Familias wakichisqasllapuni kaychik

“Wakichisqa kanaykichej tiyan, imaraykuchus mana yuyasqaykichej horapi Diospa Churenqa jamonqa.” (LUC. 12:40.)

1, 2. ¿Imaraykutaq “wakichisqa kanaykichej tiyan” nisqa yuyaychayta kasukunanchikpuni tiyan?

¿IMATAQ kanqa familianchikmanta “maypachachus Runaj Chur[in] Rey jina jatun kaynimpa kʼanchaynimpi” jamuptin, runastataq “ujkunata ujkunamanta” tʼaqaptin? (Mat. 25:31, 32.) Mana suyachkaptillanchik Jesús jamunanta yachaspa, “wakichisqa kanaykichej tiyan” nisqa yuyaychayta kasukunanchik tiyan (Luc. 12:40).

² Ñawpaq yachaqanapiqa, familia rikchʼarisqallapuni kananpaq, Jehovap kamachisqanta sapa juk juntʼanan kasqanta yachakurqanchik. Kunanqa, familianchik Diosta yupaychanallanpaqpuni imastawanchus sapa juk ruwananchik kasqanta ukhuncharisun.

“Allin” ñawiyuq kana

3, 4. a) ¿Ima tuqllasmantataq familias jarkʼakunanku tiyan? b) ¿Ima niyta munan “allin” ñawiyuq kay?

³ Familianchik Cristo jamunanpaq wakichisqa kananta munanchik chayqa, Jehovata yupaychachkasqanchikta ni ima pantachinawanchikta saqinanchikchu tiyan. Chaypaqtaq allin wakichisqallapuni kananchik tiyan. Qhapaq kayta munayqa achkha familiaspaq  juk tuqllajina. Chayrayku Jesús “allin” ñawiyuq kanamanta yuyaychasqanqa may sumaqpuni (Mateo 6:22, 23 ñawiriy). Juk kʼanchanaqa, ñanta purichkaspa mana urmakunapaq yanapawanchik, ajinallatataq “yuyayni[nchikpa] ñawisnin[qa]” mana ni ima juchaman urmanapaq yanapawanchik (Efe. 1:18).

⁴ Ñawisninchik imatapis sutʼita qhawananpaqqa, sano kanan tiyan. Ajinallataq yuyayninchikpa yuyayninwanpis. Allin ñawiyuq kayqa, imatachus ruwayta munasqanchikta juntʼay niyta munan. Chantapis qhapaqyayllata maskʼanamanta chayri familianchikman tukuy imata quyllapi yuyanamantaqa, Diospaq astawan llamkʼananchik tiyan (Mat. 6:33). Chayqa mana niyta munanchu juk cristiano, familianta uywananpaq mana llamkʼananta. Astawanpis Jehová imatachus quwasqanchikwan kusisqa kawsakunata, Diospa Reinontataq kawsayninchikpi ñawpaqman churanata niyta munan (Heb. 13:5).

5. ¿Imaynatá juk sipas astawan Diospaq llamkʼayta munasqanta rikuchirqa?

⁵ Wawasta allin ñawiyuq kayta yachachiyqa may sumaqpuni. Kayta qhawarina, Etiopía suyumanta juk sipasita yachaywasipi yachakuyta tukuptinkama, sumaq yachakuq kasqanrayku astawan yachakunanpaq juk becata quyta munarqanku. Chaywanpis payqa, precursora kayta munasqanrayku qhisacharqa. Pisi tiemponmantaq juk sumaq llamkʼaypaq wakyarqanku mayqinpichus 4.200 dolaresta sapa killa pagayta munarqanku. Chayqa may sumaq karqa imaraykuchus suyunpiqa mana chayjinata pagaqchu kanku. Chay sipasqa, precursora kayllapipuni yuyasqanrayku qhisachallarqataq. Payqa, chay llamkʼayta qhisachananpaq mana tatasnintaraqchu tapurirqa. Tatasninrí, ¿imatá nirqanku? Paykunaqa, ajinata ruwasqanmanta mayta kusikurqanku.

6, 7. ¿Imaraykutaq allinta “qhawaku[nan]chej” tiyan?

⁶ Jesusqa kay Mateo 6:22, 23 qhapaqyayta munapayaymanta jarkʼakunamanta parlachkarqa, imaraykuchus “mana allin” rimayqa, “saqra” chayri “envidia” niyta munan. ¿Jehovarí imatá kaymanta yuyan? Biblia kutichin: “Qankuna ukhupirí ama kachunchu khuchichakuy, millay kawsay, chayri qhapaj kayta munapayay ima. Chay imasmantaqa ama parlarillaychejpischu”, nispa (Efe. 5:3).

⁷ Wakkuna qhapaqyayta munapayasqankutaqa, reparayta atillanchik, ñuqanchik kikinrí mana reparakuyta atillanchikchu. Chayrayku Jesús yuyaychasqanta kasukuna pay nirqa: “Qhawakuychej tukuy imasta munapayaymanta”, nispa (Luc. 12:15). Chaymanjina ruwanapaqtaq imapichus sunqunchik kasqanta allinta qhawarikunanchik tiyan. Tukuy familias machkha tiempotachus, machkha qullqitachus sunquta kusirichiyman, qhapaqyayta maskʼayman ima churachkasqankuta qhawarikunanku tiyan.

8. Imallatapis rantichkaspa, ¿imaynatá “qhawaku[llasunmanpuni]”?

⁸ Imallatapis niraq rantichkaspaqa, qullqinchik kanchus manachus chayta qhawarikunanchik tiyan. Chantapis mana chayllatachu qhawarikunanchik tiyan. Tapurikuna: “¿Rantisqayta apaykachanaypaq, imanarpakuptin allinchanaypaq tiempoy kanqachu? ¿Machkha tiempopitaq allinta apaykachayta yachasaq?”, nispa. Chantapis wakin waynuchusqa, imatapis rantiyta munanapaq rikhurichisqankuwan mayta tanqachikunku, chayraykutaq tatasninkuta musuq pʼachasta, wak imasta ima rantichikunku. Wayna, qamqa ama chay tuqllapi urmaychu maychus necesitasqallaykita rantichikuy. Kaypi tʼukuriy: ¿Tatasniyki tukuy munasqaykita rantipusunanku kanman chayqa, runap Churin jamunanpaq wakichisqallapunichu kankuman? Jehovap nisqanpi atienekuy, pay nin: “Mana wijchʼurparisqaykichu, nitaj saqerparisqaykichu”, nispa (Heb. 13:5).

 Diospaq astawan llamkʼanapaq kallpachakuna

9. Diospaq astawan llamkʼay, ¿familiasta yanapanchu?

⁹ Chantapis familias, Diospaq astawan llamkʼanankupaq, chaytataq juntʼanankupaq kallpachakuptinkuqa, iñiyninkuta, Diosta yupaychayninkuta ima kallpachankuman. Chayqa Diosta yupaychaypi ñawpaqllamanpuni rinankupaq yanapanqa, chantapis imaspichus astawan llamkʼananku kasqanta reparayta atinqanku (Filipenses 1:10 ñawiriy).

10, 11. ¿Imastataq familiajina Diosta yupaychaypi ruwachkankichikña, imastataq aswan qhipaman ruwawaqchik?

¹⁰ Ima ruwayllapis juntʼayta atinapaqjina, tukuy familia ruwananpaqjinataq kaptinqa, familiata mayta yanapanman. Chaykunamanta jukqa, sapa pʼunchay ukhunchanapaq folletota khuska ukhunchariy kanman. Chay kutispi tataqa, familianmanta sapa juk parlarisqankuta uyarispa, Diosta yupaychaypi ñawparichkasqankutachus manachus reparanqa. Chantapis Diospa Palabranta khuska ñawiriyqa mayta yanapallantaq, ajinamanta wawasqa astawan ñawiriyta, Bibliatapis astawan entiendeyta yachakunqanku (Sal. 1:1, 2). Diosmanta mañakuchkaspaqa, allin kanman sunqunchik ukhumantapacha mañakunanchikpaq kallpachakunanchik. Chantapis espiritup puquyninta wiñachinapaq kallpachakullasunmanpuni (Gál. 5:22, 23). Diosmanta willasqanchik runasmantapis, khuyakuyta yachasunman. Wawasninchiktapis runasta khuyakuyta yachachisunman, ajinamanta paykunapis precursores chayri misioneros kayta munanqanku.

¹¹ ¿Imastawantaq qam familiayki ima ruwawaqchik? ¿Tukuyniykichik familiajina  Diospa Reinonmanta astawan willayta atiwaqchikchu? ¿Telefononiqta, callespi chayri qhatuspi willanaykichikpaq manchachikuyniykichikta atipawaqchikchu? ¿Maypichus pisi willaqkuna kanku chaymanrí ripuyta atiwaqchikchu? ¿Familiaykimanta mayqillanpis wak qalluta parlayta yachakunmanchu chay qalluta parlaqkunaman Bibliamanta yachachinanpaq?

12. ¿Imaynatá tata, familianta Diosta yupaychanallanpaqpuni yanapanman?

¹² Tataqa, familianmanta kaqkuna imaspichus llamkʼananku kasqanta qhawarinan tiyan chaymantataq sapa juk ruwayta atinanpaqjina imallatapis akllanan tiyan (Pro. 13:12). Arí, imallatapis juntʼanapaqqa tiempochakunanchik tiyan. Chayrayku teleta qhawaspa mana tiemponchikta usuchinachu, astawanqa Diosta yupaychanapaq ruwaykunata ruwana (Efe. 5:15, 16). Familias mayta kallpachakuptinkuqa, imatachus ruwayta munasqankuta juntʼayta atinqanku (Gál. 6:9). Ajinamanta familiayki ñawpaqman richkasqanta “tukuy rikun[qanku]” (1 Tim. 4:15).

Familiapi Diosta Yupaychanapaq Chʼisipi tantakuyta ama qunqanachu

13. ¿Imastaq tantakuypi wakjinamanta ruwakun, imastataq allin kanman tapurikunanchik?

¹³ Sapa semana tantakuyninchikpi kay 1 enero 2009 watamantapacha wakjinamanta ruwakusqanqa, familiasta runap Churin jamunanpaq wakichisqas kanankupaq yanapachkan. Libromanta Yachaqanapaq tantakuyqa, juk pʼunchaypi ruwakuq, kunantaq Diosmanta Parlayta Yachanapaq, Willayta Yachanapaq tantakuywan jukllapiña ruwakun. Ajinamanta familiasqa, Jehovaman astawan qayllaykunankupaq sapa semana juk chʼisita tʼaqakuyta atinkuman. Chay ruwakusqanmantaqa iskay wata kuraqña pasan chayrayku allin kanman kayta tapurikunanchik: “¿Chay pʼunchaypi Familiapi Diosta Yupaychanapaq Chʼisita ruwachkanichu chayri sapallaypi Bibliata ukhunchachkanichu? ¿Dios wakichisqanmanjinachu ruwachkani?”, nispa.

14. a) ¿Imapaqtaq Familiapi Diosta Yupaychanapaq Chʼisi, sapallanchikpi Bibliata ukhunchanapaq ima wakichikun? b) ¿Imaraykutaq sapa semana juk chʼisipi Bibliata ukhunchananchik tiyan?

¹⁴ Familiapi Diosta yupaychanapaq chayri sapallanchikpi Bibliata ukhunchanapaq wakichikusqanqa, Diosman astawan qayllaykunanchikpaq yanapawanchik (Sant. 4:8). Sapa semana Bibliata ukhunchaspa, Ruwawaqninchikmanta astawan yachakuspa imaqa, astawan payman qayllaykunchik. Astawan qayllaykuspaqa, tukuy sunqunchikwan, almanchikwan, yuyayninchikwan, kallpanchikwan ima mayta munakusun (Mar. 12:30). Chantapis Jehovata astawan kasukuyta, payjina ruwaytataq munasun (Efe. 5:1). Rikunchikjina sapa semana Familiapi Diosta Yupaychanapaq Chʼisipi tantakuyta ruwananchikpuni tiyan, ajinamanta familianchik “manchay ñakʼariy” pʼunchaypaq wakichisqa kanqa (Mat. 24:21). Arí, kawsanallapaqpuniqa, chayta ruwananchik tiyan.

15. ¿Imaynatá Familiapi Diosta Yupaychanapaq Chʼisi familiata jukchanman?

¹⁵ Chantapis Familiapi Diosta Yupaychanapaq Chʼisiqa, familia jukchasqa kananpaq yanapallantaq. Arí, familiajina sapa semana Diosmanta yachakuspaqa, astawan munanakunchik. Sutʼincharinapaq, qhariwarmikuna Bibliata khuska ñawirispaqa astawan jukchakunku (Eclesiastés 4:12 ñawiriy). Chantapis tatas, wawasninkuwan khuska Jehovata yupaychaptinkuqa astawan jukchakunku, munakuytaq “ujllaman sumajta tukuchin” (Col. 3:14).

16. ¿Imaynatá kimsa hermanasta khuska sapa semana Bibliata ukhunchay yanapan?

¹⁶ Kimsa paya viuda hermanitasmanta parlarinachik. Paykunataqa Diosmanta astawan ukhunchanankupaq juk chʼisita tʼaqakusqanku  mayta yanapan. Kay hermanasqa, mana familiaschu kanku, chaywanpis achkha watasña amigas kanku. Kikin llaqtapi tiyakusqankurayku astawan khuska kayta munarqanku, mana wak imasta ruwanallankupaqchu manaqa Diosmanta yachakunankupaqpis. Chayrayku, Bibliata ukhunchanankupaq juk chʼisipi tantakunankuta nirqanku. Chaypitaq “Testimonio cabal” del Reino de Dios nisqa librota ukhunchayta qallarirqanku. Paykunamanta juknin nin: “Ukhuncharisqaykuqa, may sumaqpuni chayrayku juk hora kuraqta ukhunchariyku. Ñawpa cristianos imaspichus rikukusqankuta rikuchkaykumanpisjina ukhunchariyku, chantapis ñuqayku chayjinapi rikukuspa imatachus ruwanaykumanta ima parlariyku. Chaymantataq yachakusqaykumanjina willaypi ruwanaykupaq kallpachakuyku. Chayrayku willaspa, yachachispa ima mayta kusikuyku, achkha runastataq yanapachkayku”, nispa. Chaytaq Jehovaman qayllaykunankupaq, sumaq amigas kanankupaqtaq yanapan. Kimsantin ninku: “Bibliata ukhunchanaykupaq tantakusqaykuqa may sumaqpuni”, nispa.

17. ¿Imastá Familiapi Diosta Yupaychanapaq Chʼisi sumaqta yanapanawanchikpaq ruwananchik tiyan?

¹⁷ ¿Imaynatá Familiapi Diosta Yupaychanapaq tantakuy chayri sapallanchikpi Bibliata ukhunchay yanapawanchik? Atispalla ruwaptinchikqa, mana yanapawasunmanchu. Chaykunata ruwanapaqqa, mana wak ruwaykuna churanakunanta saqinachu. Tantakuna horastaqa, tukuy wakichisqas kananku tiyan. Chantapis familiata yanapananpaqjina imallatapis ukhunchana. ¿Imaynatá mana saykʼuchinapaqjina kananpaq ruwasunman? Chaypaqqa imachus familianchikta yanapayta atinanpaqjina ruwasunman, ajinamanta familianchikpi sunqu tiyasqas, jatunpaq qhawanakuspataq kawsakusun (Sant. 3:18). *

Rikchʼarisqallapuni “wakichisqa[llapunitaq]” kana

18, 19. ¿Imatá ruwawaqchik qam, familiayki ima runap Churin jamunan pʼunchay may qayllapiña kasqanta yachaspa?

¹⁸ Kay 1914 watamantapacha tukuy saqra ruwaykuna rikukusqanqa, Satanaspa saqra pachan tukukuynin qayllapiña kasqanta rikuchiwanchik. Imaraykuchus Armagedonqa may qayllitapiña kachkan. Runap Churintaq saqra runasta chinkachiq jamunqa (Sal. 37:10; Pro. 2:21, 22). Chayta yachaspa ñuqanchik, familianchik ima, ¿imatá ruwananchik tiyan?

¹⁹ ¿Kasukuchkanchikchu “allin” ñawiwan qhawanamanta Jesús yuyaychasqanta? Kay pachamanta runasqa, may atiyniyuq, riqsisqas, tukuy imayuq kanankupaq ima kallpachakunku, ¿qamrí familiaykiwan imatachus Diospaq ruwanaykichikpaq kallpachakuchkankichu? ¿Familiapi Diosta Yupaychanapaq Chʼisipi chayri sapallaykipi Bibliata ukhunchay yanapachkasunkichu? ¿Familiaykita yanapanaykipaq ruwayta munasqaykita ruwachkankichu? Imaynatachus ñawpaq yachaqanapi yachakurqanchikjina, ¿familiayki rikchʼarisqallapuni kananpaq yanapachkankichu? (1 Tes. 5:6.) Chayta ruwachkanki chayqa, runap Churin jamunanpaq familiayki wakichisqa kachkasqanta rikuchinqa.

[Sutʼinchaynin]

¿Yuyarikunkichu?

• ¿Imaynatá familias wakichisqallapuni kanankupaq kaykuna yanapanqa?

“Allin” ñawiyuq kana.

Diospaq astawan llamkʼanapaq ruwaykunapi yuyana.

Familiapi Diosta Yupaychanapaq Chʼisi tantakuyta sapa kuti ruwana.

[Tapuykuna]

[13 paginapi dibujo/foto]

“Allin” ñawiyuq kayqa, kay pachap ruwanasninta qhisachanapaq yanapawasun