa, chay runata mana pʼenqaypi rikhurichinanrayku. Chayqa reparachiwanchej Jesús chay lojtʼitoj allinninta maskʼasqanta. Noqanchejpis Jesús jinallataj wajkunaj allinninta maskʼasunman. Noqanchejqa mana milagrosta ruwaspapis imastachus hermanosninchej necesitasqankupi piensarisunman. Piensarillasunmantaj imaschus llakichisqankupi, imaynasmantachus yanaparinanchejpipis. Apóstol Pablo nerqa: “Ujkuna ujkunataj purajmanta qhawarinakunachej, ajinamanta astawan munakuy kananpaj, allin ruwaykunatataj ruwananchejpaj”, nispa (Heb. 10:24).

8, 9. ¿Imaynasmantataj awelitosta, onqosqastawan yanapasunman?

 ⁸ Awelitospa allinninkuta, onqosqaspa allinninkuta ima maskʼana. Jehovaj testigosnenqa sumaj rejsisqa kanchej purajmanta munanakusqanchejrayku, manataj ruwanasninchejta sumajta juntʼasqanchejraykullachu (Juan 13:34, 35). Chayrayku kuraj hermanitosninchejta, onqosqa hermanitosninchejta ima yanapanchej tantakuykunaman, predicacionman ima pusaspa. Paykunata tukuy sonqo yanapanchej pisillata predicajtinkupis (Mat. 13:23). Hermanonchej Michaelmanta parlarina. Payqa silla de ruedaspi purikun. Maytataj kusikun familiaresnin, congregacionmanta hermanospis yanapasqankumanta. Pay nin: “Familiaresniywan, hermanoswan mayta yanapawasqankurayku, tantakuykunaman, predicacionmanpis mana faltakuspa riyta atillani. Carritoswan predicaytaj mayta gustawan”, nispa.

⁹ Ashkha Betel wasispi kuraj hermanitos, onqosqaspis tiyan. Betelmanta encargadostaj chay hermanosta munakusqankurayku yanapanku cartanejta, telefononejtataj predicanankupaj. Hermanonchej Billmanta parlarina. Payqa 86 watasniyoj, karu lugarespi tiyakoj runasmantaj cartasta apachin. Pay nin: “Kusisqa kashayku cartasnejta predicasqaykumanta”, nispa. Hermananchej Nancytaj casi 90 watasniyoj, pay nin: “Cartasnejta predicayta mana pisipajchu qhawani. Imajtinchus yachani runas chay cartanejta Diosmanta yachakunankuta”, nispa. Hermananchej Ethelqa 97 watasniyoj nintaj: “Tukuy tiempo cuerpoy nanawan. Wakin diasqa ni vistikuytapis atinichu. Jinapis telefononejta predicayqa mayta gustawan, revisitasniypis tiyapuwan”, nispa. Hermananchej Barbaraqa 85 watasniyoj. Pay nin: “Onqosqa kasqayrayku mana predicacionman riyta atillanichu. Pero Diospa yanapayninwan telefononejta predicayta atini”, nispa. Uj qotu machitu hermanosqa casi uj watapi 1.228 horastapuni predicasqanku, 6.265 cartasta qhelqasqanku, 2.000 kuraj runasmantaj telefononejta predicasqanku, 6.315 publicacionestataj runasman saqesqanku. Chayta ruwasqankumanta maytachá Jehová Diosninchej kusikorqa (Pro. 27:11).

10. ¿Imaynatataj tantakuykunaman rispa hermanosninchejpa allinninta maskʼasqanchejta rikuchisunman?

¹⁰ Tantakuykunapi hermanospa allinninkuta maskʼana. Hermanosninchejpa allinninkuta maskʼasunchej chayqa, kallpachakusunchej tantakuykunaman temprano chayanapaj, ajinamantataj hermanosninchejta mana pantachisunchu. Wakin kutisqa ichá imapis atrasachiwasunman. Chaywanpis tantakuykunaman rinapaj qhepa chakisitu kanchej chayqa, allin kanman piensarinanchej imatachus ruwananchejpi manaña atrasakunapaj. Ajinamanta rikuchisunchej hermanosninchejpa allinninkuta maskʼasqanchejta. Chantapis tantakuykunaman Jehová Dios, Jesús ima wajyarikuwasqanchejrayku horanpipuni chayana (Mat. 18:20). Ajinamanta paykunata jatunpaj qhawasqanchejta rikuchisunchej.

11. ¿Imajtintaj tantakuykunapi parteyoj hermanos partenkuta tiemponpipuni tukunanku kasqa?

¹¹ Hermanosninchejpa allinninta maskʼasunchej chayqa, Bibliaj nisqanman jinapuni ruwasunchej. Biblia nin: “Tukuy imata allinta ruwaychej, maychus kananta jinataj”, nispa (1 Cor. 14:40). Hermanospa allinninta maskʼasqanchejta rikuchisunman tantakuykunapi partenchejta tiemponpi tukuspa. Imaraykuchus ajinamanta qhepan parteyoj hermanoqa partenta tiemponpi tukonqa, tantakuypis tiemponpi tukukonqa. Chaytaj may sumajpuni, imaraykuchus wakin hermanosqa ripunankupaj karuta purinanku tiyan. Wakintaj autota japʼinanku tiyan, wakinrí ichapis wasinkuman usqhayllata kutipunanku tiyan qosanku chayri warminku mana Testigo kasqanrayku.

12. ¿Imajtintaj ancianosta munakunanchej respetananchejtaj kasqa? (“ Diospa llajtanta ñaupajman apajkunaj allinninta maskʼana” nisqata qhawariy).

¹² Ancianosqa mayta kallpachakunku congregacionpi,  predicacionpipis llankʼanankupaj. Chayrayku paykunata mayta munakunanchej, respetananchejtaj tiyan (1 Tesalonicenses 5:12, 13 leey). Ancianos yanapawasqanchejmanta may agradecesqas kashanchej. May agradecesqa kasqanchejtataj rikuchinchej paykunata tukuy sonqo kasukuspa. Imaraykuchus Biblia nin: “Paykunaqa allinniykichejpaj qhawashallasunkichejpuni. Chay ruwayninkumantaqa Diosman cuentata qonanku kanqa”, nispa (Heb. 13:7, 17).

13. ¿Imatataj Jesusmanta yachakusunman?

¹³ Profeta Isaiasqa Jesusmanta jinata nerqa: “Lajrasqa soqosota mana pʼakirparenqachu, nitaj ñakʼayllata larwashaj mecherotapis wañuchenqachu. Manachayqa cheqa sonqowan justiciata ruwanqa”, nispa (Isa. 42:3). Lajrasqa soqoso, ñakʼayllata larwashaj mechero imaqa, ninakun manchay phutisqa runaswan. Señorninchej Jesustaj chay jina runasta entiendej. Chayrayku paykunata munakoj, khuyakoj, lugarninkupi churakoj, pacienciawantaj yachachej. Chaynejta wawaspis Jesusman kʼaskakoj kanku (Mar. 10:14). Noqanchejqa mana Jesús jinapunichu runasta entiendesunchej, nitaj pay jinapunichu runasman yachachisunchej. Chaywanpis predicacionpi runaspa lugarninpi churakuyta atisunman. Chayrayku qhawarinachej imaynasmantachus runaspa allinninkuta maskʼayta atisqanchejta.

14. ¿Imaraykutaj runaswan kʼachamanta, respetowantaj parlarinanchej kasqa?

¹⁴ Kʼachamanta munakuywantaj parlarina. Comercianteswan autoridadeswan pastoreswan curaswan imaqa, runasmanta mana  khuyakunkuchu, astawanpis engañanku. Chayrayku may chhika runasqa mitharasqas jina manchay llakisqas kashanku (Mat. 9:36). Nitaj pipipis confiayta atillankuchu, nillataj kay kausay allinyananta suyankuchu. Chayrayku noqanchejqa paykunawan kʼachamanta parlarinanchej tiyan, khuyakunanchejtaj tiyan. Ashkha runasqa kʼachamanta, respetowantaj parlapasqanchejrayku uyariyta munallawanchej, manataj Bibliamanta sumajta sutʼinchasqanchejraykullachu.

15. ¿Imaynamantataj predicacionpi runaspa allinninta maskʼasunman?

¹⁵ Predicacionpi tukuy imaymanasmanta runaspa allinninta maskʼasunman. Por ejemplo, piensarisunman runasta mana pʼenqachinapaj jina tapurinanchejpi. Uj precursormanta parlarina. Pay predicarqa chay lugarmanta runasqa, wajkunawan parlayta manchachikunku. Chayrayku chay precursorqa, repararqa chay lugarmanta runasta mana pʼenqachinanpaj jinachu tapunan kasqanta. Chayrayku payqa runasta mana tapojchu, “¿imataj Diospa sutin?” nispa chayri “¿imataj Diospa Gobiernon?” nispa. Astawanqa jinata nej: “Bibliapeqa Diospa sutinta willashasqa. ¿Chayta willariykimanchu?”, nispa. Mana chay hermanito jinapunichu tukuynejpi predicananchej tiyan, imaraykuchus sapa culturamanta runasqa waj jina kanchej. Chaywanpis yachananchej tiyan imaynatachus lugarninchejmanta runaswan parlayta. Paykunawantaj miskʼi simiwanpuni parlananchej tiyan.

16, 17. 1) ¿Imajtintaj piensarinanchej kasqa ima horastachus runasta visitarinanchejpi? 2) ¿Imajtintaj piensarinanchej kasqa mashkha tiempotachus runaswan parlarinanchejpi?

¹⁶ Piensarina ima horastachus runasta visitarinanchejpi. Wasimanta wasi predicashajtinchej runasqa mana visitananchejta suyashawanchejchu. Chayrayku allin kanman piensarinanchej ima horaschus tiempoyoj kasqankupi, chay horasta wasimanta wasi predicayta qallarinapaj (Mat. 7:12). Ichapis predicanchej chay lugarmanta runasqa sabadosta domingostawan pʼunchaykama puñunkuman. Ajina kajtenqa allin kanman callespi chayri carritoswan predicayta qallarinanchej chayri revisitasninchejman rinanchej, chantaraj wasimanta wasi predicayta qallarisunman.

¹⁷ Piensarina mashkha tiempotachus runaswan parlananchejpi. Runasqa may ocupasqa kashanku. Chayrayku allin kanman paykunawan pisillata parlarinanchej. Unayta parlaykusunman chayqa mana allinchu kanman (1 Cor. 9:20-23). Runaswan pisillata parlaspaqa rikuchinchej allinninkuta maskʼashasqanchejta, ajinamanta runasqa qhepanpi kutejtinchej uyariyta munallawasunchej. Runasta munakuywan, kʼachamanta, pacienciawantaj parlapaspaqa, “Dioswan khuska” llankʼashanchej. Jehová Diostaj yanapawasunchej pillatapis llajtanman pusamunapaj (1 Cor. 3:6, 7, 9).

18. ¿Ima bendicionestataj japʼisunchej wajkunaj allinninkuta maskʼajtinchej?

¹⁸ Tukuy atisqanchejta ruwana familia ukhupi, congregacionpi, predicacionpipis wajkunaj allinninkuta maskʼanapaj chayri wajkunapi yuyanapaj. Ajinamanta kay tiempopi, aswan qhepamanpis ashkha bendicionesta japʼisunchej. Bibliapis niwanchej: “Kusikuyniyojmin mana kallpayoj wajchapi yuyajqa. Tata Diosqa payta libranqa, llakiy pʼunchay chayamojtin. Tata Diosmin paytaqa waqaychanqa; kay pachapi kusiyta, kawsaytataj qospa”, nispa (Sal. 41:1, 2).