1. ¿Imaraykutaj evangeliota willajkunamanta ñaupaj kaj Jehová kasqanta nisunman?

EVANGELIOTA willarajqa sumaj willaykunata willan. Chaytaqa Jehová ruwayta qallarerqa, imajtinchus ñaupa tatasninchej juchallikusqankutawan Satanás chinkachisqa kananta nerqa, chaytaj sumaj willay karqa (Gén. 3:15). Watas pasasqanman jinataj, cheqa sonqo runaswan qhelqacherqa imaynatachus sutinta llimphuchananta, Satanás ñakʼariykunata rikhurichisqanta allinchananta, chantá imaynatachus runas wiñay kausayta tarinankuta, mayqentachus Adanwan Evawan chinkacherqanku.

2. 1) ¿Imaynamantataj ángeles evangeliota willarajkuna kanku? 2) ¿Imatataj Jesús yachachiwarqanchej?

² Angelespis evangeliota willarajkunallataj kanku. Imajtinchus sumaj willaykunata willanku, Diospa kamachisnintataj kikinta ruwanankupaj yanapanku (Luc. 1:19; 2:10; Hech. 8:26, 27, 35; Apo. 14:6). Arcángel Miguelpis nisunman Jesuspis, Jallpʼaman jamuspa evangeliota willayta kausayninpi ñaupajman churarqa. Ajinamanta kikinta ruwananchejta yachachiwarqanchej (Luc. 4:16-21).

3. 1) ¿Ima sumaj willaykunatataj willanchej? 2) ¿Ima tapuykunatataj ukhunchasunchej?

³ Jesusqa yachachisqasninta evangeliota willanankuta kamacherqa (Mat. 28:19, 20; Hech. 1:8). Apóstol Pablopis Timoteoman kayta nerqa: “Evangeliota willaraypuni. Imachus ruwanaykita allinta juntʼay”, nispa (2 Tim. 4:5). ¿Ima sumaj willaykunatataj willanchej? Ujnenqa Tatanchej Jehová munakuwasqanchejmanta (Juan 3:16; 1 Ped. 5:7). Munakuynintataj Reinonta sayarichisqanpi rikuchiwanchej. Yachanchej jina, Reinonpa kamachiyninpi kajkuna, Payta kasukojkuna, cheqan kajtataj ruwajkuna Jehovawan masichakuyta atinku. Chayrayku runa masinchejman chaymanta willanchej (Sal. 15:1, 2). Astawanpis,  Jehovaqa tukuy ñakʼariykunata chinkachinanta, llakiy yuyaykunapis manaña yuyarisqachu kananta nin. ¡Chaymá sumaj willaykunaqa! (Isa. 65:17.) Kunanqa evangeliota willarajkuna kasqanchejrayku, iskay tapuykunata ukhuncharina: 1) ¿Imaraykutaj runas sumaj willaykunata kay tiempopi uyarinanku tiyan? 2) ¿Imaynatataj willayninchejta sumajta juntʼasunman?

4. ¿Ima llullastataj Diosmanta yachachikun?

⁴ Kaypi tʼukuriy: uj runaqa qantawan familiaykitawan tatayki saqerparisusqaykichejta nin. Chantapis mana qayllay atina kasqanta, mana qanmanta llakikusqanta, sajrataj kasqanta nisunki. Tataykita rejsiyta munaypis qhasilla kasqanta, imajtinchus wañupusqantaña nisunki. Ashkha runasqa, chay jina llullasta Diosmanta parlanku. Astawanpis mana rejsiy atina, sajrataj kasqanta ninku. Sutʼincharinapaj, religionta kamachejkunamanta wakenqa sajra runasta wajnejpi Dios mayta ñakʼarichisqanta yachachinku. Wakintaj ñakʼariykuna, jatuchaj llakiykuna ima kasqanmanta Diosta juchachanku. Chay jatun llakiykunapi kʼacha runaspis sajra runaspis kikillanta wañojtinkupis Dios castigasqanta ninku.

5, 6. ¿Imaynapitaj runas rikukunku tukuy imapis jinallamanta rikhurisqanta yachachikusqanrayku, religiones llullasta yachachisqankurayku ima?

⁵ Wakin runastaj Dios mana kasqanta ninku. Astawanqa tukuy imapis jinallamanta rikhurisqanta yachachinku. Chayraykutaj, mana Dioschu ruwawasqanchejta yuyanku. Chantapis wakenqa animalmanta jamusqanchejta ninku, chayraykutaj wakin kuteqa imatapis animal jina ruwasqanchejta. Paykunaqa atiyniyojkuna wajkunata ñakʼarichisqanku, ajinapuni kanan kasqanta ninku. Sajra ruwaykuna ni jaykʼaj chinkananta yuyasqankupis mana tʼukunapajchu. Chayrayku runas jinallamanta jamusqanchejta creejkunaqa ni ima suyakuyniyoj kanku.

⁶ Arí, tukuy imapis jinallamanta rikhurisqanta yachachikusqanrayku, religiones llullasta yachachisqankurayku ima, kay qhepa pʼunchaykunapi astawan ñakʼariykuna yapakushan (Rom. 1:28-31; 2 Tim. 3:1-5). Chay yachachiykunataj mana sumaj willaykunachu. Astawanqa apóstol Pablo nisqanman jina paykunaqa runasta yuyayninku laqhayasqata saqenku, Diospi kaj kausaymantataj karunchanku (Efe. 4:17-19). Chantapis runas jinallamanta rikhurisqanchejta, waj llulla imastawan yachachisqanku Diospa sumaj willaykunasninmanta jarkʼan (Efesios 2:11-14 leey).

7, 8. ¿Imaynallamantataj runas sumaj willaykunata entiendeyta atinkuman?

⁷ Runasqa Jehovawan masichakuyta atinankupaj pay kasqantapuni creenanku tiyan, payman qayllaykuy sumaj kasqantataj reparananku tiyan. Noqanchejtaj, Diosmanta yachakunankupaj yanapayta atinchej. ¿Imaynamantá? Ruwasqasninpi tʼukurichispa. Diospa ruwasqasninta qhawarispa chaypi sumajta tʼukurejtinkoqa Diospa yachayninta, atiyninta ima sutʼita reparanqanku (Rom. 1:19, 20). Diospa ruwasqasninpi sumajta tʼukurichinapajtaj librospi, revistaspi ima chaymanta parlaj yachaqanaswan yanapachikusunman. Sutʼincharinapaj, Jehovaman qayllaykuna nisqa libromanta 17 yachaqananta qhawarichisunman. Chaywanpis Diospa ruwasqasnenqa mana kay tapuykunaman kutichiwasunmanchu: ¿Imaraykutaj Dios ñakʼariy kananta saqen? ¿Imatataj Dios Jallpʼapaj munan? ¿Sapa ujtachu munakuwanchej?

⁸ Runasqa Bibliamanta yachakuspalla sumaj willaykunata, Diospa munayninta  ima entiendenqanku. Noqanchejtaj tapuykunasninkuman kutichiyta atinchej, ¡chaytaj may sumaj noqanchejpajqa! Chaywanpis sonqonkuman chayanapajqa Diospa ruwasqasninmanta yachachinanchej tiyan, astawanpis imaraykuchus paypi creenanku kasqanta reparachinanchej tiyan (2 Tim. 3:14). Chaypajtaj Jesús jina ruwasunman, payqa runasta tʼukurichinanpaj tapurej. ¿Imaynatá noqanchejpis kikinta ruwasunman?

9. ¿Imatá ruwananchej tiyan runa masinchejta yanapanapaj?

⁹ ¿Imaraykutaj Jesús jina runasman willashaspa tʼukurichinapaj jina tapuyta yachananchej tiyan? Kaypi tʼukuriy: doctorman rejtiyki sanoyapunaykipaj operasunanta nisojtin, ichá nisusqantaqa creewaj. Chaywanpis imachus nanasusqanta mana tapurisuspalla operasuyta munajtin, ¿imanawajtaj? Nichá paypi atienekuwajchu. Pay sumaj doctor kajtinpis tapurisunanpuni tiyan, imajtinchus imachus nanasusqanta yachaspalla imawanchus allinyapunaykita niyta atisonqa. Runa masinchejwanpis kikillantataj ruwananchej tiyan. Paykuna Reinomanta sumaj willaykunata japʼikunankupajqa sumajta tapuriyta yachana. Ajinallamanta imaynatachus yanapayta atisqanchejta yachasun.

10, 11. ¿Imataj kanqa Jesús jina yachachejtinchej?

¹⁰ Jesusqa sumaj tapuykunata ruway yachakojkunata rejsinapaj, imatachus yuyasqankumanta parlarinankupaj ima sumaj kasqanta yacharqa. Sutʼincharinapaj, yachachisqasninman llampʼu sonqo kanankuta yachachinanpaj, ñaupajtaqa tʼukurichinanpaj jina paykunata tapurerqa (Mar. 9:33). Diospa yuyaychaykunasninman jina Pedrota tʼukurichinanpajpis uj tapuyta ruwarqa, imatachus kutichinanta ajllananpaj jinataj taporqa (Mat. 17:24-26). Waj kutipitaj yachachisqasninpa sonqonkupi imachus kasqanta yachananpaj, imatachus yuyasqankuta kutichinankupaj jina tapurerqa (Mateo 16:13-17 leey). Jesusqa mana yachachillarqachu, manaqa tʼukurichinanpaj jina tapurej, chayta ruwaspataj runaspa sonqonkuman chayaj, sumaj willaykunaman jina kausanankupajtaj paykunata yanapaj.

¹¹ Jesús jina runasta tʼukurichinapaj sumaj tapuykunata ruwaspaqa: imaynatachus paykunata yanapayta atisqanchejta yachanchej, mana uyariyta munajkunata tʼukurichinchej chantapis llampʼu sonqo runasta yachakunankupaj yanapanchej. Kunanqa imaynatachus sumajta tapurinata kinsanejmanta qhawarina.

12-14. ¿Imaynatataj wawaykita yanapawaj sumaj willaykunata mana manchachikuspa willananpaj? Sutʼinchay.

¹² Ñaupaj kaj. ¿Imatá ruwawaj wawayki ujnin compañeronman Dios tukuy imata ruwasqanmanta mana sutʼinchayta atisqanta nisojtin? ¿Imaynatataj sumaj willaykunata mana manchachikuspa willananpaj yanapawaj? Wawaykita rimanaykimanta chayri imaynatachus sutʼinchananta qanlla ninaykimantaqa aswan allin kanman Jesús jina tʼukurichinaykipaj tapurinayki. ¿Imaynatá chayta ruwawaj?

¹³ Wawaykiwan Jehovaman qayllaykuna  nisqa libromanta 17 yachaqananta leeytawan, imachus aswan allin payman rijchʼasqanta tapuriwaj. Chantapis, imaraykuchus tukuy imata Dios ruwasqanpi creesqanta, munaynintapis imaraykuchus ruwayta munasqanta tapuriwaj (Rom. 12:2). Astawanpis, allin kanman mana qan jinapunichu yuyanan kasqanta sutʼincharinayki.

¹⁴ Compañeronwan parlashaspa kikillantataj ruwayta atisqanta niy. Nisunman wakin imasta compañeronman sutʼinchaytawan imatachus yuyasqanta tapurinman. Sutʼincharinapaj, Jehovaman qayllaykuna nisqa libromanta 17 yachaqananpi 11, 12 parrafosta leerichiytawan, kayta tapurinman: “Ñojtunchej tukuy imata japʼeqayta atisqan, ¿mayqen computadorallawanpis kikinchakunmanchu?”, nispa. Compañeron mana, nispa kutichejtintaj kaytawan tapurinman: “Yachayniyoj runas may sumaj computadorasta ruwasqanku, ñojtunchejwan mana kikinchakuyta atejtin, ¿imaynamantá ñojtunchej sapallanmanta rikhurinman karqa?”, nispa. Wawayki imapichus creesqanmanta mana manchachikuspa sutʼinchananpajqa qan compañeron jina kawaj. Wajkunata sumajta tʼukurichinanpaj jina tapuyta yachachejtiykeqa sumajta willayta atinanpaj yanapanki.

15. ¿Imaynatataj Diospi mana creejkunata tapuykunawan tʼukurichisunman?

¹⁵ Iskay kaj. Willayninchejpeqa Dios kasqanmanta iskayrayaj runaswan tinkunchejpuni. Sutʼincharinapaj, ichapis uj runa Diospi mana creesqanta niwasunman. Chayta niwasqanchejrayku, ¿manañachu paywan parlarisun? Mana, astawanqa maykʼajmantapachachus, imaraykutajchus ajinata yuyasqanta allillanmanta tapurisunman. Nisqanta uyariytawantaj, walejta tʼukurisqanta nisunman. Chantá  tukuy ima ruwasqapuni kasqanta sutʼinchaj publicacionesta sichus leeyta munasqanta tapurisunman. Chay runa munajtenqa, Jehovaman qayllaykuna nisqa librota rikuchisunman. Rikunchej jina, kʼachamanta tapurejtinchejqa sumaj willaykunata uyarinankupaj runasta yanapayta atisun.

16. ¿Imaraykutaj mana allinchu kanman Bibliamanta yachakoj libromanta chayri folletomanta leespalla kutichinan?

¹⁶ Kinsa kaj. Bibliamanta yachachishasqanchej runa, libropi chayri folletopi nisqanman jinalla kutichiwajtinchejqa mana ñaupariyta atenqachu. ¿Imaraykú? Imaraykuchus mana tʼukurispalla kutichiwasun chayqa mana sumaj saphichasqa sachʼa jina kanqa. Pipis payman churanakojtintaj mana sinchʼita sayayta atenqachu (Mat. 13:20, 21). Ajinapi mana rikukunanpajqa yachakushasqanmanta imatachus yuyasqanta tapurina, allinchus manachus rijchʼasqanta yachanapajtaj kallpachakuna. Astawanpis imaraykuchus ajinata yuyasqanta tapurina. Chantataj, Diospa Palabranpi nisqanman jina tʼukurinanpaj yanapana. Ajinamanta, imatachus yachakushasqan Diospa Palabranman jinapuni kasqanta reparayta atenqa (Heb. 5:14). Arí, sumajta tʼukurispa tapurisun chayqa yachakojkunaj creeyninku sinchʼiyananpaj yanapasun. Ajinamanta, paykunaman wajkuna churanakojtinku chayri mana allinta yuyaychajtinkupis sinchʼillatapuni sayanqanku (Col. 2:6-8). Chaywanpis, ¿imatawantaj ruwasunman willayninchejta sumajta juntʼanapaj?

17, 18. Willaypi kashaspa, ¿imaynatataj willashan chay hermanota yanapawaj?

¹⁷ Jesusqa yachachisqasninta Diosmanta willanankupaj iskaymanta iskay kacharqa (Mar. 6:7; Luc. 10:1). Aswan qhepamantaj, Pabloqa payta yanapajkunamanta nerqa: “Paykunaqa noqawan khuska mayta kallpakorqanku evangeliota willaspa”, nispa (Fili. 4:3). Kay tiempopi kikillantataj ruwakunanpaj kay 1953 watapi Reinomanta willajkunata wakichiyta qallarikorqa, nisunman unaytaña willajkuna mosojllaraj kajkunata yanapayta qallarerqanku.

¹⁸ Willaypi kashaspa, ¿imaynatataj willashan chay hermanota yanapawaj? (1 Corintios 3:6-9 leey.) Ima textostachus wasiyojman leepushasqanta Bibliaykipi maskʼay. Chantapis parlashasqankuta sumajta uyariy. Jinata ruwaspaqa imatapis mana kutichiyta atejtin yanapariyta atinki (Ecl. 4:12). Chaywanpis, wasiyojman sumajta sutʼinchashajtin ama pantachiychu. Chayta ruwajtiykeqa manaña sutʼinchayta atinmanchu, wasiyojtaj uma muyusqa qhepakunman. Wakin kuteqa ichapis yanaparinaykipaj parlarinayki kanqa. Chaywanpis imata niyta munanki chayqa pisillata parlariy, willashan chay hermano wasiyojwan parlarinallantapunitaj saqey.

19. ¿Imatataj ama qonqanachu, imaraykutaj?

¹⁹ ¿Imaynatataj uj wasimanta waj wasiman willaj rishaspa purajmanta yanapanakuwajchej? Imaynatachus runasman aswan sumajta willanaykichejmanta parlarispa. Chantapis chay cheqapi tiyakojkunapaj ama rimanachu, nitaj hermanospa pantaykunasnillankumanta parlanachu (Pro. 18:24). Astawanpis ama qonqanachu “tʼuru” vasos jinalla kasqanchejta, nisunman juchasapa runaslla. Jehovaqa may kʼacha kasqanrayku runasman willajta saqewanchej (2 Corintios 4:1, 7 leey). Chayrayku, chaymanta mayta agradecekusqanchejta rikuchinapajqa tukuy atisqanchejta evangeliota willaranapuni.