1, 2. ¿Imaynasmantataj Jehová kamachisninwan parlarqa?

JEHOVAQA unaymantapacha llajtanta tukuy imaymanamanta yuyaychan. Sutʼincharinapaj, wakin kamachisninman angelesnejta, mosqoykunanejta, mosqoypi jina rikuchiykunanejta ima kamachiykunata qorqa, imachus qhepaman kananmantapis willarqa (Núm. 7:89; Eze. 1:1; Dan. 2:19, 20). Wakin kutistaj runasta ajllarqa Paypa sutinpi kamachiykunasninta willananpaj. Imaynallamantapis Jehová kamachiykunasninta qojtin, chay kamachiykunata kasukojkunalla bendicionesta japʼerqanku.

² Kunanpis Jehovaqa, Biblianejta, espíritu santonnejta, qotuchakuynejta ima yuyaychawanchej (Hech. 9:31; 15:28, 29; 2 Tim. 3:16, 17). Yuyaychaynenqa sutʼi, wasanchejmantapis Jehová kayta nishawasunman jina: “Kaymin cheqan ñanqa; chayninta riy”, nispa (Isa. 30:21). Chantapis Jehovaqa Jesusta churarqa qotuchakuyta pusananpaj ‘allin kamachi yuyayniyojnejta’ (Mat. 24:45). Jehovaj yuyaychayninta jatunpaj qhawaspa, kasukuspa imalla, wiñay kausayta japʼisunchej (Heb. 5:9).

3. ¿Imataj Jehovaj yuyaychayninta mana kasukunapaj tanqawasunman? (Patapi kaj dibujota qhawariy.)

³ Satanasqa yachan Jehovaj yuyaychaykunasninta kasukuspa salvakuyta atisqanchejta, chayraykutaj mana kasukunapaj tanqayta munawanchej. Chantapis sonqonchej chʼauka kasqanrayku, Jehovata tukuy sonqo mana kasukuyta atillanchejchu (Jer. 17:9). Kay yachaqanapi qhawarisunchej Jehovaj parlayninta uyarinallapajpuni imaynatachus kallpachakunata. Chantapis  qhawarillasuntaj imapi rikukuspapis Diosmanta mana saqespa mañakuy, imaynatachus paywan allinpi kanallapajpuni yanapanawanchejta.

4. ¿Imaynatá Satanás runaspa yuyayninkuman llulla yachachiykunata juntʼachin?

⁴ Satanasqa runaspa yuyayninkuman llulla yachachiykunata juntʼachiyta munan (1 Juan 5:19 leey). Chay yachachiykunatataj periodicosnejta, librosnejta, revistasnejta, radionejta, telenejta, Internetnejta ima kay pachaman juntʼachin. Periódicos, revistas, radio, tele, Internet ima yanapawajtinchejpis wakin kutisqa Jehovaj chejnisqan imasta rikuchinku (Jer. 2:13). Sutʼincharinapaj, chaykunapeqa qharipura, warmipura casarakuy allillan kasqanta rikuchikun, chayraykutaj ashkha runas Dios chay millay imasta juchapaj qhawasqanta pisipaj qhawanku (1 Cor. 6:9, 10).

5. ¿Imaynatataj Satanaspa llulla yachachiyninmanta jarkʼakusunman?

⁵ ¿Imaynatá Jehovaj kamachiykunasninta munakojkuna Satanaspa llulla yachachiyninmanta jarkʼakusunman? ¿Imaynatá reparasunman imachus allin, imatajchus mana allinchu kasqanta? Diospa “nisqasni[n]ta kasuspa, llimphu kawsayniyoj ka[spa]” ima (Sal. 119:9). Diospa Palabranqa, mayqenchus Satanaspa llulla yachachiynin kasqanta reparanapaj yanapawanchej (Pro. 23:23). Jesús nerqa: “Runaqa kawsan[an tiyan] Diospa siminmanta tukuy llojsimoj palabraswan”, nispa (Mat. 4:4). Chayrayku Bibliaj yuyaychaykunasninman jina kausakuyta yachakunanchej tiyan. Sutʼincharinapaj, Potifarpa warmin Josewan puñuykuyta munashajtin, mana ima leypis khuchichakuy jucha kasqanta nerqachu, chaywanpis Joseqa yacharqa Potifarpa warminwan puñuykuy Diospa contranpi juchallikuy kasqanta. Chayraykutaj mana tʼukurillarqapischu chay warmiwan puñuykuyta (Génesis 39:7-9 leey). Joseqa, Potifarpa warmin sapa pʼunchay paywan puñuykuyta yuyaspa parlapayajtinpis mana uyarerqachu, astawanpis Jehovaj yuyaychasqanta kasukuyta ajllarqa. Chayrayku imachus allin, imatajchus mana allinchu kasqanta yachanapajqa Jehová yuyaychawasqanchejta kasukunanchej tiyan, Satanaspa llulla yachachiynintataj qhesachananchej tiyan.

6, 7. ¿Imaynatá jarkʼakusunman Satanaspa yuyaychaykunasninmanta?

⁶ Kay pacha llulla religionespa yachachiyninkumanta juntʼa kasqanrayku, wakin runasqa cheqa religionta mana tariyta atikusqanta yuyanku. Chaywanpis Jehovaj nisqanta uyarisun chayqa, pay yanapawasun cheqa kajta tarinapaj. Chayraykutaj ajllananchej tiyan pitachus uyariyta. Imaraykuchus iskay runaspa parlayninkuta ujllapi mana uyariyta atinchejchu. Imaynatachus ovejitas michejninkoj parlayninta rejsinku, ajinallatataj noqanchejpis Jesuspa parlayninta rejsinanchej tiyan, Jehová ovejitasninta michinanpaj Jesusta churasqanrayku (Juan 10:3-5 leey).

 ⁷ Jesús nerqa: “Imatachus uyarisqaykichejta allinta uyariychej”, nispa (Mar. 4:24, QB). Jehovaj yuyaychaykunasnin sutʼi, cheqan kasqanrayku imataj, sonqonchejta wakichinanchej tiyan uyarinanchejpaj. Chayta mana ruwaspaqa ichapis Satanaspa yuyaychayninta uyarishasunman, manataj Jehová Diospa yuyaychaynintachu. Ni jaykʼaj kay pachaj yuyayninman jina kausanachu, imaraykuchus kay pachaqa takiykunanejta, videosnejta, compañerosninchejnejta, yachachejkunanejta, yuyaychajkunanejta ima pantachiwasunman (Col. 2:8).

8. 1) ¿Imaynatá sonqonchej Satanaspa tojllasninpi urmachiwasunman? 2) ¿Imapí rikukusunman Diospa yuyaychasqanta mana kasukuspa?

⁸ Satanasqa yachan juchasapa runas kasqanchejta. Chayrayku tojllasninman urmachiyta munawajtinchej, Jehovaman cheqa sonqo kanapaj mayta kallpachakuna tiyan (Juan 8:44-47). Sonqonta sajra imaswan uj rato kusirichej runapi tʼukurinachej. Payqa mana yuyashaspalla imatachus mana ruwayta munarqachu chayta ruwarparin (Rom. 7:15). ¿Imaraykutaj chayta ruwarqa? Ichapis payqa pisimanta pisi manaña Jehovaj parlayninta uyarerqachu. Chayrí mana reparakorqachu sajra imasman urmashasqanta, manachayri yachashaspa chayta ruwarparerqa. Sutʼincharinapaj, ichapis payqa Diosmanta manaña mañakorqachu, willaymanpis, tantakuykunamanpis pisillataña rerqa. Tiempo pasasqanman jinataj sajra munayninwan atipachikorqa, yachashaspataj juchallikorqa. ¿Imatá ruwasunman chay runa jina mana urmanapaj? Imaynachus kashasqanchejta sumajta qhawarikuna, ima sajra ruwaypis sonqonchejpi kajtenqa usqhayllata orqhona. Jehovaj parlayninta sumajta uyarisunchej chayqa, Diosta wasanchajkunaj llulla yachachiykunasninkuta mana uyarisunchu (Pro. 11:9).

9. ¿Imaraykutaj sonqonchejmanta ima sajra ruwaytapis usqhayllata orqhonanchej tiyan?

⁹ Ima onqoyllatapis uj runapi doctores usqhayllata tarejtinku, chay runata onqoyninmanta sanoyachiyta atinku. Kikillantaj noqanchejwanpis, sonqonchejpi ima sajra ruwaytapis tarispa usqhayllata allinchasun chayqa, mana Satanaspa tojllasninpi munayninta ruwananchejpaj “watasqa” kasunchu (2 Tim. 2:26). Chayrayku yuyayninchej, munayninchej ima mana Jehovaj munayninman jinachu kajtin, usqhayllata Jehovaman kutirinanchej tiyan, yuyaychaykunasnintataj tukuy sonqo kasukunanchej tiyan (Isa. 44:22). Imallatapis mana allinta ajllaspaqa mayta ñakʼarisunman. Chayrayku sumajta qhawarikuna Satanaspa tojllanman mana urmanapaj.

10, 11. 1) ¿Imaynataj jatunchakoj runa? 2) ¿Imatá yachakunchej Coremanta, Datanmanta, Abirammanta ima?

¹⁰ Sonqonchej Jehovamanta karunchayta atiwasqanchejta mana qonqanachu. Sutʼincharinapaj, sonqonchejpi jatunchakuy, munapayay ima kajtenqa Jehovaj parlayninta mana uyariyta atillasunchu, llakiyllamantaj chayachiwasun. Jatunchakoj runaqa may kasqanta yuyakun. Chayraykutaj ichapis munaynillanta ruwanman, yuyanmantaj mana pipis imatachus ruwananta niyta atisqanta. Jatunchakusqanraykutaj ichapis yuyanman waj cristianospa, ancianospa, Diospa llajtanpa yuyaychayninta ima mana kasukunankuchu kasqanta. Ajinata jatunchakoj runaqa Diospa parlayninta mana uyariyta atillanchu.

¹¹ Israel llajta chʼin pampapi kashajtin Coré, Datán, Abiram ima Moisespa, Aaronpa contranpi oqharikorqanku. Jatunchakusqankuraykutaj Jehovata munayninkuman jinalla yupaychayta munarqanku. ¿Imatá ruwarqa Jehová? Paykunata, paykunawan kajkunata ima chinkarparicherqa (Núm. 26:8-10). ¿Imatá chaymanta yachakunchej? Jehovaj contranpi oqharikuy mana allinchu kasqanta. Biblia nin: “Runaykachaypa qhepantapacha urmanaqa chayamun”, nispa (Pro. 16:18; Isa. 13:11).

12, 13. 1) Munapayay mana allinman chayachiwasqanchejmanta sutʼinchay. 2) Sonqonchejpi munapayay saphichakunanta saqejtinchej, ¿ima llakiykunapi rikukusunman?

¹² Munapayayqa mana allinchu, imaraykuchus munapayaj runaqa Diosta mana kasukunchu, tukuy imatapis payllapaj japʼikapuyta munan. Siriaj reyninpa soldadosninpa kurajninku Naamanqa, lepra onqoymanta sanoyachisqa karqa, chayraykutaj profeta Eliseoman regalosta aparqa, Eliseotajrí mana japʼikorqachu. Kamachin Giezitajrí chay regalosta munapayasqanrayku jinata yuyarqa: “Tata Diospa sutinrayku jurani, usqhayta rispa taripamusaj; ichapis imallatapis qowanqa”, nispa. Giezeqa Eliseoj mana yachanallanta Naamanta taripaj rerqa. Taripaytawantaj llullerioswan mañakorqa “kinsa waranqa qolqeta, iskay mosoj pʼachastawan”. Chantapis profeta Eliseoman llullakorqa. ¿Imapitaj Giezi tukorqa chayta ruwasqanrayku? Naamanpa lepra onqoynin payman chimpaykorqa (2 Rey. 5:20-27).

¹³ Munapayayqa pisimanta pisi sonqonchejpi saphichakuyta qallarinman. Sonqonchejpi saphichakojta saqellajtinchejtaj, usqhayllata wiñaspa juchaman urmachiwasunman. Chaytataj sutʼita rikuchin Biblia Achanpa kausayninmanta parlaspa. Achán nerqa: “Jericopi chay tukuy imas ukhupi, uj kʼachitu babilonia mantata rikorqani, iskay pachaj qolqeta, khuskan kilo kuraj jina qoritawan. Chay imasta munapayasqayrayku japʼikaporqani”, nispa. Sajra munayninta qhesachananmantaqa, sajra munayninwan atipachikuspa chay imasta suwarqa, toldon uramantaj pakaykorqa. Suwakusqan yachakojtintaj, Josueqa Dios castigananta nerqa. Josué nisqanman jinapunitaj Achán, familian ima chay kikin pʼunchayllapitaj rumiswan chʼanqasqas wañorqanku (Jos. 7:11, 21, 24, 25). Tukuypis Achán jina munapayayman urmayta atisunman. Chayrayku sumajta qhawakunanchej tiyan mana ni imata munapayanapaj (Luc. 12:15). Wakin kutisqa ichá yuyayninchejman jamunman khuchichakuymanta yuyaykuna chayri waj sajra yuyaykuna. Chayrayku mana juchallikunapaj sumajta qhawarikunanchej tiyan imaspichus yuyayninchej kashasqanta (Santiago 1:14, 15 leey).

14. ¿Imatá ruwasunman sonqonchej jatunchakuyman, munapayayman ima aysashawasqanchejta reparaspa?

¹⁴ Jatunchakuyman, munapayayman urmaspaqa mayta ñakʼarisunman. Chayrayku chaykunaman urmaspa imaspichus rikukunanchejpi  tʼukureyqa, Jehovaj parlayninta aswan sumajta uyarinapaj yanapawasunchej (Deu. 32:29). Jehovaqa Biblianejta mana cheqan ñanllatachu purinanchejta niwanchej. Astawanpis cheqan ñanninta rispa kusiyta tarinanchejta, mana cheqan ñanninta rispataj imapichus rikukunanchejta ima niwanchej. Sonqonchej munapayayman, jatunchakuyman ima aysawajtinchej, allin kanman tapurikunanchej: “Sajra munayniywan atipachikusaj chay, ¿Diospa qayllallanpipunichu kasaj? ¿Familiayta kusichisajchu? ¿Noqapis kusisqallapunichu kasaj?”, nispa.

15. ¿Imatá Jesusmanta yachakusunman?

¹⁵ Jehovaqa allinninchejtapuni munan (Sal. 1:1-3). Chayraykutaj ashkha yuyaychaykunata maychus tiemponpi qowanchej (Hebreos 4:16 leey). Jesusqa juntʼa runa kaspapis Dioswan allinpi kananpaj mana saykʼuspa Diosmanta mañakorqa. Jehovataj tukuy imaymanamanta yanaparqa. Angelesta kacharqa kallpachananpaj, espíritu santonta qorqa, 12 apostolesninta ajllananpajpis yanaparqa. Janaj pachamantapachataj Jehová parlamorqa Churinwan sonqo juntʼasqa kashasqanta, yanapashasqanta ima rikuchinanpaj (Mat. 3:17; 17:5; Mar. 1:12, 13; Luc. 6:12, 13; Juan 12:28). Noqanchejpis tukuy sonqowan Jesús jina mana saykʼuspa Jehovamanta mañakunanchej tiyan (Sal. 62:7, 8; Heb. 5:7). Ajinamanta astawan payman qayllaykuyta atisun, payta jatunchanapaj jinataj kausakusun.

16. ¿Imatá ruwananchej tiyan Jehovaj nisqanta uyarinapaj?

¹⁶ Jehovaqa mana tanqawanchejchu yuyaychaykunasninta kasukunapaj. Chaywanpis Payta kasukunapajqa espíritu santonta mañakunanchej tiyan, imaraykuchus Jehovaqa espiritunta mana michʼakuspa qowasunchej (Lucas 11:10-13 leey). Biblia nin: “Allinta uyariychej ari”, nispa (Luc. 8:18). Sutʼincharinapaj khuchichakuymanta yuyaykunata atipanapaj Jehovaj espiritunta mañakojtinchejqa, mana allinchu kanman qʼala runasmanta fotosta, chayri khuchichakuymanta peliculasta qhawananchej. Astawanpis maypichus Diospa espiritun kashan chaypi kananchej tiyan, nisunman tantakuykunapi. Ashkha hermanosqa tantakuykunapi Diospa nisqanta uyariytawan sonqonkupi sajra yuyaykuna saphichakushasqanta reparaspa, chayta sonqonkumanta orqhonankupaj kallpachakorqanku. Ajinamanta imaymana llakiykunamanta jarkʼakorqanku (Sal. 73:12-17; 143:10).

17. ¿Imaraykutaj noqallanchejpi atienekuy mana allinchu?

¹⁷ Israel llajtamanta rey Davidpi tʼukurinachej. Payqa wayna kashaspa jatun karay Goliatta wañucherqa. Tiempo pasasqanman jinataj Davidqa, Israel llajtapi soldado, rey ima karqa. Israel llajtata jarkʼarqa, llajtaraykutaj allin imasta ajllarqa. Payllapi atienekusqanraykutaj sonqon chʼaukiyarqa, Betsabewantaj khuchichakorqa, Betsabej qosan Uriasta ima wañucherqa. Chay jinata juchallikusqanmantataj Jehová kʼamerqa, paytaj llampʼu sonqowan “contraykipi juchallikorqani” nerqa, ajinamantataj watejmanta Diospa amigon karqa (Sal. 51:4, 6, 10, 11).

18. ¿Imataj yanapawasunchej Jehovaj parlayninta uyarinallapajpuni?

¹⁸ Imatachus 1 Corintios 10:12 versiculopi yuyaychakusqanman jina ruwanallapuni, manataj noqallanchejpi atienekunachu. Biblia nisqanman jina mana imatapis sapallanchejmanta ruwayta atisqanchejrayku Jehovaj nisqanta, chayri Satanaspa nisqanta uyarisunman (Jer. 10:23). Chayraykutaj mana saykʼuspa Diosmanta mañakunallapuni, espiritunwantaj yanapachikunallapuni. Arí, ¡Jehovaj parlayninta sumajta uyarinallapuni!