‘Sumaq willaykunata willana pʼunchaypi’ ama tiemponchikta usuchinachu

SAMARIA llaqtap punkunpi, tawa runas lepra unquyniyuq mañakusman ni imata qurisqankuchu, niñataq maypipis mañakuyta atirqankuchu. Imaraykuchus Sirios, Samaria llaqtata muyuykusqanku, runastaq chay llaqtapi yarqhaymanta wañuchkarqankuña. Paykunaqa qhasillata yaykunkuman karqa, imaraykuchus mikhunaqa may wicharisqa kachkarqa. Chantapis, chay llaqtapiqa juk runataña mikhuykusqanku (2 Rey. 6:24-29).

Chayrayku chay lepra unquyniyuq runasqa, tutapi Siriospa jarankuman rirqanku. Imaraykuchus paykunapaqqa riptinku mana riptinku kikillan karqa. Chaywanpis, chayanankupaq chʼinlla kachkarqa. Caballospis, burrospis, watasqa kachkarqanku, nitaq juk soldadollapis karqachu. Chayrayku, juk toldo ukhuta qhawaykurqanku, ni pita chaypi rikuspataq, yaykuytawan tukuy imata mikhurarqanku, ukyararqanku ima. Chantapis, qurita, phatata, sumaq pʼachasta ima, rikullarqankutaq. Tukuy atisqankuta urqhuspa pakaykamurqanku, kutirqankutaq astawan apanankupaq. ¡Arí, chay jarapiqa, ni juk soldado siriopis karqachu! ¿Imarayku? Imaraykuchus Jehová, juk jatun ejercitop chʼaqwanta uyarichisqa. Paykunataq, mana wañuyta munaspa tukuy imankuta pachanpi saqispa ayqisqanku.

Lepra unquyniyuq runasqa, tukuy imata apakuchkallarqankupuni, jinallapi Samariamanta runas, yarqhaymanta wañuchkasqantaña yuyarikurqanku, chayraykutaq sunqu yuyayninku (conciencianku) tʼuqsirirqa. Nirqankutaq: “Manasina allintachu ruwashanchej. Kunan pʼunchay sumaj kashan kayta willanapaj”, nispa. Chayrayku, usqhayllata llaqtamanta runasman chay allin willaykunata willamurqanku (2 Rey. 7:1-11).

Ñuqanchikpis, chay leprososjina ‘allin willaykunata willana pʼunchaypi kachkanchik’. ¿Ima willaykunamantá parlachkanchik? Jesús, ‘kay pachap tukukuyninpi señalkunamanta’ parlaytawan, nirqa: “Janaj pacha reinomanta evangelio tukuynejpi willasqa kanqa, tukuy runas yachanankupaj; chaypachamá tukukoyqa jamonqa”, nispa (Mat. 24:3, 14). ¿Imata ruwaymantaq chay nisqan tanqawasunman?

Kawsayninchikpi ruwaykunaqa aswan allin kaqta qunqachiwasunman

Lepra unquyniyuq runas, siriospa jarankupi tukuy imata tarisqankumanta may kusisqas kasqankurayku, Samaria llaqtamanta qunqapurqanku. Paykunaqa, paykunallapi yuyachkarqanku. Ñuqanchikpis, ¿chayjina yuyaypi urmasunmanchu? Jesuspis, tukukuy pʼunchaykunapi “yarqhaykuna” kananmanta parlarqa (Luc. 21:7, 11). Discipulosninman nirqa: “Qhawarikuychej; pajtataj sonqoykichej atipachikunman mikhunawan, machaykuywan, kay pacha ruwanaswan ima” (Luc. 21:34). Chayrayku, kay saqra pachamanta runasjina allinnillanchikta maskʼaypi mana urmanapaq, kay ‘allin willaykunata willanapaq pʼunchaypi’, allinta qhawarikunachik.

Kunanqa Blessing sutiyuq hermanamanta qhawarina, payqa Diospa munayninta ruwayta ñawpaqmanpuni churarqa. Chayrayku, jatun yachaywasipi yachakuchkaspallaraq, precursorajina llamkʼayta qallarirqa. Chaymanta aswan qhipamanqa, Benín suyumanta Betel wasipi llamkʼaq hermanowan casarakurqa, chantá paytapis, chayman waqyarirqanku. Pay nin: “Kunanqa wasista llimphuchaspa llamkʼachkani, chay llamkʼayniytaq mayta kusichiwan”, nispa. Blessingqa, 12 watataña Diospaq juntʼamanta llamkʼachkan,  ajinata ‘allin willaykunata willanapaq pʼunchaypi tiemponta mana usuchisqanmanta,’ payqa mayta kusikun.

Qhasi mana kaq ruwaykuna tiemponchikta usuchinman

Jesusqa, 70 discipulosninta willaq kachachkaspa nirqa: “Cheqamanta cosechanaqa ashkha, oqharejkunatajrí pisilla kanku. Mañakuychej Señormanta aswan ashkha oqharejkunata cosechanman kachamunampaj” (Luc. 10:2). Chakrapi llamkʼaqkuna, mana tiemponpi uqhariptinkuqa, ichapis puquyqa ismuykunman. Kikillantaq kanman willayninchikwanpis, imaptinchus mana willaptinchikqa, achkha runaspa kawsaynin chinkayman rinman. Chayrayku, Jesús nillarqataq: “Ñanta rishaspaqa, ama sayaychejchu runasta napaykunaykichejpaj” (Luc. 10:4). Griego qallupi ‘napaykuy’ rimayqa, mana “imaynalla” chayri “allin pʼunchay” niyllachu. Manaqa, iskay amigos tinkukuspa unayta parlakusqankumanta parlachkan. Discipulosqa, chay willayninkuta usqhayllata willananku kasqanrayku, mana tiemponkuta usuchinankuchu karqa.

Yachanchikjina, televisionqa achkha tiempota qhichuwanchik. Chaywanpis, ¿imatá celularesmanta, computadorasmanta ima, nisunman? Gran Bretaña suyupi 1.000 runasta tapurisqankumanjinaqa, “chay suyumanta runasqa, sapa pʼunchay 88 minutosta telefononiqta parlanku, celularniqtataq 62 minutosta. Computadorapi willaykunatataq, 53 minutosta ñawirinku, celularpi willaykunatataq 22 minutosta”. Tukuy chay tiempota yupaykusunman chayqa, precursor auxiliar machkha horastachus willanan kasqanmanta, iskay jinasmanta astawan tiempota usuchinku. ¡Achkha tiempota chay ruwaykuna qhichuwanchik! Chayrayku tapurikusunman: “¿Machkha unaytataq chaykunata ruwaspa tiempoyta usuchinirí?”, nispa.

Ernst Seliger, warmin Hildegard imaqa, tiemponkuta allinta apaykacharqanku. Paykunataqa, 40 watas kuraqta, nazis, comunistas nisqas ima, wisqʼarqanku, chaywanpis kacharichisqa kaytawan wañupunankukama precursoresjina llamkʼarqanku.

Achkha hermanos paykunawan parlayta munaspa cartasta qillqarqanku, chaywanpis tiemponkuta allinta apaykachayta munasqankurayku, mana chay cartasta ñawirirqankuchu nitaq kutichiykunata qillqarqankuchu. Imaraykuchus paykunaqa, Jehová Diospaq llamkʼayta aswan ñawpaqman churarqanku.

Yachanchikjina familianchikwanqa, parlariyta munanchikpuni. Chaytaq allin. Imaraykuchus sapa pʼunchay llamkʼayninchikpiqa, imallatawanpis ruwanapaq tiempochakunapuni. Chaywanpis, chay ruwaykunaqa, ‘allin willaykunata willanapaq pʼunchayta’ mana qunqachinawanchikchu tiyan.

Allin willaykunata willamunallapuni

‘Allin willaykunata willamunapaq pʼunchaypi’ kawsayqa, may sumaq. Chayrayku, ama saqinachu chay lepra unquyniyuq runastajina, imapis tiemponchikta qhichunawanchikta. Paykunaqa, qhipaman nirqanku: “Manasina allintachu ruwashanchej”, nispa. Chayrayku, mana allinchu kanman Diosmanta runaman willamuna kachkaptin, munaynillanchikta maskʼaspa tiemponchikta usuchiy.

Apóstol Pablo ajinata ruwasqanmanta, sumaqta yachakusunman. Iskay chunka watasta Diospaq llamkʼasqanmanta, ajinata nirqa: “Cristoj evangelionta juntʼachini”, nispa (Rom. 15:19). Arí, Pabloqa, Diosmanta sunqu kʼajaywan willallarqapuni. Ñuqanchikpis, payjina Diospa Reinonmanta sunqu kʼajaywan willamuna, ‘kunan pʼunchay allin willaykunata willamunapaq sumaq kachkaptin’.

[28 paginapi dibujo/foto]

Blessingtaqa, Diospaq juntʼamanta llamkʼananta ni ima jarkʼarqachu

[29 paginapi dibujo/foto]

Seliger hermanosqa, tiemponkuta allinta apaykacharqanku