KAY 1923 watapi George Naish, 18 metrosniyoj kʼaspista sukʼasqata rikuspa jinata taporqa: “¿Imapajtaj chaykunari?”, nispa. Chayta taporqa Canadá suyoj Saskatchewan nisqa provincianmanta Saskatoon nisqa llajtanpi kashaspa. Chay kʼaspiswanqa ñaupaj kaj guerra mundialpi torrresta jina sayachikusqa. Aswan qhepaman, hermano George nerqa: “Chay kʼaspiswan radio antenasta sayachiyta atinaykuta yuyarqani, ajinamanta Diosmanta yachachikunanpaj radio ruwakunanta yuyakorqa”, nispa. Watanmantaj CHUC nisqa radio uyarikuyta qallarerqaña. Chay radiotaj, Canadá suyupi religionmanta parlaj ñaupaj kaj radios rikhurisqanmanta ujnin karqa.

Canadá suyoqa may jatun kasqanrayku, radionejta willakunanpaj may sumaj karqa. Florence Johnson, pichus Saskatoon llajtapi radiopi llankʼarqa, jinata nerqa: “Cheqa yachachiykunaqa radionejta may chhika runasman chayarqa, pikunamanchus mana noqayku chayayta atiykumanchu karqa. Runasqa chay tiempollapiraj radio rikhurishasqanrayku, tukuy ima tocachikusqanta uyariyta munaj kanku”, nispa. Bibliamanta Yachaqajkunaqa, nisunman Jehovaj testigosnin, 1926 watapaj, Canadá suyumanta tawa llajtaspiña radionkuta uyarichisharqanku. *

¿Imastataj radionejta tocachej kanku? Chay llajtapi qotuchakuymanta hermanos, tocajkunawan khuska takisqankuta, umallirichiykunata, Bibliamantataj parlaj kanku. Amy Jones, pichus radiopi parlaj yuyarikuspa nerqa: “Willashajteyqa pichus kasqayta nejtiy, wasiyojkuna wakin kuti jinata niwaj kanku, ‘¡ah qanchu kanki! Radiopi uyarerqayki’”, nispa.

Nueva Escocia nisqa provinciamanta Halifax llajtitapi Bibliamanta Yachaqajkunaqa uyarejkunata Bibliamanta imatapis tapunankupaj radioman wajyanankuta nikoj, chaytataj paykunallaraj ruwarqanku. Uj hermano qhelqarqa: “Ajinata ruwasqaykoqa runaspaj may sumaj karqa. May chhika runas wajyamusqankurayku niña kutichiytapis atejchu kayku”, nispa.

 Chaywanpis, apóstol Pablota jina, mana tukuy runaschu Bibliamanta Yachaqajkunata allinta uyarerqanku (Hech. 17:1-5). Wakinpajqa, radiopi uyarisqanku sumaj karqa. Sutʼincharinapaj, Estudios de las Escrituras nisqa libromanta radiopi parlajta uyarispa, Hector Marshall chay libromanta sojta laya librosta mañakorqa. Aswan qhepamantaj qhelqarqa: “Chay libros iglesiaypi yachachinaypaj yanapanawanta yuyarqani”, nispa. Chaywanpis, ñaupaj kaj librota leeyta tukuytawan iglesianmanta llojsiporqa. Chantataj sonqo kʼajaywan Diosmanta willarqa, 1998 watapi wañupunankamataj cheqa sonqowan Jehovata sirverqa. Nueva Escociaj ujnin llajtanpi, Coronel J. A. MacDonald sutiyoj “El Reino, la esperanza del mundo” nisqa umallirichiyta uyarerqa. Qʼayantintaj, chay lugarmanta uj hermanoman nerqa: “Cabo Bretón churumanta runasqa ni jaykʼaj jina aswan sumaj willaykunata uyarinku”, nispa.

Religionta kamachejkunataj, phiñasqa kasharqanku. Wakin catolicosqa, Halifax llajtapi Bibliamanta Yachaqajkunaj radionkuta chinkachiyta munarqanku. Gobiernoqa 1928 watapi, iglesiata kamachejkuna nisqankurayku, Bibliamanta Yachaqajkunaman radionkuta tocachinankupaj niña permisota qonanta nerqa. Hermanostaj, gobierno ruwayta munasqan mana allinchu kasqanta rikuchinankupaj, inglespi ¿Pitaj wayra simimanta dueñorí? nisqa papelta runasman jaywarqanku. Chaywanpis, gobiernoqa Bibliamanta Yachaqajkunaj radio tocachina permisonkuta, nipuni watejmanta qorqachu.

¿Niñachu chayrayku Jehovaj kamachisnin sonqo kʼajaywan willarqanku? Isabel Wainwright nerqa: “Qallariypeqa contranchejpi churanakoj atipasqanman rijchʼakorqa. Chaywanpis, Jehová radionejllatapuni willanaykuta munanman karqa chayqa, nichá chayta saqenmanchu karqa. Chayrayku, waj jinamantañataj Reinomanta sumaj willaykunata willanayku kasqanta repararqayku”, nispa. Canadapi Bibliamanta Yachaqajkunaqa, radionejllata willanankuta yuyanankumanta, paykuna kikin runasta wasinkupi visitarqanku. Chaywanpis jaqay tiempopeqa, “ni jaykʼaj jina aswan sumaj willaykunata” radionejta uyarikorqa. (Canadapi Waqaychakusqanmanta.)