1, 2. 1) ¿Pitataj Dios ñaupajta ruwarqa chantá imastataj paynejta ruwarqa? 2) ¿Imaynatá yachanchej ángeles maychus kanankuman churasqas kasqankuta?

RUWAWAJNINCHEJQA, tukuy imata maychus kajtapuni ruwan. Payqa, kʼata Churinta ñaupajta ruwarqa. Bibliataj chay Churi ‘Palabra’ kasqanta nin, Diospa sutinpi parlasqanrayku. Biblia paymanta parlaspa nin: “Qallariypeqa Palabraqa karqapuni. Chay Palabraqa Dioswan kasharqa”, nispa. Payqa may chhika watastaña cielopi Diosta sirvisharqa. Biblia paymanta nillanpuni: “Tukuy imasqa paynejta ruwasqa karqa, ruwasqa kajmantataj mana paywanqa mana imapis ruwasqachu karqa”, nispa. Diosqa Jesusta kay Jallpʼaman kachamorqa. Chaymanta kunankamataj iskay waranqa watas kurajña kashan. Jesusqa juntʼa runa karqa, tukuy sonqotaj Tatanpa munayninta ruwarqa (Juan 1:1-3, 14).

² Diospa Churin manaraj kay Jallpʼaman jamushaspa “Yanapaj Maestro jina karqa” (Pro. 8:30, NM). Paynejtataj Jehovaqa janaj pachapi waranqa waranqa angelesta ruwarqa (Col. 1:16). Chay angelesmanta Biblia nin: “Waranqa waranqastaj payta sirverqanku, millones millonestaj paypa ñawpaqempi sayarasharqanku”, nispa (Dan. 7:9, 10). Chay tukuynin ángeles maychus  kanankuman churasqas kasqankurayku, Bibliaqa Diospa “soldadosnin” kasqankuta nin (Sal. 103:21).

3. ¿Mashkha chʼaskastaj, planetastaj tiyan, chantá imayna churasqastaj kashanku?

³ Jehovaqa cielopi ashkha chʼaskasta, planetasta ima ruwarqa. Periódico El Universal nisqanman jina, mashkhachus chʼaskas kasqanmanta kunallanraj yachakusqanman jinaqa, ñaupajta yachayniyoj runas yachasqankumanta kinsa kutiswanrajsina aswan ashkha kasqan yachakun. Nisunman may chhika mana yupayta atina kasqankuta. Chay chʼaskasqa galaxiaspi maychus kananpi churasqas kashanku, sapa galaxiapitaj ashkha chʼaskas, planetas ima tiyan. Ashkha galaxiastaj jatuchaj qotuspi churasqas kashanku, chay jatuchaj qotustaj aswan aswan jatuchaj qotuspi.

4. ¿Imaynatá yachanchej Jehová llajtanpi tukuy imata maychus kananman churasqanta?

⁴ Jehovaqa, angelesta, chʼaskasta, planetasta ima, maychus kanankuman churan, chaytaj tʼukunapaj jinapuni (Isa. 40:26). Kay pachapi kamachisninwanpis kikillantataj ruwan. Chaytaj paykunata yanapan, Diosmanta japʼisqanku ruwayta sumajta juntʼanankupaj. Cheqamantapuni Jehovaqa llajtanta unaymantapachaña yanapashan, llajtanpi kajkuna cheqa sonqollapuni Payta sirvinankupaj. Kunantaj qhawarina imaschus rikuchisqanta Jehová llajtanwan kashasqanta, imaraykuchus Jehovaqa “tukuy imata maychus kananman churan” (1 Corintios 14:40 leey; 1 Cor. 14:33, NM).

5. ¿Imaraykutaj Diospa munaynin Jallpʼapi mana juntʼakorqachu?

⁵ Jehovaqa, ñaupa tatasninchejta ruwaytawan nerqa: “Miraychej, kay pachaman juntʼaychej; atiyniyojtaj kaychej, kamachispa mama qochapi kaj challwasta, tukuy pʼisqosta, jallpʼa patapi tukuy qhatatakojkunatawan”, nispa (Gén. 1:28). Runasqa pisimanta pisi miraspa kay Jallpʼaman juntʼananku karqa, Diospa munayninman jina uj paraisoman tukuchinankupaj. Adanwan Evawan mana kasukusqankuraykutaj Diospa munaynenqa mana juntʼakorqachu (Gén. 3:1-6). Watas pasasqanman jinataj Jehová “Diosqa rikorqa runaspa ashkha millay sajra ruwasqasninkuta, qhepamampis tukuy sajrallatapuni ruwayta yuyasqankuta”. “Ñawpaqempi[taj] kay pachaqa imaymana juchawan juntʼa karqa, chejninakuywan ima”. Chayraykutaj Jehovaqa, sajra runasta Jatun Parapi chinkacherqa (Gén. 6:5, 11-13, 17).

6, 7. 1) ¿Imaraykutaj Noé “Diospa ñawpaqempi khuyakuyta tarerqa”? (21 paginapi dibujota qhawariy.) 2) ¿Imapitaj tukorqanku Noej tiemponmanta sajra runas?

⁶ “Noeqa Diospa ñawpaqempi khuyakuyta tarerqa” cheqan runa kasqanrayku. “Sumaj runataj chay tiempo runa mita ukhupi” karqa. Pay “kʼatalla Diospa munayninta ruwarqa”, chayraykutaj Jehová kamacherqa arcata ruwananta (Gén. 6:8, 9, 14-16). Chay ruwasqan arcapitaj pay, familian, animales ima salvakorqanku. Noeqa “Diospa tukuy kamachisqanta ruwarqa”. Diospa nisqanman jina ruwasqanrayku, familianpa yanapayninwantaj chay arcata tukorqa. Animalesta arcaman qhatiykusqantawantaj, Jehová “arcaj punkunta wisqʼaykorqa” (Gén. 7:5, 16).

⁷ Arcaman mana yaykojkunatataj Jatun Parapi ‘chinkacherqa’. Noeta, familianta imallataj salvarqa. Chay Jatun Paraqa 2370 watapi Jesús niraj jamushajtin karqa (Gén. 7:23). Kay pachapi tukuy runasqa Noemanta, familianmanta ima miranchej. Arcaman mana yaykojkunarí wañorqanku, “cheqan kajta willaj Noeta” mana kasukusqankurayku (2 Ped. 2:5).

8. ¿Imayna wakichisqataj kasharqa Diospa llajtan, Sumaj Jallpʼaman yaykunankuta Dios kamachishajtin?

 ⁸ Jatun Paramanta 800 watas qhepaman, Jehovaqa israelitasta llajtan kanankupaj wakicherqa. Sumajtataj yachacherqa imaynatachus kausanankuta, imaynatachus Payta yupaychanankuta ima. Sutʼincharinapaj, chay llajtapeqa sacerdotes, levitas ima karqanku. Chantapis “Tinkukuna Toldo punkupi sirvej warmis[ta]” churarqa (Éxo. 38:8). Jehová llajtanta Sumaj Jallpʼaman yaykunankuta kamachejtintaj ashkhas manchachikorqanku, nitaj kasukorqankuchu. Chayrayku paykunaman nerqa: “Makiyta oqharispa qonayta nerqani, chay jallpʼamanqa mana yaykunkichejchu. Chaymanqa Jefonej churin Calebwan, Nunpa churin Josuellawan yaykonqanku”, nispa. Calebwan, Josuellawan yaykunankuta nerqa, imaraykuchus paykunalla Sumaj Jallpʼamanta allin imasta willarqanku (Núm. 14:30, 36-38). Aswan qhepamantaj Jehovaqa, Josueta llajtanta kamachinanpaj churarqa (Núm. 27:18-23). Manaraj Sumaj Jallpʼaman Josué Israel llajtata pusaykushajtintaj, Jehová payman nerqa: “Sumaj kallpasapa, waputaj kay. Ama manchachikuychu, nitaj qʼewakuychu. Noqa Señorniyki Tata Diosqa qanwampuni kasaj, maymanchá rinki, chaypi”, nispa (Jos. 1:9).

9. ¿Imaynatá Rahab Jehovata, llajtanta ima qhawarqa?

⁹ Jehovaqa, cheqamantapuni Josueta yanaparqa. Israelitasqa 1473 watapi Jesús niraj jamushajtin Jericó llajtaj qayllanpi jarasqa kasharqanku. Josuetaj chay llajtaman iskay wateqajkunata kacharqa. Paykunataj phisu warmi Rahabpa wasinman chayarqanku, chay warmitaj chay iskay runasta rey mana japʼichinanpaj wasi pataman pakaykorqa. ¿Imaraykutaj chayta ruwarqa? Rahabqa iskaynin wateqajkunaman nerqa: “Noqa yachani Tata Diosqa qankunaman kay jallpʼata qosqasuykichejta [...]. Noqayku uyariyku, Egiptomanta llojsimushajtiykichej, Diosqa Puka Qocha nisqata iskayman khallaspa [salvasusqaykichejta]. Yachallaykutaj qankuna [...]  chinkarparichisqaykichejta amorreospa iskaynin reyesninkuta”, nispa. Chantapis nillarqataj: “Señorniykichej Tata Diosqa janaj pachapipis, kay pachapipis Dios”, nispa (Jos. 2:9-11). Rahabqa Diosta sirviyta ajllasqanrayku, israelitasman ujchaykukusqanrayku ima, israelitas Jericó llajtata japʼikapushajtinku familianwan khuska salvakorqa (Jos. 6:25). Rahabqa creeyniyoj kasqanta, Jehovata, Diospa llajtanta ima jatunpaj qhawasqanta rikucherqa.

10. ¿Imatataj Jesús, judiospa religionninkuta kamachejkunaman nerqa, imaraykutaj?

¹⁰ Josué kamachishajtin, israelitasqa Canaanpa jallpʼasninta ujmanta uj japʼikaporqa. Qhepan, 1500 wataspitaj israelitasqa sapa kuti Diosta wasanchallarqankupuni, Jesús kay Jallpʼapiña kashajtintaj astawanraj chayta ruwarqanku. Chayraykutaj Jesús nerqa: “Jerusalén, profetasta wañuchej”, nispa (Mateo 23:37, 38 leey). Jehovaqa, judiospa religionninkuta kamachejkunata qhesacharqa mana kasukusqankurayku. Chayrayku Jesús paykunaman nerqa: “Diospa reinonqa qankunamanta qhechusqa kanqa, jinataj Diospa munayninta ruwajkunaman qosqa kanqa”, nispa (Mat. 21:43).

11, 12. 1) ¿Imataj rikuchin Jehová mosoj llajtata ajllakusqanta? 2) ¿Pikunataj chay mosoj llajtamanta karqanku?

¹¹ Jehovaqa, Jesús kay Jallpʼaman jamusqanmanta pisi tiemponman wasanchaj Israel llajtata qhesacharqa. Chaywanpis kay Jallpʼapi cheqa sonqo kamachisnin karqaraj, paykunaqa Jesucristota, yachachisqanta ima kasukorqanku. Chayraykutaj paykunata llajtan kanankupaj Pentecostés 33 watapi ajllakorqa, Jerusalenpi 120 Jesuspa yachachisqasnin tantasqa kashajtinku. Chay kuti “ujllata janaj pachamanta uj sonay uyarikorqa, sinchʼitapis wayramushanman jina. Chay sonayqa wasi ukhuman juntʼaykorqa”. Chantá “paykunaman nina larway qallus jina rakʼisqa rikhurerqa, tiyaykorqataj sapa ujpa patanman. Tukuyninkutaj Espíritu Santowan juntʼasqa karqanku. Jinapi waj parlaykunapi parlayta qallarerqanku, Espíritu Santo atiyta qosqanman jina” (Hech. 2:1-4). Chay tʼukuna imasqa, Jehová chay mosoj llajtata allinpaj qhawasqanta rikucherqa, imaraykuchus chay llajtapi kajkunaqa Jesuspa yachachisqasnin karqanku.

¹² Chay pʼunchayllapitaj “kinsa waranqa jina yapakorqanku creejkunaman”. Biblia nisqanman jinaqa Jehová “sapa pʼunchay [qotuchakuyman] yapasharqa, salvasqa kananku karqa, chaykunata” (Hech. 2:41, 47). Jesuspa yachachisqasninpa willayninkutaj tukuy runasman chayasharqa, “ajinamanta Diospa Palabran tukuynejpi uyarikorqa. Jinataj ashkhas Jerusalén llajtapi kajkuna creerqanku [...]. Jinallataj ashkha sacerdotespis” (Hech. 6:7). Chay mosoj llajtaj willayninta ashkha llampʼu sonqo runas uyarerqanku. Aswan qhepaman “mana judío kajkunamampis Diosqa” espíritu santonta qollarqataj (Hechos 10:44, 45 leey).

13. ¿Imatá Dios llajtanman kamacherqa?

¹³ Jehová, Jesuspa yachachisqasninman willamunankuta kamachisqanqa sutʼi karqa. Jesustaj kay Jallpʼapi kashaspa imaynatachus ruwanankuta rikucherqa. Bautizakuytawan “janaj pacha reinomanta” willayta qallarerqa (Mat. 4:17). Yachacherqataj pay jina ruwanankuta. Chayrayku nerqa: “Noqamanta testigos jina willankichej Jerusalenpi, tukuy Judea jallpʼapi, Samariapi, tukuy kay pachaj kʼuchusninkama”, nispa (Hech. 1:8). Ñaupa cristianosqa sutʼita yacharqanku imatachus Jesús ruwanankuta munasqanta. Uj kuti Pablowan Bernabewan Pisidiapi kaj Antioquía llajtapi kashaspa paykunawan chhoqonakoj judiosman  nerqanku: “Diospa Palabranta qankunamanraj willanayku karqa. Qankunatajrí qhesachankichej, nitaj wiñay kawsaytapis japʼikuyta munankichejchu. Chayrayku kunanqa mana judío kajkunaman ripusqayku. Señorqa kay jinata kamachiwarqayku: Mana judío kajkunapaj uj kʼanchay kanaykipaj churayki, tukuy kay pachapi runasman salvacionmanta willanaykipaj”, nispa (Hech. 13:14, 45-47). Jehovaj llajtanqa, Jesuspa tiemponmantapacha imatachus Jehová runasta salvananpaj ruwasqanmanta willashan.

14. ¿Imataj karqa Jerusalén llajtamanta, chantá pikunataj mana wañorqankuchu?

¹⁴ Ashkha judíos sumaj willaykunata mana uyarerqankuchu, nitaj kasukorqankuchu imatachus Jesús yachachisqasninman nisqantapis. Jesús yachachisqasninman nerqa: “Jerusalén llajtata soldadoswan muyurisqata rikuspa, yachaychej thuñikunan chayamusqanta. Chaypacha Judeapi kajkuna orqosman ayqechunku, Jerusalenpi kajkunataj llajtamanta jawaman llojsichunku. Jinallataj chajraspi kajkuna ama llajtaman kutirimuchunkuchu”, nispa (Luc. 21:20-22). Jesuspa nisqantaj juntʼakorqapuni. Judiosqa, romanospa contranpi oqharikorqanku. Cestio Galo, kamachiyninpi kaj Romamanta soldados imataj Jerusalén llajtata 66 watapi muyuykorqanku thuñinankupaj. Jinallapitaj riporqanku. Jesuspa yachachisqasnintaj Jerusalenmanta, Judeamanta ima ayqeyta aterqanku. Unay tiempomanta qhelqaj runa Eusebio nisqanman jina, ashkhas Jordán mayuta chimpaytawan, Pereapi kaj Pela llajtaman ayqerqanku. Kay 70 watapitaj Tito, kamachiyninpi kaj Romamanta soldadoswan kutimorqa, Jerusalenta thuñinankupaj. ¿Imataj karqa Diospa cheqa sonqo kamachisninmanta? Jesuspa kamachisqanta kasukusqankurayku, mana wañorqankuchu.

15. ¿Imaraykutaj Diospa Palabran tukuynejman chayashallarqapuni?

¹⁵ Ñaupa tiempomanta cristianos chʼampaykunapi rikukojtinku, qhatiykachasqas kajtinku, creeyninku pruebaman churasqa kajtinpis, “Diospa Palabran tukuynejman chayasha[llarqapuni]” (Hech. 11:19-21; 19:1, 19, 20). ¿Imaraykú tukuynejman chayashallarqapuni? Imaraykuchus Jehová llankʼayninkuta bendecisharqa (Pro. 10:22).

16. ¿Imatataj sapa uj cristiano creeyninta kallpachananpaj ruwanan karqa?

¹⁶ Sapa uj cristiano creeyninta kallpachanan karqa. Chayrayku may sumaj karqa Diosmanta Qhelqasqasta sapa pʼunchay ukhunchananku, tantakuykunaman rinanku, Diosmanta kusiywan willamunanku ima. Chay ruwaykunaqa qotuchakuyta kallpacharqa, ujcharqa ima, kay tiempopi jina. Arí, qotuchakuykunapeqa ancianos, siervos ministeriales ima karqa. Chay hermanos tukuy sonqo yanapayta munasqankuraykutaj, qotuchakuymanta hermanos paykunawan yanapachikoj kanku (Fili. 1:1; 1 Ped. 5:1-4). Chantapis qotuchakuykunata waturejkunaqa, hermanosta Pablo jina kallpachaj kanku (Hech. 15:36, 40, 41). Ñaupa tiempomanta qotuchakuykunaqa, kay tiempomanta qotuchakuykuna jina wakichisqaspuni karqanku. Chayraykutaj, ¡mayta Jehovaman agradecekunchej!

17. ¿Imamantataj qhepan yachaqanapi yachakusunchej?

¹⁷ Kay qhepa pʼunchaykunapi, Satanaspa pachan tukukuyninmanña chayashan, kay Jallpʼapi kaj Diospa llajtantaj ni jaykʼaj jina ñaupajman rishallanpuni. ¿Diospa llajtanwan khuskachu ñaupajman rishanchej? ¿Diosta yupaychaypi ñauparishanchejchu? Qhepan yachaqanapi chaykunamanta astawan yachakusunchej.