JEHOVÁ Sumaj “Yachachejni[n]chejqa” (Isa. 30:20). Munakuynenqa, wajkunata yachachinanpaj tanqan. Arí, munakuyninrayku “imatachus ruwan, chay tukuyta Churiman rikuchin” (Juan 5:20). Munakuyninraykullataj “Tata Diosqa yachayniyojkunaj parlayninkuta” Testigosninman qowanchej, pikunachus Payta jatunchanapaj, runasta yanapanapaj ima, kallpachakunchej (Isa. 50:4).

Diospa Llajtanta Kamachejkunamanta Yachachinapaj Comisión nisqapis, munakuyraykullataj atejkunata, munajkunata ima, chunka escuelasnejta wakichin. ¿Jehová chay escuelasnejta munakuyninta rikuchisqanta reparankichu?

Diospa llajtanpi ima escuelaschus kasqanta, chay escuelasman rejkuna imatachus nisqankuta ima, kay yachaqanapi leerinaykita munayku. Chantá tapurikuy: “¿Imaynatá Diospa yachachiyninwan yanapachikuyman?”, nispa.

“Munakuyta” qoj Dios yachachiwasqanchejqa, kusisqa willanapaj, kausayninchejpi ima yanapawanchej, chʼampaykunata atipanapajtaj wakichiwanchej (2 Cor. 13:11). Chantapis Jesuspa discipulosnin jina, wajkunata yanapanapaj wakichisqa kanchej, “yachachimu[nchejtaj]” kamachiwasqanchejta kasukunankupaj (Mat. 28:19, 20).

Mana chay tukuynin escuelasman riyta atispapis, ichá ujllamanpis riyta atisunman. Chantapis Bibliaj yachachiykunasninta tukuy japʼinchej, chayman jinataj ruwasunman. Chay escuelasman rejkunawan willaspataj, aswan sumaj willajkuna kasunman.

Chayrayku tapurikuy: “¿Chay escuelasmanta mayqellanmanpis riyta atiymanchu?”, nispa.

Jehovaj kamachisnenqa chay escuelasman riyta, chaypi yachakuyta ima sumajpaj qhawanchej. Chaypi yachachikusqan, Diosman qayllaykuchisunanta munayku. Chantapis Diosta yupaychaypi ruwanasniykita juntʼanaykipaj, astawanpis sumaj willaykunata willanaykipaj wakichisunanta.