1, 2. ¿Imaraykutaj 45 Salmo noqanchejpaj may sumaj?

UJ ATIYNIYOJ rey, caballonpi lloqʼasqa llojsin cheqa kajrayku, jinallataj cheqan kajrayku maqanakunanpaj. Enemigosninta atipaytawantaj, kʼachita novianwan casarakun. Chantá wiñaypaj yuyarisqa, jatunchasqa ima. Kay 45 Salmopi chaykunamanta parlan.

² Arí, 45 Salmoqa chay imaspa tukukuynin sumaj kasqanta nin. Imastachus chaypi nisqantaj, noqanchejpajpis may sumaj, imajtinchus kay tiempo yanapawanchej, qhepamanpis yanapallawasuntaj. Chayrayku, chay salmota sumajta ukhuncharina.

3, 4. 1) ¿Ima “kʼacha” palabraswantaj sonqonchej juntʼa kashan, imaynataj chayrayku kashanchej? 2) ¿Imatataj uj reymanta willanchej? 3) ¿Imaraykutaj willasqanchej “sumaj qhelqajpa lapiznin jina”?

³ (Salmo 45:1 leey.) Salmista nerqa: “Kʼacha palabraswan sonqoyqa juntʼa kashan”, nispa. Chay kʼacha palabrasqa imatachus uj reymanta uyarisqan karqa. “Juntʼa kashan” rimayqa hebreo qallupi “tʼimpuy” niyta munan. Arí, chay salmistaj sonqonqa kusiymanta tʼimpurerqa, nisqantaj “sumaj qhelqajpa lapiznin jina” karqa.

 ⁴ Cristoj Kamachiyninmanta sumaj willaykunapis “kʼacha palabraswan” ninakun, sonqonchejtataj kusichin. Kay 1914 watamantapachataj aswan kʼacha karqa. Imajtinchus, chay watamantapacha manaña Diospa Reinon qhepaman sayarichisqa kananmantachu willana karqa, manaqa janaj pachapi sayarichisqaña kasqanmanta. Chay sumaj willaykunatataj “tukuynejpi” willashanchej, “tukuy runas yachanankupaj” (Mat. 24:14). ¿Sonqonchej juntʼachu kashan chay willaywan? ¿Tukuy sonqochu Reinomanta sumaj willaykunata willanchej? Noqanchejpis, salmista jinallataj uj reymanta willanchej: Jesucristo Diospa Reinonpi Reyña kasqanmanta. Chantapis, kamachejkunata, jinallataj tukuy runastapis chay reyman kʼumuykukunankuta ninchej (Sal. 2:1, 2, 4-12). Bibliawan yachachejtinchejtaj, willasqanchejqa “sumaj qhelqajpa lapiznin jina”.

5. 1) ¿Imaynasmantataj Jesús “aswan alajo” karqa? 2) ¿Imaynamantá may kʼacha parlaykunawan yachacherqa, imaynatataj pay jina ruwasunman?

⁵ (Salmo 45:2 leey.) Bibliaqa Jesús imayna rijchʼayniyojchus kasqanmanta pisillata parlan. Jinapis mana juchayoj kasqanrayku, “aswan alajo” kasqanta nisunman. Chaywanpis mana rijchʼayninraykullachu aswan alajo karqa, manaqa Jehovata ni imapi wasanchasqanrayku. Chantapis, Reinomanta willashaspa may kʼacha parlaykunawan yachacherqa (Luc. 4:22; Juan 7:46). Noqanchejrí, ¿pay jinallatajchu willanapaj kallpachakunchej, runaspa sonqonkumanpis chayanapaj? (Col. 4:6.)

6. ¿Imaynatataj Jesusta Jehová “wiñaypaj” bendicerqa?

⁶ Jesusqa Jehovaman tukuy imapi juntʼa sonqo karqa, chayraykutaj Jehovaqa willayninta bendicerqa, jatuncharqataj kausayninta runasrayku qosqanrayku. Apóstol Pablo kayta qhelqarqa: “[Jesusqa] runa kaspa, kʼumuykukorqa, paytaj kasukoj kaspa, wañuykama chayarqa. Jinataj [kurkupi] wañorqa. Chayrayku Diosqa payta maytapuni jatuncharqa tukuy kaj chhika patapi kanampaj, uj sutitataj qorqa, tukuy sutismanta aswan sumaj sutita. Ajinamanta Jesuspa sutimpi qonqorikonqanku janaj pachapi tukuy kajkuna, kay pachapi kajkuna, ukhu pachapi kajkunapis. Tukuy runastaj rimarenqanku Jesucristo Señor kasqanta, chaynejta Dios Tata jatunchasqa kanampaj”, nispa (Fili. 2:8-11). Arí, Jehovaqa Jesusta kausarichiytawan “wiñaypaj” bendicerqa, mana jaykʼaj wañoj cuerpota qospa (Rom. 6:9).

7. ¿Imaynamantataj Jehová Jesusta “kawsaqesni[n] ukhumanta” ajllakorqa?

⁷ (Salmo 45:6, 7 leey.) Jehovaqa Jesusta Reinonpi Rey kananpaj ajllarqa. ¿Imaraykú? Cheqa kajta mayta munakusqanrayku, Tatanta pisipaj qhawachej imastataj mayta chejnisqanrayku. Chayrayku Jehovaqa Jesusta “kawsaqesni[n] ukhumanta” “kusiywan juntʼachispa” ajllakorqa, nisunman Davidpa mirayninmanta kaj reyes ukhumanta, pikunachus judapi kamacherqanku. ¿Imaynamantá chayta ruwarqa? Jesusta Jehová kikin ajllakuspa, manataj Reyta jinallachu, manaqa Kuraj kaj Sacerdoteta jina (Sal. 2:2; Heb. 5:5, 6). Astawanpis, Jesusqa  mana aceitewanchu jawisqa karqa, manaqa espíritu santowan ajllasqa karqa. Kamachiynintaj mana kay pachamantachu, manaqa janaj pachamanta.

8. ¿Imaraykutaj Jesuspa kamachiynin cheqan kasqanta nisunman, imaraykutaj kamachina atiynin paypatapuni?

⁸ Jehovaqa Churinta 1914 watapi Reinonpi Rey kananpaj churarqa. Kamachisqantaj “cheqan kayman jina”, chayrayku kamachiyninpeqa cheqan kajtapuni ruwakonqa, nitaj pipis pisipajchu qhawasqa kanqa. Kamachina atiynintaj paypatapuni, imajtinchus Jehová kamachiyninta sayaricherqa. Chantapis kamachiynenqa “wiñaypa wiñaynintimpaj” kanqa. Chay jawa, Rey Jesucristoj kamachiyninpi Jehovata sirvispa umata oqharinchej.

9, 10. 1) ¿Maykʼajtaj Cristo espadanta chumpinman churakorqa, imapajtaj? 2) ¿Imatataj Cristo qhepaman espadanwan ruwanqa?

⁹ (Salmo 45:3 leey.) Jehovaqa ajllasqan Reyman kayta nin: “Espadaykita chumpiykiman churay”, nispa. Ajinamanta, atiyta qorqa mana Diospa kamachiyninpi kayta munajkunaj contranpi maqanakunanpaj, sutinpitaj juzgananpaj (Sal. 110:2). Cristoqa “may atiyniyoj” Rey, chayrayku mana pipis paytaqa atipanmanchu. Payqa 1914 watapi espadanta chumpinman churakorqa. ¿Imapaj? Satanasta, supaykunasninta ima atipaspa kay pachaman wijchʼumunanpaj (Apo. 12:7-9).

¹⁰ Ajinamanta Cristoqa Rey jina atipayta qallarerqa, chaywanpis manaraj tukuchanchu (Apo. 6:2). Imajtinchus Jehovaj sutinpi, Satanaspa pachanmanta tukuy imasninta chinkachinanraj tiyan, chantapis Satanasmanta, supaykunasninmantawan atiyninkuta qhechonqa. Ñaupajtaqa Jatun Babiloniata chinkachenqa, mayqenchus tukuy llulla religioneswan ninakun. Jehovaqa kay pachamanta kamachejkunanejta, chay sajra “phisu warmita” chinkachenqa (Apo. 17:16, 17). Chaymantataj, atipaj Rey Cristoqa Satanaspa pachanmanta tukuynin politicosta chinkachenqa. Arí, “ukhu pachaj angelnenqa” nisunman Cristo atipaspa llojsenqa. ¿Imaynamantá? Satanasta, supaykunasnintawan chinkay chinkay ukhuman wijchʼuykuspa (Apo. 9:1, 11; 20:1-3). Chaykunamantaqa 45 Salmopi parlan. Kunantaj chayta qhawarina.

11. ¿Imaynatá Cristo “cheqa kajrayku” maqanakun?

¹¹ (Salmo 45:4 leey.) Rey Jesucristoqa mana jallpʼasta chayri llajtasta japʼikapunanpajchu maqanakun, manaqa “cheqa kajrayku, llampʼu sonqo kajrayku, cheqan kajrayku ima”. Ñaupajtaqa imaynatachus “cheqa kajrayku” maqanakusqanmanta parlarina. ¿Imataj chay cheqa kaj? Jehovalla tukuy imamanta Kamachej kasqan. Satanasqa Jehovaj contranpi oqharikuspa chayta iskayrayacherqa. Chay kutimantapachataj, supaykuna, runaspis kikillantataj ruwanku. Chaywanpis, tiempoña kashan Diospa ajllasqan Rey Jesucristo, Jehovalla kamachej kasqanta rikuchinanpaj.

12. ¿Imaynamantataj Cristo “llampʼu sonqo kajrayku” maqanakun?

¹² Cristoqa “llampʼu sonqo kajrayku” maqanakullantaj. Payqa Diospa kʼata churin kaspapis, may llampʼu sonqo kasqanta rikucherqa, Tatanpa kamachiyninpitaj churakusqanta (Isa. 50:4, 5; Juan 5:19). Cristoj kamachiyninpi kajkunapis, kikillantataj llampʼu sonqowan Diospa kamachiyninpi churakunanku tiyan. Imajtinchus, chayta ruwajkunalla mosoj pachapi kausakuyta atenqanku (Zac. 14:16, 17).

13. ¿Imaynamantá Cristo “cheqan kajrayku” maqanakullantaj?

 ¹³ Chantapis, Cristoqa “cheqan kajrayku” maqanakullantaj. ¿Imataj chay cheqan kaj? Imatachus Dios cheqanpaj qhawasqan, nisunman imachus allin, imatajchus mana allin kasqan (Rom. 3:21; Deu. 32:4). Isaiasqa Rey Jesucristomanta kayta nerqa: “Uj rey kanqa cheqanta kamachej”, nispa (Isa. 32:1). Arí, Cristoqa “mosoj cielota, mosoj jallpʼatawan” rikhurichenqa, “maypichus cheqan kawsaylla kanqa” (2 Ped. 3:13). Chay mosoj pachapi kausakojkunataj, Jehovaj kamachiykunasninta kasukunanku kanqa (Isa. 11:1-5).

14. ¿Ima “jatuchaj” imastataj Jesucristo paña makinwan ruwanqa? (3 paginapi dibujota qhawariy.)

¹⁴ Reyqa caballonpi lloqʼasqa llojsispa chumpinpi uj espadata apan (Sal. 45:3). Tumpamantawantaj espadanta orqhospa paña makinwan japʼenqa. Salmistaqa Jesús paña makinwan “jatuchaj imasta” ruwananta nerqa (Sal. 45:4). Arí, Jesucristoqa Armagedonpi Diospa sutinpi juzgananpaj caballonpi lloqʼasqa llojsimojtin, “jatuchaj imasta” enemigosninpa contranpi ruwanqa. Mana yachanchejchu imaynatachus Satanaspa pachanta chinkachinantaqa. Chaywanpis, ruwasqasnenqa Diosta mana kasukojkunata, ajllasqan Reypa kamachiyninpi mana churakojkunatapis manchariywan uj jinayachenqa (Salmo 2:11, 12 leey). Jesuspis, kay pachaj tukukuyninmanta parlaspa kayta nerqa: “Runasqa uj jinayanqanku manchariywan, imachus kay pachaman jamunanmanta, imaraykuchus janaj pacha atiykuna chaypacha kharkatirenqanku. Chaypacha rikonqanku Runaj Churinta phuyupi, manchay atiywan, jatun kaynimpa kʼanchayninwan ima uraykʼamushajta”, nispa (Luc. 21:26, 27).

15, 16. ¿Pikunataj Cristowan khuska maqanakoj “janaj pachamanta” soldados kanqanku?

¹⁵ Apóstol Juanqa Cristo Rey jina “manchay atiywan, jatun kaynimpa kʼanchayninwan ima” jamunanmanta parlaspa, kayta nerqa: “Janaj pachata kicharisqata rikorqani. Uj runa yuraj caballopi lloqʼasqa kasharqa, sutintaj karqa Nisqanta Juntʼaj Kajtaj, Cheqa Kajtaj, imaraykuchus cheqanta kamachej, maqanakojtaj. Janaj pachamanta soldadostaj sumaj awasqa, yuraj llimphu linowan pʼachallisqas, paypa qhepanta yuraj caballospi risharqanku. Paypa siminmanta uj filo espada llojsimusharqa, chaywan nacionesta tʼojsinampaj. Payllataj fierro varawan kamachenqa, jinallataj paykunata saronqa Tukuy Atiyniyoj Diospa kʼajaj phiñakuynimpa uvas sarunampi”, nispa (Apo. 19:11, 14, 15).

¹⁶ ¿Pikunataj kanqanku “janaj pachamanta” soldados, pikunachus Cristowan maqanakuman renqanku chaykuna? Satanasta, supaykunasnintawan janaj pachamanta wijchʼumunanpaj Cristo ñaupaj kutirayku espadanta chumpiykukushajtenqa, “angelesnin” paywan khuska rerqanku (Apo. 12:7-9). Chayrayku, Armagedonpi Cristowan khuska maqanakoj “janaj pachamanta” soldadosqa angelesllataj kanankuta nisunman. Chaywanpis, ¿pikunapiwantaj chay soldadosmanta kanqanku? Jesusqa ajllasqa cristianosman kayta nerqa: “Atipajmanqa, tukukuykama munayniyta juntʼajman ima atiyta qosaj nacionesta kamachinampaj. Fierro varawan chaykunata kamachenqa, tʼuru mankasta jinataj phiriranqa, imaynatachus noqapis chay atiyta Tataymanta japʼerqani, ajinata”, nispa (Apo. 2:26, 27). Chayrayku ajllasqa cristianospis, pikunachus janaj pachapi tʼinkankuta japʼenqankuña, “janaj pachamanta” soldadosllamantataj kanqanku. Cristo nacionesta fierro varawan kamachispa “jatuchaj imasta” ruwashajtintaj paywan khuska kashanqanku.

17. 1) ¿Ima niytataj munan Jesucristo yuraj caballopi lloqʼasqa rishasqan? 2) ¿Imawantaj ninakun espada, flechana arco ima?

¹⁷ (Salmo 45:5 leey.) Rey Jesucristoqa yuraj caballopi lloqʼasqa rishan. Chaytaj niyta munan, maqanakuynin Diospa ñaupaqenpi llimphu, cheqan kasqanta ima (Apo. 6:2; 19:11). Chantapis mana espadallatachu apan, manaqa uj flechana arcotawan. Apocalipsis libropi nillanpuni: “Qhawashaspa, chaypi rikorqani uj yuraj caballota. Patampi lloqʼasqa kajtaj uj flechana arcota japʼisharqa. Payman uj pilluta qorqanku. Atipaspa llojserqa, atipanallampajtaj”, nispa. Espadawan flechana arcowanqa imasnejtachus Cristo enemigosninta chinkachenqa, chaykunawan ninakun.

18. ¿Imaynamantataj Reypa flechasnin filos kanqanku?

¹⁸ Salmistaqa Rey Jesucristomanta parlaspa kayta nerqa: “Llajtasqa chakisniykiman urmanku. Flechasniykeqa filos kanku, enemigosniykej sonqonkumantaj satʼiykukunku”, nispa. Chay wañuchinaku maqanakoqa Jallpʼantinpi kanqa. Jeremiaspis kayta nerqa: “Pikunatachus Tata Dios chay pʼunchaypi wañuchenqa, chaykunaqa kay pachaj ujnin kantumanta ujnin kantukama mastʼalla kanqanku”, nispa (Jer. 25:33). Chayllamantataj parlaspa, apóstol Juan nerqa: “Chantá uj angelta intipi sayashajta rikorqani. Chaytaj patata cieloj chawpinta aycha mikhu tukuy phawajkunaman sinchʼita qhaparerqa: Jamuychej, tantakamuychej Diospa jatun mikhunanman. Chaypi reykunaj aychasninta mikhunkichej, capitanespata, atiyniyojkunaj aychasninta, caballospa aychasninta, caballospi purejkunaj aychasninta, jinallataj tukuy runaspa aychasninta, kamachispata, mana kamachispata, juchʼuypata, jatumpata ima”, nispa (Apo. 19:17, 18).

19. ¿Imaynatataj Cristo “ñawpajman” rispa atipayta tukonqa?

¹⁹ Rey Jesucristoqa Satanaspa sajra pachanta chinkachisqantawan “ñawpajman” rillanqapuni (Sal. 45:4). Atipaytataj tukonqa Satanastawan supaykunasnintawan chinkay chinkay ukhuman wijchʼuykojtin, maypichus Waranqa Watasta kanqanku (Apo. 20:2, 3). Kuraj Supaywan angelesninwanqa wañusqapis kankuman jina, ni imata ruwayta atenqankuchu. Chayrayku, Jallpʼamanta runasta manaña pantachenqankuchu, astawanpis runasqa atipaj Reyninkuta tukuy imapi kasukuyta atenqanku. Chaywanpis, niraj Jallpʼa uj paraisoman tukushajtin, runaspaj waj jatun kusiy kanqa, maypichus Reywan ajllasqa cristianoswan khuska mayta kusikonqanku. Qhepan yachaqanapeqa imachus chay jatun kusiy kasqanmanta parlarisunchej.