¿Yachanchikchu imaynatachus Dios yanapawasqanchikta?

ISRAELITAS Egiptomanta lluqsisqankutawan sayachkaq phuyu, tutanpitaq nina kʼanchay paykunawan khuska rirqa. Israelitaswan egipcioswanqa ni jaykʼaq chayta rikurqankuchu. Chayqa ¡tʼukunapaqjinachá karqa! Chaywanpis, ¿maymantá chay rikhurirqa? ¿Imapaqtaq? Chay kasqanmanta 3.500 watasña pasan, ¿imatá israelitas “phuyu ukhumanta, nina kʼanchay ukhumantawan” Jehová yachachisqanta imaynatachus qhawasqankumanta yachakunchik? (Éxo. 14:24.)

Bibliapiqa, imaynatachus chay phuyu, nina kʼanchay ima rikhurisqanta sutʼinchawanchik: “Tata Diosqa paykunaj ñawpaqenta rerqa pʼunchaypi jatun chhoqo phuyu ukhupi paykunata pusaspa, tutantaj nina kʼanchaypi ama ñanta pantanankupaj, chantapis tuta pʼunchay rinankupaj” (Éxo. 13:21, 22). Rikunchikjina Diosqa, israelitasta Egiptomanta lluqsimusqankumantapacha chay phuyuniqta, nina kʼanchayniqta ima pusarqa. Phuyu sapa kuyuriptintaq chʼin pampaniqta mayniqtachus richkasqanta qhatinanku karqa. Chantapis Jehovaqa, israelitaspa qhipankuman phuyuta sayachirqa egipcios mana rikunankupaq, ajinamanta Jehová paykunata jarkʼarqa (Éxo. 14:19, 20). Mana chiqantapunichu riptinpis chaypa qhipanta rispalla, Sumaq Jallpʼaman chayankuman karqa.

Chay phuyu, nina kʼanchay imaqa, Dios paykunawan kachkasqanta rikuchirqa. Chay phuyupi Jehovapis kachkanmanjina karqa, imaraykuchus chayniqta parlaq (Núm. 14:14; Sal. 99:7). Chantapis llaqtanta kamachinanpaq chay phuyuniqta parlaspa Moisesta akllarqa (Éxo. 33:9). Josuetapis Moisespa cuentanmanta llaqtanta kamachinanpaq chayniqllatataq akllarqa, chaymantataq Bibliapiqa manaña chay phuyumanta parlakunchu (Deu. 31:14, 15). Arí, israelitas Egiptomanta allinta lluqsinankupaqqa, Dios imaynatachus yanapachkasqanta yachananku karqa, chaymanjinataq ruwananku karqa.

Chay phuyu, nina kʼanchay ima imapaqchus kasqanta qunqarparirqanku

Israelitasqa, chay phuyuta ñawpaq kutirayku rikuspa, maytachá tʼukurqanku. Chaytaq sapa pʼunchay rikuspapis Jehovapi mana atienekuyta atillarqankuchu. Astawanqa, mana yuyarqankuchu Jehová chayniqta pusachkasqanta. Sutʼincharinapaq, egipcios paykunap qhipanta richkaptinku, Dios salvanantaqa mana creerqankuchu. Astawapis wañurachinankupaq urqhumusqanta yuyaspa, kamachin Moiseswan churanakurqanku (Éxo. 14:10-12). Puka mama quchaniqta pasaytawan mikhunanku, yakunku ima pisiyananta yuyaspa, Moisespaq, Aaronpaq, Jehovapaq ima rimarqanku (Éxo. 15:22-24; 16:1-3; 17:1-3, 7). Semanasninmantaq Aaronta, qurimanta waka uñaman rikchʼakuq lantita ruwananpaq tanqarqanku. Maypichus kachkarqanku chaypi phuyu, nina kʼanchay ima kachkarqa chaytaq Jehová kacharichiqninkujina paykunawan kachkasqanta rikuchirqa. Chaywanpis aswan jaqayniqpiqa, mana kawsayniyuq lantita yupaychachkarqanku, nichkarqankutaq: “Israelitas, kayqa Diosniykichej, pichus Egiptomanta orqhomusorqachej, chay”, nispa. Chayta ruwaspaqa, “millay juchasta ruwasha[rqanku]” (Éxo. 32:4; Neh. 9:18, 19).

Israelitas chayta ruwaspaqa, Jehovap yanapayninta qhisachachkarqanku. Paykunaqa  imaynatachus Jehová yanapachkasqanta mana repararqankuchu. Chay phuyuta, nina kʼanchayta ima rikuspapis Jehová chayniqta yanapachkasqanta qunqapurqanku. Paykunaqa, chayta ruwaspa “Israelpa santo Diosnimpa sonqonta nanacherqanku” chaywanpis Jehovaqa, paykunamanta khuyakurqa, Sumaq Jallpʼaman chayanankukamataq pusallarqapuni (Sal. 78:40-42, 52-54; Neh. 9:18, 19).

¿Yachanchikchu imaynatachus Dios llaqtanta yanapachkasqanta?

Kay tiempopipis Jehovaqa, llaqtanta yanapachkallanpuni. Jehovaqa, israelitasta mana sapallanku chʼin pampata rinankuta saqirqachu, kikillantataq kunanpis musuq pachaman chayananchikpaqqa, mana sapallanchiktachu saqirpariwanchik. Chaypaqqa, Jesucristota qutuchakuypa uman kananpaq akllan (Mat. 23:10; Efe. 5:23). Jesustaq allin yuyayniyuq mayordomoman, nisunman kawsachkaq akllasqa cristianosman yanapananpaq kamachin. Paykunataq qutuchakuykunata qhawanankupaq ancianosta churanku (Mat. 24:45-47; Tito 1:5-9).

¿Imaynatá pichus allin kamachi kasqanta yachasunman? Jesús nirqa: “Pitaj allin yuyayniyoj juntʼaj mayordomo, mayqentachus patronnin churan wasi qhawajta, tiempompi kamachisman mikhuchinampajtaj, chay? Kusikuyniyojmin kanqa jaqay kamachi, pitachus patronnin ajinata ruwashajta taripanqa, chay”, nispa (Luc. 12:42, 43).

Kay akllasqa cristianosqa, allin kasqankuta nisunman, Jehovaman, llaqtanman, Bibliaman ima, juntʼa sunqullapuni kasqankurayku. Chantapis yuyayniyuq, chaytataq “reinomanta” allin willaykunata willakunanpaq, “tukuy laya runasta” yachachikunanpaq ima, allin yuyaywan kamachisqanpi rikukun (Mat. 24:14; 28:19, 20). Chantapis Diosmanta yachachiykunata mikhunatajina “tiempompi” quchkan. Jehovap llaqtanqa, mayta wiñachkan, chaytaq akllasqa cristianosta pay bendecisqanta sutʼi rikuchin. Chantapis llaqtanta imatapis allinta ruwanankupaq yanapan, Bibliap chiqa yachachiykunasninta sutʼita entiendenankupaq yanapallantaq. Chantá enemigosnin llaqtanta mana tukuchinankuta saqinchu, kamachisninmantaq sunqu tiyaykuyninta qun (Isa. 54:17; Fili. 4:7).

Diospa yanapayninta agradecekuna

¿Imaynatá Dios yanapawasqanchikmanta agradecekusunman? Apóstol Pablo nin: “Kurajkunaykichejta kasuychej, paykunaj kamachiynimpitaj kaychej”, nispa (Heb. 13:17). Arí, chayta ruwayqa mana atikullanchu. Sutʼincharinapaq, Moisespa tiemponpi juk israelita kasqaykipi tʼukuriy. Phuyup qhipantataq achkha pʼunchaykunataña richkanki. Jinallamanta phuyuqa sayarparin. Tapurikunkitaq: “¿Machkha tiempotataq kaypi qhipakunqa? ¿Juk pʼunchaytachu? ¿Juk semanatachu? ¿Achkha killastachu? ¿Waliqchu kanman qʼipiyta phaskaranay?”, nispa. Iskaychakuspataq imatachus necesitallasqaykita urqhunki. Chaywanpis chaypi achkha pʼunchaykunataña kachkanki, qʼipiykipi maskʼaytataq saykʼunkiña, chayrayku tukuyninta urqhunki. Qʼipicharakuyta tukusqaykitawan chay phuyu kuyuriyta qallarin, watiqmantataq qʼipichakunayki tiyan. ¡Chaymá uma nanayqa! Chaywanpis tukuywan khuska usqhayllata “purir[inayki]” tiyan (Núm. 9:17-22).

Jehová yanapawaptinchik, ¿yanapachikunchikchu? ¿Usqhayllatachu kasukunchik chayri imaynatachus ruwachkarqanchik jinallatapunichu ruwachkanchik? Imaynatachus Bibliamanta yachachinata, wak qallusta parlaqkunaman willanata, familiapi Diosta yupaychanata, Comités de Enlace con los Hospitales nisqata yanapanata, jatun tantakuykunapi imaynatachus parlanata, ruwanata ima yuyaychawasqanchikta, ¿kasukuchkanchikchu? Chantapis yuyaychariwasqanchikta kasukuspa agradecekusqanchikta rikuchinchik. Chayrayku imatapis akllachkaspa mana  yuyasqallanchikpichu atienekunchik manaqa, Jehovamanta, llaqtanmanta ima yanapayninta maskʼanchik. Imaynatachus juk muyuq wayra kaptin juk yuqallitu jarkʼanankupaq tatasninta maskʼan, ajinallatataq ñuqanchikpi kay pachapi chʼampaykuna kaptin qutuchakuypi jarkʼayta maskʼanchik.

Arí, Diospa llaqtanta kamachiqkunaqa, pantaq runas kanku. Moisespis pantaq runallataq karqa, chaywanpis chay phuyu, nina kʼanchay ima Jehová payta churasqanta, allinta qhawasqantataq sapa kuti yuyarichiq. Chantapis israelitasqa, puririnankupaq “Tata Diospa kamachisqanta juntʼaj kanku, Moisesnejta kamachisqanman jina”, manataq sapallankumantaqa maymanpis riyta atiqchu kanku (Núm. 9:23). Arí, Moiseslla israelitasta maykʼaqchus puririnankuta niyta atirqa.

Kay tiempopipis Jehovaqa, imatachus ruwananchikta allin yuyayniyuq mayordomoniqta niwanchik. Chaypaqtaq Torremanta Qhawaq revistaniqta, Reinomanta Willayninchik hojitaniqta, musuq publicacionesniqta, jatun tantakuykunapi umallirichiykunaniqta ima yanapawanchik. Chantapis qutuchakuykunata waturiqniqta, cartasniqta ima yanapawanchik. Sutichasqa hermanospaqpis achkha yanapas kallantaq.

¿Yachanchikchu kay tiempopi imaynatachus Dios yanapawasqanchikta? Jehovaqa, llaqtanniqta kay saqra pachapi yanapawanchik, chayrayku jarkʼasqas, munakuypi, jukchasqas ima kawsakunchik.

Israelitas Sumaq Jallpʼaman chayasqankutawanqa, Josué nirqa: “Munani tukuy sonqo, tukuy alma reparanaykichejta Tata Diosqa imatachus nerqa qonasuykichejta, chay allin imasta juntʼasqanta. Ni ima nisqampis qhepakunchu mana juntʼakuspaqa”, nispa (Jos. 23:14). Kay tiempomanta Diospa llaqtanpis musuq pachaman chayanqapuni. Chayman kawsayniyuq chayanapaqqa, sapa juk llampʼu sunquwan Diospa yanapayninta japʼikunanchik tiyan. Chayrayku Jehová imaynatachus yanapawasqanchikta yachanapaqqa, mayta kallpachakuna.

[5 paginapi dibujos/fotos]

Jehovaqa kay tiempopi llaqtanniqta yanapawanchik

Musuq publicaciones

Diosmanta Yachachiykuna

Willamunapaq tantakuykunaniqta yachachikun