Kay tapoyqa sumajpuni, astawanraj qosayki chayri warmiyki wañupun chayqa. Qanqa ichá watejmanta paraisopi kausarimoj qosaykiwan chayri warmiykiwan qhariwarmi jina kausakuyta suyakushanki. Uj hermano nin: “Warmiywan, noqawanqa khuskallapuni kayta munarqayku. Khuskataj wiñaypaj Diosta yupaychayta munarqayku. Warmiy wañupojtinpis, jinallatapuni yuyani”, nispa. ¿Wañusqas kausarimuspa casarakonqankuchu? Chaytaqa mana yachanchejchu.

Jesusqa, wañuymanta kausarimojkuna niña casarakunankuta nerqa. Chayta nispa ichá kay Jallpʼapi kausarimojkunamanta parlasharqa, chaytataj publicacionesninchejpi ashkha watastaña sutʼinchakorqa. Chayraykutaj kausarimojkunaqa niña casarakuyta atisqankuta nikorqa (Mat. 22:29, 30; Mar. 12:24, 25; Luc. 20:34-36). * ¿Jesús janaj pachapi kausarimuymantachu parlasharqa? Mana sutʼita yachanchejchu, chayrayku Jesuspa nisqanta qhawarinachej.

Jesusqa kausarimuymanta saduceoswan parlasharqa (Lucas 20:27-33 leey). Paykunaqa wañusqas kausarimunankupi mana creejchu kanku, Jesusta pantachiyta munaspataj kausarimuymanta, uj warmi wañoj qosanpa hermanonwan casarakuyta atisqanmanta ima taporqanku. * Jesustaj nerqa: “Kay pachamanta runasqa casarakunku, casarachisqataj kanku, chaywanpis pikunachus jamoj kausayta japʼinankupaj jina, wañuymantataj kausarimunankupaj jina kajkunaqa, mana casarakonqankuchu nitaj casarachisqachu kanqanku. Manañataj wañonqankuchu, imaraykuchus ángeles jina kanqanku, Diospa wawasnintaj kanqanku, kausarimuypa wawasnin kasqankurayku”, nispa (Luc. 20:34-36, NM).

Publicacionesninchejpi sutʼinchakoj Jesús chayta nishaspa kay Jallpʼapi kausarimuymanta parlashasqanta. Imaraykuchus: 1) Saduceosqa Jesusta tapushaspa, kay Jallpʼapi kausarimuy kananpisina yuyasharqanku, chayraykutaj ichapis Jesús, chaymanta parlaspallataj kuticherqa; 2) Jesusqa Abrahammanta, Isaacmanta, Jacobmanta ima parlaspa tukucharqa, paykunataj kay Jallpʼapi kausarimonqanku (Luc. 20:37, 38).

Chaywanpis Jesusqa, ichá janaj pachapaj kausarimuypi yuyasharqa. ¿Imaraykú chayta nisunman? Jesuspa nisqanta qhawarina.

‘Jamoj kausayta japʼinankupaj jina, wañuymantataj kausarimunankupaj jina kajkuna.’ Cheqa sonqo ajllasqa cristianosqa “Diospa reinonman yaykunapaj jina qhawasqa” kanku (2 Tes. 1:5, 11). Imaraykuchus Jesuspa wañuyninnejta cheqan runaspaj qhawasqa kanku. Nitaj juchasninkuta paganankupajchu wañunku, imaraykuchus Jehovaj ñaupaqenpi cheqan runaspajña qhawasqas kanku (Rom. 5:1, 18; 8:1). Sapa ujninkutaj kusikuyniyoj, santotaj kanku. Janaj pachapaj kausarimunankupaj jinataj  (Apo. 20:5, 6, NM). Kay Jallpʼapeqa “mana cheqanta ruwajkunapis” kausarimullanqankutaj (Hech. 24:15, NM). ¿Chay runas kausarimunankupaj jinachu kanku?

“Manañataj wañonqankuchu.” Jesusqa mana nerqachu: “Mana wañonqankuchu”, nispa. Astawanpis nerqa: “Manañataj wañonqankuchu”, nispa. Cheqa sonqo ajllasqa cristianosqa janaj pachapi kausanankupaj kausarichisqas kanku, ni jaykʼaj wañoj cuerpotataj japʼinku (1 Cor. 15:53, 54). Janaj pachapi kausanankupaj kausarimojkunaqa manaña wañonqankuchu. *

¿Imatá yachakunchej Jesuspa nisqanmanta? Ichapis janaj pachapi kausarimuymanta parlashasqanta. Janaj pachapaj kausarimojkunamanta parlasharqa chayqa, paykuna mana casarakunankuta, mana wañunankuta, wakin imaspi ángeles jina kasqankuta ima yachakunchej. Jesús janaj pachapi kausarimuymantapuni parlasharqa chayqa, kay tapuykunaman kutichina.

Ñaupaj kaj. Saduceos kay Jallpʼapi kausarimuy kananpi yuyashankuman karqa chay, ¿imaraykú Jesús janaj pachapi kausarimuymanta parlarqa? Jesusqa mana enemigosninman imapichus yuyasqankuman jinapunichu kutichej. Sutʼincharinapaj, Jesusqa judíos uj señalta ruwananta nejtinku nerqa: “Kay Templota urmachiychej, kinsa pʼunchay[pi]taj sayarichisaj”, nispa. Ichapis yacharqa templo sayarichisqa kananpi yuyanankuta. Chaywanpis “kikin cuerponta templo kasqanta nisharqa” (Juan 2:18-21). Jesusqa ichá chay runasman mana kutichiyta munarqachu, paykuna kausarimuypi mana creesqankurayku, nitaj angelespipis (Pro. 23:9; Mat. 7:6; Hech. 23:8). Astawanpis Jesusqa ichá yachachisqasninman janaj pachapi kausarimuymanta astawan sutʼinchayta munarqa. Imaraykuchus llampʼu sonqos karqanku, janaj pachapi kausakuytataj suyakusharqanku.

Iskay kaj. Jesús chay runaswan parlayta tukuchashaspa Abrahammanta, Isaacmanta, Jacobmanta ima parlarqa, paykunaqa kay Jallpʼapi kausarimonqanku. ¿Imaraykú Jesús paykunamanta parlarqa? (Mateo 22:31, 32 leey.) Jesusqa niraj paykunamanta parlashaspa nerqa: “Wañusqakunaj kawsarimuyninmantaqa, manachu leerqankichej Dios imatachus nisqanta?”, nispa. Chayta nispataj ichá kay Jallpʼapi kausarimuymanta parlayta qallarisharqa. Chantá Jesusqa, saduceos Moisespa qhelqasqasninta jatunpaj qhawasqankuta yachaspa, imatachus Jehová Moisesman lauraj sachʼaj qayllanpi nisqanmanta parlarqa. Chaywanqa rikuchisharqa wañusqas kay Jallpʼapi kausarimunankuta Jehová munasqanta, nisqan juntʼakunanta ima (Éxo. 3:1-6).

Kinsa kaj. Jesús janaj pachapi kausarimojkunamanta parlasharqa chay, ¿ninayanchu kay Jallpʼapi kausarimojkuna casarakunankuta? Bibliaqa kay tapuyman mana sutʼita kutichinchu. Chaywanpis Jesuspa nisqanqa mana rikuchinchu Jallpʼapi kausarimojkuna casarakunankutachus manachus.

Bibliaqa, qhariwarmi kausayta wañuy tʼaqasqanta nin. Chayrayku uj viudo chayri uj viuda watejmanta casarakuspaqa mana juchachakunchu. Imaraykuchus chaytaqa sapa uj ajllayta atin, nitaj qhawarananchejchu tiyan ujtawan casarakojkunata (Rom. 7:2, 3; 1 Cor. 7:39).

Imaynachus paraisopi kausay kananta ichá mayta tapukunchej. Chaywanpis mana allinchu kanman imatapis parlananchej mana allinta yachaspaqa, astawanpis imaynapunichus kausay kananta yachanapajqa paraisota suyakunanchej tiyan. Kasukojkuna paraisopi kusisqas kausakunankuta yachanchej, imaraykuchus Jehová tukuy kausajkunaman sajsachenqa ashkhata qospa (Sal. 145:16).