¿Wawasllaraqchu bautizakunankupaq kanku?

FILIPINASMANTA juk tata Carlos * sutiyuq nin: “Ususiy, Jehovap kamachin kasqanmanta mayta kusikuni, paypis kusisqallataq kachkan”, nispa. Greciamanta juk tatapis nillantaq: “Warmiywan ñuqawanqa, kimsa wawasniyku waynuchusllaraq kachkaspa bautizakusqankumanta kusisqas kachkayku. Kunantaq ñawpaqllamanpuni richkanku, Jehovata yupaychasqankumantataq mayta kusikunku”, nispa.

Cristiano tatasqa, wawasninku bautizakuptinku mayta kusikunku, chaywanpis wakin kutisqa iskaychasqajina sientekunku. Juk hermana nin: “Kusisqataq llakisqataq kachkarqani, ruwasqanmanta pay kikinta Jehová cuentata mañananta yachasqayrayku”, nispa.

Tukuy waynas, sipaskuna imaqa bautizakuyta munananku tiyan. Chaywanpis wakin tatasqa ichá yuyankuman: “Wawayqa, ñawpaqllamanpuni richkasqanta reparani chaywanpis khuchichakuyman mana urmananpaq, Jehovap ñawpaqinpi llimphu kawsayniyuq kananpaq ima, ¿wakichisqachu kachkan?”, nispa. Wakin tatastaq tapukunkuman: “¿Waway tukuy sunquchu Diosta yupaychallanqapuni chayri qullqita munapayaymanchu qukunqa? ¿Imataq tatasta yanapanqa wawasninku bautizakunankupaq wakichisqaschus manachus kachkasqankuta yachanankupaq?

Bautizakunapaqqa Cristop discipulon kananku tiyan

Diospa Palabranqa, bautizakunankupaq machkha watayuqchus kananku kasqanta mana ninchu, astawanpis imaynachus Diosta yupaychaypi kananku kasqanta rikuchin. Jesusqa kamachirqa: “Tukuy laya runasta yachachisqasniyman tukuchimuychej, bautizaspa”, nispa (Mat. 28:19, 20). Arí, Cristop discipulosnin kaqkunalla bautizakuyta atinku.

¿Imataq discípulo niyta munan? Perspicacia para comprender las Escrituras nisqa libropi nin: “Chay rimaytaqa, mana Cristopi creeqkunallapaqchu uqharikun, manaqa paypa yachachisqanta ruwaqkunapaq”. ¿Waynuchitullaraq chayri sipasitallaraq kachkaspa Cristop discipulon kayta atisunmanchu? Juk cristiana  Latinoamericapi 40 wata kuraqtaña misionerajina llamkʼaq nin: “[Iskay ñañasniy ñuqa ima] Diosta yupaychayta, wiñaypaq juk Paraisopi kawsayta ima munasqaykuta yachanaykupaq edadniyuqña kasqaykuta yacharqayku. Diosman qukusqaykuqa, sipas kachkaspa mana juchaman urmanaykupaq yanapawarqayku. Sipasitasllaraq kachkaspa Diosman qukuspa bautizakusqaykumantaqa mana pesachikuykuchu”, nispa.

Wawayki Cristop discipulonpuni kasqantaqa, ruwasqasninniqta yachawaq. Bibliapi nin: “Uj wawapis ruwasqasnimpi allinta rejsichikun, sichus llimphuta, cheqantataj kawsan chayqa”, nispa (Pro. 20:11). Chayrayku Cristop discipulonjina ruwachkasqanta yachanaykipaq kaykunata reparanayki tiyan (1 Tim. 4:15).

¿Imataq wawayki Cristop discipulon kasqanta rikuchin?

¿Wawayki kasukunchu? (Col. 3:20.) ¿Wasipi ruwananpaq kamachisqaykita juntʼanchu? Biblia nin Jesusqa 12 watayuq kachkaspa tatasninta kasuspa kawsakusqanta (Luc. 2:51). Mana tukuy wawaschu tukuy imapi kasukunku. Chaywanpis tukuy cristianos Jesusjina “ruwana[nku]” tiyan. Chayrayku bautizakuq wayna chayri sipasqa, qutuchakuypi kasukuq wawajina riqsisqa kanan tiyan (1 Ped. 2:21).

Kay tapuykunapi tʼukuriy: ¿Wawayki willamuspa “Diospa reinonta[chu]” ñawpaqta maskʼachkan? (Mat. 6:33.) ¿Chayri willaq lluqsinanpaq, runaswan parlananpaq ima, maytachu tanqanayki tiyan? ¿Diosmanta willaqjina ruwanasninta juntʼanchu? ¿Yachakuyta munaqkunaman kutinanpaq kallpachakunchu? ¿Yachaywasimanta compañerosninman, profesoresninman ima Jehovamanta sutʼinchaq kasqanta willanchu?

¿Tantakuykunaman rina kasqanta may jatunpaqchu qhawan? (Sal. 122:1.) Torremanta Qhawaq revistamanta yachaqanapaq, Bibliamanta Yachaqanapaq, Diosmanta Parlayta Yachanapaq tantakuykunapi, ¿maytachu kutichiyta munan? (Heb. 10:24, 25.)

¿Yachaywasipi wak lugarespi ima, saqra runaswan masichakuyta qhisachanchu? (Pro. 13:20.) ¿Ima laya takiykunatataq uyarin, telepi ima peliculastataq qhawan, ima videojuegostataq pukllan, internetpipis imastataq qhawan? ¿Parlasqan, ruwasqan ima Bibliap yuyaychasqanmanjinachu?

¿Bibliap yachachisqanta allintachu riqsin? ¿Familiapi Diosta Yupaychanapaq Chʼisipi yachakusqanta parlasqanmanjina sutʼinchayta atinchu? ¿Bibliap yachachisqanta sutʼinchayta atinchu? (Pro. 2:6-9.) ¿Bibliata ñawiriyta, allin kamachi yuyayniyuq publicacionesta urqhusqanta ukhunchariyta ima maytachu munan? (Mat. 24:45.) ¿Bibliap pʼitisninmanta chayri imallatapis yachachisqanmanta tapurikunchu?

Chay tapuykunaqa, Diospa llaqtanpi ñawparichkasqantachus manachus yachanaykipaq  yanapasunqa. Chaykunata ukhunchariytawanqa ichapis wawayki bautizakunanpaq manaraq wakichisqachu kachkasqanta reparanki. Chayri Jehovaman qukuspa, ruwasqasninwantaq Cristop discipulon kasqanta rikuchisqanrayku, bautizakunanpaq wakichisqa kachkasqanta reparanki.

Waynas sipaskuna ima Jehovata yupaychayta atinku

Wakinqa, waynuchitumantapacha chayri aswan ñawpaqta Diosta chiqa sunquwan yupaycharqanku. Sutʼincharinapaq Josepi, Samuelpi, Josiaspi, Jesuspi ima tʼukurina (Gén. 37:2; 39:1-3; 1 Sam. 1:24-28; 2:18-20; 2 Cró. 34:1-3; Luc. 2:42-49). Felipep tawa ususisninpis Diospa Palabranta sutʼinchaq kanku, juchʼuymantapacha Diosmanta yachakusqankurayku (Hech. 21:8, 9).

Greciamanta juk hermano nin: “Chunka iskayniyuq watayuq kachkaspa bautizakusqaymantaqa, ni jaykʼaq pesachikunichu; kunankamaqa 24 watasña pasan, precursor kasqaymantataq 23 watas. Jehovata munakusqay wayna kachkaspa chʼampaykunata atipanaypaq yanapawarqa. Arí, 12 watayuq kachkaspaqa, Bibliamanta mana kunanjinaqa yacharqanichu, chaywanpis Jehovata munakusqayta, munaynintataq wiñaypaq ruwayta munasqayta sutʼita yacharqani. Ñawpaqllamanpuni rinaypaq pay yanapawasqanmanta mayta kusikuni”, nispa.

Cristop discipulon kasqanta rikuchiqqa bautizakunan tiyan. Pablo nirqa: “Runaqa sonqowan creen Diospa ñaupaqempi cheqampaj qhawasqa kanampaj, simiwantajrí sutʼinchan salvasqa kasqanta”, nispa (Rom. 10:10). Wawayki bautizakusqan pʼunchayqa, tukuy familiaykipaq may sumaq kanqa. Chayrayku qamta, wawaykita ima chay kusiymanta ni ima jarkʼasunaykichikta saqiychikchu.

[Sutʼinchaynin]

[5 paginapi recuadro]

¿Imaynatá bautizakuyta qhawanchik?

Wakin tatasqa, wawasninku bautizakusqanku allinninkupaq kasqanta yuyanku, chaywanpis achkha llakiykuna kananta yuyallankutaq. Chaytaq autota apaykachanapaq licenciata urqhuyjina. Chaywanpis, ¿bautizakuy, Diosta yupaychay ima, llakiykunata apamusqantachu Biblia nin? Mana. Proverbios 10:22 sutʼinchan: “Tata Diospa bendicionnenqa qhapajyachin, nitaj ima llakiytapis chay bendición apamunchu”, nispa. Pablopis wayna Timoteoman qillqarqa: “Cheqan kajman jina kawsayniyoj kaspa, sichus pipis kapusqallanwan sonqo juntʼasqa kanman chayqa, cheqa kaj qhapaj kapuyniyoj kanqa”, nispa (1 Tim. 6:6).

Jehovata yupaychaypiqa chʼampaykuna kanqapuni. Profeta Jeremiaspi tʼukurina, payqa, Diosmanta willachkaspa achkha chʼampaykunapi rikukurqa. Chaywanpis, Diosta may kusiywan yupaychallarqapuni, chayrayku qillqarqa: “Parlasqaykita [...] sonqo qhallallay, kusiytaj sonqoy ukhupi kawarqa, imaraykuchus qampatamin kani Tata Dios, Tukuy Atiyniyoj Diosníy”, nispa (Jer. 15:16). Jeremías nirqajina Diosta yupaychaypiqa may kusiyta tarinchik. Satanaspa pachantaq llakiymanta juntʼa kachkan. Tatas, wawasniykichikta chayta reparanankupaq yanapanaykichik tiyan (Jer. 1:19).

 [6 paginapi recuadro, dibujo/foto]

¿Waway bautizakunanpaq suyarikunanraqchu tiyan?

Wakin tatasqa, wawan wakichisqaña kaptinpis bautizakunantaqa mana munankuchu. ¿Imaptin?

“Waway bautizakunantaqa manchachikuni imaptinchus juchallikuptinqa qutuchakuymanta qharquchikunman.” Chaywanpis, ¿mana bautizakusqanraykuchu Dios mana cuentata mañanman? Salomonqa, sapa juk waynaman chayri sipasman nin: “Yachay, chay [tukuy ruwasqaykimanta] Dios cuentata mañasunanta”, nispa (Ecl. 11:9). Pablopis bautizakunapaq machkha watayuqchus kana kasqanta mana nirqachu, astawanpis nirqa: “Sapa ujninchej ruwasqasninchejmanta Diosman cuentata qonanchej kanqa” (Rom. 14:12).

Bautizasqa kaqkuna, mana bautizasqa kaqkunapis ruwasqankumanta cuentata qunanku tiyan. Chaywanpis Jehovaqa kamachisninta jarkʼanqapuni “manataj saqe[nqa]chu mana sayay atinata tanqasqa kana[nku]ta” (1 Cor. 10:13). “Allinta qhawa[kuptinku]”, mana juchallikunankupaq kallpachakuptinkutaq paykunata Dios yanapanqa (1 Ped. 5:6-9). Juk hermana nin: “Bautizakuqkunaqa astawanraq saqra kaqmanta karunchakunku; 15 watasniyuq kachkaspa bautizakuq wawayqa, juk jarkʼayjina kasqanta nin. Pay niwarqa: ‘Jehovata wasanchaypiqa, mana yuyallanchikpischu’, nispa. Arí, bautizasqa kayqa chiqan kawsayniyuq kanapaq yanapawanchik”.

¿Ruwasqaykiwan sumaqtachu wawaykita yachachinki, Jehovata kasukuypis sunqunpichu kachkan? Jina kaptinqa, bautizakuspapis chiqa sunqullapuni kanqa. Proverbios 20:7 nin: “Cheqan runaqa llimphu kawsaypi purin, paypa qhepantataj wawasnin may kusikuyniyoj kanqanku”, nispa.

“Wawayqa, imallatapis ruwayta yachakunantaraq munayman.” Ichapis tataqa, jatun yachaywasimanraq yaykunanta munanman. Yachanchikjina, wawasqa sapallankumanta imatapis ruwanankupaq wakichisqas kananku tiyan. Chaywanpis jatun yachaywasipi yachakunankupaq, allin llamkʼayniyuq kanankupaq imaqa, mana tanqananchikchu tiyan, imaraykuchus chayqa Diosta yupaychaymanta karunchachinman. Jesús nirqajina wakin chʼampaykunaqa, “muju” nisunman Reinomanta willay sunqunchikpi mana wiñananta saqinmanchu. Pay nirqa: “Khishkarara jallpʼa, maymanchus muju tʼakakusqa, chay jallpʼaqa Palabrata uyarejwan ninakun. Jinapis kay pacha imaspi yuyaykuna, qhapajyayta munapayay ima Diospa Palabranta pʼampaykuspa, mana poqojta saqenkuchu”, nispa (Mat. 13:22). Arí, qhapaq kaytaraq maskʼan chayqa, Diosta yupaychayta manaña munanmanchu.

Juk tata, wawanta bautizakunanta qhasillata jarkʼaptinpis, wawanpaq mana allinchu kanman. Watastaña ancianojina kaq hermano nin: “Bautizakunanta jarkʼaspaqa, Diosta yupaychaypi mana ñawpaqllamanpuni rinanpaq yanapanmanchu”, nispa. Qutuchakuykunata waturiq hermano nillantaq: “Bautizakunanta jarkʼaptinkuqa, Diosta yupaychaymanta iskayrayanman chayri pisipaq qhawakunman. Ichapis kay pachamanta runaswan masichakuyta maskʼanman”, nispa.

[Dibujo/foto]

¿Wawayki jatun yachaywasimanraqchu yaykunan tiyan?

[3 paginapi dibujo/foto]

Wakinqa juchʼuyllaraq kachkaspa Cristop discipulon kasqankuta rikuchinku

[3 paginapi dibujos/fotos]

Tantakuykunapaq wakichikunku tapuykunamanpis kutichinku

[4 paginapi dibujo/foto]

Tatasninkuta kasukunku

[4 paginapi dibujo/foto]

Willaq lluqsinku

[4 paginapi dibujo/foto]

Jehovamanta mañakunku